1, 2. (a) Fakamaama e kakano ko e lakaaga hokulo lahi e papatisoaga. (e) Ko e heigoa kua lata he tagata ke iloa tonu ato papatiso a ia, ti ko e ha?

KO KOE kia e fuata tote kua manako ke papatiso? Ka pihia, ko e lilifu mua ue atu anei ka moua e koe. He talahau he vala tala kua mole, ko e fifiliaga hokulo lahi e papatisoaga. Kua fakakite ke he falu kua tukulele a koe ki a Iehova, kakano ai kua mavehe a koe ki a ia to fekafekau tukulagi a koe ki a ia mo e taute he finagalo haana ko e mena ne mua atu e aoga ke he moui haau. Ha ko e maveheaga hokulo lahi mahaki anei ke he Atua, kua lata a koe ke papatiso kaeke kua motua e manamanatuaga haau ti ha ha ia koe e manako ke taute pihia, mo e maama e koe e kakano ke tukulele ke he Atua.

² Ka e liga nakai logona hifo e koe kua mautali a koe ke papatiso. Po ke tuga kua logona hifo e koe kua mautali a koe ka e manatu e tau matua haau kua lata a koe ke fakatali ato lahi hake ti lahi e iloaaga ke he moui. Ko e heigoa haau kua lata ke taute? Ua loto lolelole. Ka e fakaaoga e magaaho nei ke fakaholo  ki mua ke maeke ia koe ke nakai leva ti hoko ke he katoatoaaga ke papatiso. He tokaloto e mena ia, maeke a koe ke fakatoka e foliaga ke he tolu e faahi kehekehe: (1) haau a mauokafua, po ke tau taofiaga, (2) haau a tau mahani, mo e (3) haau a loto fakaaue.

3, 4. Ko e heigoa e fakaakoaga ka ako e lautolu ne ikiiki mai he fifitakiaga ha Timoteo?

³ Manamanatu ke he puhala ka tali e koe e tau hūhū nei: Ko e ha ne talitonu au na fai Atua? Ko e ha ne mauokafua au kua puhala mai he Atua e Tohi Tapu? Ko e ha kua omaoma au ke he tau poakiaga he Atua ka e nakai fifitaki ke he tuaga he tau mahani he lalolagi? Ko e tau hūhū nā ka lagomatai a koe ke muitua e fakatonuaga he aposetolo ko Paulo: “Kia kumikumi [“fakamooli,” NW] e mutolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:2) Ko e ha kua lata a koe ke taute e mena ia?

⁴ Ko e fifitakiaga ha Timoteo ka lagomatai a koe. Iloa mitaki e ia e tau Tohiaga Tapu ha kua fakaako he matua fifine mo e tupuna fifine haana a ia ke he tau Tohiaga Tapu. Pete ia, ne pehē a Paulo ki a Timoteo: “Kia tumau a koe ke he tau mena kua ako ai e koe, mo e iloa tonuhia e koe.” (2 Timoteo 3:14, 15) Ko e kupu “iloa” ne kakano “ke mauokafua mo e talitonu ke he mooli he taha mena.” Ti kua mauokafua a Timoteo kua maeke ke moua e kupu mooli he tau Tohiaga Tapu. Ne talia e ia, nakai ha kua tala age he matua fifine mo e tupuna fifine haana ke taute pihia, ka kua manamanatu a ia ke he mena ne fakaako ti kua iloa foki e ia.​—Totou Roma 12:1.

5, 6. Ko e ha kua aoga ma haau ke iloa ke fakaaoga e manamanatuaga iloilo he tote agaia a koe?

⁵ Ka e kua a koe? Liga kua leva tuai e iloa e koe e kupu mooli. Ka pihia, eke mo foliaga haau ke manamanatu hagaao ke he tau kakano he tau taofiaga haau. To lagomatai he mena ia a koe ke fakamalolō e tua haau mo e kalo kehe he taute e tau fifiliaga hepe ha ko e peehiaga atu taha, manamanatuaga he lalolagi, po ke tau logonaaga ni haau.

