1. Iloa fēfē e tautolu to fakatokanoa e tau tagata he Atua mai i Papelonia Lahi, ti ko e heigoa e tau hūhū ka tali?

KE HE vala tala kua mole atu, ne fakaako e tautolu na fakapaea e tau Kerisiano fakamooli ki Papelonia Lahi. Ka ko e tala mitaki to nakai fakapaea tukulagi a lautolu. Iloa e tautolu mogonei ha kua pehē e Tohi Tapu na poaki he Atua e tau tagata haana ke “o kehe” mai he lotu fakavai he lalolagi katoa. (Totou Fakakiteaga 18:4.) Fakamooli e mena nei to fakatokanoa e tau Kerisiano mai i Papelonia Lahi. Makai a tautolu ke fakaako he magaaho ka fakatokanoa a lautolu! Ka e fakamua, kua lata a tautolu ke tali e tau hūhū nai: Ko e heigoa he tau Tagata Fakaako Tohi Tapu he magaaho fakamua ne eketaha ke taute hagaao ki a Papelonia Lahi ato hoko e 1914? Fakamakutu fēfē e tau matakainaga ha tautolu he gahua fakamatala he Felakutaki I he Lalolagi? Fakapaea kia e tau tagata he Atua ki Papelonia he magaaho ia ha kua lata a lautolu ke fakahako?

2. Ko e heigoa he tau Tagata Fakaako Tohi Tapu he magahala fakamua ne fifili ke taute ato hoko e Felakutaki I he Lalolagi?

² Loga e tau ato hoko e Felakutaki I he Lalolagi (1914-1918), ko Charles Taze Russell mo e falu he tau Tagata Fakaako Tohi Tapu ne mailoga kua nakai fakaako e Kerisitenitome e kupu mooli mai he Tohi Tapu. Ti nakai manako a lautolu ke fai mena ke taute mo e lotu fakavai. He 1879, ne pehē e Zion’s Watch Tower ko e tau lotu oti ne talahau kua eke mo kitofaihoana fakamooli ke he Keriso ka kua lalago e lautolu e tau fakatufono, ko e vala mooli ha Papelonia Lahi ne fakahigoa he Tohi Tapu ko e fifine fakataka.​—Totou Fakakiteaga 17:1, 2.

3. Ko e heigoa ne taute he tau Tagata Fakaako Tohi Tapu ke fakakite kua nakai fai vala a lautolu he lotu fakavai? (Kikite fakatino he kamataaga.)

³ Iloa he tau tagata taane mo e tau fifine fakamooli, kaeke ke matutaki a lautolu ke lalago e lotu fakavai to nakai fakamonuina he Atua a lautolu. Ti tokologa ia lautolu ne fakafano e tau tohi ke he tapu ha lautolu ke tala age kua nakai manako a lautolu ke liliu he tapu ia. Falu ne totou fakaleolahi e tau tohi ki a lautolu oti he tapu. Ka nakai fakaatā e mena nei, kua fakafano e lautolu e tohi ke he tau tagata takitaha he tapu. Ne talahau fakamahino he tau Tagata Fakaako Tohi Tapu kua nakai manako a lautolu ke fai mena ke taute mo e lotu fakavai! He tau tau fakamua atu, na lata ke kelipopo a lautolu ha kua taute e mena nei. Ka e he 1870, ko e tau fakatufono he tau motu loga ne nakai lalago e tapu tuga ne fa mahani a lautolu ki ai. Maeke he tau tagata mogonei ke atāina ke tutala hagaao ke he Tohi Tapu mo e nakai talia foki ke he tapu.

