1. Ko e heigoa falu fakataiaga he tau matafakatufono he Tohi Tapu, ti aoga fēfē a tautolu he omaoma ki ai?

I LOTO he Tohi Tapu, kua tuku mai e Iehova ki a tautolu e tau matafakatufono ne talahau fakamaali ki a tautolu e mena ne manako a ia ke taute e tautolu. Ma e fakatai, pehē a ia ki a tautolu kua nakai lata a tautolu ke tapuaki e tau tupua, kaihā, konahia, po ke taute e tau mahani feuaki. (1 Korinito 6:9, 10) Ti ko Iesu ko e Tama ha Iehova ne foaki e poakiaga pauaki nei ke he tau tutaki haana: “Ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu; Ti fakaako atu a mutolu kia lautolu kia omaoma ke he tau mena oti ne tala atu e au kia mutolu; kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.” (Mataio 28:19, 20) Ko e tau mena oti ne tala mai e Iehova mo Iesu ke taute e tautolu kua lata ni mo e mitaki ha tautolu. Fakaako he tau matafakatufono ha Iehova a tautolu ke leveki a tautolu mo e tau magafaoa ha tautolu ti lagomatai a tautolu ke malolō e tau tino mo e fiafia. Mua atu e aoga, ka omaoma a tautolu ke he tau poakiaga ha Iehova, putoia e poakiaga ke fakamatala, kua fiafia  a ia ki a tautolu mo e to fakamonuina e ia a tautolu.

2, 3. (a) Ko e ha ne nakai tuku mai he Tohi Tapu ki a tautolu e tau matafakatufono ma e tau tuaga oti he moui? (e) Ko e heigoa e tau hūhū ka fakatutala a tautolu ki ai he vala tala nei? (Kikite fakatino he kamataaga.)

² He magaaho taha, kua nakai tuku mai he Tohi Tapu ki a tautolu e matafakatufono ke he tau tuaga takitaha he moui. Ma e fakatai, nakai moua e tautolu e tau fakatonuaga pauaki he Tohi Tapu ke he tau mena kua lata a tautolu ke tui. Fakakite he mena nei e pulotu ha Iehova. Pete ni kua hiki tumau e tau fasone mo e tui he tau tagata he lalolagi e tau sitaila kehekehe he tau mena tui, kua nakai hiki e Tohi Tapu. Kua nakai loga foki e tau matafakatufono ke he tau gahua tupe po ke fakafiafiaaga kua lata a tautolu ke fifili po ke mena kua latatonu a tautolu ke tumau e tino malolō. Fakaatā e Iehova a lautolu takitaha mo e tau ulu magafaoa ke taute e tau fifiliaga hagaao ke he tau mena nei.

³ Ti ka taute e tautolu e fifiliaga aoga ka lauia e tau momoui ha tautolu ti nakai moua e tautolu e matafakatufono hagaao ki ai he Tohi Tapu, liga manamanatu a tautolu: ‘Fiafia nakai a Iehova ke he fifiliaga kua taute e au? To fiafia nakai a ia ke he tau mena kua fifili e au ke taute pete he nakai moumou e au e matafakatufono he Tohi Tapu? Maeke fēfē au ke iloa tonu to fiafia a ia ke he tau fifiliaga kua taute e au?’

4, 5. Maeke fēfē e tau fifiliaga ha tautolu ke lauia a tautolu mo e falu?

⁴ Falu tagata ne logona hifo kua maeke a lautolu ke taute ha mena kua manako a lautolu ki ai. Ka e manako a tautolu ke taute e tau mena kua fakafiafia a Iehova. Ato taute e tautolu e fifiliaga, lata a tautolu ke manamanatu hagaao ke he mena ne talahau he Tohi Tapu ti omaoma mogoia ki ai. Ma e fakatai, tala mai e Tohi Tapu ki a tautolu e logonaaga he Atua ke he fakaaoga he toto, ti muitua a tautolu ke he mena ne talahau ai. (Kenese 9:4; Gahua 15:28, 29) Maeke a tautolu ke liogi ki a Iehova ke lagomatai a tautolu ke taute e tau fifiliaga ke fakafiafia a ia.

