1. Ko e heigoa kua manako e tau matua ke iloa tonu ato hokotia e fanau ha lautolu ke he papatiso?

“KUA totou mahina he tala age tumau e au ki a Tete mo Mami na manako au ke papatiso, ti fa tutala a laua ki a au hagaao ke he manatu ia. Manako a laua ke iloa tonu kua mailoga e au e hokulo lahi he fifiliaga haaku. Ia Tesemo 31, 1934, ko e aho pauaki he moui haaku.” Pihia e fakamaamaaga ha Blossom Brandt ke he mena ne tupu he mogo ne fifili a ia ke papatiso. He vahā nei foki, manako e tau matua ke lagomatai e fanau ha laua ke taute e tau fifiliaga pulotu. Ka fakatali e tama ke papatiso ka e nakai fai kakano mitaki ke fakatali, to liga fakahagahaga kelea he mena nei e fakafetuiaga he tama mo Iehova. (Iakopo 4:17) Fakamua to papatiso e tama, manako e tau matua pulotu ke iloa tonu kua mautali e tama ke eke mo tutaki a Keriso.

2. (a) Ko e heigoa e lekua ne mailoga he falu leveki takaiaga? (e) Ko e heigoa ka fakatutala e tautolu he vala tala nei?

² Mailoga he falu leveki takaiaga kua tokologa a lautolu ne  fuata mui mo e 20 tumā e tau tau he moui ne nakaila papatiso, pete kua tutupu hake a lautolu he kupu mooli. Laulahi he tau magaaho, kua ō a lautolu nei ke he tau feleveiaaga, ō he gahua he fonua, mo e onoono ki a lautolu ni ko e Tau Fakamoli a Iehova. Ka e fai kakano agaia ne nakaila tukulele a lautolu ki a Iehova ti nakaila papatiso foki. He falu tuaga, ha kua manatu e tau matua kua nakaila lata e tau fanau ha lautolu ke papatiso. He vala tala nei, to fakatutala a tautolu ke he fā e manatu tupetupe ne taofi e falu matua he fakamafana e tau tama ke papatiso.

3. Ko e heigoa ne tupetupe e tau matua ha Blossom ki ai?

³ Ko e tau matua ha Blossom, ne talahau he paratafa fakamua ne tupetupe kua lahi mooli nakai a ia ke maama e kakano ke papatiso mo e hokulo lahi he papatiso. Iloa fēfē he tau matua kua mautali e tama ha laua ke tukulele a ia ki a Iehova?

4. Maeke fēfē he poakiaga ha Iesu ne moua ia Mataio 28:19, 20 ke lagomatai e tau matua he vahā nei?

⁴ Totou Mataio 28:19, 20. Nakai talahau he Tohi Tapu kua lata e tagata ke papatiso he tau tau pauaki. Ka e mitaki ma e tau matua ke manamanatu fakahokulo ke he kakano he mena nei ke taute tutaki. He vagahau Heleni, ko e talahauaga ke “eke . . . mo tutaki,” po ke taute tutaki, ne fakaaoga he Mataio 28:19 kua kakano ke fakaako e taha mo e foliaga ke lagomatai a ia ke eke mo tagata fakaako, po ke tutaki. Ko e tutaki ko e tagata ne iloa mo e maama e mena ne fakaako e Iesu ti manako ke omaoma ki a ia. He magaaho ne fanau mai e tau tama, kua lata e tau matua ke fakaako e tau tama mo e foliaga ke lagomatai a lautolu ke tukulele e tau momoui ki a Iehova ti eke mo tau tutaki a Keriso. Mooli, nakai lata e tau tama mukemuke ke papatiso. Ka e fakakite agaia he Tohi Tapu kua maeke foki he tau fanau ikiiki ke maama mo e fiafia ke he kupu mooli he Tohi Tapu.

5, 6. (a) Ko e talahauaga he Tohi Tapu hagaao ki a Timoteo ne takitaki a tautolu ke he fakahikuaga fe ke he papatiso haana? (e) Ko e heigoa e puhala mitaki lahi mahaki ma e tau matua pulotu ke lagomatai e tau fanau ha lautolu?

