He 2012, ne moua he tau tagata keli kelekele e tau vala ikiiki he siā ne taute mai he kelekele ne kua 3,000 e tau. Fiafia lahi e tau tagata kumikumi. Ko e ha? Nakai ha ko e tau valavala he siā ka ko e tau matatohi ne tu ai.

He mogo ne mau e siā he tukutuku ai he tau tagata keli kelekele, ne maeke a lautolu ke talahau e tau matatohi Kanana he siā. Pehē ai: “Eshba’al Ben Beda,” ne kakano “Esipaala ko e tama taane ha Beda.” Ko e magaaho fakamua anei ne moua he tau tagata keli kelekele e higoa ne tohia he koloa i tuai.

Taha tagata ne higoa ko Esipaala ne totoku he Tohi Tapu. Ko ia taha he tau tama taane he Patuiki ko Saulo. (1 Nofoaga he Tau Patuiki 8:33; 9:39) Ko e Porofesa ko Yosef Garfinkel, ko e taha ia lautolu ne moua e siā ne pehē: “Fuluola ha ia ke mailoga kua haia e higoa Esipaala i loto he Tohi Tapu ti haia foki mogonei he fakamauaga tala tuai he tau tagata keli kelekele he magahala ne pule e Patuiki ko Tavita.” Ko e taha fakafifitakiaga anei ne lalago he tau tagata keli kelekele e Tohi Tapu!

He Tohi Tapu, ko e tama taane ha Saulo ko Esipaala ne ui foki ko Isoposeta. (2 Samuela 2:10) Ko e ha kua hukui he “poseta” e “paala”? Fakamaama he tau tagata kumikumi ko e tagata ne tohia e Ua Samuela ne liga kalo he fakaaoga e higoa Esipaala ha kua fakamanatu ke he tau Isaraela hagaao ki a Paala ko e atua he afā ne tapuaki he tau Kanana. Ka e, he tohi Fakamua he Nofoaga he Tau Patuiki he Tohi Tapu, na maeke agaia a tautolu ke moua e higoa Esipaala.