“Ko e tagata mahani mā pauaki au ti tote e mauokafua haaku,” he fakamaama e Sara. * “Tupetupe au ka haia mo e tau tagata ne mauokafua lahi mo e pule malolō. Ka e fakatotoka au ka haia mo e taha ne mahani molū mo e fakatokolalo. Atāina au ke tutala ke he tagata pihia ti talahau e tau logonaaga mo e tau lekua haaku. Na pihia e tau kapitiga uho haaku.”

Fakakite he tau talahauaga ha Sara ka mahani molū a tautolu to manako e tau tagata ke kapitiga mo tautolu. Fiafia foki a Iehova ke he mahani molū. Tomatoma he Kupu Haana a tautolu: “Kia fakatapulu a mutolu ke he . . . mahani molu.” (Kolo. 3:12) Ko e heigoa e mahani molū? Fakakite fēfē e Iesu e mahani molū? Ti taute fēfē he mahani nei e tau momoui ha tautolu ke lahi atu e fiafia?

Ko e mahani molū ko e tuaga mafola he loto. Ko e tagata mahani molū kua fehagai mo e falu he puhala totonu ti fakatotoka ka feleveia mo e tau mena fakahogohogo manava he moui.

Ko e mahani molū ko e fakamailoga he loto malolō. Ko e kupu Heleni ma e “mahani molu” ne fakaaoga ke fakamaama e solofanua vale ne kua fakaako ke mahani totonu. Malolō agaia e solofanua, ka ko e fakauka ke fakaako ai kua tautaofi e malolō haana. Pihia foki, ka fakakite e tautolu e mahani molū kua tautaofi e aga hemu ha tautolu ti fakatumau e mafola mo e falu.

‘Nakai ko e tagata mahani molū pauaki au,’ he liga manatu e tautolu. Nonofo a tautolu he lalolagi ne aga mau e pule malolō mo e nakai fakauka, ti liga paleko ki a tautolu ke fakakite e mahani molū. (Roma 7:19) Maaliali ai, lata ke eketaha ke feaki e mahani molū ka e to lagomatai he agaaga tapu ha Iehova a tautolu ke fakamalolō e fifiliaga ke hokotia ke he foliaga ha tautolu. (Kala. 5:22, 23) Ko e ha kua lata a tautolu ke eketaha ke feaki e mahani molū?

Ko e mahani molū ko e aga ne fiafia e tau tagata ki ai. Tuga a Sara ne totoku i luga, logona hifo e tautolu e fakatotoka ka haia mo e tagata mahani molū. Ko Iesu e fakafifitakiaga mitaki lahi he tagata mahani molū mo e totonu. (2 Kori. 10:1) Manako foki e tau fanau ne nakai iloa a ia ke fakatata ki a ia.​—Mare. 10:13-16.

Puipui he mahani molū a tautolu mo lautolu ne fakalataha mo tautolu. Ka mahani molū a tautolu to nakai mafiti a tautolu ke hogohogo manava po ke  ita. (Fakatai 16:32) Ti kalo mai a tautolu he tokihala ne tupu ka mole e fakamamahi e tautolu e taha​—mua atu ke he tagata ne ofania e tautolu. Puipui foki a lautolu ne fakalataha mo tautolu mai he mamahi ha ko e aga fakahanoa ha tautolu.

Pete ne mamafa e tau kotofaaga mo e loga e matagahua ha Iesu, ne mahani molū a ia ke he tau tagata oti. Tokologa he magahala haana ne taufetului mo e pehia he tau kavega, ti lata ia lautolu ke moua e okiokiaga. Kua mafanatia mooli a lautolu he pehē a Iesu ki a lautolu: “Kia o mai a mutolu kia au, . . . ha ko au ni ko e totonu mo e loto holoilalo”!​—Mata. 11:28, 29.

