KAVI ke he tau 1910, ne hiki e tau matua haaku mai i Tbilisi i Georgia, ki Canada. Ne nonofo a laua he fale nakai lahi he faama tata ki Pelly i Saskatchewan, he faahi lalo i Canada. Fanau au he 1928, ti ko e tama fakahiku au he fanau tokoono. Mate e matua taane haaku ono e mahina ato fanau au ti mate e matua fifine haaku he tama mukemuke agaia au. Nakai leva, ne mate e mahakitaga lahi haaku ko Lucy he 17 e tau he moui. Ti leveki he agikolo haaku ko Nick a au mo e lafu haaku.

Taha aho he tote agaia au, ne kitia he magafaoa haaku au ne toho e hiku he taha he tau solofanua ha mautolu. Ne hopoate a lautolu neke tele he solofanua au ti tauhea ki a au ke ua taute e mena ia. Ka ko e tua haaku kua haga ki a lautolu ti nakai logona e au e tauhea ha lautolu. Fakaaue ai, nakai pakia au. Ka ko e aho ia ne mailoga he magafaoa haaku kua teligatuli au, ha kua nakai vagahau po ke logona.

Ko e kapitiga he magafaoa ne pehē kua mitaki ke fano au he aoga ne ha ha i ai e falu tama teligatuli. Ti fakafano he agikolo ko Nick au he aoga ma e tau tagata teligatuli i Saskatoon i Saskatchewan. Kua mamao e aoga nei mai he magafaoa haaku, mo e lima laia e tau haaku he moui, ti hopoate lahi au. Maeke ni au ke ahiahi atu ke he magafaoa haaku he tau magahala okioki mo e vahā mafana. Fakahiku ai, ne fakaako e au e vagahau matalima ti fiafia he pelē mo e falu fanau.

He 1939, ko e mahakitaga lahi haaku ko Marion ne mau ki a Bill Danylchuck, ti kamata ke leveki au mo e mahakitaga haaku ko Frances. Ko laua he magafaoa haaku ne kamata ke fakaako fakamua mo e Tau Fakamoli a Iehova. He tau magahala okioki haaku he vahā mafana, ne eketaha a laua ke matutaki ki a au e tau mena ne fakaako e laua mai he Tohi Tapu. Nakai mukamuka ia mautolu ke matutaki ha kua nakai iloa e laua e vagahau matalima. Ka e maeke agaia a laua ke kitia kua fiafia mooli au ke he mena ne fakaako e au hagaao ki a Iehova. Maama e au ko e mena ne taute e laua kua liga matutaki mo e mena ne talahau he Tohi Tapu ti fano au mo laua he gahua fakamatala ha laua. Nakai leva he mole, ne manako au ke papatiso, ia Sepetema 5, 1941 ne papatiso e Bill au he pā lapatoa ne puke he vai mai he vaikeli. Makalili lahi mahaki e vai!

He 1946, ne liu au ki kaina he vahā mafana ti o atu a mautolu he fonoaga ki Cleveland i Ohio i U.S.A. He aho fakamua ne tohi he tau mahakitaga haaku e tau manatu ke maeke au ke muitua e fakaholoaga. Ka e aho ke uaaki, fiafia au ke iloa na fai matakau he tau tagata teligatuli mo e taha e tagata fakahokohoko he vagahau matalima he fonoaga. Ne fiafia lahi au ke he fakaholoaga ti ko e mena homo ue atu ke maama mooli e mena ne fakaako he Tohi Tapu!

