1, 2. (a) Ko e heigoa ati fiafia e tau tagata he Atua he vahā nei? (e) Maeke fēfē he tau matua Kerisiano mo e tau motua ke lagomatai a lautolu ne ikiiki ke maama e kakano he papatisoaga?

“KUA iloa e au a koe tali mai he fanau a koe,” tala age he motua ki a Christopher ne 12 e tau, “ti fiafia au ke logona kua manako a koe ke papatiso. Loto au ke hūhū ki a koe, ‘Ko e ha ne manako a koe ke taute e lakaaga ia?’” Ha ha he motua ia e tau kakano mitaki ati hūhū pihia a ia. Fiafia lahi a tautolu ke kitia e tokoafe he tau fuata ikiiki ne papatiso he tau tau takitaha. (Fakamatalaaga 12:1) Ka e manako e tau matua Kerisiano mo e tau motua he fakapotopotoaga ke iloa tonu kua taute e lautolu ne ikiiki e tau fifiliaga ni ha lautolu ti maama e kakano ke papatiso.

² He Tohi Tapu, kua fakaako e tautolu ko e tukuleleaga mo e papatisoaga ko e kamataaga he moui foou ma e Kerisiano. To  tamai he moui foou nei e tau monuina loga mai ia Iehova ka e pihia foki e tau totokoaga mai ia Satani. (Tau Fakatai 10:22; 1 Peteru 5:8) Kakano haia ne lata he tau matua Kerisiano ke fai magaaho ke fakaako e tau fanau ha lautolu ke he kakano mooli ke eke mo tutaki he Keriso. Ka nakai ha ha i ai e tau matua Kerisiano ha lautolu ne ikiiki, to lagomatai fiafia he tau motua he fakapotopotoaga a lautolu ke maama e kakano he tukuleleaga mo e papatisoaga. (Totou Luka 14:27-30.) Tuga ni he fai tauteuteaga ke mau katoa e gahua talaga, kua lata ia lautolu ne ikiiki ke fai tauteuteaga ato papatiso a lautolu ke maeke a lautolu ke fekafekau fakamooli ki a Iehova ke “hoko ke he fakaotiaga.” (Mataio 24:13) Ko e heigoa ka lagomatai a lautolu ne ikiiki ke fifili ke fekafekau tukulagi ki a Iehova? O mai la ke kitekite ki ai.

3. (a) Ko e heigoa he tau kupu ha Iesu mo Peteru ne fakaako ki a tautolu hagaao ke he aoga he papatisoaga? (Mataio 28:19, 20; 1 Peteru 3: 21) (e) Ko e heigoa e tau hūhū ka fakatutala a tautolu ki ai, ti ko e ha?

³ Ko koe kia ko e fuata tote ne manako ke papatiso? Ka pihia, ko e foliaga mitaki lahi mahaki a ia! Ko e lilifu lahi ke papatiso ke eke mo taha he Tau Fakamoli a Iehova. Ko e mena foki kua lata he Kerisiano ke taute, ti ko e lakaaga aoga lahi ma lautolu ke hao he matematekelea lahi. (Mataio 28:19, 20; 1 Peteru 3:21) Ka papatiso a koe, fakakite e koe kua mavehe a koe ke fekafekau tukulagi ki a Iehova. Manako mooli a koe ke tumau ke he maveheaga ia, ti ko e tau hūhū nā ka lagomatai a koe ke kitia kaeke kua mautali a koe ke papatiso: (1) Motua nakai e manamanatuaga haaku ke taute e fifiliaga? (2) Ko e manako ni kia haaku ke taute pihia? (3) Maama nakai e au e kakano ke tukulele ki a Iehova? Kia fakatutala a tautolu ke he tau hūhū ia.

4, 5. (a) Ko e ha e papatisoaga kua nakai lata ma lautolu ne momotua hokoia? (e) Ko e heigoa e kakano ma e Kerisiano ke motua e manamanatuaga?

⁴ Nakai talahau he Tohi Tapu ko lautolu ni hokoia kua lalahi po ke hokotia ke he tau tau pauaki he moui ka papatiso. Totou e tautolu he Tau Fakatai 20:11: “Kua maeke ke iloa ai e tama ke he hana tau mahani; po ke mitaki mo e hakohako hana tau mena ne eke.” Maeke foki he tama ke maama e kakano ke taute e mena hako mo e ke tukulele ke he Tufuga haana. Ti ko e papatisoaga ko e lakaaga aoga lahi mo e lata ma e fuata tote ne kua fakakite kua motua e manamanatuaga ati taute e tukuleleaga ki a Iehova.​—Tau Fakatai 20:7.

