1. Ko e ha ne ole a Iesu ki a Iehova ke leveki e tau tutaki haana?

KO E pō fakahiku he moui ha Iesu, ne manamanatu a ia ke he tau paleko ka fehagai mo e tau tutaki haana. Ha kua fakaalofa a Iesu ke he tau tutaki haana, ole a ia ke he Matua haana ke ‘leveki a lautolu mai ia ia ne mahani kelea.’ (Ioane 17:14, 15) Iloa e Iesu to nakai leva ti liu a ia ke he lagi, to matutaki a Satani ko e Tiapolo ke tau atu ke he ha tagata kua manako ke fekafekau ki a Iehova. Maaliali ai, lata e tau tagata ha Iehova ke puipui.

2. Ko e ha kua talitonu a tautolu to tali e Iehova e tau liogi ha tautolu?

² Tali e Iehova e liogi ha Iesu ha kua fakaalofa a Ia ke he Tama Haana. Ka eketaha a tautolu ke fakafiafia a Iehova to fakaalofa foki a ia ki a tautolu, mo e to tali e ia e tau liogi ha tautolu ma e lagomatai mo e puipuiaga. Ha ko Iehova ko e Ulu he magafaoa ne fakaalofa, to matutaki a ia ke leveki fakamitaki e tau fanau haana. Ko e higoa haana kua uho lahi!

3. Ko e ha kua lata a tautolu ke moua e puipuiaga ha Iehova mogonei?

³ Mua atu e manako ha tautolu mogonei ke he puipuiaga ha Iehova. Ha kua liti hifo a Satani mai he lagi, “kua ita lahi.” (Fakakite. 12:12) Kua fakaohooho e ia e falu ne favale ki a tautolu ke talitonu kua taute e lautolu e “poa ke he Atua.” (Ioane 16:2) Ko e falu ne nakai talitonu ke he Atua ne favale ki a tautolu ha kua kehe a tautolu mai he tau tagata he lalolagi. Pete ia, kua maeke a tautolu ke mauokafua. Ko e ha? Ha kua pehē e Kupu he Atua: “Ka e fakamoli e Iki, ko ia kua fakatumau a mutolu, mo e leveki a mutolu mai ia ia ne kelea.” (2 Tesa. 3:3) Puipui fēfē e Iehova a tautolu? Kia fakatutala ke he ua e puhala.

4. Ia Efeso 6:13-17, ko e heigoa kua foaki mai e Iehova ke puipui aki a tautolu?

⁴ Foaki mai e Iehova e tapulu tau ke puipui a tautolu he tau totokoaga ha Satani. (Totou Efeso 6:13-17.) Maō mo e aoga e tapulu tau fakaagaaga nei! To puipui ni a tautolu ka tui e tau vala takitaha he tapulu tau, mo e fakatumau ke tui ai. Ko e heigoa ne hukui he tau vala takitaha? To fakatutala a tautolu ki ai.

5. Ko e heigoa e pipi he kupu mooli, ti ko e ha kua lata a tautolu ke tui ai?

⁵ Ko e pipi he kupu mooli ko e tau kupu mooli he Tohi Tapu. Ko e ha kua lata ke tui e pipi nei? Ha ko Satani ko e “matua he pikopiko.” (Ioane 8:44) Kua leva tuai e pikopiko a ia mo e fakahehē e “lalolagi oti”! (Fakakite. 12:9) Ka kua puipui he tau kupu mooli he Tohi Tapu a tautolu neke fakahehē. Tui fēfē e tautolu e pipi fakatai nei? Tui e tautolu he fakaako e kupu mooli hagaao ki a Iehova he tapuaki ki a ia ke he “agaga mo e fakamoli,” mo e mahani fakamooli ke he tau mena oti kana.​—Ioane 4:24; Efeso 4:25; Hepe. 13:18.

