1. Ko e heigoa kua mooli hagaao ke he tau matakainaga taane fuata mui ha tautolu?

TAU MATAKAINAGA taane fuata mui, to aoga lahi a mutolu ke he fakapotopotoaga. Tokologa ia mutolu kua malolō mo e hakahakau. (Fakatai 20:29) Ko e fakamonuinaaga mooli a mutolu ke he fakapotopotoaga. Ti liga manako a mutolu ke eke mo fekafekau lagomatai. Ka e liga logona hifo e mutolu kua onoono e falu ki a mutolu kua ikiiki agaia po ke nakaila lata ke taute e tau matagahua lalahi. Pete he ikiiki a mutolu, ha ha i ai e tau mena ka maeke ke taute he magaaho tonu nei ke moua e falanaki mo e fakalilifu ha lautolu i loto he fakapotopotoaga.

2. Ko e heigoa ka fakatutala a tautolu he vala tala nei?

² He vala tala nei, to kumikumi a tautolu ke he moui he Patuiki ko Tavita. To fakatutala fakakū foki a tautolu ke he tau mena ne tutupu ke he tau momoui ha Asa mo Iehosafata​—ko e tau patuiki tokoua ha Iuta. To fakatutala a tautolu ke he falu he tau lekua ne fehagai e tau tagata taane tokotolu nei ki ai, mena ne taute e lautolu, mo e mena ka fakaako he tau matakainaga taane fuata mui mai he tau fakafifitakiaga ha lautolu.

3. Ko e heigoa taha puhala ka lagomatai he tau fuata mui a lautolu ne momotua he fakapotopotoaga?

³ He mogo ne tote a Tavita, fakaako e ia e tau lotomatala ne manatu e falu kua aoga lahi. Ko e tagata fakaagaaga mooli a ia ti feaki e ia e tau taleni uhu lologo mo e fakaaoga ai ke lagomatai a Saulo, ko e patuiki ne kotofa he Atua. (1 Samu. 16:16, 23) Fai lotomatala nakai a mutolu ma tau matakainaga taane fuata mui ka aoga ke he falu he fakapotopotoaga? Tokologa ia mutolu ne lotomatala. Ma e fakatai, liga mailoga e mutolu e falu kua momotua ne loto fakaaue ka fakakite age e puhala  ke fakaaoga fakamitaki e tau tepelete mo e tau matini hila ha lautolu ma e fakaako fakatagata mo e tau feleveiaaga. Ko e iloaaga ha mutolu ke he tau matini nei ka aoga lahi ki a lautolu ne momotua.

4. Tuga a Tavita, ko e heigoa e tau mahani kua lata e tau matakainaga taane fuata mui ke feaki? (Kikite fakatino he kili.)

⁴ He moui ha Tavita he tau aho takitaha, kua fakalago mo e falanaki ki a ia. Ma e fakatai, he fuata tote a ia ne gahua malolō a ia ke leveki e tau mamoe he matua haana. Ko e gahua hagahagakelea lahi. Fakamaama e Tavita he mogo fakamui ke he Patuiki ko Saulo: “Ne leveki he fekafekau hau e tau mamoe he hana matua; ka fina atu foki e leona poke urosa, mo e uta e punua mamoe mai he fuifui mamoe; Ti tutuli e au a ia, mo e keli e au a ia, mo e hamuti mai e au e mena he gutu hana.” (1 Samu. 17:34, 35) Logona hifo e Tavita e fakalagoaga ke leveki e tau mamoe ti eketaha fakamalolō a ia ke puipui a lautolu. Maeke e tau matakainaga taane fuata mui ke fifitaki a Tavita ke fakamakai ke taute e tau kotofaaga ne tuku age ki a lautolu.

5. Ia Salamo 25:14, ko e heigoa e mena ne mua atu e aoga ka taute he tau matakainaga taane fuata mui?

⁵ Feaki he fuata ko Tavita e fakafetuiaga tata lahi mo Iehova. Mua atu e fakafetuiaga ia ki a Tavita ke he loto malolō po ke lotomatala haana ke tā kitara. Nakai ni ko e Atua a Iehova ki a Tavita ka ko e Kapitiga uho foki haana. (Totou Salamo 25:14.) Tau matakainaga taane fuata mui, ko e mena ne mua e aoga ka taute e mutolu ke fakamalolō e fakafetuiaga ha mutolu mo e Matua he lagi, mo e to moua ai e mutolu e falu kotofaaga foki.