⁵ Ko e heigoa e kakano ke motua e manamanatuaga? Ko e motua e manamanatuaga kua nakai hagaao tumau ke he tau he moui he tagata po ke tupuaga he tino. Pehē e  Tohi Tapu ko e tau tagata ne motua e tau manamanatuaga kua fakamahani ha lautolu a “mahani he ako mua ai” ke mailoga e kehekeheaga he hako mo e hepe. (Heperu 5:14) Ko e tagata ne motua e manamanatuaga kua iloa e mena hako ti fifili ke he loto haana ke taute ai. Ti nakai mukamuka a ia ke fakaohooho ke taute e mena hepe. Nakai lata tumau a ia ke he ha tagata ke tala age ki a ia e mena hako ke taute. Kua tonu ke amanaki ke he fuata tote kua papatiso ke taute e mena hako pete he nakai ha ha i ai e tau matua haana po ke falu tagata lalahi.​—Fakatatai Filipi 2:12.

6, 7. (a) Fakamaama e tau paleko ne moua e Tanielu he nofo a ia i Papelonia. (e) Fakakite fēfē e Tanielu kua motua e manamanatuaga haana?

⁶ Maeke nakai he fuata tote ke fakakite mooli kua motua e manamanatuaga? Manamanatu ke he fifitakiaga ha Tanielu. Liga ko e fuata mui a ia he mogo ne uta a ia mai he tau matua haana ti fakafano ki Papelonia. Amanaki ni ti nofo a Tanielu he vahāloto he tau tagata ne nakai omaoma ke he tau poakiaga he Atua. Ka e onoono fakahokulo la tautolu ke he tuaga ha Tanielu. Kua taute a ia tuga ko e taha tagata kua uho lahi i Papelonia. Ko ia taha he tau fuata tokogahoa ne fifili fakamitaki ke fekafekau ke he patuiki. (Tanielu 1:3-5, 13) Tuga kua moua e Tanielu e tuaga mitaki i Papelonia ne liga to nakai moua e ia i Isaraela.

⁷ Fēfē e tali atu he fuata tote ko Tanielu? Fakaatā kia e ia e tau tagata i Papelonia ke hiki a ia po ke fakalolelole e tua haana? Nakai pihia! Pehē e Tohi Tapu ne “manatu e Tanielu nakai kelea ai a ia” he nofo i Papelonia, to maeke a ia ke fakamamao mai  he ha mena ne matutaki mo e tapuakiaga fakavai. (Tanielu 1:8) Fakakite mooli he mena ia kua motua e manamanatuaga!

8. Ko e heigoa kua maeke a koe ke fakaako mai he fifitakiaga ha Tanielu?

⁸ Ko e heigoa ka fakaako e koe mai he fifitakiaga ha Tanielu? Ko e fuata tote ne motua e manamanatuaga to mauokafua ke he tau taofiaga haana, pete ne tau tuaga uka. To nakai tuga e moko lā nasama a ia ne hiki e lanu, fakavē ni ke he takatakaiaga. Nakai mahani a ia tuga e kapitiga he Atua he Fale he Kautu ka e tuga e kapitiga he lalolagi he aoga. Ka e fakamooli tumau a ia pete foki ka kamatamata a ia.​—Totou Efeso 4:14, 15.

9, 10. (a) Aoga fēfē e fuata tote mai he manamanatu ke he puhala haana ke tali atu ke he tau kamatamata foou mogonei he tua? (e) Ko e heigoa e kakano he papatisoaga?

⁹ Mooli, nakai fai tagata ne mitaki katoatoa. Ko e tau fuata ikiiki ti pihia mo e tau tagata lalahi ne hehē he falu mogo. (Fakamatalaaga 7:20) Kaeke ke manako a koe ke papatiso, kua pulotu ke iloa e puhala ne eketaha a koe ke omaoma ke he tau poakiaga ha Iehova. Hūhū hifo, ‘Kua fai magaaho kia kua omaoma au ki a Iehova?’ Manamanatu ke he mogo fakahiku ne tali atu a koe ke he kamatamata he tua haau. Maeke nakai a koe ke fifili e mena hako ke taute? Tuga a Tanielu, kua fakamafana nakai he taha a koe ke fakaaoga e tau taleni haau he lalolagi a Satani? Ka fai mena pehēnei ne kamatamata ki a koe, maeke nakai a koe ke maama e finagalo ha Iehova?​—Efeso 5:17.