6. Ko e heigoa e ufi kahokaho he tututonu, ti ko e ha kua lata a tautolu ke tui ai?

⁶ Ko e ufi kahokaho he tututonu ko e tau tuaga tututonu ha Iehova. Ko e ha kua lata ke tui e ufi kahokaho? Tuga he puipui he ufi kahokaho e ate he kautau neke tuina, puipui he ufi kahokaho he tututonu e tau loto ha tautolu mai he tau fakaohoohoaga kelea he lalolagi. (Fakatai 4:23) Amanaki a Iehova ki a tautolu ke fakaalofa mo e fekafekau ki a ia mo e loto katoa. (Mata. 22:36, 37) Ti eketaha a Satani ke vevehe e tau loto ha tautolu he taute a tautolu ke fiafia ke he tau mena he lalolagi​—ko e tau mena ne vihiatia e Iehova. (Iako. 4:4; 1 Ioa. 2:15, 16) Ka nakai gahua e lagatau nei to eketaha a ia ke fakamatakutaku a tautolu ke totoko e tau tuaga ha Iehova.

7. Tui fēfē e tautolu e ufi kahokaho he tututonu?

⁷ Tui e tautolu e ufi kahokaho he tututonu he talia e tau tuaga ha Iehova ke he tau mena hako mo e hepe mo e momoui fakatatau ke he tau tuaga ia. (Sala. 97:10) Falu ne liga logona hifo kua pāpā maō e tau tuaga ha Iehova. Ka nakai fakagahua e tautolu e tau matapatu fakaakoaga he Tohi Tapu ke he tau momoui, kua tuga e kautau a tautolu ne aaki e ufi kahokaho haana he uhouho he felakutaki ha kua manatu a ia kua mamafa lahi. Ko e mena goagoa lahi a ia! Ko lautolu ne fakaalofa ki a Iehova, ko e tau poakiaga haana kua “nakai mamafa,” ka e fakahao e moui.​—1 Ioa. 5:3.

8. Ko e heigoa e kakano ke afi e tau aloalohui ha tautolu ke mautali ke fakailoa e tala mitaki?

⁸ Tomatoma foki e Paulo a tautolu ke afi e tau aloalohui ke he tauteaga he vagahau mitaki he mafola. Kakano ai, kua lata tumau ke mautali ke fakamatala e tala mitaki he Kautu. Ka tala age e tautolu e fekau he Tohi Tapu ke he falu, kua fakamalolō e tua ha tautolu. Mafanatia mooli ke kitia e tau tagata ha Iehova he lalolagi katoa hane kumi e tau puhala ke fakailoa e tala mitaki he gahuaaga, aoga, matakavi pisinisi mo e fakamatala he taha fale ke he taha fale, he fale koloa, ahiahi atu ke he tau magafaoa nakai tua, tutala mo e tau tagata fa mahani, mo e pihia foki he nonofo i kaina. Ka mahala a tautolu ke he matakutaku mo e oti e fakamatala, to tuga e kautau a tautolu ne aaki e tau afi aloalohui haana he uhouho he felakutaki; to mukamuka e tau hui haana ke pakia. Ko e fua, to uka a ia ke puipui he tau ti nakai maeke ke muitua ke he tau poaki he takitaki kau.

9. Ko e ha kua lata a tautolu ke totō e akau punuti lahi he tua?

⁹ Ko e akau punuti lahi ko e tua ha tautolu ki a Iehova. Falanaki a tautolu to fakamooli e ia e tau maveheaga oti haana. Ko e tua ia ka  lagomatai a tautolu “ke tamate e tau fana kaka oti hana kua kelea.” Ko e ha kua lata ke totō e akau punuti lahi nei? Ke puipui a tautolu neke maueue he tau fakaakoaga he tau tagata tiaki taofiaga po ke matakutaku he tau talahauaga fakavai he tau tagata tuahā. Ka nakai ha ha ia tautolu e tua, to nakai malolō ke totoko ka lali e falu ke fakaohooho a tautolu ke tiaki e tau tuaga ha Iehova. Ka ko e tau magaaho takitaha kua nakai talia a tautolu ke taute e taha mena he gahua, po ke he aoga kua nakai fiafia a Iehova ki ai, puipui he akau punuti ha tautolu a tautolu. (1 Pete. 3:15) Ko e tau magaaho takitaha kua nakai talia e tautolu e gahua tupe totogi lahi ne fakatauhele e fakaholoaga tapuaki, puipui he akau punuti ha tautolu a tautolu. (Hepe. 13:5, 6) Ti ko e tau magaaho takitaha kua fekafekau a tautolu ki a Iehova pete e totokoaga, puipui he akau punuti ha tautolu a tautolu.​—1 Tesa. 2:2.

