1, 2. Ko e heigoa e tau hūhū ne lagā mai ha ko e tau kupu ha Iesu ia Mataio 24:14?

KUA talahau tuai e Iesu he tau aho fakamui to fakamatala e tala mitaki he Kautu ke he tau tagata oti kana. (Mataio 24:14) Ko e Tau Fakamoli a Iehova, iloa lahi a tautolu ke he lalolagi katoa ha ko e gahua fakamatala ha tautolu. Falu tagata ne fiafia ke he fekau ne fakamatala e tautolu, ka e nakai pihia e falu. Ka e pete he nakai fiafia e falu ke he fekau ha tautolu kua fakalilifu e lautolu e gahua ha tautolu. Talahau e tautolu ko tautolu ne taute e gahua ne talahau tuai e Iesu. Ha ha nakai ia tautolu e tonuhia ke talahau pihia? Iloa tonu fēfē e tautolu ko e fakamatala ha tautolu ko e gahua ne talahau tuai e Iesu?

² Tokologa e tau matakau fakalotu ne talahau kua fakamatala e lautolu e fekau ha Iesu. Ka ko e fakamatala ha lautolu kua fakakaupā ke he tau lauga he fale tapu, he televisoni, po ke he Initanete, po ke he tala age ke he falu e puhala ne iloa e lautolu hagaao ki a Iesu. Falu ne logona hifo kua lagomatai e lautolu e  tau tagata ne nonofogati po ke taute e gahua foaki lagomatai tuga e tau ekekafo, tau nosi, po ke tau faiaoga ko e puhala fakamatala ha lautolu. Ka ko e tau matagahua pehenei kia ko e gahua fakamatala ne tutala a Iesu ki ai?

3. Hagaao ke he Mataio 28:19, ko e heigoa e tau mena fā ne kua lata he tau tutaki ha Iesu ke taute?

³ Manako kia a Iesu ke he tau tutaki haana ke fakatali ke he tau tagata ke o mai ki a lautolu? Nakai! Mole e liu tu mai ha Iesu, ne tala age a ia ke he tokoteau he tau tutaki haana: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu. . . . Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Ha ko e tau tutaki ha Iesu, kua lata a tautolu ke taute fā e lakaaga. Kua lata a tautolu ke taute tutaki, papatiso a lautolu, ti fakaako a lautolu. Ka e fakamua, kua lata a tautolu ke o atu ke he tau tagata. Taha e pulotu he Tohi Tapu ne fakamaama: “Ke ‘o atu’ ko e matafekau he tau tagata oti ne tua, ke he taha faahi he puhalatū po ke taha faahi he moana.”​—Mataio 10:7; Luka 10:3.

4. Ko e heigoa kua putoia he eke mo “takafaga ke he tau tagata”?

⁴ Ko e heigoa ne amanaki a Iesu ke he tau tutaki haana? Manako kia a ia ki a lautolu ke fakamatala hoko lautolu ni, po ke manako a ia ki a lautolu ke fakapotopoto ke he matakau? Ha kua nakai maeke ai ke he taha e tagata ke fakamatala ke he “tau motu oti kana,” kua lata he tau tutaki haana ke fakapotopoto ke he matakau. Ko e kakano ha ia ha Iesu he uiina e ia e tau tutaki haana ke eke mo “takafaga ke he tau tagata.” (Totou Mataio 4:18-22.) Nakai kakano a Iesu ke he taha e tagata takafaga ne fakaaoga e akau hī ika mo e page ni haana, ti fakatali ke kai he ika. Ka ko e takafaga ne hagaao a Iesu ki ai kua putoia e fakaaoga he tau kupega futi ika. Ko e puhala takafaga ia kua lata ke gahua malolō, fakatokatoka, mo e gahua fakalataha e tau tagata tokologa.​—Luka 5:1-11.

5. Ko e heigoa e tau hūhū fā kua lata ke moua e tali, ti ko e ha?

⁵ Ke iloa ko hai kua fakamatala e tala mitaki mogonei, kua lata a tautolu ke tali e tau hūhū fā nei:

• Ko e heigoa e fekau kua lata ke fakamatala he tau tutaki ha Iesu?

• Ko e heigoa e fatuakiloto ha lautolu?

• Ko e heigoa e tau puhala kua lata a lautolu ke fakaaoga?

• Laulahi fēfē e gahua, ti kua lata ke leva fēfē e matutaki ai?

Ko e tau tali ke he tau hūhū nei to lagomatai a tautolu ke mailoga a lautolu kua taute e gahua fakamoui nei mo e to fakamalolō e manako ha tautolu ke matutaki ke fakamatala.​—1 Timoteo 4:16.

