1, 2. (a) Ko hai ne hagaao fakamua e tau kupu ha Iesu ia Mataio 24:12 ki ai? (e) Fakakite fēfē he tohi ha Gahua kua laulahi he tau Kerisiano fakamua atu ne tumau ai e malolō he fakaalofa? (Kikite fakatino he kamataaga.)

KO E mogo ne nofo a Iesu he lalolagi, ne fakamaama e ia e puhala ka kitia he tau tagata e “fakaotiaga he lalolagi.” Falu mena foki ne talahau tuai e ia ko e: ‘Momoko foki e fakaalofa he tau loto he tau tagata tokologa.’ (Mataio 24:3, 12) Ko e tau Iutaia he senetenari fakamua ne totoku ko e tau tagata he Atua ka kua fakaatā e lautolu e fakaalofa ha lautolu ke he Atua ke momoko.

² Ka e laulahi he tau Kerisiano he magahala ia ne kehe lahi e aga. Kua fakamakutu a lautolu he fakamatala e “tala mitaki kia Iesu Keriso” mo e fakakite e fakaalofa ke he Atua, ke he tau matakainaga, mo e falu ne nakaila iloa e kupu mooli. Ko e tau Kerisiano nei ne tumau ke malolō e fakaalofa ke he Atua. (Gahua 2:44-47; 5:42) Ka kua ha ha i ai falu Kerisiano fakamua atu ne momoko e fakaalofa. Iloa fēfē e tautolu e mena nei?

3. Ko e ha ne liga momoko e fakaalofa he falu Kerisiano?

³ Tala age a Iesu ke he tau Kerisiano fakamua atu ne nonofo i  Efeso: “Kua toka e [mutolu e] fakaalofa fakamua.” (Fakakiteaga 2:4) Liga ko e tau Kerisiano i Efeso ne kua fakaohooho he tau tagata ne agaagai ia lautolu ne manako pauaki ke fakafiafia ni a lautolu. (Efeso 2:2, 3) Ko e taone mautū a Efeso ne manamanatu ni e tau tagata ke he hagahaga mitaki mo e maukoloa ha lautolu. Tokologa foki i Efeso ne mahani feuaki mo e nakai fakalilifu ke he tau matafakatufono he Atua. Ne manamanatu lahi a lautolu ke he tau fakafiafiaaga ka e nakai fakakite e fakaalofa mooli ke he Atua mo e falu.

4. (a) Puhala fe kua momoko e fakaalofa he magahala ha tautolu? (e) He tau vala tolu fe kua lata a tautolu ke tumau e malolō he fakaalofa ha tautolu?

⁴ Ko e tau kupu ha Iesu hagaao ke he fakaalofa kua momoko ne aoga foki mogonei ki a tautolu. Kua tote maka e fakaalofa he tau tagata mogonei ke he Atua. He nakai onoono atu ke he Atua ke fakamafola e tau lekua he lalolagi, totou miliona he tau tagata ne onoono atu ke he tau fakatokatokaaga he tau tagata. Matutaki e fakaalofa ha lautolu ke momoko. Maeke foki e fakaalofa he tau fekafekau ha Iehova ke momoko tuga ni ne tupu he fakapotopotoaga i tuai ha Efeso. Kia fakatutala a tautolu mogonei ke he tolu e vala kua lata a tautolu ke tumau e malolō he fakaalofa ha tautolu: (1) fakaalofa ki a Iehova, (2) fiafia ke he kupu mooli he Tohi Tapu, mo e (3) fakaalofa ke he tau matakainaga ha tautolu.

5. Ko e ha kua lata a tautolu ke fakaalofa ke he Atua?

⁵ Ko hai kua lata ke lahi e fakaalofa ha tautolu ki ai? Pehē a Iesu: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa. Ko e poaki fakamua hanā mo e lahi.” (Mataio 22:37, 38) Ko e ha tautolu a fakaalofa ke he Atua kua lagomatai a tautolu ke omaoma ke he haana a tau poakiaga, ke fakauka, mo e ke vihiatia e kelea. (Totou Salamo 97:10.) Ka ko Satani mo e lalolagi haana ne lali ke fakalolelole mo e moumou ha tautolu a fakaalofa ke he Atua.