4. He Felakutaki I he Lalolagi, fēfē e logonaaga he tau Tagata Fakaako Tohi Tapu ki a Papelonia Lahi? Fakamaama.

⁴ Maama he tau Tagata Fakaako Tohi Tapu ne nakai kuenaia ma lautolu ke tala age ke he magafaoa, tau kapitiga tata, mo e tau tagata he tapu kua nakai liu a lautolu ke lalago e lotu fakavai. Manako a lautolu ke he lalolagi katoa ke iloa ko Papelonia Lahi ko e lotu fakataka! Ia Tesemo he 1917 ke hoko ke he mataulu he 1918, tokogahoa he tau Tagata Fakaako Tohi Tapu ne tufa fakamakutu 10,000,000 he tau lagaki he tuleke ne putoia e vala tala “The Fall of Babylon.” Ne fakakite fakamalolō he tuleke ia e kupu mooli hagaao ki a Kerisitenitome. Ka manamanatu a koe, kua ita lahi mahaki e tau takitaki lotu! Ka e nakai oti e gahua he tau Tagata Fakaako Tohi Tapu. Ne eketaha a lautolu ke fakamatala tumau mo e omaoma ke he Atua ko e pule ka e nakai ke he tau tagata. (Gahua 5:29) Ko e heigoa ne fakakite he mena nei ki a tautolu? Fakakite ai he Felakutaki I he Lalolagi, ko e tau tagata taane mo e tau fifine Kerisiano nei ne nakai ō ke he fakapaeaaga; ka e vevehe kehe mooli  a lautolu mai he lotu fakavai ti lagomatai e falu ke taute pihia foki.

5. Ko e ha ne talahau e tautolu na lahi e fakamakutu he tau matakainaga he Felakutaki I he Lalolagi?

⁵ He tau tau kua mole, pehē a tautolu ko e tau tagata he Atua ne nakai moua e taliaaga Haana he Felakutaki I he Lalolagi, ha kua nakai fakamatala fakamakutu a lautolu. Ma e kakano nei, talitonu a tautolu na fakaatā e Iehova a Papelonia Lahi ke fakapaea fakakū e tau tagata he Atua. Ka ko e tau matakainaga ne fekafekau ke he Atua he 1914 ke hoko ke he 1918 ne fakamaama he magaaho fakamui ko e matakau, ti taute e lautolu e tau mena oti ke maeke ia lautolu ke fakamatala tumau. He maama mitaki e mena ne tupu ke he tau Tagata Fakaako Tohi Tapu he magaaho ia kua lagomatai a tautolu ke maama falu mena tutupu ne fakamau he Tohi Tapu.

6, 7. (a) Ko e heigoa e tau paleko ne fehagai mo e tau Tagata Fakaako Tohi Tapu he Felakutaki I he Lalolagi? (e) Ko e heigoa ne fakakite kua fakamakutu e tau Tagata Fakaako Tohi Tapu?

⁶ He Felakutaki I he Lalolagi, ne nakai okioki e tau Tagata Fakaako Tohi Tapu he fakamatala. Ka e loga foki e tau paleko ha lautolu. Kitekite la ke he ua e paleko. Fakamua, nakaila iloa e tau Tagata Fakaako Tohi Tapu ke fakamatala he fakaaoga ni he Tohi Tapu. Mahani a lautolu ke tufatufa e tau tohi mo e fakaatā e tau tohi ke fakamaama e kupu mooli. Magaaho ne pā he fakatufono e tohi The Finished Mystery he matulu he 1918, ne uka e falu matakainaga ke fakamatala. Ko e paleko ke uaaki he tau ia foki, ko e kamataaga he fulū Sepania. Ko e gagao kelea lahi nei ne pikitia ti uka ma e tau matakainaga ke o fano ke fakamatala. Pete ne tau paleko nei, ne eketaha e tau Tagata Fakaako Tohi Tapu ke taute e tau mena oti ke matutaki e gahua fakamatala.

 ⁷ He 1914, ko e matakau tote he tau Tagata Fakaako Tohi Tapu ne fakakite e “Photo-Drama of Creation.” Ko e kifaga nei ne ha ha i ai foki e tau lapa ata mo e tau kifaga ne fai leo, ko e mena foou he magahala ia. Ko e Drama ia ne fakahigoa ai ko e tala ke he tau tagata mai he tufugatia ha Atamu ato hoko ke he matahiku he Pule he Keriso. He 1914, ko e tau fakapā ne fakakite, ne molea e 9,000,000 tagata ne kitekite ai. Manamanatu la. Lahi atu e numera ia ke he Tau Fakamoli a Iehova he lalolagi katoa he vahā nei! Falu hokotaki ne fakakite he 1916, molea e 809,000 tagata ne o atu ke he tau feleveiaaga he toloaga i Amerika, ti ko e 1918, ne tupu e numera ia teitei ke 950,000. Ko e tau Tagata Fakaako Tohi Tapu ia kua fakamakutu mooli!