6. Maeke he ha a koe ke mauokafua ko e Tau Fakamoli a Iehova hane fakamatala e fekau hako?

⁶ Totou Luka 4:43. Fakamatala e Iesu e “[tala] mitaki he kautu,” ti manako a ia ke he tau tutaki haana ke taute pihia. Ko e matakau fe he tau tagata kua fakamatala e fekau ia  ke he tau tagata oti? Ko e Tau Fakamoli a Iehova hokoia! Falu foki ne nakai fiafia ki a tautolu ne talahau pihia. Ma e fakatai, mailoga e mena ne tala age he taha akoako misionare ne nofo he tau motu kehekehe loga, ke he taha he Tau Fakamoli a Iehova. He tau motu takitaha, fitā he hūhū e akoako ke he fekau ne fakamatala he Tau Fakamoli a Iehova. Pehē e akoako, “Kua goagoa lahi a lautolu oti ha kua tatai e tali ha lautolu: ‘Ko e tala mitaki he Kautu.’” Ko e talahauaga he akoako kua fakamooli kua nakai goagoa a tautolu ka kua kaufakalataha a tautolu ko e tau Kerisiano mooli. (1 Korinito 1:10) Ko e Kautu he Atua ko e fekau pauaki foki he The Watchtower Announcing Jehovah’s Kingdom. Kua moua e mekasini nei ke he 254 e vagahau, ti evalesi ke teitei 59,000,000 lagaki he tau fufuta takitaha ne taute, ti ko e mekasini kua lahi mahaki e tufatufa he lalolagi katoa!

7. Iloa fēfē e tautolu kua nakai fakamatala he tau akoako ha Kerisitenitome e fekau hako?

⁷ Ko e tau akoako he Kerisitenitome kua nakai fakamatala e Kautu he Atua. Ka tutala a lautolu hagaao ke he Kautu, tokologa a lautolu ne pehē ko e logonaaga a ia he loto he tagata. (Luka 17:21) Nakai fakaako e lautolu ke he tau tagata ko e Kautu ko e fakatufono he lagi kua pule a Iesu. Ka e fa tutala a lautolu hagaao ki a Iesu he Kirisimasi po ke Isitā. Nakai fakamaama e lautolu ko e Kautu ka fakamafola e tau lekua oti he tagata mo e to nakai leva ti utakehe e tau mahani kelea oti kana mai he lalolagi. (Fakakiteaga 19:11-21) Maaliali ai, ko e tau takitaki Kerisitenitome ne nakai iloa e mena ka taute e Iesu ko e Patuiki he Kautu he Atua. Ha kua nakai maama e lautolu e fekau ha Iesu, kua nakai maama e lautolu e kakano kua lata ia lautolu ke fakamatala.

8. Ko e heigoa e fatuakiloto hepe he taute e gahua fakamatala?

⁸ Nakai lata mogoia e tau tutaki ha Iesu ke fakamatala ke taute tupe po ke talaga e tau fale lalahi mamahaki. Pehē a Iesu: “Kua moua noa e mutolu, kia foaki noa atu e mutolu.” (Mataio 10:8) Ti kua lata e gahua fakamatala ke nakai eke mo pisinisi. (2 Korinito 2:17) Kua nakai lata e tau tutaki ha Iesu ke ole ke totogi e gahua fakamatala ha lautolu. (Totou Gahua 20:33-35.) Pete he maaliali lahi e fakaakoaga ha Iesu, laulahi he tau tapu kua lavelave he oko tupe ke maeke ke tumau e tau tapu ha lautolu mo e totogi e tau akoako ha lautolu mo e falu tagata gahua ha lautolu. Ti ko e fua, tokologa e takitaki he Kerisitenitome ne kua lahi e maukoloa.​—Fakakiteaga 17:4, 5.

9. Fakakite fēfē he Tau Fakamoli a Iehova kua taute e lautolu e gahua fakamatala mo e fatuakiloto hako?

⁹ Oko tupe nakai e Tau Fakamoli a Iehova he ha lautolu a tau Fale he Kautu po ke tau fonoaga? Nakai! Kua lalago e gahua ha lautolu he tau mena fakaalofa foaki noa. (2 Korinito 9:7) Ka e he tau kua mole, ne fakaaoga he Tau Fakamoli a Iehova teitei ua e piliona tulā he fakamatala e tala mitaki mo e taute molea hiva e miliona fakaako Tohi Tapu he tau mahina takitaha. Nakai totogi a lautolu ha ko e fakamatala ka e fiafia a lautolu ke fakaaoga e tau tupe ni ha lautolu ke taute  e gahua nei. Taha e tagata kumikumi ne pehē hagaao ke he gahua he Tau Fakamoli a Iehova: “Ko e foliaga pauaki ko e fakamatala mo e fakaako atu.” Pehē foki a ia ko e Tau Fakamoli a Iehova kua nakai totogi e tau akoako. Ti ka nakai fakamatala a tautolu ma e tupe, ko e heigoa e fatuakiloto ha tautolu? Taute fakamakai e tautolu e gahua nei ha kua fakaalofa a tautolu ki a Iehova mo e fakaalofa a tautolu ke he tau tagata. Ko e aga ia kua fakamooli he perofetaaga ia Salamo 110:3. (Totou.)