6. Ko e heigoa kua tupu ka galo e fakaalofa he tau tagata ke he Atua?

⁶ Kua malokiloki e onoonoaga he lalolagi ke he fakaalofa. He lata ke fakaalofa ke he Atua, ne “ofaofa he tau tagata a lautolu ni.” (2 Timoteo 3:2) Hagaaki a lautolu ke he “manako lahi he tino, mo e manako lahi he tau mata, katoa mo e tau mena he mouiaga nai ke hula ki ai.” (1 Ioane 2:16) Hataki he aposetolo ko Paulo e mena ka tupu ka ofaofa fakamua e tautolu a tautolu. Pehē a ia: “Ko e loto ke he tau mena he tino ko e mate haia.” Ko e ha? Ha ko lautolu ne taute e mena nei kua eke mo tau fī he Atua. (Roma 8:6, 7) Ko e tau tagata ne fakaaoga e tau momoui ke hagaaki ke moua e tau tupe po ke fakamakona e tau manako feuaki kua fakahiku ni ke he loto mamahi.​—1 Korinito 6:18; 1 Timoteo 6:9, 10.

7. Ko e heigoa e tau manatu hagahaga kelea ka lauia e tau Kerisiano mogonei?

⁷ Tokologa ne talitonu kua nakai fai Atua, tuahā ke he fakaakoaga faka-Atua, mo e talitonu ke he tupumainoa ne lali ke fakaohooho falu ke nakai fakaalofa ke he Atua po ke talia na moui a Ia. Taute e lautolu ke tuga ko e tagata ne goagoa po ke nakai fakaako ni ka talitonu ke he Tufuga. Lafi ki ai, tokologa e tagata ne fakalilifu lahi ke he tau saienetisi ka e nakai ke he Tufuga. (Roma 1:25) Maeke foki e Kerisiano ke lauia he tau manatu nei. To lolelole e fakafetuiaga ha tautolu mo Iehova, ti momoko ai e fakaalofa ha tautolu.​—Heperu 3:12.

8. (a) Ko e heigoa e tau tutūaga ka fakalolelole e tau tagata ha Iehova? (e) Fakamafana fēfē he Salamo 136 a tautolu?

⁸ Ha kua nonofo a tautolu he fakatokaaga  kelea ha Satani, loga e tau kakano ati logona hifo e tautolu e loto lolelole falu magaaho. (1 Ioane 5:19) Kaeke ke fakaatā a tautolu ke loto lolelole lahi foki, maeke he tua ha tautolu ke lolelole mo e fakaalofa ke he Atua ke momoko. Ma e fakatai, liga fehagai a tautolu mo e tau lekua ha ko e motua fakahaga he tino, gagao, po ke tau lekua fakatupe. Po ke liga momoko a tautolu ha kua nakai maeke ke taute e tau mena ne amanaki a tautolu ki ai. Liga loto mamahi a tautolu ha kua nakai fakahiku mitaki e amaamanakiaga ha tautolu he moui. Pete ni e tau paleko ne fehagai mo tautolu, nakai lata a tautolu ke logona hifo kua tiaki e Iehova a tautolu. Manamanatu ke he tau kupu mafanatia nei ia Salamo 136:23: “Ko ia ne manatu a tautolu ka kua takaveli a tautolu; ha ko e mena tukulagi ni hana fakaalofa.” Maeke a tautolu ke iloa tonu kua logona e Iehova ha tautolu “a tau ole” mo e to tali ai e ia.​—Salamo 116:1; 136:24-26.

9. Ko e heigoa ne fakamalolō a Paulo ke tumau e fakaalofa haana ke he Atua?

⁹ Ko e aposetolo ko Paulo ko e fekafekau he Atua ne hokulo e manamanatuaga ke he puhala ne lagomatai e Iehova a ia ti fakamalolō he mena nei a ia ke fakatumau e loto malolō. Tohi e ia: “Ko e Iki [Iehova], ko e haku a lagomatai haia, nakai matakutaku au ke he tau mena ke eke he tau tagata kia au.” (Heperu 13:6) Ko e mauokafua ha Paulo ki a Iehova ne lagomatai a ia ke fehagai mo e tau paleko he moui. He lauia a Paulo mo e tau tutūaga uka, ne nakai galo haana mauokafua ki a Iehova. Pihia foki he nofo a ia he fale puipui, ne lagomatai e ia e tau matakainaga he tohia e tau tohi fakamafana ke he tau fakapotopotoaga. (Efeso 4:1; Filipi 1:7; Filemoni 1) Pete ne tau lekua ne fehagai mo Paulo, ne tumau e malolō he fakaalofa haana ki a Iehova. Falanaki a ia ke he “Atua foki hana e tau fakamafanaaga oti, . . . kua fakamafana mai . . . ke he ha mautolu a tau matematekelea oti.” (2 Korinito 1:3, 4) Fifitaki fēfē e tautolu a Paulo?