8. Fakamafana fēfē he tau matakainaga taane ne takitaki e tau Tagata Fakaako Tohi Tapu he Felakutaki I he Lalolagi?

⁸ He Felakutaki I he Lalolagi, ko e tau matakainaga taane ne takitaki ne gahua fakamalolō ke taute e tau tohi faka-Tohi Tapu mo e fakamafana e tau Tagata Fakaako Tohi Tapu. Ko e lalagoaga totonu ia ne atihake a lautolu ke matutaki e fakamatala. Ko Richard H. Barber, ko e tagata fakamatala fakamakutu he magahala ia, ne pehē: “Kautū a mautolu he fakaaoga falu leveki faifano tokogahoa mo e tumau ke tufatufa he The Watch Tower ti fakafano atu ki Kanatā, ko e matakavi ne kua pā e gahua.” Matutaki e ia: “Moua e au e kotofaaga ke fakafano atu e tau lagaki he The Finished Mystery ke he falu kapitiga ne nakai fai lagaki ha kua uta pulenoa ai. Ne ole e Matakainaga ko Rutherford ke fakatokatoka e mautolu e tau fonoaga ke he tau taone kehekehe he faahi lalo i Amerika, ti fakafano atu e tau tagata lauga ke lali ke fakamafana fakalahi e tau kapitiga.”

9. (a) Ko e ha e tau tagata he Atua kua lata ke fakahako he 1914 ke hoko ke he 1919? (e) Pete he lata ia lautolu ke fakahako, ko e ha kua hepe ke tali manatu?

⁹ Ne fai mena agaia e tau Tagata Fakaako Tohi Tapu kua lata ke fakahako. Nakai maama katoatoa e lautolu e kakano ne tala age a Iehova ke omaoma ke he tau fakatufono. (Roma 13:1) Kakano haia ko e matakau, ne nakai tuuho tumau a lautolu he magahala ne felakutaki ai. Ma e fakatai, he ole e pelesiteni ha Amerika ke he tau tagata ke liogi ma e mafola ia Me 30, 1918, ne fakamafana he The Watch Tower e tau Tagata Fakaako Tohi Tapu ke liogi foki. Falu matakainaga ne foaki e lalagoaga fakatupe ke he felakutaki, ati tokogahoa a lautolu ne eke mo tau kautau ti ō he tau. Ka e pete he lata a lautolu ke fakahako, to hepe ke tali manatu ko e kakano hanei ati fakapaea a lautolu ki Papelonia Lahi. Ko e mena ne tupu, kua fitā a lautolu he teitei vevehe kehe katoatoa mai he lotu fakavai he lalolagi  katoa he magahala he Felakutaki I he Lalolagi.​—Totou Luka 12:47, 48.

10. Fakakite fēfē he tau Tagata Fakaako Tohi Tapu e fakalilifu ke he moui?

¹⁰ Mooli kua nakai maama katoatoa he tau Tagata Fakaako Tohi Tapu e kakano ke tuuho e tau Kerisiano. Ka e iloa e lautolu kua hepe ke kelipopo e tau tagata. Ti pete ni he tokogahoa e matakainaga taane ne eke mo kautau ti totō e tau kanavaakau he Felakutaki I he Lalolagi, kua nakai talia e lautolu ke fakaaoga ai ke kelipopo falu tagata. Falu ne nakai talia ke kelipopo e falu tagata ne fakatū i mua he malētau ke mamate a lautolu.

11. Tali atu fēfē e tau fakatufono he magaaho ne nakai talia he tau Tagata Fakaako Tohi Tapu ke tau he felakutaki?

¹¹ Ne ita e Tiapolo ha kua mahani fakamooli e tau matakainaga ke he Atua. Ti ko e fua, kua taute he Tiapolo e “fakatufono ke fakamamahi.” (Salamo 94:20) Ko e hagai he U.S. Army, ko James Franklin Bell, ne tala age ke he Matakainaga ko Rutherford mo e Matakainaga ko Van Amburgh, kua lali e fakatufono ke fakatū e matafakatufono foou ke fakahala mate e ha tagata ne nakai talia ke fano he tau. Ne hagaao pauaki a ia ke he tau Tagata Fakaako Tohi Tapu. Ita lahi e hagai ti tala age ke he Matakainaga ko Rutherford kua nakai fakatū e matafakatufono ha kua taofi he pelesiteni ha Amerika. Ti tala age e hagai, “Ka e iloa e mautolu e puhala ke moua a mutolu, mo e to taute pihia e mautolu!”

