1-2. Ko e heigoa e tau tuaga uka ne fehagai mo e tokologa he Tau Fakamoli a Iehova?

KUA fakamalolō he aposetolo ko Paulo a Timoteo mo e tau Kerisiano oti ke taute katoatoa e fekafekauaga ha lautolu. (2 Timo. 4:5) Igatia a tautolu mo e eketaha ke muitua ke he fakatonuaga ha Paulo. Ka e ha ha i ai e tau tuaga uka. Tokologa e matakainaga ha tautolu ne lata ke loto malolō mooli ke taute e gahua fakamatala. (2 Timo. 4:2) Ma e fakatai, manamanatu ke he tau matakainaga ha tautolu ne nonofo he tau motu ne fakakaupā po ke pā e gahua ha tautolu. Taute e lautolu e gahua fakamatala pete he iloa e hagahaga kelea ke he atāina ha lautolu!

² Fehagai e tau tagata ha Iehova mo e tau lekua kehekehe ka fakalolelole a lautolu. Tuga anei, tokologa ne gahua loa ke leveki aki e tau manako he tau magafaoa ha lautolu. Liga manako a lautolu ke lahi e gahua fakamatala ka e nakai fahia a lautolu he matahiku he vahā tapu. Falu ne fakakaupā lahi e mena ke taute ha kua leva e gagao po ke motua e tau tino, ti nonofo fale foki a lautolu. Ka ko e falu kua pehia tumau ha ko e tau logonaaga fakateaga. Ko Mary * ko e matakainaga fifine ne nofo he Middle East, ne pehē: “Lata au ke eketaha ke totoko e logonaaga kelea ne fakamategūgū e logonaaga haaku. Ti logona e au e agahala ha kua fofō e magaaho mo e malolō haaku mai he gahua fakamatala.”

3. Ko e heigoa ka fakatutala a tautolu he vala tala nei?

³ Pete e tau tuaga ha tautolu, maeke a Iehova ke fakamalolō a tautolu ke fahia ke he tau tuaga uka fakatagata mo e tumau ke fekafekau ki a ia ke he tau tuaga kua maeke. Ato fakatutala a tautolu ke he puhala ka lagomatai e Iehova a tautolu, kia kumikumi e puhala kua fakamalolō e ia a Paulo mo Timoteo ke  fakakatoatoa e gahua fakamatala ha laua pete e tau lekua.

4. Ko e heigoa e tau tuaga uka ne fehagai a Paulo ki ai?

⁴ Fehagai a Paulo mo e loga e tuaga uka. Lata pauaki a ia ke moua e malolō he mogo ne fahi, taulitimaka, mo e tuku he fale puipui. (2 Kori. 11:23-25) Nakai mā a Paulo ke talahau kua taufetului a ia mo e tau logonaaga kelea he falu a magaaho. (Roma 7:18, 19, 24) Fakauka foki a ia ke he “mena mahukihuki ke he tino” ti manako lahi mahaki a ia ke he Atua ke utakehe ai.​—2 Kori. 12:7, 8.

5. Ko e heigoa ne maeke a Paulo ke taute pete e tau tuaga uka ne fehagai mo ia?

⁵ Fakamalolō e Iehova a Paulo ke taute e gahua fakamatala haana pete e tau tuaga uka ne fehagai mo ia. Manamanatu ke he tau mena ne taute e Paulo. Ma e fakatai, he mogo ne puipui a ia ki loto he fale i Roma, fakamatala fakamakutu e ia e tala mitaki he tū a ia ki mua he tau takitaki Iutaia mo e tau pule fakatufono. (Gahua 28:17; Filipi 4:21, 22) Fakamatala foki a ia ke he tokologa he kau leoleo mo e pihia mo lautolu oti ne ahiahi atu ki a ia. (Gahua 28:30, 31; Filipi 1:13) He magaaho ia foki, tohia e Paulo e tau tohi omoomoi ke lagomatai e tau Kerisiano mooli oti ti hoko mai ke he mogonei. Lafi ki ai, fakamalolō he fakafifitakiaga ha Paulo e fakapotopotoaga i Roma ti au atu ai e tau matakainaga haana he fakamalolō ke “talahau atu e kupu [he Atua] mo e nakai matakutaku.” (Filipi 1:14) Pete he nakai lahi e mena ha Paulo ne taute tuga he loto a ia ki ai ka e fakaaoga fakamitaki e ia e tuaga haana ti “tupu lahi ai e vagahau mitaki.”​—Filipi 1:12.