10. Ko e heigoa e potiki tau he fakamouiaga, ti ko e ha kua lata a tautolu ke tui ai?

¹⁰ Ko e potiki tau he fakamouiaga ko e amaamanakiaga ne foaki mai e Iehova ki a tautolu, ko e amaamanaki ke fakahao e ia a tautolu mai he mate mo e palepale a lautolu oti ne taute e finagalo haana. (1 Tesa. 5:8; 1 Timo. 4:10; Tito 1:1, 2) Tuga ni he puipui he potiki tau e ulu he kautau, ko e amaamanakiaga ke he fakamouiaga kua puipui e puhala manamanatu  ha tautolu. He puhala fe? Ko e amaamanakiaga ia kua taute a tautolu ke hagaaki tumau ke he tau maveheaga he Atua mo e lagomatai ke ua molea e tupetupe ke he tau lekua ha tautolu. Tui fēfē e tautolu e potiki tau nei? Taute pihia e tautolu he fakatumau ke manamanatu fakatatau mo e tau manatu he Atua. Ma e fakatai, fakavē e amaamanakiaga ha tautolu ke he Atua ka e nakai ke he tau koloa nakai tumau.​—Sala. 26:2; 104:34; 1 Timo. 6:17.

11. Ko e heigoa e pelu he agaaga, mo e ko e ha kua lata ia tautolu ke fakaaoga ai?

¹¹ Ko e pelu he agaaga e Kupu he Atua ko e Tohi Tapu. Ha ha he pelu ia e malolō ke utakehe e tau fakahehē oti mo e fakatokanoa e tau tagata mai he tau fakaakoaga pikopiko mo e tau aga kelea. (2 Kori. 10:4, 5; 2 Timo. 3:16, 17; Hepe. 4:12) Fakaako e tautolu ke fakaaoga fakamitaki e pelu ia puhala he kumikumi fakatagata mo e fakamahaniaga kua moua e tautolu mai he fakatokatokaaga he Atua. (2 Timo. 2:15) Lafi ke he tapulu tau, foaki mai e Iehova e taha puhala puipui malolō lahi. Ko e heigoa e mena ia?

12. Ko e heigoa foki kua lata ma tautolu, ti ko e ha?

¹² Ko e kautau iloilo ne iloa kua nakai kautū a ia he tau tokotaha ke he kautau lahi; lata a ia ke moua e lagomatai he tau kautau haana. Pihia foki, nakai kautū a tautolu he totoko tokotaha a Satani mo e kau haana; lata ke moua e lalagoaga he tau matakainaga ha tautolu. Foaki e Iehova e “tau matakainaga” he lalolagi katoa ke lagomatai a tautolu.​—1 Pete. 2:17.

13. Ia Heperu 10:24, 25, ko e heigoa e aoga he ō ke he tau feleveiaaga?

¹³ Taha puhala kua moua e tautolu e lalagoaga ko e ō ke he tau feleveiaaga. (Totou Heperu 10:24, 25.) Loto lolelole a tautolu oti he falu magaaho ka e maeke e tau feleveiaaga ke fakamalagaki e tau agaaga ha tautolu. Atihake a tautolu ha ko e tau tali mafanatia he tau matakainaga. Ko e tau lauga mo e tau fakatātāaga ne fakavē ke he Tohi Tapu ne tauteute kua fakamalolō a tautolu ke fekafekau ki a Iehova. Mafanatia a tautolu ha ko e tau fakatutala atihake ato kamata mo e ka hili e feleveiaaga. (1 Tesa. 5:14) Foaki foki he tau feleveiaaga ki a tautolu e fiafia he lagomatai e falu. (Gahua 20:35; Roma 1:11, 12) Lagomatai he tau feleveiaaga a tautolu he falu puhala foki. Fakaholo ki mua he tau feleveiaaga a tautolu ke iloa e puhala ke fakamatala. Ma e fakatai, fakaako a tautolu ke fakaaoga fakamitaki e Puha Koloa Fakaako. Ti tauteute fakamitaki ma e tau feleveiaaga he fakapotopotoaga. He feleveiaaga, fanogonogo fakamitaki. He mole e feleveiaaga, fakagahua e mena ne fakaako e koe. He taute e tau mena ia, kua eke a koe mo “tagata tau mitaki a Iesu Keriso.”​—2 Timo. 2:3.

