Fiafia ha ko e Moui Fakamukamuka
KO DANIEL MO MIRIAM ne mau ia Sepetema 2000 mo e hagahaga mitaki e moui i Barcelona i Sepania. Fakamaama e Daniel: “Ko e tau gahua ha maua ne fakaatā a maua ke kai he tau fale kai mitaki, ō evaeva ke he falu motu, mo e tui he tau mena tui tauuka. Fakalataha tumau foki a maua ke he gahua he fonua.” Ka e fai mena ne tupu.
Ke he fonoaga he 2006, logona e Daniel e lauga ne hūhū: “Kua taute nakai e tautolu e tau mena oti ke lagomatai a lautolu ne kua ‘kelipopo ha ne fai’ ke ha ha ai he puhala ke he moui tukulagi?” (Tau Fakatai 24:11) Fakamaama he lauga kua moua e tautolu e matagahua ke fakamatala e fekau he Tohi Tapu ha ko e tau momoui he tau tagata kua fakavē ki ai. (Gahua 20:26, 27) Manatu e Daniel, “Ha ha ia au e logonaaga kua tutala a Iehova ki a au.” Talahau foki he lauga kua fiafia lahi a tautolu ka lahi e mena ka taute e tautolu he fekafekauaga ha Iehova. Iloa e Daniel kua mooli e mena nei ha kua kitia e ia a Miriam, kua fitā e paionia ti lahi e fiafia.
Kua lauia lahi mahaki a Daniel he lauga nei ti fifili a ia kua lata ke taute e hikiaga lahi he moui haana. Kamata a ia ke fakatote hifo e tau tulā gahua, ti paionia agataha, mo e manamanatu ke he fiafia lahi haana mo Miriam ka fekafekau he matakavi ne kua lata ke moua e tau tagata fakamatala he Kautu.
KAMATA KE HE TAU LEKUA—FAKAHIKU KE HE VALA TALA FIAFIA
Ia Me 2007, ne toka e Daniel mo Miriam e gahua ha laua ti hiki ki Panama, ko e motu ne fitā e ahiahi atu fakamua a laua ki ai. Ko e fonua i ai ne loga e tau aelani he Bocas del Toro Archipelago he Caribbean Sea. Laulahi he tau tagata ne nonofo i ai ko e tau tagata Ngabe. Manatu a Daniel mo Miriam kua maeke ni a laua ke nonofo i Panama kavi ke he valu e mahina ke felauaki mo e tupe ne fitā he fakaputu e laua.
Ne fenoga a laua ke he tau aelani he posi mo e pasikala taholi. Manatu agaia e laua e magaaho fakamua ne heke a laua he tau pasikala taholi kavi ke 30 e kilomita he o hake he mouga tokoluga he aho vela lahi. Ne mategūgū lahi a Daniel ti teitei matefua a ia. Ka ko e tau magafaoa Ngabe ne feleveia mo laua kua lahi e fakamokoi, mua atu he fakaako he hoa mau falu kupu he vagahau motu. Nakai leva ti 23 e fakaako Tohi Tapu ha laua.
Ko e heigoa ne tupu he mole e oti e tau tupe ha laua he fakaaoga? Pehē a Daniel: “Mo e tau hihina mata ha maua, ne manamanatu agataha a maua ke liliu ki Sepania. Kua momoko lahi a maua ke toka hifo e tau tagata fakaako Tohi Tapu ha maua.” Ka e taha e mahina he mole, ne moua e laua e vala tala fiafia. Pehē a Miriam: “Uiina a maua ke eke mo tau paionia pauaki. Ko e fiafia mooli he maeke a maua ke fakatumau he kotofaaga ha maua!”
FIAFIA LAHI MAHAKI HA LAUA
Ha ko e tau hikiaga he fakatokatokaaga, ne nakai liu a Daniel mo Miriam ke fekafekau ko e tau paionia pauaki he 2015. Ko e heigoa ha laua ka taute mogonei? Falanaki a laua ke he maveheaga ne moua ia Salamo 37:5: “Kia tuku atu hāu a puhala kia Iehova, kia tua foki a koe kia ia, ti eke ai e ia.” Moua e laua e gahua ke maeke a laua ke leveki aki a laua ko e tau paionia tumau ti kua fekafekau a laua mogonei he fakapotopotoaga Veraguas i Panama.
Pehē a Daniel: “Ato toka e maua a Sepania, nakai iloa tonu e maua to maeke nakai a maua ke momoui fakamukamuka. Maeke a maua mogonei, ti nakai mativa a maua ke he tau mena kua aoga mooli.” Ko e heigoa e fiafia lahi mahaki ha laua? Pehē a laua: “Ke lagomatai e tau tagata loto tokolalo ke fakaako hagaao ki a Iehova ko e fiafia ne nakai fai mena ke fakatatai ki ai!”