⁵ Ko Timoteo ko e tutaki ne fifili ke fekafekau ki a Iehova he tote agaia a ia. Pehē e aposetolo ko Paulo ne kamata a Timoteo ke fakaako e kupu mooli mai he Kupu he Atua “tali mai foki he vaha tote.” Nakai fekafekau e matua taane ha Timoteo ki a Iehova, ka e lagomatai he matua fifine mo e tupuna fifine ha Timoteo a ia ke fiafia ke he Kupu he Atua. Ko e fua, ne malolō lahi e tua haana. (2 Timoteo 1:5; 3:14, 15) He teitei po ke mole fakatote e 20 he tau he moui a Timoteo, ne hokotia a ia ke moua e tau kotofaaga pauaki he fakapotopotoaga.​—Gahua 16:1-3.

⁶ Kehekehe e tau tama. Nakai tatai e tau tau ne motua ai a lautolu. Falu tama ne maama e kupu mooli, taute e tau fifiliaga pulotu, ti manako ke papatiso he mogo ne ikiiki a lautolu. Falu ne liga nakai mautali ke papatiso ato lalahi hake a lautolu. Ko e tau matua pulotu ne nakai peehi e tau fanau ha lautolu ke papatiso. Ka e lagomatai e lautolu e tau tama takitaha ke holo ki mua he magaaho ni haana. Fiafia e tau matua ka fakagahua he tama e Tau Fakatai 27:11. (Totou.) Ka e lata a lautolu ke manatu ko e foliaga ha lautolu ke lagomatai e tau fanau ke eke mo tau tutaki. He tokaloto e mena ia, lata a lautolu ke hūhū hifo, ‘Lahi nakai e  mena ne iloa he tama haaku ke tukulele a ia ke he Atua ti papatiso?’

7. Lata kia he tagata ke iloa e tau vala tala oti he Tohi Tapu ato papatiso a ia? Fakamaama.

⁷ He fakaako he tau matua e tau fanau, kua lagomatai ai ke he tau fanau ke iloa mitaki e kupu mooli. To fakaohooho he iloilo nei e tau fanau ke tukulele ke he Atua. Ka e nakai kakano e mena ia kua lata e tama ke iloa oti e tau fakaakoaga he Tohi Tapu ato maeke a ia ke tukulele ti papatiso. Ko e tau tutaki oti a Keriso kua lata ke tumau e fakaako pete he mole e papatiso. (Totou Kolose 1:9, 10.) Ti lahi fēfē e mena kua lata he tagata ke iloa ato papatiso a ia?

8, 9. Ko e heigoa e mena ne tupu ke he leoleo i Filipi, ti ko e heigoa ka fakaako e tautolu mai he mena ne tupu ki a ia?

⁸ Ko e mena ne tupu ke he magafaoa he vahā kua mole ka lagomatai e tau matua he vahā nei. (Gahua 16:25-33) He tau 50, ne fano a Paulo ke he maaga ko Filipi he fenoga misionare haana ke uaaki. He haia a Paulo mo Sila i ai, ne vagahau fakakelea, tapaki, ti tuku a laua he fale puipui. He pō, ne tō e mafuike malolō lahi ti mahafagi e tau gutuhala oti he fale puipui. Ko e leoleo ne manatu kua fehola e tau tagata oti he fale puipui, ti manako a ia ke tamate a ia. Ka e taofi e Paulo a ia. Ne fakaako e Paulo mo Sila e leoleo mo e magafaoa haana ke he kupu mooli hagaao ki a Iesu. Talitonu a lautolu ke he tau mena ne iloa hagaao ki a Iesu ti mailoga e aoga lahi ke omaoma ki a ia. Ti papatiso agataha a lautolu. Ko e heigoa kua fakaako e tautolu mai he mena ne tupu?

⁹ Ko e leoleo ne liga ko e kautau Roma kua oti e fekafekauaga mo e gahua. Nakai iloa e ia e Kupu he Atua. Ke eke mo Kerisiano, lata a ia ke fakaako e tau kupu mooli mai he Tohi Tapu, maama e tau poakiaga ha Iehova ke he tau fekafekau haana, mo e manako ke omaoma ke he tau fakaakoaga ha Iesu. Ko e mena ne fakaako e ia he magaaho kū ne lagomatai a ia ke manako ke papatiso. Mooli, maeke a ia ke matutaki ke fakaako foki he mole e papatiso haana. Ti ka tala atu e tama ki a koe kua manako a ia ke papatiso ha kua fakaalofa a ia ki a Iehova ti manako ke omaoma ki a Ia, ko e heigoa haau ka taute? Maeke a koe ke fakaatā a ia ke tutala mo e tau motua ke maeke a lautolu ke fifili kaeke kua latatonu a ia ke papatiso. * (Kikite matahui tala.) Tuga ni e tau Kerisiano papatiso oti, to matutaki a ia ke fakaako foki hagaao ki a Iehova he moui katoa haana ke hoko atu ke he tukulagi.​—Roma 11:33, 34.