⁶ Ka fakaako a koe ke fakaaoga e ‘lata ke eke ai,’ po ke manamanatuaga iloilo ka e tote agaia a koe, to maeke ia koe ke tali e tau hūhū mai he tau atu haau tuga e: ‘Iloa mooli fēfē e koe na fai Atua? Ka fakaalofa e Atua ki a tautolu, ko e ha kua fakaatā e ia e tau mena kelea ke tutupu? Maeke fēfē mogoia ke ha ha i ai tumau e Atua?’ Ka mautauteute a koe, to nakai tupu hake e tau hūhū fakauaua pihia he manamanatuaga haau ka e to fakalagalaga a koe ke fakaako fakalahi e Tohi Tapu.

7-9. Fakamaama e fakaaogaaga he tau fufuta he initanete he puhala ke fakaako, “What Does the Bible Really Teach?,” ka lagomatai a koe ke fakamalolō e mauokafua haau.

⁷ Ko e fakaakoaga fakamatafeiga haau ka lagomatai a koe ke tali e tau hūhū, utakehe e tau fakauaua, mo e fakamalolō e mauokafua haau. (Gahua 17:11) Loga e tau tohi ha  tautolu ka lagomatai a koe ke taute e mena ia. Tokologa ne moua e lagomataiaga he fakaako e porosua The Origin of Life​—Five Questions Worth Asking mo e tohi Is There a Creator Who Cares About You? Tokologa foki e fuata ne fiafia mo e aoga mai he tau fufuta he “What Does the Bible Really Teach?” he jw.org. Maeke a koe ke moua ke he vagahau Peritania. Onoono ki lalo he BIBLE TEACHINGS. Ko e tau puhala takitaha ke fakaako he tau fufuta nei kua talaga ke lagomatai a koe ke fakamalolō e mauokafua haau hagaao ke he matakupu he Tohi Tapu.

⁸ Ko e tagata fakaako he Tohi Tapu a koe, ti liga fitā he iloa e koe e tau tali ke he falu hūhū ne moua he tau puhala ke fakaako. Ka e talitonu nakai a koe ke he tau tali haau? To takitaki he puhala ke fakaako a koe ke manamanatu fakamitaki ke he tau kupu tohi kehekehe ti fakamalolō mogoia ki a koe ke tohi hifo e tau kakano he tau taofiaga haau. To lagomatai ai ki a koe ke iloa e puhala ke fakamaama e tau taofiaga haau ke he falu. Ka maeke a koe ke moua he initanete e tau fufuta he “What Does the Bible Really Teach?” to fakaaoga ai e koe ke he kumikumi fakatagata haau ke lagomatai a koe ke fakamalolō e mauokafua haau.

⁹ Lata ia koe ke fakamooli ki a koe ko e kupu mooli anei. To lagomatai he mena ia a koe ke tauteute ma e papatisoaga. Taha e matakainaga fifine fuata mui ne pehē: “Fakamua to fifili au ke papatiso, ne fakaako e au e Tohi Tapu ti kitia ai ko e lotu mooli anei. He tau aho takitaha he moui au, kua malolō fakahaga e mauokafua haaku.”

10. Ko e ha kua mitaki ai ke amanaki ke he Kerisiano papatiso ke fakalautatai e tau mahani mo e tua haana?

¹⁰ Pehē e Tohi Tapu: “Ti pihia foki e tua, kaeke ke nakai ha i ai e tau gahua, ti mate ni a ia ha ko e tokotaha ni.” (Iakopo 2:17) Ka ha ha ia koe e mauokafua malolō, to fakakite ai e koe he tau mahani haau. To iloa e koe e mena ne talahau he Tohi Tapu ko e “tau mahani  mitaki mo e tau mahani Atua.”​—Totou 2 Peteru 3:11.

11. Fakamaama e talahauaga “tau mahani mitaki.”

¹¹ Ko e heigoa e “tau mahani mitaki”? Ka hakohako e tau puhala haau, kua meā e tau mahani haau. Ma e fakatai, manamanatu ke he ono e mahina kua mole. Ka kamatamata a koe ke taute taha mena hepe, manamanatu fakamitaki nakai a koe ke he mena kua hako mo e mena kua hepe? (Heperu 5:14) Manatu nakai e koe e tau magaaho pauaki ne nakai mahala a koe ke he kamatamata po ke peehiaga atu taha? He aoga, ko e fakafifitakiaga mitaki nakai a koe ke he falu? Fakatumau nakai e mahani fakamooli haau ki a Iehova, po ke lali a koe ke tuga e tau kapitiga he vahega ke nakai vaiga e lautolu a koe? (1 Peteru 4:3, 4) Mooli, nakai fai tagata ne mitaki katoatoa. He falu mogo, ko lautolu foki ne fekafekau ki a Iehova ke he loga e tau tau ne liga mā mo e uka ke fakamatala ke he falu. Ka tukulele e taha tagata ke he Atua to matalahi ke eke mo taha he Tau Fakamoli a Iehova, ti fakakite e ia e mena nei he mahani meā haana.