12, 13. (a) Ko e ha ne tuku age ke he tau matakainaga tokovalu e fakahala leva ke he fale puipui? (e) Fakaohooho kia he fale puipui e tau matakainaga ke galo ha lautolu a fifiliaga ke omaoma ki a Iehova? Fakamaama.

¹² Fakahiku ai ne moua he fakatufono e puhala ke fakahala e tau Tagata Fakaako Tohi Tapu. Ko e Matakainaga ko Rutherford mo e Matakainaga ko Van Amburgh, mo e tau matakainaga tokoono foki ne hukui e Watch Tower Society ne kua tapaki. Ko e ikifakafili ne taute e fakafiliaga nei ne pehē ko e tau matakainaga ia ne mua atu e hagahagakelea ke he matakau tau Sihamani. Pehē a ia kua fakaita e lautolu e fakatufono, tau kautau, mo e tau lotu oti ti kua lata a lautolu ke fakahala fakamamahi. ^[1] (Kikite tala he matahiku.) Ne fakahala e tau Tagata Fakaako Tohi Tapu tokovalu ke leva  e nonofo he fale puipui i Atlanta, Georgia. Ka e, he oti e felakutaki ne fakatoka mai a lautolu ti magalo noa e fakahala.

¹³ Pete he haia a lautolu he fale puipui ko e tau tagata taane tokovalu ia ne eketaha ke omaoma ke he fakatufono he Atua. Iloa fēfē e tautolu e mena nei? Ne tohi ole a lautolu ke he pelesiteni ha Amerika ke fakatoka mai a lautolu he fale puipui. He tohi, pehē a lautolu kua tala mai e Tohi Tapu ki a mautolu ke nakai keli tagata, ti ko e ha tagata ne fakatapu ke he Atua mo e kua nakai makai ke omaoma ki a Ia to galo e taliaaga Haana, ti mate. Fakamaama e lautolu ko e kakano hanei ne nakai maeke a lautolu mo e to nakai kelipopo e lautolu falu tagata. Ne loto toa a lautolu ke tohi e mena nei ke he pelesiteni! Nakai fakauaua ai ko e tau matakainaga taane to nakai galo ia lautolu e fifiliaga ke omaoma ki a Iehova.

14. Fakaaoga e Tohi Tapu ke fakamaama e mena ne tupu he 1914 ke hoko ke he 1919.

¹⁴ Ia Malaki 3:1-3 ne fakamaama e mena ne tupu ke he tau Tagata Fakaako Tohi Tapu he 1914 ke hoko ke he mataulu he 1919. (Totou.) Ko Iehova ko e Atua ko e “Iki,” mo Iesu Keriso ko e “Agelu he maveheaga,” ne o mai ke kitekite e “fanau a Levi,” kua hukui a lautolu ne fakauku. He mole e fakahako mo e fakameā e Iehova a lautolu, ne mautali a lautolu ke moua e kotofaaga foou. He 1919, ne kotofa e Iesu e “fekafekau fakamoli mo e loto matala,” ne fifili ke takitaki mo e hataki e tau fekafekau oti he Atua. (Mataio 24:45) Fakahiku ai ne tokanoa e tau tagata he Atua mai i Papelonia Lahi. Tali mai mogoia, ne fakaako fakalahi a lautolu ke he finagalo he Atua ti hokulo lahi e fakaalofa ha lautolu ki a Ia. Loto fakaaue mooli a lautolu ke he monuina Haana! ^[2]​—Kikite tala he matahiku.

15. Fakakite fēfē e tautolu e loto fakaaue ha kua fakatokanoa mai i Papelonia Lahi?

¹⁵ Kua loto fakaaue lahi a tautolu ha kua fakatokanoa mai i Papelonia Lahi. Nakai maeke a Satani ke moumou e tapuakiaga mooli. Kua kaumahala a ia! Pete ia, kua lata a tautolu ke manatu e kakano ne fakatokanoa e Iehova a tautolu. Ko e finagalo haana ke fakamomoui e tau tagata oti. (2 Korinito 6:1) Ka kua tautaofi agaia he lotu fakavai e tau miliona tagata kua loto molū, ti lata a lautolu ke lagomatai! Kia eketaha a tautolu ke fifitaki e tau matakainaga tua fakamooli ha tautolu, ke lagomatai e tau tagata ke moua e fakatokanoaaga.