6. Ia 2 Korinito 12:9, 10, ko e heigoa ne lagomatai a Paulo ke taute e gahua fakamatala haana?

⁶ Mailoga e Paulo ko e tau mena oti ne taute e ia he fekafekauaga ha Iehova, ko e malolō he Atua ni ka e nakai ko e haana. Talahau e ia ko e malolō he Atua ne ‘fakakatoatoa haana a malolo ke he lolelole.’ (Totou 2 Korinito 12:9, 10.) Foaki he agaaga tapu ha Iehova e malolō ki a Paulo ke taute katoatoa e fekafekauaga haana pete he fehagai a ia mo e favale, tuku he fale puipui, mo e falu tuaga uka foki.

7. Ko e heigoa e tau tuaga uka ha Timoteo kua lata ke fahia ke taute e fekafekauaga haana?

⁷ Ko Timoteo ko e hoa ha Paulo ne falanaki foki ke he malolō he Atua ke taute e  fekafekauaga haana. Ō a Timoteo mo Paulo he tau fenoga misionare loloa. Fekau atu foki e Paulo a ia ke he falu fenoga ke ahiahi mo e fakamafana e tau fakapotopotoaga. (1 Kori. 4:17) Logona hifo e Timoteo e nakai lotomatala lahi. Ati tomatoma e Paulo a ia: “Aua neke fakalialia e taha ke he hau a fuata.” (1 Timo. 4:12) He mogonei foki, lauia a Timoteo he mahukihuki he tino haana ko e “tau gagao kua tupu mau.” (1 Timo. 5:23) Ka e iloa e Timoteo ko e agaaga tapu ha Iehova to foaki ki a ia e malolō kua lata ke fakamatala e tala mitaki mo e lagomatai e tau matakainaga haana.​—2 Timo. 1:7.

8. Fakamalolō fēfē e Iehova e tau tagata haana mogonei?

⁸ Mogonei kua foaki e Iehova ke he tau tagata haana e “lahi ue atu he malolo” ke maeke a lautolu ke matutaki ke fekafekau fakamooli ki a ia. (2 Kori. 4:7) Kia fakatutala ke he fā e puhala kua taute e Iehova ke fakamalolō mo e lagomatai a tautolu ke fakatumau e fakamooli ki a ia ko e: liogi, Tohi Tapu, lafiaga he tau matakainaga, mo e gahua fakamatala.

9. Lagomatai fēfē he liogi a tautolu?

⁹ Fakamalolō puhala he liogi. Ia Efeso 6:18, fakamalolō e Paulo a tautolu ke liogi “nakai noa” ke he Atua. To fakamalolō he Atua a tautolu. Ko Jonnie ne nofo i Bolivia ne logona e lalagoaga ia he mogo ne tupufetui e tau matematekelea haana. Ko e haana hoana mo e tau matua haana ne gagao lahi he taha e magaaho. Taufetului a Jonnie ke leveki e tau manako ha lautolu tokotolu. Mate e matua fifine haana ti leva to malolō e hoana mo e matua taane haana. He liu ono ki tua, pehē a Jonnie, “He tupetupe lahi mahaki au, lagomatai tumau ki a au he tutala fakahako ki a Iehova he tau liogi haaku.” Foaki e Iehova ki a Jonnie e malolō kua lata ke fakauka. Ko Ronald ko e motua i Bolivia ne logona kua kenesā e matua fifine haana. Taha e mahina he mole ti mate a ia. Ko e heigoa ne lagomatai a Ronald ke fahia? Pehē a ia: “Ko e liogi ki a Iehova kua fakaatā au ke liligi e loto mo e tau logonaaga haaku ki a Iehova. Iloa e au kua maama mitaki e ia au ke he ha tagata mo e pihia foki he iloa e au au.” Falu mogo, molea e tupetupe ha tautolu po ke fakauaua ke he mena kua lata a tautolu ke liogi hagaao ki ai. Ka e uiina e Iehova a tautolu ke liogi ki a ia pete kua uka a tautolu ke tuku e tau manatu mo e tau logonaaga ha tautolu ke he tau kupu.​—Roma 8:26, 27.