⁵ Lauia a tautolu he tau fifiliaga ha tautolu. Lagomatai he fifiliaga mitaki a tautolu ke fakatata lahi ki a Iehova. Maeke he fifiliaga kelea ke moumou e fakafetuiaga ha tautolu mo ia. Maeke foki he tau fifiliaga ha tautolu ke lauia e falu tagata. Nakai manako a tautolu ke taute ha mena kua liga fakaita e tau matakainaga ha tautolu po ke fakalolelole e tua ha lautolu. Nakai manako foki a tautolu ke fakatupu e tau lekua ke he vahāloto he tau matakainaga he fakapotopotoaga. Ti aoga ma tautolu ke taute e tau fifiliaga mitaki.​—Totou Roma 14:19; Kalatia 6:7.

6. Ko e heigoa kua lata ke takitaki e tau fifiliaga ha tautolu?

⁶ Ka nakai tala mai fakatonu he Tohi Tapu ki a tautolu e mena kua lata ia tautolu ke taute, maeke fēfē a tautolu ke taute e tau fifiliaga mitaki? He nakai taute noa ni e mena ne loto a tautolu, kua lata a tautolu ke manamanatu fakamitaki hagaao ke he tuaga ni ha tautolu mo e taute e fifiliaga ka fakafiafia a Iehova. Ti maeke a tautolu ke iloa tonu to lagomatai e ia a tautolu ke moua e tau fua mitaki.​—Totou Salamo 37:5.

7. He nakai fai matafakatufono he Tohi Tapu, maeke fēfē a tautolu ke moua e mena kua manako a Iehova ke taute e tautolu he tuaga pauaki?

⁷ Ka e iloa fēfē e tautolu e mena kua fakafiafia a Iehova? Tala mai e Efeso 5:17: “Kia iloa e  mutolu e finagalo he Iki [Iehova].” Ka nakai fai matafakatufono pauaki he Tohi Tapu, kua lata a tautolu ke iloa, po ke maama e manako ha Iehova ke taute e tautolu he tuaga ha tautolu. Maeke fēfē a tautolu ke taute e mena ia? Lata ia tautolu ke liogi ki a ia mo e fakaatā e agaaga tapu haana ke takitaki a tautolu.

8. Iloa fēfē e Iesu e mena ne manako a Iehova ke taute e ia? Talahau e fakatai.

⁸ Iloa tumau e Iesu e mena ne manako a Iehova ke taute e ia. Ma e fakatai, lagaua ai e magaaho ne hoge e moto tagata ati liogi a Iesu mo e fagai a lautolu he puhala fakamana. (Mataio 14:17-20; 15:34-37) Ka ko e mogo ne hoge a ia he tutakale ti manako e Tiapolo ki a ia ke fakafaliu e tau maka ke he tau areto, ne nakai taute e Iesu. (Totou Mataio 4:2-4.) Iloa mitaki e ia e Matua haana, ti iloa e ia to nakai manako a Iehova ke fakaaoga e ia e agaaga tapu ke lata ma e tau manako ni haana. Mailoga mooli e ia to takitaki mo e foaki age he Matua haana e tau mena kai ka manako a ia ki ai.

9, 10. Ko e heigoa ka lagomatai a tautolu ke taute e tau fifiliaga pulotu? Fakatai.