10, 11. (a) Ko e heigoa e manatu he falu matua? (e) Ko e heigoa ka puipui mooli e tama?

¹⁰ Falu matua ne manatu kua mua e mitaki ma e tama ha lautolu ke papatiso he mole e  moua e fakaakoaga mitaki mo e gahua mitaki. Liga mitaki e manatu he tau matua nei, ka kua lata a lautolu ke hūhū hifo: ‘To lagomatai nakai he mena nei e tama haaku ke kautū mooli? Tatai nakai e mena ia mo e mena ne fakaako mai he Tohi Tapu? Puhala fe kua manako a Iehova ke fakaaoga aki e tau momoui ha tautolu?’​—Totou Fakamatalaaga 12:1.

¹¹ Aoga ke manatu ko e lalolagi nei mo e tau mena i ai ne totoko ke he tau mena ne manako mo e manatu a Iehova ki ai. (Iakopo 4:7, 8; 1 Ioane 2:15-17; 5:19) Ko e fakafetuiaga tata mo Iehova ko e puipuiaga mitaki lahi mahaki ke maeke he tama ke totoko a Satani, lalolagi nei, mo e manamanatuaga kelea he lalolagi. Ka tuku fakamua he tau matua e fakaakoaga mo e gahua mitaki he moui, to liga talitonu e tama ko e tau mena he lalolagi kua mua atu e aoga ke he fakafetuiaga mo Iehova. Hagahaga kelea e mena nei. Ha ko e tau matua fakahele, manako mooli nakai a mutolu ke he lalolagi nei ke fakaako ke he tama haau e mena kua manatu to fakafiafia aki a ia? Ko e puhala ni ke kautū mo e moua e fiafia mooli ke tuku fakamua a Iehova he tau momoui ha tautolu.​—Totou Salamo 1:2, 3.

12. Ko e ha e falu matua ne logona hifo kua mitaki ma e tama ke fakatali ato papatiso?

¹² Taha e matua fifine ne fakamaama e kakano ne nakai manako a ia ke papatiso e tama fifine haana. Pehē a ia, “Fuafua kelea au ke talahau ko e matapatu kakano ko e fakatokaaga ke tuku ki tua.” Tuga e matakainaga fifine ia, falu matua ne logona hifo kua mitaki ma e tama ha lautolu ke fakatali ato motua to papatiso neke taute e tau hehē goagoa. (Kenese 8:21; Tau Fakatai 22:15) Ko e tau matua pihia ne logona hifo ka nakai papatiso e tama to nakai tuku a ia ki tua. Ka ko e heigoa ne hepe e manatu nei?​—Iakopo 1:22.

13. Ka nakai papatiso e tagata, kakano kia e mena nei kua nakai fai fakalagoaga a ia ki a Iehova? Fakamaama.

¹³ Mooli, nakai manako e tau matua ke he  tama ke papatiso ato mautali a ia ke tukulele e moui haana ki a Iehova. Ka ko e hehē ke manatu kua nakai fai fakalagoaga e tama ki a Iehova ato papatiso a ia. Kua fai fakalagoaga e tama ke he Atua ka iloa e ia e talahauaga ha Iehova ke he mena hako mo e hepe. (Totou Iakopo 4:17.) Ko e tau matua pulotu ne nakai fakalolelole e tama ke papatiso. Pete he tote agaia e tama, fakaako he tau matua a ia ke fiafia ke he mena ne talahau e Iehova kua hako mo e vihiatia e mena ne talahau e Ia kua hepe, tuga ne taute e laua. (Luka 6:40) Ko e fakaalofa he tama ki a Iehova to puipui a ia he taute e agahala kelea ue atu, ha kua manako a ia ke taute e mena ne talahau e Iehova kua hako.​—Isaia 35:8.