10. Ia Heperu 4:12, ko e ha e totou he Tohi Tapu mo e manamanatu fakahokulo ke he mena ne totou e tautolu kua aoga lahi?

¹⁰ Fakamalolō puhala he Tohi Tapu. Tuga ni he falanaki a Paulo ke he Tohi Tapu ma e malolō mo e fakamafanaaga, lata foki a tautolu ke taute pihia. (Roma 15:4) He totou e tautolu e Kupu he Atua ti manamanatu fakahokulo ki ai, fakaaoga e Iehova e agaaga haana ke lagomatai a tautolu ke maama mitaki e puhala ke fakagahua e Tohi Tapu ke he tuaga ha tautolu. (Totou Heperu 4:12.) Ko Ronald ne totoku fakamua, ne pehē: “Fakaaue au he feaki e aga ke totou e tau kupu Tohi Tapu he tau pō takitaha. Lahi e manamanatu fakahokulo haaku ke he tau mahani ha Iehova mo e puhala totonu he fehagai a ia mo e tau fekafekau haana. Fakamalolō he mena nei au.”

11. Fakamalolō fēfē he Tohi Tapu e matakainaga fifine ne maanu?

¹¹ Feaki e tautolu e aga hako ke he tau tuaga ha tautolu he manamanatu fakahokulo ke he Kupu he Atua. Manamanatu ke he lagomataiaga he Tohi Tapu ke he takape ne maanu. Tala age e motua kua maeke a ia ke moua e tau lagomataiaga aoga he totou e tohi ha Iopu.  He totou e ia, mafiti a ia ke tuhituhi a Iopu he hepe e manamanatuaga. He manatu haana, pehē a ia: “Iopu! Ua manamanatu kelea!” Ka e mailoga e ia kua tatai lahi e aga haana mo e ha Iopu. Lagomatai he mena nei a ia ke hiki e onoonoaga mo e fakamalolō ki a ia ke fehagai mo e mamahi he mate e taane haana.

12. Fakamalolō fēfē e Iehova a tautolu puhala he tau matakainaga fakahelehele?

¹² Fakamalolō puhala he lafiaga he tau matakainaga. Taha puhala kua fakamalolō e Iehova e tau Kerisiano ko e puhala he tau matakainaga fakahelehele. Tohi e Paulo kua manako lahi a ia ke “fefakamafanaaki” mo e tau matakainaga fakaagaaga haana. (Roma 1:11, 12) Ko Mary ne totoku fakamua ne tokiofa e tau lafiaga pihia. Pehē a ia: “Fakaaoga e Iehova e tau matakainaga ne nakai iloa e tau lekua haaku. Talahau e lautolu e taha mena fakamafana po ke fakafano mai e lautohi ti ko e mena tonu ia ne lata mo au. Lagomatai foki ke tutala ke he falu matakainaga fifine ne taufetului pihia mo e fakaako mai he tau mena ne taute e lautolu. Taute foki he tau motua au ke logona hifo ko e vala aoga he fakapotopotoaga.”

13. Fakamalolō fēfē e tautolu e taha mo e taha he tau feleveiaaga he fakapotopotoaga?

¹³ Ko e taha matakavi ne mua e mitaki ke fefakamafanaaki ko e tau feleveiaaga he fakapotopotoaga. Ka fano a koe he tau feleveiaaga, eketaha ke fakamalolō e falu aki e tau talahauaga mooli he fakaalofa mo e loto fakaaue. Ma e fakatai, ato kamata e feleveiaaga ko e motua ko Peter ne tala age ke he matakainaga fifine ne nakai tua e taane: “Mafanatia lahi ke kitia a koe kua hau. Kua mautali mo e tauteute tumau e koe e tau tali ma e tau fanau tokoono haau.” Kua puke e tau mata haana he tau hihina mata he fakaaue mo e tali: “Loto fakaaue lahi mahaki au ha ko e mena ia ne manako au ke logona he aho nei.”

14. Lauia fēfē a tautolu he gahua fakamatala?

¹⁴ Fakamalolō puhala he gahua fakamatala. Ka tutala a tautolu ke he falu ke he kupu mooli he Tohi Tapu, logona hifo e tautolu e fakamalagaki mo e atihake he mitaki po ke nakai mitaki e tali ha lautolu. (Fakatai 11:25) Ko e matakainaga fifine ko Stacy ne logona hifo pihia e fakamalolō he gahua fakamatala. He tuku ki tua e tagata he magafaoa, ne momoko lahi a ia ti hūhū tumau a ia ki a ia, ‘Kua lata kia a au ke lahi e mena ke taute ke lagomatai?’ Nakai fai mena foki a Stacy ne manamanatu ki ai. Ko e heigoa ne lagomatai a ia ke fahia ke he tuaga tupetupe nei? Ko e gahua fakamatala! He taute e ia e gahua fakamatala, kamata a ia ke hagaaki ke he tau tagata he fonua ne lata ke moua e lagomatai haana. Pehē a ia: “He magaaho ia, mai e Iehova ki a au e tagata fakaako Tohi Tapu ti mafiti e holo ki mua haana. Fakamalolō lahi he mena ia au. Ko e mena ne lagomatai lahi ki a au ko e fano he gahua fakamatala.”