6. Ko e heigoa e onoonoaga kelea he falu ki a Tavita?

⁶ Lata a Tavita ke kautū ke he tau onoonoaga kelea he falu ki a ia. Ma e fakatai, he mogo ne ole a Tavita ke tau mo Koliato, lali e Patuiki ko Saulo ke taofi a ia he pehē: “Ko e tama tote a koe.” (1 Samu. 17:31-33) He mogo fakamua, ne ekefakakelea he taokete ni ha Tavita a ia he fakateaga ke he matagahua haana. (1 Samu. 17:26-30) Ka e nakai onoono a Iehova ki a Tavita kua tote agaia po ke fakateaga. Iloa mitaki e ia a Tavita. He falanaki a Tavita ke he Kapitiga haana ko Iehova ma e malolō, ne keli e ia a Koliato.​—1 Samu. 17:45, 48-51.

7. Ko e heigoa ka fakaako e koe mai he taha tala hagaao ki a Tavita?

⁷ Ko e heigoa ne fakaako e koe mai he mena ne tupu ki a Tavita? Fakaako mai kua lata  a tautolu ke fakauka. Liga fai magaaho a lautolu ne iloa a koe he vahā tote ne mailoga kua lahi tuai a koe. Ka e mauokafua kua nakai ni kitekite a Iehova ke he tino haau. Iloa mitaki e ia a koe mo e tau mena kua maeke a koe ke taute. (1 Samu. 16:7) Fakamalolō e fakafetuiaga haau mo e Atua. Taute pihia e Tavita he onoono fakahokulo ke he tau tufugatia ha Iehova. Manamanatu fakahokulo a Tavita ke he tau gahua oti ia ne fakakite hagaao ke he Tufuga. (Sala. 8:3, 4; 139:14; Roma 1:20) Taha mena foki ka taute e koe ko e ole ki a Iehova ma e malolō. Ma e fakatai, vaiga kia he falu kapitiga aoga haau a koe ha ko koe taha he Tau Fakamoli a Iehova? Ka pihia, liogi ki a Iehova ke lagomatai a koe ke fehagai ke he lekua nei. Ti fakagahua e fakatonuaga aoga kua moua e koe he Kupu haana mo e tau tohi ne fakavē ke he Tohi Tapu mo e tau vitiō ha tautolu. He tau magaaho takitaha kua kitia e koe e lagomatai ha Iehova ki a koe he fehagai mo e lekua, to tupu ki mua e mauokafua haau. Lafi ki ai, ka kitia he falu kua tua a koe ki a Iehova to falanaki a lautolu ki a koe.

8-9. Ko e heigoa ne lagomatai a Tavita ke fakatali mo e fakauka ato eke mo patuiki, ti ko e heigoa he tau matakainaga taane fuata mui ka fakaako mai he fakafifitakiaga haana?

⁸ Manamanatu ke he taha lekua foki ne fehagai a Tavita ki ai. He mole e fakauku a Tavita mo patuiki, ne loga e tau ne fakatali a ia ato eke mo patuiki a Iuta. (1 Samu. 16:13; 2 Samu. 2:3, 4) He magaaho ia, ko e heigoa ne lagomatai a ia ke fakatali mo e fakauka? He nakai molea e loto lolelole, ne hagaaki a Tavita ke he mena kua maeke a ia ke taute. Ma e fakatai, he nofo fakapaea a Tavita he matakavi he tau Filisitia, fakaaoga e ia e magaaho ke tau atu ke he tau fī ha Isaraela. He taute pihia, kua puipui e ia e tau katofia he tau matakavi ha Iuta.​—1 Samu. 27:1-12.

⁹ Ko e heigoa he tau matakainaga taane fuata mui kua fakaako mai he fakafifitakiaga ha Tavita? Fakaaoga e tau magaaho kua maeke ia mutolu ke fekafekau ke he tau matakainaga. Manamanatu ke he mena ne tupu ke he matakainaga ko Ricardo. * Tali mai he fuata tote a ia, ne loto lahi a ia ke eke mo paionia tumau. Ka e pehē e tau motua kua nakaila lata a ia. He nakai loto lolelole po ke ita a Ricardo, ne fakalahi e ia e gahua fakamatala haana. Pehē a ia: “Ka liu au ke manamanatu, kua mitaki ma haaku ke holo ki mua. Eketaha au ke liu atu ke he tau tagata oti ne fiafia ti tauteute ma e tau ahiahi takitaha. Taute foki e au e fakaako Tohi Tapu fakamua haaku. He lahi e fakamatala haaku, tupu fakahaga e mauokafua haaku.” Kua eke a Ricardo mogonei mo paionia tumau kua mitaki mo e fekafekau lagomatai.