14. Ko e heigoa falu lagomatai kua moua e tautolu?

¹⁴ Moua foki e tautolu e lalagoaga he tau agelu malolō lahi ne totou miliona. Manamanatu ke he mena ne maeke e agelu tokotaha ke taute! (Isaia 37:36) Manamanatu mogonei ke he mena kua maeke e kau he tau agelu malolō ke taute. Nakai fai tagata po ke temoni kua maeke ke tatai mo e kautau malolō ha Iehova. Kua talahau ai ko e taha e matakainaga Fakamoli, lafi aki a Iehova kua mua atu e malolō lahi. (Fakafili 6:16) Mooli lahi e mena ia! Tokaloto e tau manatu ia ka logona hifo e koe e fakalolelole ha ko e tau mena ne talahau po ke taute he kapitiga gahua, kapitiga aoga, po ke tagata he magafaoa ne nakai tua. Manatu, nakai tokotaha ni a koe he tauaga nei. Kua muitua a koe ke he takitakiaga ha Iehova.

15. Ia Isaia 54:15, 17, ko e ha kua nakai maeke e tau tagata he Atua ke taofi?

¹⁵ Ko e lalolagi i lalo he pule ha Satani kua loga e kakano ke vihiatia a tautolu. Nakai lalago e tautolu ha fakatokaaga fakapolitika ti nakai ō he tau. Fakapuloa e tautolu e higoa he Atua, omoomoi e Kautu haana ko e amaamanakiaga ni ma e mafola, mo e lalago e tau tuaga tututonu haana. Fakakite e tautolu e pule he lalolagi ko ia ko e pikopiko lahi mahaki mo e kelipopo tagata. (Ioane 8:44) Ti fakailoa e tautolu e tata lahi mahaki he moumouaga he lalolagi ha Satani. Ti nakai maeke a Satani mo e kau haana ke taofi e gahua fakamatala ha tautolu. Ka e fakaheke tumau e tautolu a Iehova he tau puhala oti kua maeke! Pete he malolō a Satani, nakai maeke a ia ke taofi e fekau he Kautu ke hokotia atu ke he tau tagata he lalolagi katoa. Ko e puipuiaga ni ha Iehova kua maeke e mena nei.​—Totou Isaia 54:15, 17.

16. To fakahao fēfē e Iehova e tau tagata haana he magaaho he matematekelea lahi?

¹⁶ Ko e heigoa kua fakatoka mai i mua? Ka hoko e matematekelea lahi, to fakahao e Iehova a tautolu ke he ua e puhala ofoofogia. Fakamua, to fakahao e ia e tau fekafekau fakamooli haana ka hoko e magaaho ke fakaohooho e ia e tau patuiki he lalolagi ke moumou a Papelonia Lahi, ko e matapatu he lotu fakavai. (Fakakite. 17:16-18; 18:2, 4) Holo atu mogoia a ia ke fakahao e tau tagata haana ka fakaotioti e ia e vala ne toe he lalolagi ha Satani i Amaketo.​—Fakakite. 7:9, 10; 16:14, 16.

17. Aoga fēfē ki a tautolu he fakatumau ke fakatata ki a Iehova?

¹⁷ Ka fakatumau a tautolu ke fakatata ki a Iehova to nakai maeke a Satani ke fakamamahi tukulagi a tautolu. Ka ko ia ka matematekelea tukulagi. (Roma 16:20) Ti tui e tapulu tau katoa, mo e fakatumau ke tui ai! Ua lali ke tau tokotaha ki a Satani mo e lalolagi haana. Lalago e tau matakainaga haau. Mo e muitua ke he takitakiaga ha Iehova. Ka taute pihia e koe, maeke a koe ke mauokafua to fakamalolō mo e puipui he Matua fakaalofa haau he lagi a koe.​—Isaia 41:10.