10. Ko e heigoa e tau puhala ne fakaaoga e Iesu mo e tau tutaki haana ke fakamatala?

¹⁰ Ko e heigoa e tau puhala ne fakaaoga e Iesu mo e tau tutaki haana ke fakamatala? Ne ō a lautolu ke he ha matakavi ne maeke a lautolu ke moua e tau tagata. Ma e fakatai, ne fakamatala a lautolu he tau puhalatū mo e tau makete. Kumi foki a lautolu ke he tau tagata he tau kaina ha lautolu. (Mataio 10:11; Luka 8:1; Gahua 5:42; 20:20) Ko e fakamatala mai he taha fale ke he taha fale ko e puhala fakatokatoka ke hokotia ke he tau tagata kehekehe oti.

11, 12. Ka fakamatala e tala mitaki, fakatatai fēfē e tau laliaga he Kerisitenitome mo e he tau tagata ha Iehova?

¹¹ Fakamatala nakai he tau tapu he Kerisitenitome e tala mitaki tuga ne taute e Iesu? Fa totogi e tau akoako ke lauga ke he tau tagata ha lautolu. Nakai taute tutaki foou e tau takitaki nei ka e lali a lautolu ke fakatumau e tau tagata he tapu ne fitā i ai. He falu mogo, ne lali a lautolu ke fakamalolō e tau tagata ha  lautolu ke fakamatala. Ma e fakatai, he tau 2001, ko e Pope ko John Paul II ne pehē he tohi kua lata e tau tagata he tapu ke fakamatala e Evagelia mo e moua e fakamakutu pihia tuga he aposetolo ko Paulo, ne pehē: “Oi fakaalofa foki kia au, kaeke ke nakai fakamatala e au e Evagelia.” Ti pehē e pope kua lata e gahua fakamatala nei ke taute he tau tagata oti he tapu ka e nakai ni he tau tagata tokogahoa ne kua fakaako. Ka e tokogahoa ne muitua ke he fakamalolōaga ia.

¹² Ka e kua e Tau Fakamoli a Iehova? Ko lautolu ni hane fakamatala kua pule a Iesu ko e Patuiki tali mai he 1914. Ne omaoma a lautolu ki a Iesu ti tuku fakamua e gahua fakamatala he tau momoui ha lautolu. (Mareko 13:10) Ko e tohi Pillars of Faith​—American Congregations and Their Partners ne pehē kua aoga lahi e gahua fakamatala ke he Tau Fakamoli a Iehova. Ne pehē foki kua moua e lautolu kua hoge, matimati, mo e gagao e tau tagata ti eketaha a lautolu ke lagomatai, ka e nakai nimo e lautolu ko e foliaga pauaki ha lautolu ke fakamatala hagaao ke he moumouaga he lalolagi nei mo e ke fakamatala ke he tau tagata hagaao ke he fakamouiaga. Matutaki e Tau Fakamoli a Iehova ke fakamatala e fekau mo e fifitaki e tau puhala fakamatala ha Iesu mo e tau tutaki haana.

13. Kua lata ke laulahi fēfē e gahua fakamatala?

¹³ Kua pehē a Iesu to fakamatala mo e fakaako he tau tutaki haana e tala mitaki ke he “lalolagi oti.” Ne poaki ki a lautolu ke taute tutaki he tau tagata ke he “tau motu oti kana.” (Mataio 24:14; 28:19, 20) Kakano e mena nei na lata e tala mitaki ke fakamatala ke he lalolagi katoa.

14, 15. Ko e heigoa e fakamooliaga ko e Tau Fakamoli a Iehova kua taute e perofetaaga hagaao ke he fakalaulahiaga he gahua? (Kikite fakatino he kamataaga.)