⁹ Tuga a Iesu, maeke a tautolu ke taute e tau fifiliaga mitaki ka falanaki a tautolu ki a Iehova ke takitaki a tautolu. Pehē e Tohi Tapu: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala. Aua neke fakafiailoilo a koe; kia matakutaku a kia Iehova, kia kalo kehe mo e mahani kelea.” (Tau Fakatai 3:5-7) Ka fakaako a tautolu ke he Tohi Tapu ti iloa e finagalo ha Iehova, to maama e tautolu e mena ne manako a ia ke taute e tautolu he tuaga pauaki. Ko e lahi e fakaako ha tautolu ke he puhala manamanatu ha Iehova, to mukamuka lahi ma tautolu ke taute e tau fifiliaga ka fakafiafia a ia. He puhala nei, maeke a tautolu ke loto kakano lahi ke he takitakiaga he Atua.​—Esekielu 11:19.

¹⁰ Manamanatu la ke he fifine fai taane kua fano ke fakatau ti kitia e tevae fuluola. Ka e tauuka lahi ai. Pete kua nakai haia e taane haana mo ia, iloa e ia e manatu he taane haana ka lahi e tupe ka fakamole e ia. Iloa fēfē e ia? Kua fai magaaho tuai he mau a ia ke he taane haana ti iloa e ia e manako he taane ke fakaaoga e tupe kua moua e laua. He puhala taha ia, ka fakaako a tautolu ke he puhala kua manamanatu a Iehova mo e mena kua taute e ia i tuai, to iloa e tautolu e mena ka manako a ia ke taute e tautolu he tau tuaga kehekehe.

11. Ko e heigoa e tau hūhū ka hūhū hifo e tautolu ka totou po ke fakaako e tautolu e Tohi Tapu? (Kikite puha “ Ka Fakaako a Koe he Tohi Tapu, Hūhū Hifo.”)

¹¹ Maeke fēfē a tautolu ke iloa e manatu ha Iehova? Ko e mena ne aoga lahi ka taute e tautolu ko e totou mo e fakaako tumau e Tohi Tapu. He taute e tautolu e mena nei, maeke a tautolu ke hūhū hifo: ‘Ko e heigoa he mena nei kua fakaako ki a au hagaao ki a Iehova? Ko e ha ne taute e ia e mena nei?’ Tuga a Tavita, kua lata foki a tautolu ke ole ki a Iehova  ke lagomatai a tautolu ke iloa mitaki a ia. Tohi e Tavita: “Iehova na e, kia fakailoa mai kia au hāu a tau puhala; kia fakaako mai e koe au ke he hau a tau hala. Kia takitaki e koe au ke he mena moli mai ia koe, mo e fakaako mai kia au, ha ko koe ko e Atua he haku a fakamouiaga; kua tatali au kia koe ke he aho oti.” (Salamo 25:4, 5) Ka iloa e tautolu taha mena hagaao ki a Iehova, maeke a tautolu ke manamanatu ke he tau tuaga ka fakaaoga e tautolu e tau vala tala ia. Fakaaoga nakai e tautolu ke he magafaoa, gahua, aoga, po ke gahua fakamatala? Ka manamanatu a tautolu ke he tuaga pauaki, to mukamuka lahi ke iloa e mena ne manako a Iehova ke taute e tautolu ke fakaaoga e tau vala tala.

12. Maeke fēfē e tau tohi mo e tau feleveiaaga ha tautolu ke lagomatai a tautolu ke iloa mitaki e finagalo ha Iehova ke he tau matakupu kehekehe?

¹² Taha puhala foki ke iloa e tautolu e manatu a Iehova ko e muitua fakalahi ke he mena ne fakaako he fakatokatokaaga haana ki a tautolu mai he Tohi Tapu. Ma e fakatai, ka fai fifiliaga a tautolu ke taute, ko e Watch Tower Publications Index mo e Research Guide for Jehovah’s Witnesses ka lagomatai a tautolu ke moua e manatu a Iehova. Maeke foki a tautolu ke aoga mai he tau feleveiaaga Kerisiano ka fanogonogo  fakamitaki mo e tali a tautolu mo e manamanatu fakahokulo ke he mena ne kua fakaako mai. To lagomatai he mena nei a tautolu ke iloa e manatu ha Iehova. Ko e fua, to maeke a tautolu ke taute e tau fifiliaga ka fakafiafia a ia mo e to fakamonuina e ia.