He magaaho ia, ko e oti laia e Felakutaki II he Lalolagi, ti manako e tau tagata ke fakakite kua fakamooli a lautolu ke he motu. Ka e he liu mai au he fonoaga ti liu he aoga, ne eketaha au ke fakatumau e mahani fakamooli ki a Iehova. Ti oti e fakalataha haaku he saluti ke he matini, lologo motu, mo e tau fakamanatuaga aho okioki. Oti foki e fano haaku ke he tapu mo e tau kapitiga aoga haaku. Nakai fiafia e tau faiaoga, ti lali a lautolu ke vale ki a au mo e talahau e tau pikopiko ke hiki e manatu haaku. Mailoga he tau kapitiga aoga haaku e mena ne tupu, ti moua e au e magaaho lahi ke fakamatala ki a lautolu. Falu he tau kapitiga aoga haaku putoia ai a Larry Androsoff, Norman Dittrick, mo Emil Schneider, ne talia e kupu mooli he mogo fakamui ti fekafekau agaia a lautolu ki a Iehova.

He ahiahi atu au ke he falu taone foki, ne lali tumau au ke fakamatala ke he tau tagata teligatuli. Ma e fakatai, i Montreal ne fano au ke he matakavi he tau tagata teligatuli. I ai, ne fakamatala au ki a Eddie Tager, ko e fuata taane ne eke mo kege fakamua. Ato hoko e mate haana he tau kua mole, ko ia he fakapotopotoaga vagahau matalima i Laval i Quebec. Feleveia foki au mo e fuata ko Juan Ardanez. Tuga e tau Perea i tuai, ne kumikumi a ia ke iloa tonu ko e tau mena ne fakaako e ia ki ai kua fakavē ke he Tohi Tapu. (Gahua 17:10, 11) Ne hau foki a ia ke he kupu mooli ti fekafekau i Ottawa, Ontario ato mate a ia.

He 1950, ne hiki au ki Vancouver. Pete he fiafia au ke fakamatala ke he tau tagata teligatuli, ne nakai nimo e au e taha mena ne tupu. Ko Chris Spicer ko e fifine nakai teligatuli, ne fakamatala au ki ai he puhalatū. Talia e ia e mekasini moua mau ti manako ki a au ke feleveia mo e taane haana ko Gary. Ahiahi atu au ke he kaina ha laua ti loa e fakatutalaaga he tohi e tau manatu ti feutaaki. Nakai fekitiaaki a mautolu he mogo fakamui ato fai tau gahoa he mole, ti ofo au he o mai a laua ke feleveia mo au he fonoaga i Toronto i  Ontario. Amanaki a Gary ke papatiso he aho ia. Fakamanatu he mena ia ne tupu ki a au e aoga ke fakamatala tumau, ha ko e mena nakai iloa e tautolu to fai tagata ne fakamatala a tautolu ki ai ka hau ke he kupu mooli he mogo fakamui.

Fakahiku, ne liu au ki Saskatoon. Ti feleveia au mo e fifine ne ole ki a au ke fakaako e Tohi Tapu mo e tau mahaga fifine haana ne teligatuli ko Jean mo Joan Rothenberger. Ko e fanau aoga a laua he aoga teligatuli ne fano foki au ki ai. Nakai leva ti tala age e laua ke he tau kapitiga e tau mena ne fakaako a laua ki ai. Mogo fakamui ne tokolima mai he vahega ha laua ne eke mo Tau Fakamoli a Iehova. Taha ha lautolu ia ko Eunice Colin. Feleveia fakamua e au a Eunice he tau fakahiku haaku he aoga ma e tau tagata teligatuli. Mogoia ne mai e ia ki a au e vala lole ti ole ke kapitiga a maua. Mogo fakamui ne eke a ia mo vala aoga lahi he moui haaku. Ko ia ko e hoana haaku!

He iloa he matua fifine ha Eunice kua fakaako a ia ke he Tohi Tapu ne ole e matua fifine ke he ulu faiaoga ke fakaohooho a Eunice ke oti e fakaako. Pete he lali e ulu faiaoga mo e utakehe e tau tohi ha Eunice, ka kua eketaha tumau ni a ia ke mahani fakamooli ki a Iehova. He manako a ia ke papatiso, tala age e tau matua haana ki a ia, “Eke mo taha he Tau Fakamoli a Iehova ti fano kehe he kaina ha maua!” Ko e mogo ne 17 e tau ha Eunice he moui ne toka e ia e kaina ti hiki atu ke he magafaoa Fakamoli. Matutaki ai e fakaako haana ti papatiso he mogo fakamui. Magaaho ne mau a maua he 1960, ne nakai o mai e tau matua haana ke he aho mau ha maua. Ka e he tau tau loga kua mole, kua tupu e fakalilifu ha laua ki a maua ha ko e tau taofiaga ha maua mo e puhala ne feaki e maua e fanau.