12. Ko e heigoa e falu he “tau mahani Atua,” ti kua lata ke fēfē e onoonoaga haau ki ai?

¹² Ko e heigoa e “tau mahani Atua”? Putoia ai e tau matagahua haau he fakapotopotoaga tuga e fano ke he tau feleveiaaga mo e gahua fakamatala. Ka e putoia foki e tau matagahua ne nakai kitia he falu, tuga e tau liogi ni haau tokotaha ki a Iehova mo e kumikumi fakatagata haau. Ko e tagata kua tukulele e moui ki a Iehova to nakai manatu kua mamafa e tau matagahua nei. To logona hifo a ia tuga e Patuiki ko Tavita ne pehē: “Haku Atua na e, kua fiafia au ke eke hāu a finagalo; ha i loto ia au hau a fakatufono.”​—Salamo 40:8.

13, 14. Ko e heigoa e tau foakiaga ka lagomatai a koe ke taute e “tau mahani Atua,” ti aoga fēfē e falu ia lautolu ne ikiiki mai he foakiaga nei?

¹³ Ke lagomatai a koe ke fakatoka e tau foliaga, ha ha ia mautolu e tohi Questions Young People Ask​—Answers That Work, Volume 2, ne toka ai e laupepa gahua he lau 308 mo e 309. He laupepa gahua, maeke a koe ke tohi hifo e tau tali haau ke he tau hūhū tuga e: “Talahau fakatonu fēfē e tau liogi haau, ti ko e heigoa ne fakakite ai hagaao ke he fakaalofa haau ki a Iehova?” “Ko e heigoa ne putoia he kumikumiaga fakatagata haau?” “Fano nakai a koe he gahua he fonua pete e nakai ō e tau matua haau?” Fai vala foki he laupepa gahua ke tohi hifo e tau foliaga haau kua manako a koe ke fakatoka ke lata mo e haau a tau liogi, kumikumi fakatagata, mo e gahua fakamatala.

¹⁴ Tokologa a lautolu ne ikiiki kua manamanatu ke papatiso ne kitia e uho lahi he laupepa gahua nei. Ko e fuata tote ne higoa ko Tilda ne pehē: “Fakaaoga e au e laupepa gahua ke fakatoka e tau foliaga. Ne hokotia au ke he tau foliaga takitaha, ti mautali au ke papatiso he tau hake.” Ko e fuata tote ne higoa ko Patrick ne kautū pihia foki. “Fitā he iloa e au e tau foliaga haaku,” he ui e ia, “ka ko e tohi hifo ai ne maeke au ke eketaha ke hokotia ki ai.”

15. Fakamaama e kakano kua lata e tukuleleaga mo fifiliaga fakatagata.

 ¹⁵ Taha he tau hūhū he laupepa gahua ko e: “To fekafekau nakai a koe ki a Iehova pete he nakai liu e tau matua mo e tau kapitiga haau ke taute pihia?” Ka tukulele e koe e moui haau ki a Iehova ti papatiso, to moua e koe e fakafetuiaga fakatagata mo e Atua. Ti ko e mena kua taute e koe ma Iehova kua nakai lata ke fakavē ke he tau matua haau po ke ha tagata. Ko e haau a tau mahani mitaki mo e tau mahani Atua ne fakakite na mauokafua a koe kua moua e koe e kupu mooli mo e manako ke muitua ke he tau tutūaga he Atua. To nakai leva ti hokotia a koe ke he katoatoaaga ke papatiso.

16, 17. (a) Ko e heigoa kua lata ke fakalagalaga e tagata ke eke mo Kerisiano? (e) Maeke fēfē e loto fakaaue ke he lukutoto ke fakamaama?