10. Maeke fēfē a tautolu ke tumau e malolō he fakaalofa ha tautolu ki a Iehova?

¹⁰ Fakamaama e Paulo taha puhala ka tumau e fakaalofa ha tautolu ke he Atua he  tohi e ia: “Kia liogi nakai noa.” Tohi foki e ia fakamui: “Kia fakamakamaka ke he liogi.” (1 Tesalonia 5:17; Roma 12:12) Ko e ha e liogi kua fakatata lahi a tautolu ke he Atua? Ka liogi a tautolu, kua matutaki a tautolu mo Iehova. Maeke he mena nei ke moua e tautolu e fakafetuiaga mitaki mo ia. (Salamo 86:3) Ka tala age e tautolu ke he ha tautolu a Matua he lagi e tau fatuakiloto mo e tau logonaaga hokulo ha tautolu, kua fakatata lahi a tautolu ki a ia. (Salamo 65:2) Ti tupu foki e fakaalofa ha tautolu ki a Iehova he kitia e puhala ne tali e ia e tau liogi ha tautolu. Mauokafua a tautolu “kua tata mai a Iehova kia lautolu oti kana ne ui atu kia ia.” (Salamo 145:18) Ko e mauokafua ha tautolu ke he fakaalofa mo e lalagoaga ha Iehova to lagomatai a tautolu ke fehagai mo e tau lekua ne lauia a tautolu mogonei mo e anoiha.

11, 12. Maeke fēfē a tautolu ke fakalaulahi e fiafia ke he kupu mooli he Tohi Tapu?

¹¹ Ha ko e tau Kerisiano, kua fiafia a tautolu ke he kupu mooli. Moua e tautolu e kupu mooli he Tohi Tapu. Tala age a Iesu ke he Matua haana: “Ko e hau a kupu ko e kupu moli haia.” (Ioane 17:17) Ke fiafia ke he kupu mooli he Tohi Tapu, lata a tautolu ke iloa e tau mena i loto. (Kolose 1:10) Ka e ha ha i ai foki falu mena. Mailoga e lagomataiaga ki a tautolu mai he tagata tohia he Salamo 119 ke maama e tau mena kua lata ia tautolu ke taute. (Totou Salamo 119:97-100.) He aho katoa, lata a tautolu ke manamanatu fakahokulo ke he mena ne totou e tautolu he Tohi Tapu. He manamanatu fakahokulo a tautolu ke he puhala kua aoga a tautolu mai he fakagahua e kupu mooli he Tohi Tapu ke he tau momoui ha tautolu, to fiafia lahi mahaki a tautolu ki ai.

¹² Talahau foki he salamo: “Kua humelie na ati kehe hāu a tau vagahau ke he haku a gutu; kua mua ni ke he meli ke he haku a gutu.” (Salamo 119:103) Ko e tau tohi ne fakavē ke he Tohi Tapu ne tauteute he fakatokatokaaga he Atua kua tuga e tau mena kai lolo. Ka kai e tautolu e tau mena kai ne fiafia a tautolu ki ai, maeke a tautolu ke nakai kai fakaaveave. He puhala pihia, manako a tautolu ke nakai fakaaveave e kumikumi ha tautolu. To moua mooli e tautolu e “tau kupu ke fiafia ai” he kupu mooli, ti mukamuka lahi ke manatu e mena ne totou e tautolu mo e fakaaoga ai ke lagomatai e falu.​—Fakamatalaaga 12:10.

13. Ko e heigoa ne lagomatai a Ieremia ke fiafia ke he tau kupu he Atua? Lauia fēfē a ia?

¹³ Na fiafia e perofeta ko Ieremia ke he tau kupu he Atua. Pehē a ia: “Ne moua hau a tau kupu, ti kai ai e au; ti eke hau a tau kupu kia au mo mena ke olioli ai mo e fiafia ia haku loto; ha kua ui au ke he hau a higoa, Iehova na e, ko e Atua Sapaota.” (Ieremia 15:16) Manamanatu fakahokulo a Ieremia ke he tau kupu mitaki he Atua ti fiafia a ia ki ai. Loto fakaaue a ia ha kua maeke ke fakailoa a Iehova mo e fakapuloa e fekau Haana. Ka fiafia a tautolu ke he kupu mooli he Tohi Tapu, to mailoga e tautolu e kotofaaga uho ha tautolu ke eke mo Tau Fakamoli ha Iehova mo e ke fakamatala e Kautu he tau aho fakamui nei.