13. Talahau e fakatai ka taute e tautolu e fifiliaga iloilo he magaaho ka manamanatu a tautolu ke he finagalo ha Iehova.

¹³ Kia onoono la tautolu ke he fakafifitakiaga ka taute e tautolu e fifiliaga pulotu ka manamanatu a tautolu ke he manatu ha Iehova. Liga manako a koe ke paionia. Taute e koe falu hikiaga he moui haau ke maeke a koe ke fakalahi e magaaho he fonua. Ka e liga nakaila iloa tonu e koe to fiafia mooli a koe ke he nakai lahi e tupe mo e tau koloa gahoa. Mooli nakai talahau he Tohi Tapu kua lata a tautolu ke paionia ke fekafekau ki a Iehova. Maeke a tautolu ke fekafekau fakamooli tumau ki a ia ko e tau tagata fakailoa. He taha faahi, pehē a Iesu kua fakamonuina e Iehova a lautolu kua taute e tau foakiaga ke lata mo e Kautu. (Totou Luka 18:29, 30.) Pehē foki e Tohi Tapu kua fiafia a Iehova ka taute e tautolu e tau mena oti kua maeke ia tautolu ke fakaheke a ia, ti manako a ia ki a tautolu ke fiafia he fekafekau ki a ia. (Salamo 119:108; 2 Korinito 9:7) He liogi hagaao ke he tau mena nei mo e manamanatu fakahokulo ki ai, maeke ia tautolu ke taute e fifiliaga kua aoga ke he tuaga ha tautolu mo e to fakamonuina ai e Iehova.

14. Maeke fēfē a koe ke fifili kaeke kua fiafia a Iehova ke he falu puhala mena tui?

¹⁴ Hanei foki taha fakataiaga: Manako mooli a koe ke he sitaila pauaki he mena tui, ka e iloa e koe to tupetupe falu he fakapotopotoaga ka tui e koe e tau mena tui ia. Nakai talahau he Tohi Tapu ha mena hagaao ke he sitaila pauaki ia. Ti maeke fēfē a koe ke iloa e manatu a Iehova? Pehē e Tohi Tapu ki a tautolu: “Kua pihia mo e tau fifine, kia taute e lautolu a lautolu ke he tau tapulu kua gali, mo e maimaina mo e mahani fakalatalata; aua neke taute mo e lauulu fili, po ke auro, po ke tau penina, po ke tapulu fakafua lahi; Ka kia taute a lautolu ke he tau gahua mitaki, (ko e mena haia kua lata mo e tau fifine kua talahaua e lautolu a lautolu kua mahani Atua.)” (1 Timoteo 2:9, 10) Mooli, ko e tau fekafekau oti ha Iehova, putoia e tau tagata taane ka fakaako mai he tau kupu nei. Ka mahani fakalatalata a tautolu to manamanatu a tautolu ke he tau logonaaga he falu hagaao ke he tau mena tui kua fifili e tautolu ke tui. Ha kua fakaalofa a tautolu ke he tau matakainaga ha tautolu, kalo kehe a tautolu he fakatupetupe po ke fakaita a lautolu. (1 Korinito 10:23, 24; Filipi 3:17) Ka manamanatu a tautolu ke he mena ne talahau he Tohi Tapu mo e manatu a Iehova, maeke a tautolu ke taute e tau fifiliaga ka fiafia a ia ki ai.

15, 16. (a) Fēfē e logonaaga ha Iehova ka manamanatu tumau a tautolu ke he tau mahani feuaki? (e) Ka fifili e tautolu e tau fakafiafiaaga, maeke fēfē a tautolu ke iloa e mena ne fiafia ki ai a Iehova? (i) Lata fēfē e tau fifiliaga lalahi ke taute?