¹⁰ Ko e ha kua aoga lahi ke iloa e tau tali ke he tau hūhū fakatagata pihia? Ha ko e mena to lagomatai ai a koe ke kitia e hokulo lahi mahaki he papatisoaga. Fakakite he papatisoaga ke he falu kua taute e koe e maveheaga aoga ki a Iehova. Mavehe a koe to fakaalofa a koe ki a ia mo e fekafekau tukulagi ki a ia mo e loto katoa haau. (Mareko 12:30) Ko e tau tagata oti ne papatiso kua lata ke eketaha ke fakamooli tumau e maveheaga haana ki a Iehova.​—Totou Fakamatalaaga 5:4, 5.

11, 12. (a) Ko e tagata kua manamanatu ke papatiso kua lata ke iloa tonu e heigoa? (e) Ko e heigoa ka lagomatai a koe ke tumau e onoonoaga hako ke he fakatokaaga ha Iehova he papatisoaga?

¹¹ Pehē e Tohi Tapu ko e tau tagata oti ha Iehova, lautolu ne ikiiki foki to fekafekau mo e “loto” ki a Ia. (Salamo 110:3) Ti ko e tagata kua manako ke papatiso kua lata ke mailoga mooli ko e manako fakatagata haana ni anei. Liga lata ia koe ke kumikumi hifo fakamitaki e manako haau mua atu kaeke kua feaki hake a koe he kupu mooli.

¹² He lahi hake a koe, liga kitia e koe e tau tagata tokologa ne papatiso, liga falu ko e haau a tau kapitiga po ke tau lafu. Ka e fakaeneene kua nakai kamata a koe ke logona hifo kua lata a koe ke papatiso ha kua  hokotia a koe ke he tau tau pauaki he moui po ke ha kua papatiso e falu tagata foki. Maeke fēfē a koe ke iloa kua kitia e koe e papatisoaga ke he puhala ha Iehova? Fai magaaho ke manamanatu hagaao ke he kakano ne aoga lahi e papatisoaga. To moua e koe loga e tau kakano mitaki he vala tala nei mo e vala tala kahau.

13. Maeke fēfē a koe ke kitia ko e fifiliaga ke papatiso kua hake mai he loto haau?

¹³ Taha puhala ke kitia e koe kaeke ko e fifiliaga ke papatiso kua hake mai he loto haau ke kumikumi hifo ke he tau liogi haau. Laga fiha e liogi haau ki a Iehova? Talahau fakatonu fēfē e tau liogi haau? Ko e tau tali ke he tau hūhū ia kua liga fakakite e puhala kua tata haau a fakafetuiaga mo Iehova. (Salamo 25:4) Loga e magaaho ne tali e Iehova e tau liogi ha tautolu mai he Tohi Tapu. Ti ko e taha puhala foki ne maeke ke kitia kua manako mooli a koe ke fakatata lahi ki a Iehova mo e fekafekau ki a ia mai he loto haau ko e kumikumi hifo ke he fakaholoaga fakaako haau. (Iosua 1:8) Hūhū hifo: ‘Tumau fēfē haaku a fakaako ke he Tohi Tapu? Makai nakai au ke taute e tapuakiaga magafaoa haaku?’ Ko e tau tali ke he tau hūhū ia ka lagomatai a koe ke kitia ko e fifiliaga haau ke papatiso ko e manako ni haau.

14. Fakamaama e kehekeheaga he tukuleleaga mo e papatisoaga.

¹⁴ Falu ia lautolu ne ikiiki ne liga nakai iloa mooli e kehekeheaga he vahāloto he tukuleleaga mo e papatisoaga. Falu ne liga pehē kua fitā a lautolu he tukulele e tau momoui ha lautolu ki a Iehova ka e nakai la mautali ke papatiso. Ka e maeke mooli nakai e mena ia? Ko e tukuleleaga ko e liogi kua tala age ki a Iehova kua mavehe a koe ke fekafekau tukulagi ki a Ia. Ka papatiso a koe, fakakite e koe ke he falu kua fitā he tukulele a koe ki a Iehova. Fakamua to papatiso a koe, kua lata ia koe ke maama e kakano he tukuleleaga ke he Atua.