14. Ko e heigoa foki taha mena ka taute e tautolu ke fakalaulahi e fiafia ha tautolu ke he kupu mooli he Tohi Tapu?

¹⁴ Ko e heigoa foki taha mena ka lagomatai a tautolu ke fakahokulo e fiafia ke he kupu mooli he Tohi Tapu? Lata a tautolu ke ō tumau ke he tau feleveiaaga ne kua fakaako e Iehova a tautolu. Ko e fakaako ke he Tohi Tapu he fakaaoga he Ko e Kolo Toko he tau faahi tapu takitaha ko e taha he tau matapatu  puhala ne fakaako ki a tautolu. Ka manako a tautolu ke aoga katoatoa mai he feleveiaaga nei, kua lata a tautolu ke tauteute tuai. Ma e fakatai, kumi e tautolu e tau kupu Tohi Tapu oti ne tutū i ai. Tokologa mogonei ne mukamuka ke totou po ke moua mai e Kolo Toko he initanete ha kua moua ai ke he loga e vagahau he faahi kupega hila he jw.org mo e he JW Library app. Falu puhala ne taute ai ke moua mafiti e tautolu e tau kupu tohi ne tutū ai. Ka e fifili a tautolu ke kumikumi e tau vala tala takitaha, ka totou fakamatafeiga mo e manamanatu fakahokulo ke he tau kupu tohi to tupu e fiafia ha tautolu ke he kupu mooli he Tohi Tapu.​—Totou Salamo 1:2.

15, 16. (a) Hagaao ke he Ioane 13:34, 35, ko e heigoa e poakiaga ne tuku mai e Iesu ki a tautolu? (e) Matutaki fēfē e fakaalofa ha tautolu ke he Atua mo e fiafia ke he Tohi Tapu mo e fakaalofa ha tautolu ke he tau matakainaga ha tautolu?

¹⁵ He pō fakahiku ha Iesu he lalolagi, pehē a ia ke he tau tutaki haana: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”​—Ioane 13:34, 35.

¹⁶ Ko e fakaalofa ke he tau matakainaga ha tautolu kua matutaki mo e fakaalofa ki a Iehova. Ka nakai fakaalofa a tautolu ke he Atua, kua nakai maeke a tautolu ke fakaalofa ke he tau matakainaga ha tautolu. Ti ka nakai fakaalofa a tautolu ke he tau matakainaga, kua nakai maeke a tautolu ke fakaalofa ke he Atua. Tohi he aposetolo ko Ioane: “Ha ko ia kua nakai fakaalofa ke he matakainaga hana kua kitia, maeke fefe ia ia ke fakaalofa ke he Atua, kua nakai kitia e ia?” (1 Ioane 4:20) Ko e ha tautolu a fakaalofa ki a Iehova mo e tau matakainaga ha tautolu kua matutaki ke he fiafia ha tautolu ke he Tohi Tapu. Ko e ha? Kakano ka fiafia a tautolu ke he mena kua fakaako e tautolu he Tohi Tapu, to manako a tautolu ke omaoma ke he tau poakiaga ne moua e tautolu i ai ke fakaalofa ke he Atua  mo e tau matakainaga ha tautolu.​—1 Peteru 1:22; 1 Ioane 4:21.

17. Ko e heigoa falu puhala ka fakakite e tautolu e fakaalofa?

¹⁷ Totou 1 Tesalonia 4:9, 10. Ko e heigoa falu puhala aoga ka fakakite e tautolu e fakaalofa ki a lautolu he fakapotopotoaga ha tautolu? Liga manako lagomatai e matakainaga motua ke ta atu mo e liuaki mai he tau feleveiaaga. Liga manako lagomatai e takape ke fakafoou taha mena he kaina haana. (Iakopo 1:27) Ko e tau matakainaga kua loto lolelole, fakaatukehe, po ke fehagai mo e falu lekua kua lata ke moua e leveki, fakamalolō, mo e fakamafana ha tautolu. (Tau Fakatai 12:25; Kolose 4:11) Fakakite e tautolu kua fakaalofa a tautolu ke he “faoa ne tua” ha ko e tau mena ne talahau mo e taute e tautolu.​—Kalatia 6:10.

18. Ko e heigoa ka lagomatai a tautolu ke fakamafola e tau fekehekeheaki mo e tau matakainaga?

¹⁸ Talahau he Tohi Tapu “ko e tau aho fakamui” he fakatokaaga kelea nei, tokologa e tagata ka lotokai mo e velevelemena. (2 Timoteo 3:1, 2) Ha ko e tau Kerisiano, lata a tautolu ke eketaha tumau ke tupu e fakaalofa ki a Iehova, ke he Kupu haana, mo e fefakaalofaaki e taha mo e taha. Ha kua nakai mitaki katoatoa a tautolu, liga fehagai a tautolu falu mogo mo e tau fekehekeheaki ikiiki mo e tau matakainaga ha tautolu. Ka e he fefakaalofaaki a tautolu ko e taha mo e taha, to lali a tautolu ke fakamafola fakamafiti e tau fekehekeheaki he puhala totonu. (Efeso 4:32; Kolose 3:14) Kia nakai fakaatā e fakaalofa ha tautolu ke momoko! Ka e fakatumau ke fakaalofa lahi ki a Iehova, ke he Kupu haana, mo e tau matakainaga ha tautolu.