¹⁵ Mai he Tohi Tapu, maeke a tautolu ke iloa kua mamahi lahi e finagalo ha Iehova mo e momoko ka taute he tau tagata e tau mena kelea mo e ka manamanatu a lautolu ke he tau mena kelea. (Totou Kenese 6:5, 6.) Maaliali ai kua nakai manako a Iehova ki a tautolu ke mohemiti ke he tau logonaaga feuaki. Kaeke ke manamanatu tumau a tautolu ke he tau mena nei to maeke ia tautolu ke taute ai. Ka kua manako a Iehova ki a tautolu ke manamanatu ke he tau mena kua meā mo e mitaki.  Tohia he tutaki ko Iakopo ko e iloilo ha Iehova kua “fakamua hana a mea, ti mafola, ti totonu, ti fulumokoi, kua puke ke he fakaalofa mo e tau fua mitaki, nakai fakaalofa fakaigati, nakai fakatupua.” (Iakopo 3:17) Ti fakaako he Tohi Tapu ki a tautolu kua lata ia tautolu ke kalo kehe he tau fakafiafiaaga ka fakatupu a tautolu ke manamanatu po ke manako loto ke he tau mena nakai meā mo e kelea. Ka maama maaliali e tautolu e tau mena kua fiafia mo e tau mena kua vihiatia e Iehova, to mukamuka ma tautolu ke iloa ai ke fifili e tau tohi, tau kifaga, po ke tau pelē. To nakai lata a tautolu ke tala age ke he falu hagaao ke he mena kua lata ia tautolu ke taute.

¹⁶ Ka fai fifiliaga a tautolu ke taute, ha ha i ai loga e tau puhala ka fifili e tautolu mai ai ka fakafiafia oti ki a Iehova. Ka e, ka lata a tautolu ke taute e fifiliaga aoga lahi, liga mitaki ke ole ke he motua po ke matakainaga taane po ke fifine kua motua fakaagaaga ke foaki ki a tautolu falu fakatonuaga. (Tito 2:3-5; Iakopo 5:13-15) Mooli, nakai lata a tautolu ke ole ke he tagata ia ke taute e fifiliaga ma tautolu. Ka e lata ia tautolu ke manamanatu fakahokulo hagaao ke he mena ne iloa e tautolu mai he Tohi Tapu ti taute mogoia e tautolu e fifiliaga ni ha tautolu. (Heperu 5:14) Pehē e aposetolo ko Paulo: “To igatia e tagata mo e fua hana ni a kavega.”​—Kalatia 6:5.

17. Aoga fēfē a tautolu mai he taute e tau fifiliaga kua fiafia ki ai a Iehova?

¹⁷ Ka taute e tautolu e tau fifiliaga kua fakafiafia a Iehova, kua fakatata lahi a tautolu ki a ia ti moua e taliaaga mo e monuina haana. (Iakopo 4:8) Ti malolō lahi mogoia e tua ha tautolu ki a Iehova. Kia manamanatu fakahokulo a tautolu ke he mena kua totou e tautolu he Tohi Tapu ke maeke ke maama e tautolu e manatu haana. Mooli to fai mena foou tumau a tautolu ke iloa hagaao ki a Iehova. (Iopu 26:14) Kaeke ke gahua malolō a tautolu mogonei ke fakaako hagaao ki a ia, to pulotu a tautolu mo e to maeke ia tautolu ke taute e tau fifiliaga mitaki. (Tau Fakatai 2:1-5) Hiki e tau manatu mo e tau pulega he tau tagata, ka e nakai hiki ha Iehova. Pehē e salamo: “Tumau e pule a Iehova tukulagi, ko e tau fatuakiloto he hana finagalo ke hahau mo hahau ia.” (Salamo 33:11) Maaliali ai, maeke ia tautolu ke taute e tau fifiliaga kua mitaki lahi mahaki ka fakaako a tautolu ke manamanatu he puhala kua manatu a Iehova ti taute mogoia e mena kua fakafiafia ki a ia.