15. Ko e heigoa e kakano he tukuleleaga?

¹⁵ Ka tukulele e moui haau ki a Iehova, kua tala age a koe ki a ia kua pule a ia ki a koe mogonei. Kua mavehe a koe ko e fekafekau ki a ia to eke mo mena kua mua e aoga he moui haau. (Totou Mataio 16:24.) Ko e maveheaga pihia ke he Atua kua hokulo lahi mahaki! (Mataio 5:33) Ti fakakite fēfē e koe nukua iloa e koe na nakai pule a koe ki a koe ka ko Iehova mogonei kua pule ki a koe?​—Roma 14:8.

16, 17. (a) Fakamaama e kakano ke fakatikai e koe a koe. (e) Ko e heigoa ne talahau mooli he tagata kua taute e tukuleleaga?

¹⁶ Kia fakatutala la tautolu ke he fakataiaga. Manamanatu kua atu he kapitiga e motokā ko e mena fakaalofa ki a koe. Kua atu e ia ki a koe e levekiaga ti pehē: “Ko e motokā haau a nā.” Ka e pehē mogoia e kapitiga haau: “Nakai atu e au e tau kī. Ti ko au ka fakaholo e motokā, nakai ko koe.” To fēfē e logonaaga haau ke he mena fakaalofa nei? To fēfē e logonaaga haau ke he kapitiga haau ne atu e motokā?

¹⁷ Ka tukulele he taha e moui haana ki a Iehova, pehē a ia ke he Atua: “Kua foaki atu e au e moui haaku ki a koe. Na pule a koe ki a au.” Ha ha ia Iehova e tonuhia ke amanaki ke he tagata ke fakamooli e maveheaga haana. Ka e kua ka kamata e tagata ia ke liuliu  ki a Iehova he kapitiga fūfū mo e tagata taane po ke fifine ne nakai fekafekau ke he Atua? Ka e kua ka talia foki he tagata ia e gahua ne fakakaupā e magaaho ka fakaaoga he gahua he fonua po ke galo tumau a ia he tau feleveiaaga he fakapotopotoaga? Ne nakai tumau e fakamooliaga he tagata ia ke he maveheaga haana ki a Iehova. To tuga e nakai age he tau kī he motokā. Ka tukulele e tau momoui ha tautolu ki a Iehova, pehē a tautolu ki a Ia, “Kua pule a koe ke he moui haaku ka e nakai ko au.” To taute tumau e tautolu e tau mena ne manako a Iehova pete kua nakai manako a tautolu ke taute. Kia fifitaki a tautolu ki a Iesu, ne pehē: “Ko e mena nakai hifo mai au he lagi ke eke ni hoku loto, ka ko e finagalo hana ne fakafano mai au.”​—Ioane 6:38.

18, 19. (a) Fakamaama fēfē he tau talahauaga ha Rose mo Christopher ko e papatisoaga ko e lilifu kua takitaki ke he tau monuina? (e) Fēfē e logonaaga haau ke he lilifu he papatisoaga?

¹⁸ Maaliali ai, ko e papatisoaga ko e fifiliaga hokulo lahi. Ko e lilifu lahi ke tukulele ki a Iehova mo e ke papatiso. Ko mutolu ne ikiiki kua fakaalofa ki a Iehova mo e maama e kakano he tukuleleaga ke nakai fakauaua ke tukulele e tau momoui ha mutolu ke he Atua mo e papatiso ai. Nakai tokihala a lautolu ke he fifiliaga ha lautolu. Ko e fuata mui kua papatiso ne higoa ko Rose ne pehē: “Fakaalofa au ki a Iehova, ti nakai fai mena ne fiafia foki au he taute ka ke fekafekau ki a Ia. Mauokafua au ke he fifiliaga ne taute e au he moui haaku ke papatiso.”

¹⁹ Ka e kua a Christopher ne talahau he kamataaga he vala tala nei? Fēfē e logonaaga haana ke he fifiliaga haana ke papatiso he 12 e tau he moui? Pehē a ia kua fiafia lahi a ia ha kua taute e ia e fifiliaga pihia? Kamata a ia ke fekafekau ko e paionia tumau he 17 e tau, ti eke mo fekafekau lagomatai he 18 e tau. Fekafekau a ia mogonei he Peteli. Pehē a ia: “Ko e fifiliaga hako ke papatiso. Kua puke e moui haaku he gahua fiafia ki a Iehova mo e fakatokatokaaga haana.” Ka manako a koe ke papatiso, maeke fēfē a koe ke tauteute ke lata mo e mena ia? Ko e vala tala ka mui mai to tali e hūhū ia.