¹⁶ Taha aho, ko e tagata ne iloa mitaki e Fakatufono faka-Mose ne hūhū ki a Iesu: “Ko e poaki fe he fakatufono kua lahi?” Ne tali a Iesu: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa.” (Mataio 22:35-37) Ne fakamaama e Iesu ko e fakaalofa ki a Iehova kua lata ke eke mo  kakano ne papatiso e tagata ti eke mo Kerisiano. Taha he tau puhala mitaki lahi mahaki ke fakamalolō e fakaalofa haau ki a Iehova ke manamanatu fakamitaki hagaao ke he lukutoto, ko e mena fakaalofa mua ue atu he Atua ke he tau tagata. (Totou 2 Korinito 5:14, 15; 1 Ioane 4:9, 19.) Ka taute e koe e mena ia, to manako a koe ke fakakite e loto fakaaue ke he mena fakaalofa homo ue atu ia.

¹⁷ Ko e loto fakaaue haau ke he lukutoto ka fakamaama he puhala nei: “Manamanatu la kua tomo a koe ti fai tagata ne fakahao a koe. Fano ni kia a koe ki kaina, fakamōmō ti nimo e mena ne taute he tagata ia ma haau? Nakai! To logona tumau e koe e loto fakaaue ke he tagata ia ne fakahao e moui haau! He puhala pihia, kua lata a tautolu ke loto fakaaue lahi ki a Iehova mo Iesu ma e lukutoto. Foaki e tautolu e tau momoui ha tautolu ki a laua! Kua fakahao e laua a tautolu mai he agahala mo e mate. Ha ko e fakaalofa ha laua ma tautolu, ha ha ia tautolu e amaamanakiaga mogonei ke momoui tukulagi he Parataiso he lalolagi!

18, 19. (a) Ko e ha ne nakai matakutaku a koe ke pule a Iehova ki a koe? (e) Maeke fēfē he fekafekau ki a Iehova ke taute e moui haau ke mitaki?

¹⁸ Kua loto fakaaue nakai a koe ke he mena ne taute e Iehova ma haau? Ka pihia, ko e tukuleleaga mo e papatisoaga ko e mena hako ke taute. Ko e tukuleleaga haau ko e maveheaga ke he Atua to taute tukulagi e koe e finagalo haana. Lata nakai a koe ke matakutaku he taute e maveheaga pihia? Nakai! Manako a Iehova ke he mena mitaki lahi ma haau, mo e to palepale e ia a lautolu ne taute haana finagalo. (Heperu 11:6) Ka tukulele e koe e moui haau ke he Atua ti papatiso, to nakai kelea e moui haau ka e to mitaki fakahaga! Ko e matakainaga taane ne 24 e tau he moui ne papatiso ato hoko e fuata mui haana ne pehē, “Liga ha ha ia au e maamaaga hokulo ane mai motua au, ka ko e taute e fifiliaga ke tukulele au ki a Iehova kua puipui au mai he tau tutuliaga fakalalolagi.”

¹⁹ Manako a Iehova ke he mitaki lahi ma tautolu. Ka e lotokai mo e nakai manamanatu a Satani ki a koe. Nakai foaki e ia ha mena mitaki ki a koe ka muitua a koe ki a ia. Maeke fēfē a ia ke atu e taha mena ne nakai moua e ia? Nakai fai tala mitaki a ia, ti nakai fai amaamanakiaga a ia. Ko e vahā kelea i mua ni ka atu e ia ki a koe, ha ko e vahā ia ni kua moua e ia!​—Fakakiteaga 20:10.

20. Ko e heigoa he fuata tote ka taute ke maeke ke holo atu ke he tukuleleaga mo e papatisoaga? (Kikite foki e puha “Ke Lagomatai a Koe ke Holo ki Mua.”)

²⁰ Ke tukulele e moui haau ki a Iehova ko e fifiliaga mitaki lahi mahaki a ia ne kua taute e koe. Mautali nakai a koe ke taute e mena ia? Ka pihia, ua matakutaku ke taute e maveheaga ia. Ka logona hifo a koe kua nakaila mautali a koe, fakaaoga e tau lagomataiaga he vala tala nei ke matutaki ke holo ki mua. Ne tala age a Paulo ke he tau matakainaga i Filipi ke matutaki ke holo ki mua. (Filipi 3:16) Ka muitua a koe ke he fakatonuaga ia, to nakai leva ti manako a koe ke tukulele e moui haau ki a Iehova ti papatiso.