Ha ko e tau matua teligatuli, ne paleko ke feaki e tau tama taane tokofitu ne  nakai teligatuli. Ka e eketaha a maua ke iloa e lautolu e vagahau matalima ti maeke ia mautolu ke matutaki fakamitaki mo e fakaako e kupu mooli ki a lautolu. Ko e tau matakainaga he fakapotopotoaga ne lagomatai lahi ki a maua. Ma e fakatai, ne tohi mai e matua ke talahau ko e taha he tau tama taane ha maua ne talahau e tau kupu kelea he Fale he Kautu. Maeke a maua ke fakatutala ke he matakupu he magaaho ia ni. Ti tokofā e tama taane haaku ko James, Jerry, Nicholas, mo Steven, ko e tau motua ti fekafekau fakamooli ki a Iehova mo e tau hoana mo e tau magafaoa ha lautolu. Ko Nicholas mo e hoana haana ko Deborah ne lagomatai ke he vagahau matalima he la ofisa i Britain, mo Steven mo e hoana haana ko Shannan ko e vala he matakau fakaliliu he vagahau matalima he la ofisa i United States.

Momoko ai, he mahina ato tu e 40 e tau he mau a maua, ne mate a Eunice he kenesā. He tau magaaho uka ia, ko e tua haana ke he liu tu mai kua fakamalolō ki a ia. Amanaki atu au ke he aho ka liu au ke kitia a ia.

Ia Fepuari 2012, ne veli au ti mapaki e  pula. Mailoga e au kua lata au ke moua e lagomatai ti hiki atu au ke nofo mo e taha he tau tama taane haaku mo e hoana haana. Fakalataha a mautolu ke he Fakapotopotoaga Calgary ne Vagahau Matalima, ti matutaki au ke eke mo motua. Ko e magaaho fakamua laia anei ne fakalataha au ke he fakapotopotoaga vagahau matalima! Ti tumau fēfē e fakafetuiaga haaku mo Iehova ke malolō he tau tau oti ia he fakalataha au ke he fakapotopotoaga Palagi? Lagomatai e Iehova au. Fakamooli e ia e maveheaga haana ke leveki a lautolu kua nakai fai matua. (Salamo 10:14) Fakaaue au ki a lautolu oti ne makai ke tohi e tau manatu, fakaako e vagahau matalima, mo e lagomatai ke fakahokohoko ma haaku.

Ha ha i ai e tau magaaho kua nakai maeke au ke maama e tau mena ne talahau po ke logona hifo e au kua nakai fai tagata ne maama e puhala ke lagomatai e tagata teligatuli. He tau mogo pihia ka logona e au e hogohogo manava ti loto ke tiaki, manatu e au e tau kupu ha Peteru ki a Iesu: “Ko e Iki na e, ke o kia a mautolu kia hai? Ha ha ia koe e tau kupu he moui tukulagi.” (Ioane 6:66-68) Tuga ni e tokologa he tau matakainaga teligatuli ne kua leva e nonofo he kupu mooli, ne fakaako au ke fakauka. Fakaako au ke falanaki ki a Iehova mo e fakatokatokaaga haana ti kua loga e tau fua mitaki he mena nei. Loga e tau tohi mogonei he vagahau haaku ti kua fiafia au ke fano he tau feleveiaaga mo e tau fonoaga he Vagahau Matalima Amerika. Mooli, kua moua e au e moui fiafia mo e palepale lahi he fekafekau ki a Iehova ko e ha tautolu a Atua ne mua ue atu.