10. He taha magaaho, ko e heigoa ne taute e Tavita ato taute e ia e fifiliaga aoga lahi?

¹⁰ Manamanatu ke he taha mena foki ne tupu ki a Tavita. He magaaho ne nonofo fakapaea a ia mo e tau tagata taane haana, ne toka e lautolu e tau magafaoa ke o atu ke tau. He haia a lautolu he taha matakavi, ne huhū pulenoa e tau fī ke he tau kaina ha lautolu mo e fofō e tau magafaoa ha lautolu. Maeke a Tavita ke talahau ko ia ko e toa malolō, ti iloa e ia e puhala mitaki ke fakahao aki e tau magafaoa ha lautolu. Ka e kumi atu a Tavita ki a Iehova ma e takitakiaga. Mo e lagomatai he ekepoa ko Aviata ne hūhū a Tavita ki a Iehova: “To tutuli nakai e au e kau na?” Tala age a Iehova ki a Tavita ke tutuli atu mo e mauokafua to kautū a ia. (1 Samu. 30:7-10) Ko e heigoa haau ne fakaako mai he mena nei ne tupu?

11. Ko e heigoa ka taute e koe ato taute e tau fifiliaga?

¹¹ Kumi lagomatai ato taute e tau fifiliaga.  Tutala ke he tau matua haau. Moua foki e koe e fakatonuaga mitaki he tutala ke he tau motua lotomatala. Falanaki a Iehova ke he tau tagata taane nei kua kotofa, ti maeke foki a koe. Onoono a Iehova ki a lautolu ko e “tau mena fakaalofa” ke he fakapotopotoaga. (Efeso 4:8) To aoga ki a koe he fifitaki e tua ha lautolu mo e fanogonogo ke he tau manatu mitaki ne talahau e lautolu. Kia fakatutala a tautolu mogonei ke he mena ka fakaako e tautolu mai he Patuiki ko Asa.

12. Ko e heigoa e tau mahani he Patuiki ko Asa he mogo ne kamata e pule haana?

¹² He fuata ne mahani fakatokolalo mo e loto malolō e Patuiki ko Asa. Ma e fakatai, he mole e mate e matua taane haana ko Avia, ne eke a Asa mo patuiki ti kamata ke utakehe e tau atua mo e tau tupua tā. Pihia foki “ne pehe atu a ia kia Iuta kia kumi e lautolu a Iehova ko e Atua he tau matua ha lautolu, mo e eke ai a lautolu e fakatufono mo e poaki.” (2 Nofo. 14:1-7) Ko e mogo ne tau mai a Saraha ko e Aitiope ki Iuta mo e 1,000,000 kautau, ne fakailoilo a Asa he ole ki a Iehova ma e lagomatai he pehē: “Iehova na e, ko koe ni hoko koe ke lagomatai ke he tau tagata tokologa, po ko lautolu kua nakai fai malolo. Iehova na e, ha mautolu a Atua, kia lagomatai mai a kia mautolu; ha kua falanaki a mautolu kia koe.” Ko e tau kupu mafanatia nei kua fakakite e lahi he mauokafua ha Asa ke he lotomatala ha Iehova ke fakahao a ia mo e tau tagata haana. Ti falanaki a Asa ke he Matua haana he lagi mo e “ta e Iehova e tau tagata Aitiope.”​—2 Nofo. 14:8-12.

13. Ko e heigoa ne tupu ki a Asa he magaaho fakamui, ti ko e ha?

¹³ Ko e mena matakutakuina he tau mai e tau kautau ne 1,000,000 ki a Asa ka e kautū a ia ki ai. Momoko ai he feleveia a Asa mo e taha lekua foki, ne nakai falanaki a ia ki a Iehova. He fakamatakutaku he patuiki kelea ko Paasa ha Isaraela a Asa, ne fuluhi atu a ia ke he patuiki ha Suria ma e lagomatai. Fakahiku kelea e fifiliaga ia! Puhala he perofeta ko Hanani, ne tala age a Iehova ki a Asa: “Kua falanaki a koe ke he patuiki a Suria, ka e nakai falanaki a koe kia Iehova hau a Atua, ko e mena ia kua hao ai e kau he patuiki a Suria he lima hau.” Tali mai he magaaho ia ko e gahua ni ha Asa ko e tau. (2 Nofo. 16:7, 9; 1 Patu. 15:32) Ko e heigoa e fakaakoaga?

14. Maeke fēfē a koe ke falanaki ki a Iehova, mo e he 1 Timoteo 4:12, ko e heigoa e fua he taute pihia e koe?

 ¹⁴ Fakatumau ke mahani fakatokolalo mo e matutaki ke falanaki ki a Iehova. He papatiso a koe, fakakite e koe e tua mo e falanaki lahi ki a Iehova. Kua fiafia lahi a Iehova ke fakafeleveia mai a koe ke he magafaoa haana. Ko e mena kua lata ke taute mogonei ke matutaki ke falanaki ki a Iehova. Liga mukamuka ke falanaki ki a Iehova ka taute e koe e tau fifiliaga uho lahi he moui, ka e kua he falu magaaho? Kua uho lahi ke falanaki a koe ki a Iehova ka taute e tau fifiliaga, putoia ai e fakafiafiaaga, gahua tupe, mo e tau foliaga he moui! Ua falanaki ke he iloilo ni haau. Ka e kumi e tau matapatu fakaakoaga he Tohi Tapu ne felauaki mo e tau tutūaga haau ti gahua fakalautatai ki ai. (Fakatai 3:5, 6) Ka taute pihia e koe, to fakafiafia e koe a Iehova mo e to moua e koe e fakalilifu mai ia lautolu he fakapotopotoaga.​—Totou 1 Timoteo 4:12.