14. Maeke fēfē e tau motua ke lalago e mena ne taute he tau matua?

¹⁴ Maeke e tau motua ke lalago e mena ne taute he tau matua he atihake ka tutala a lautolu hagaao ke he tau foliaga he fekafekauaga ha Iehova. Taha e matakainaga fifine ne manatu kua tutala e Matakainaga ko Russell ki a ia he mogo ne ono e tau haana. Pehē a ia, “Ne 15 e minuti haana mo au he fakatutala ke he tau foliaga fakaagaaga haaku.” Ko e heigoa e fua? Fakamui, ne eke e matakainaga fifine ia mo paionia, ti paionia a ia ke molea 70 e tau! Maaliali ai, ko e tau kupu atihake mo e fakamafana ka lauia e moui katoa he tagata. (Tau Fakatai 25:11) Maeke foki e tau motua ke uiina e tau matua mo e tau fanau ke lagomatai ke he tau matagahua he Fale he Kautu. Maeke a lautolu ke ole ke he tau fanau ke taute e tau mena ne felauaki mo e tau tau he moui mo e tau lotomatala ha lautolu.

15. Maeke fēfē e falu he fakapotopotoaga ke lagomatai a lautolu ne fuata?

¹⁵ Maeke fēfē e falu he fakapotopotoaga ke lagomatai? He fakakite e fiafia fakatagata kua latatonu ki a lautolu e tau fuata ikiiki. Ma e fakatai, maeke a koe ke mailoga e tau tutūaga kua fakatata lahi e tau fuata ikiiki ki a Iehova. Mitaki nakai e tali he tama he  feleveiaaga, po ke fai vala nakai a ia he fakaholoaga he feleveiaaga he faahi tapu? Fakamatala nakai a ia ke he taha tama he aoga, po ke taute e ia e mena hako he mogo ne kamatamata a ia ke taute e mena hepe? Ka pihia, mafiti ke tala age kua mitaki e mena ne taute e ia! Eke mo foliaga ha tautolu ke tutala ki a lautolu ne ikiiki ato kamata mo e ka hili e tau feleveiaaga. Ka taute pihia e tautolu, to logona hifo he tau fanau kua fai vala a lautolu he “fakapotopotoaga lahi.”​—Salamo 35:18.

16, 17. (a) Ko e ha kua aoga ma e tau fanau ke papatiso? (e) Ko e heigoa e fiafia ka moua he tau matua Kerisiano? (Kikite fakatino he kamataaga.)

¹⁶ Taha he tau kotofaaga mitaki lahi he tau matua ko e fakaako e tau tama ha lautolu ke fakaalofa ki a Iehova. (Salamo 127:3; Efeso 6:4) He motu ha Isaraela, ne tukulele e tau fanau ki a Iehova he magaaho ne fanau a lautolu. Ka e nakai pihia e tau fanau ha tautolu. Ha kua fakaalofa e tau matua ki a Iehova mo e fiafia ke he kupu mooli, nakai kakano e mena ia to pihia foki e tau fanau. Mai he aho ne fanau e tama, kua lata e tau matua ke moua e foliaga ke lagomatai a ia ke eke mo tutaki, ke tukulele ke he Atua ti papatiso. Ko e heigoa ka mua atu e aoga? Ko e tukulele, papatiso, mo e fekafekau fakamooli he tagata ki a Iehova ka taute a ia ke hao he matematekelea lahi.​—Mataio 24:13.

¹⁷ He manako a Blossom Brandt ke papatiso, manako e tau matua haana ke iloa tonu kua mautali a ia. He talitonu a laua kua mautali a ia, ne lalago e laua e fifiliaga haana. Fakamaama e Blossom e mena ne taute he matua taane haana he pō ato papatiso a ia: “Pehē a ia ki a mautolu ke fakatokotui, ti liogi a ia. Tala age a ia ki a Iehova kua fiafia lahi a ia ke he fifiliaga he tama fifine tote haana ke tukulele e moui haana ki a Ia.” He molea ai 60 e tau, pehē a Blossom: “Mauokafua a koe he tau tau loga ka mui mai, to nakai nimo e au e pō ia!” Tau matua, kia moua foki e mutolu e fiafia mo e makona ka kitia e mutolu e tau fanau kua tukulele ti eke mo tau fekafekau papatiso ha Iehova.