Feaki fēfē e tautolu e mahani molū ne fakakite e Iesu? Fakaako e tautolu e Kupu he Atua ke iloa e puhala ne fehagai a Iesu ke he tau tagata mo e tau tuaga uka. Ti ka feleveia mo e tau tuaga ka kamatamata e mahani molū ha tautolu, eketaha a tautolu ke mahani tuga a Iesu. (1 Pete. 2:21) Manamanatu ke he tolu e mena ne lagomatai a Iesu ke mahani molū.

Loto fakatokolalo a Iesu. Pehē a Iesu kua “totonu mo e loto holoilalo” a ia. (Mata. 11:29) Totoku fakalataha he Tohi Tapu e tau mahani ua nei ha kua tata lahi e mahani molū ke he mahani fakatokolalo. (Efeso 4:1-3) Ko e ha ne pihia ai?

Lagomatai he mahani fakatokolalo a tautolu ke ua uliulitonu lahi po ke ita noa. Tali atu fēfē a Iesu ki a lautolu ne tuhituhi fakakelea a ia ko e “tagata kai lahi mo e inu uaina”? Fakanono he fakafifitakiaga haana e tuhituhi ia, ti mahani molū a ia he fakakite kua “talahaua tututonu e pulotu he tau fanau [gahua] hana.”​—Mata. 11:19.

Ka talahau he taha tagata e mena fakahukia hagaao ke he motu, ha ko e tagata taane po ke fifine, po ke tupumaiaga haau, kia eketaha ke tali atu mo e mahani molū. Ko Peter ko e motua Kerisiano i Aferika Toga ne pehē: “Ka hogohogo manava au ke he mena ne talahau he taha, hūhū hifo au, ‘To tali atu fēfē a Iesu?’” Lafi e ia: “Kua fakaako au ke ua uliulitonu lahi.”

Maama e Iesu e lolelole he tagata. Ne manatu mitaki e tau tutaki ha Iesu, ka e falu magaaho kua tautaofi he nakai mitaki katoatoa a lautolu ke fakakite e tau manatu ia ha lautolu. Ma e fakatai, he pō ato mate a Iesu ne kaumahala a Peteru, Iakopo, mo Ioane ke foaki e logonaaga mafanatia ne ole e ia. Mailoga e Iesu “kua makai ni e loto, ka ko e tino kua lolelole.” (Mata. 26:40, 41) Ha kua maama e Iesu kua nakai mitaki katoatoa e tau aposetolo, ne nakai hogohogo manava a ia ki a lautolu.

Ko Mandy ko e matakainaga fifine ne fa tuhituhi lahi e falu, ka kua lali fakalahi a ia mogonei ke muitua e fakafifitakiaga ha Iesu he mahani molū. Pehē a ia, “Lali au ke manatu kua nakai mitaki katoatoa e tau tagata oti mo e ke hagaaki ke he tau mahani mitaki he tau tagata, tuga ne taute e Iehova.” Maeke nakai he onoonoaga fakaalofa hofihofi ha Iesu ke he tau tuaga lolelole he tagata ke lagomatai foki a koe ke mahani molū he fehagai mo e falu?

Falanaki a Iesu ke he Atua. Fakauka a Iesu ke he tau nakai fakafili tonu he nofo he lalolagi. Ne nakai maama, taute fakateaga, mo e fakamamahi ki ai. Pete ia, fakatumau e mahani molū ha Iesu ha kua “tuku atu a [ia] kia ia kua fakafili fakatonu.” (1 Pete. 2:23) Iloa e Iesu to leveki he haana Matua he lagi a ia mo e to fehagai ke he tau nakai fakafili tonu he magaaho kua lata.

Ka ita a tautolu ti lali ke totoko ke he nakai fakafili tonu ki a tautolu, to mukamuka ke vale ti au atu e kelea he tuaga. Kakano haia ati fakamanatu he tau Tohiaga Tapu ki a tautolu: “Ko e mena nakai tupu e tututonu mai he Atua mai he ita he tau tagata.” (Iako. 1:20) Pete ne fai kakano a tautolu ke ita, liga takitaki he nakai mitaki katoatoa a tautolu ke tali atu he puhala hepe.