15. Ko e heigoa haau ne fakaako mai he tala ha Mary?

¹⁵ Ha ko e tau tuaga ha lautolu, falu ne liga logona hifo kua nakai lahi e mena ha lautolu ne taute he gahua he fonua. Ka pihia e logonaaga haau, manatu kua fiafia a Iehova ka eketaha a koe. Liu manamanatu ke he fakataiaga ha Mary. He hiki atu a ia ke he fonua vagahau kehe, ne logona hifo e ia e nakai aoga lahi haana. Pehē a ia, “Fai magaaho ne maeke ni au ke talahau e tali kū po ke totou e kupu Tohi Tapu po ke foaki e tuleke he gahua fakamatala.” Logona hifo e ia e fakakaupā he fakatatai ki a lautolu ne mahifi he vagahau ia. Ka e hiki e ia e onoonoaga haana. Kamata a ia ke mailoga na maeke a Iehova ke fakaaoga a ia pete ne fakakaupā e tau lotomatala haana. Pehē a ia, “Ko e tau kupu mooli he Tohi Tapu kua mukamuka, ti ko e tau kupu mooli ia ne hiki e tau momoui he tau tagata.”

16. Ko e heigoa ka lagomatai a lautolu kua nonofo fale ke moua e malolō?

 ¹⁶ Kitia mo e loto fakaaue a Iehova ke he manako ha tautolu ke taute e gahua fakamatala, pete ka nonofo fale a tautolu. Maeke a ia ke lagomatai a tautolu ke fakamatala ke he tau tagata gahua leveki po ke tau ekekafo mo e tau nosi. Ka fakatatai e tautolu e tau gahua ha tautolu mogonei mo e tau mena ne taute e tautolu kua mole, to liga loto lolelole a tautolu. Ka e he mailoga e tautolu e lagomataiaga ha Iehova ki a tautolu mogonei, to moua e tautolu e malolō kua lata ke fakauka mo e fiafia ke he tau kamatamata.

17. Ia Fakamatalaaga 11:6, ko e ha kua lata a tautolu ke matutaki ke he gahua fakamatala pete ka nakai fai tali mafiti?

¹⁷ Nakai iloa e tautolu ko e tau tega fe he kupu mooli kua tō e tautolu kua liga vakavaka mo e kamata ke tutupu. (Totou Fakamatalaaga 11:6.) Ma e fakatai, ko Barbara ko e matakainaga fifine ne 80 tumā e tau he moui kua fakamatala tumau he telefoni mo e tohitohi. Taha he tau tohi haana ne tuku e ia The Watchtower ia Mati 1, 2014, ne tū ai e vala tala “Tau Mena kua Taute he Atua ma Haau.” Nakai iloa e ia kua fakafano e ia e tohi ke he hoa mau ne nakai liu eke mo Tau Fakamoli a Iehova. Totou tafeliuaki e laua e mekasini. Logona hifo he taane kua tuga na vagahau fakahako a Iehova ki a ia. Kamata e hoa ke o atu ke he tau feleveiaaga ti liu malolō fakaagaaga ko e Tau Fakamoli a Iehova he molea e 27 e tau. Manamanatu la ke he mafanatia mo e atihake ha Barbara ke kitia e tau fua mitaki he taha he tau tohi haana!

18. Ko e heigoa ha tautolu ka taute ke aoga mai he malolō he Atua?

¹⁸ Foaki mai e Iehova ki a tautolu e magaaho ke moua e tautolu e malolō lahi haana. Ka fakaaoga e tautolu e tau puhala ha Iehova tuga e liogi, Tohi Tapu, lafiaga he tau matakainaga, mo e gahua fakamatala, kua fakakite e tautolu na falanaki a tautolu ke he lotomatala ha Iehova mo e manako haana ke lagomatai a tautolu. Kia falanaki tumau a tautolu ke he ha tautolu a Matua he lagi kua fiafia lahi “ke lagomatai kia lautolu kua katoatoa ha lautolu a tau loto kia ia.”​—2 Nofo. 16:9.