¹⁴ Ko e Tau Fakamoli a Iehova ni ne fakamooli e perofetaaga ha Iesu ke fakamatala e tala mitaki ke he lalolagi katoa. Ko e ha ne talahau pihia e tautolu? I United States ne kavi ke he 600,000 akoako he Kerisitenitome, ka e ha ha ai e 1,200,000 he Tau Fakamoli a Iehova kua fakamatala e tala mitaki he motu ia. He lalolagi katoa ne kavi ke he 400,000 e patele Katolika, ka e molea 8 e miliona he Tau Fakamoli a Iehova kua fakamatala e tala mitaki ke he 240 e motu. Maaliali ai kua fakamatala he Tau Fakamoli a Iehova e tala mitaki ke he lalolagi katoa ne tamai e fakalilifuaga mo e fakahekeaga ki a Iehova!​—Salamo 34:1; 51:15.

¹⁵ Ha ko e Tau Fakamoli a Iehova, ko e foliaga ha tautolu ke fakamatala e tala mitaki ke he tokologa he tau tagata ato hoko mai e moumouaga. Ke taute e gahua nei, kua fakaliliu mo e lomi e tautolu e miliona he tau tohi, tau mekasini, tau tuleke, mo e tau uiina fonoaga mo e Fakamanatuaga ke he molea e 700 vagahau. Foaki noa e tautolu e tau tohi nei ke he tau tagata. He tau kua mole ne lomi e tautolu kavi ke he 4.5 e piliona he tau tohi faka-Tohi Tapu. Kua lomi foki e tautolu molea e 200 miliona he tau lagaki he New World Translation of the Holy Scriptures he molea 130 e vagahau. He faahi kupega hila pauaki ha tautolu, kua moua e tau vala tala ke he molea 750 e vagahau. Ko e Tau Fakamoli a Iehova ni hane taute e gahua ofoofogia pihia.

16. Iloa fēfē e tautolu ko e Tau Fakamoli a Iehova ne ha ha ai e agaaga he Atua?

¹⁶ Fiha e leva ka matutaki e gahua fakamatala? Pehē a Iesu to fakamatala e tala  mitaki ato hoko mai e moumouaga. Ha ko e Tau Fakamoli a Iehova, kua maeke a tautolu ke fakauka ke he gahua fakamatala he tau aho fakamui nei ha ko tautolu ni kua ha ha ai e agaaga tapu ha Iehova. (Gahua 1:8; 1 Peteru 4:14) Falu tagata lotu ne liga talahau: “Ha ha ia mautolu e agaaga tapu.” Ka e maeke nakai a lautolu ke taute e gahua hane taute he Tau Fakamoli a Iehova he tau aho fakamui nei? Falu matakau ne lali ke fakamatala ke he puhala ne taute e tautolu, ka e kaumahala a lautolu. Falu ne makai ke fakamatala, ka e ke he magaaho kū ni. Ka e maeke he falu ke fakamatala mai he taha fale ke he taha fale, ka e nakai fakamatala e lautolu e tala mitaki he Kautu. Ti nakai taute e lautolu e gahua ne kamata e Iesu.

17, 18. (a) Ko e ha kua maeke ia tautolu ke iloa tonu ko e Tau Fakamoli a Iehova kua fakamatala e tala mitaki he Kautu mogonei? (e) Maeke fēfē a tautolu ke matutaki e gahua nei?

¹⁷ Ti ko hai hane fakamatala e tala mitaki he Kautu mogonei? Ko e Tau Fakamoli a Iehova ni! Iloa fēfē e tautolu e mena ia? Ha kua fakamatala e tautolu e fekau hako, ko e tala mitaki he Kautu. Hane kumi a tautolu ma e tau tagata he fonua ha tautolu, ti kua fakaaoga e tautolu e tau puhala hako. Ha ha ia tautolu e fatuakiloto hako ke fakamatala, kakano kua fakaalofa a tautolu ki a Iehova mo e fakaalofa a tautolu ke he tau tagata. Ko e gahua fakamatala ha tautolu kua laulahi mahaki ha kua fakamatala a tautolu ke he tau tagata he tau motu oti mo e tau vagahau oti. To matutaki a tautolu ke fakamatala e tala mitaki he Kautu ato hoko e moumouaga!

¹⁸ Kua ofoofogia mooli ke kitia e gahua homo ue atu kua taute he tau tagata ha Iehova ke fakamatala e tala mitaki he tau aho fakamui nei. Ka e maeke fēfē a tautolu ke taute katoa e gahua nei? Fakamaama he aposetolo ko Paulo: “Ko e Atua ni, kua gahua ki loto ia mutolu ke tupu ai e loto ke he hana finagalo fakaalofa, kia gahua foki ki ai.” (Filipi 2:13) Kia matutaki a Iehova ke foaki ki a tautolu e malolō kua lata ke maeke a tautolu ke eketaha katoatoa ke tumau e fakamatala he tala mitaki!​—2 Timoteo 4:5.