15. He fakamau ia 2 Nofoaga he Tau Patuiki 18:1-3; 19:2, ko e heigoa e tau hehē ne taute he Patuiki ko Iehosafata?

¹⁵ Mooli, tuga ni a tautolu oti kua nakai mitaki katoatoa a koe mo e he falu magaaho to taute e koe e falu hehē. Ka e nakai lata e mena nei ke taofi a koe he taute e tau mena kua maeke a koe he fekafekau ki a Iehova. Manamanatu ke he fakafifitakiaga he Patuiki ko Iehosafata. Loga e tau mahani mitaki haana. He fuata, “kumi e ia e Atua he hana tau matua, mo e fano ai a ia ke he hana [Iehova] tau poaki.” Lafi ki ai, fakafano foki e ia e tau iki ke he tau maaga ha Iuta ke fakaako e tau tagata hagaao ki a Iehova. (2 Nofo. 17:4, 7) Ne mahani fakamooli a Iehosafata ka e falu magaaho, taute e ia e tau fifiliaga kelea. Ko e fua he taha fifiliaga ia, ne fakatonu he taha he tau hukui ha Iehova a Iehosafata. (Totou 2 Nofoaga he Tau Patuiki 18:1-3; 19:2.) Ko e heigoa kua fakaako e koe mai he tala ia?

16. Ko e heigoa ka fakaako e koe mai he mena ne tupu ki a Rajeev?

¹⁶ Talia mo e fakaaoga e fakatonuaga. Liga tuga e tau fuata taane tokologa, kua uka ki a koe ke fakatokatoka e tau mena ne mua e aoga he moui haau. Ua loto lolelole. Mailoga e mena ne tupu ke he matakainaga taane fuata ko Rajeev. Pehē a ia he fuata mui a ia: “He falu mogo, nakai iloa e au e mena ne manako au ke taute he moui haaku. Tuga e tokologa he tau fanau fuata, lahi atu e fiafia haaku ke he tau sipote mo e tau mena fakafiafia  ke he fano ke he tau feleveiaaga po ke gahua he fonua.” Ko e heigoa ne lagomatai a Rajeev? Fakatonu he motua totonu a ia. Fakamaama e Rajeev: “Lagomatai e ia au ke maama e matapatu fakaakoaga ia 1 Timoteo 4:8.” Tali atu fakatokolalo a Rajeev ke he fakatonuaga mo e liu manamanatu ke he tau mena ne aoga lahi he moui haana. Pehē a ia: “Ne fifili au ke tuku fakamua e tau foliaga fakaagaaga.” Ko e fua? “Fai tau he mole e moua e au e fakatonuaga ia,” he fakamaama e Rajeev, “ne hokotia au ke eke mo fekafekau lagomatai.”

17. Fēfē e logonaaga ha lautolu ne momotua hagaao ke he tau fuata taane ne fekafekau ki a Iehova?

¹⁷ Loto fakaaue a lautolu ne momotua ki a mutolu ma tau fuata taane ne fekafekau ki a Iehova “mo e loto fakalataha” mo lautolu! (Sefa. 3:9) Fiafia a lautolu ke he aga fakamakutu mo e hakahakau ha mutolu he taute e tau gahua ne atu ki a mutolu. Nava lahi e lautolu a mutolu.​—1 Ioa. 2:14.

18. He fakakite he Tau Fakatai 27:11, fēfē e logonaaga ha Iehova ke he tau fuata taane ne fekafekau ki a ia?

¹⁸ Tau matakainaga taane fuata mui, ua nimo kua fakaalofa mo e falanaki a Iehova ki a mutolu. Talahau tuai e ia he tau aho fakamui, ko e kau he tau fuata taane to foaki fakamakai e lautolu a lautolu. (Sala. 110:1-3) Iloa e ia kua fakaalofa a mutolu ki a ia mo e manako ke eketaha ke fekafekau ki a ia. Ti fakauka ke he falu mo e fakauka ki a koe ni. Ka taute e mutolu e tau hehē, kia talia e fakaakoaga mo e akonaki ne moua e mutolu he onoono ki ai kua mai ia Iehova. (Hepe. 12:6) Fakamalolō ke taute e tau kotofaaga kua tuku atu ki a mutolu. Mo e mua atu ai, ko e tau mena oti kua taute e mutolu, kia fakafiafia e Matua he lagi.​—Totou Tau Fakatai 27:11.