Ko e matakainaga fifine i Sihamani ne higoa ko Cathy ne fa manatu, ‘Ka nakai lalago e koe a koe, to nakai fai tagata ke lalago a koe.’ Ka ko e magaaho ne fakaako a ia ke falanaki ki a Iehova, ne hiki e aga haana. “Nakai lata au ke totoko tumau,” he ui e ia. “Atāina au ke mahani molū he iloa kua maeke a Iehova ke fakahako e tau mena oti.” Ka lauia a koe he nakai fakafili tonu, ko e muitua ke he fakafifitakiaga  ha Iesu he falanaki ke he Atua ka lagomatai foki a koe ke fakatumau ke mahani molū.

Fakakite e Iesu ka manako a tautolu ke fiafia kua lata a tautolu ke mahani molū. “Uhoaki a lautolu ne mahani molu,” he talahau e ia. (Mata. 5:5) Mailoga e puhala ne lagomatai he mahani molū e tau tuaga nei.

Utakehe he mahani molū e taufetoko he fakamauaga. “Loga e mena fakamamahi ne talahau e au ke he hoana haaku ne nakai amanaki au ki ai,” he ui e Robert ko e matakainaga mai Ausetalia. “Ka ko e tau kupu ne talahau he ita kua nakai maeke ke liuaki mai. Kelea e logonaaga haaku he kitia kua fakamamahi lahi e au a ia.”

“Ko e tau mena loga kua hehe ai a tautolu oti” ke he puhala vagahau ti ko e tau kupu fakahanoa ha tautolu ka fakahagahaga kelea e mafola he fakamauaga. (Iako. 3:2) He tau magaaho pihia, lagomatai he mahani molū a tautolu ke tumau e fakatotoka mo e taofi e alelo ha tautolu.​—Fakatai 17:27.

Gahua lahi a Robert ke feaki e fakatotoka mo e mahani fakalatalata. Ko e heigoa e fua? “Mogonei, ka tupu e fekehekeheaki ne lali au ke fanogonogo fakatekiteki, vagahau he puhala molū, mo e ua ita,” he ui e ia. “Ti kua mitaki lahi e fakafetuiaga haaku mo e hoana.”

Lagomatai he mahani molū a tautolu ke matutaki mitaki mo e falu. Ko lautolu ne mafiti ke ita kua gahoa e tau kapitiga. Ka kua lagomatai he mahani molū a tautolu “ke toto mau . . . ke he pipiaga he mafola.” (Efeso 4:2, 3) Ko Cathy ne totoku fakamua ne pehē, “Ko e mahani molū kua foaki mai e malolō ke fehagai fakamitaki mo e taha tagata, pete kua uka ke fakafetui mo e falu tagata.”

Tamai he mahani molū e loto mafola. Matutaki he Tohi Tapu e “iloilo mai luga” ke he mahani molū mo e mafola. (Iako. 3:13, 17) Ko e tagata mahani molū kua “loto mitaki.” (Fakatai 14:30) Ko Martin ne eketaha ke feaki e mahani molū ne pehē, “Maeke au mogonei ke talia e manatu he falu mo e nakai pule malolō, ti lahi e loto mafola mo e fiafia haaku.”

Liga taufetului a tautolu ke feaki e mahani molū. “Ko e tala mooli, ke hoko mai ke he aho nei, fa punapuna e loto haaku he ita he falu mogo,” he ui he taha matakainaga taane. Ka ko Iehova ne fakamafana a tautolu ke tutuli e mahani molū ka lagomatai a tautolu he taufetului nei. (Isaia 41:10; 1 Timo. 6:11) Maeke a ia ke “fakakatoatoa” e fakamahaniaga ha tautolu; maeke foki a ia ke “fakamalolo” a tautolu. (1 Pete. 5:10) Tuga e aposetolo ko Paulo, to hoko e magaaho ti maeke a tautolu ke fifitaki e “mahani molu mo e totonu a Keriso.”​—2 Kori. 10:1.