1. Ko e heigoa he uhu lologo ne kua lagomatai a tautolu ke taute?

KO E tagata tohi lologo talahaua ne talahau he taha mogo: “Taute he tau kupu a koe ke manamanatu. Taute he leo kofe a koe ke hufia ke he logonaaga. Ka e taute he lologo a koe ke logona hifo ke he fatuakiloto.” Ko e tau lologo ha tautolu kua fakakite e fakahekeaga mo e fakaalofa ki a Iehova ko e ha tautolu a Matua he lagi. Taute he tau lologo a tautolu ke logona hifo e tata lahi ki a Ia. Kua mukamuka mogoia ke maama e kakano ne aoga e uhu lologo he tapuakiaga meā, pete kua lologo tokotaha a tautolu po ke mo e tau matakainaga.

2, 3. (a) Liga fēfē e logonaaga he falu ke he lologo fakaleo lahi mo e fakapotopotoaga? (e) Ko e heigoa e tau hūhū ka fakatutala a tautolu he vala tala nei?

² Ka e fēfē e logonaaga haau ke lologo fakaleo lahi mo e fakapotopotoaga? Fuafua kelea kia e mena ia ki a koe? He falu aga fakamotu, liga tehatehaua e tau tagata taane ke lologo i mua he falu. Maeke e aga nei ke lauia kelea e fakapotopotoaga katoa, mua atu ka fakauaua e tau motua ke lologo po ke lavelave a lautolu he falu matagahua he magaaho lologo.​—Salamo 30:12.

 ³ Ko e uhu lologo ko e vala he tapuakiaga ha tautolu ki a Iehova. Ko e mena ia, nakai manako mooli a tautolu ke ō ki fafo he magaaho ka lologo po ke fakatonoa e vala ia he feleveiaaga. Ko e mena ia, lata a tautolu oti ke hūhū hifo: ‘Fēfē e logonaaga haaku ke lologo he tau feleveiaaga? Ko e heigoa haaku ka taute ka fakauaua au ke lologo i mua he falu? Ti maeke fēfē au ke uhu e tau lologo mai he loto?’

4, 5. Ko e heigoa e tau fakatokaaga ma e uhu lologo he faituga a Isaraela i tuai?

⁴ He fakamauaga tala, ne fakaaoga he tau tagata tapuaki ha Iehova e leo kofe ke fakaheke a Ia. Fuluola ai, he fakamooli e tau Isaraela ki a Iehova ne eke e uhu lologo mo vala aoga he tapuakiaga ha lautolu. Ma e fakatai, he tauteute a Tavita ke lata mo e faituga, ne fakatokatoka e ia 4,000 he tau tagata Levi ke fakaheke a Iehova he fakaaoga e tau leo kofe. Ia lautolu nei, tokologa “ne fakaako ai ke lologo kia Iehova, ko lautolu oti ne pulotu.”​—1 Nofoaga he Tau Patuiki 23:5; 25:7.

⁵ Ko e leo kofe mo e uhu lologo ko e vala aoga foki he fakatapuaga he faituga. Tala mai e Tohi Tapu ki a tautolu: “Ko lautolu ne ulo e tau pu, mo lautolu ne lologo kua tuga ne tagata tokotaha, ko e taha ni e leo he fakaheke atu mo e fakaaue atu ai a lautolu kia Iehova; ne lologo a lautolu fakalataha mo e tau pu ne ulo, mo e tau kumepalo, mo e tau akau fakatagi, mo e fakaheke atu a lautolu kia Iehova, . . . kua puke e fale he Atua ke he lilifu a Iehova.” Manamanatu la ke he puhala ne fakamalolō e tua he tau Isaraela he magaaho nei!​—2 Nofoaga he Tau Patuiki 5:13, 14; 7:6.

6. Ko e heigoa e tau fakatokaaga ma e leo kofe mo e uhu lologo ne taute e Nehemia he mogo ne eke a ia mo iki ne pule ha Ierusalema?

⁶ Ne fakatokatoka e Nehemia e tau Isaraela ke liu ati hake e tau kaupā ha Ierusalema, ti fakatokatoka foki e tau tagata Levi ke uhu lologo mo e tā e tau akau fakatagitagi. Ko e mena nei ne taute e lautolu kua foaki foki e fiafia lahi ke he fakatapuaga he tau kaupā. Ti kotofa e Nehemia “ua e vahega lalahi ne fakaaue.” Ko e tau vahega, po ke kau uhu lologo ne ō i luga he tau kaupā he maaga he tau faahi kehekehe ato feleveia a lautolu he kaupā ne tata lahi ke he mena ne tū ai e faituga. Ko e uhu lologo ha lautolu kua leo lahi ti maeke he tau tagata ke logona mai he tau matakavi mamao. (Nehemia 12:27, 28, 31, 38, 40, 43) Maeke a tautolu ke iloa kua fiafia a Iehova ke logona e tau tagata tapuaki haana ne uhu lologo mo e fiafia he fakaheke ki a Ia.

7. Fakakite fēfē e Iesu ko e uhu lologo ko e vala uho lahi he tapuakiaga ma e tau Kerisiano?

⁷ He magahala ha Iesu, ne matutaki e leo kofe ke eke mo vala uho lahi he tapuakiaga mooli. Manamanatu ke he mena ne tupu he pō ne mua atu e uho he fakamauaga tala he tagata. Mole e taute e Iesu e Kaiaga Afiafi he Iki mo e tau tutaki haana, ne uhu lologo fakaheke a lautolu oti ki a Iehova.​—Totou Mataio 26:30.

8. Fakatoka fēfē he tau Kerisiano fakamua e fakafifitakiaga he fakaheke e Atua ke he tau lologo?

⁸ Ko e tau Kerisiano fakamua ne fakatoka e fakafifitakiaga mitaki he fakaheke e Atua ke he tau lologo. Nakai tuga e tau Isaraela ne ō ke he faituga ke tapuaki ki a Iehova, ne feleveia e tau Kerisiano ia ke he tau kaina tagata. Pete kua nakai fulufuluola mo e monuina e tau kaina ia tuga e faituga, ne fakamakutu  agaia e tau matakainaga he lologo. Ti tala age e aposetolo ko Paulo ke he tau matakainaga Kerisiano haana: “Kia fakaako mo e tomatoma e mutolu ko e taha kia taha ke he tau salamo, mo e tau lologo, mo e tau ulutapu ke lata mo e agaga, ko e fakaalofa noa kua lologo atu ai ke he tau loto ha mutolu ke he Iki [Iehova].” (Kolose 3:16) Ko e tau lologo he tohi lologo ha tautolu kua lata mooli ke ‘lologo mo e fakaalofa noa.’ Ko e vala a ia he “tau mena kai ke he tau magaaho [tonu]” ne foaki mai he “fekafekau fakamoli mo e loto matala” ki a tautolu.​—Mataio 24:45.

9. (a) Ko e ha ne liga fakauaua e falu ke lologo mo e fiafia he tau feleveiaaga mo e tau toloaga ha tautolu? (e) Lata ke lologo fakaheke fēfē a tautolu ki a Iehova, ti ko hai kua lata ke matamua? (Kikite fakatino he kamataaga.)

⁹ Ko e heigoa falu kakano ne liga fakauaua a koe ke lologo? Liga nakai ko e aga mo e mahani e lologo ke he magafaoa po ke aga fakamotu haau. Po ke liga fanogonogo a koe ke he tau tagata pulotu ne lologo he letiō po ke televisoni ti ka fakatatai e puhala lologo haau mo e ha lautolu, logona hifo e koe e fuafua kelea po ke nakai mitaki. Ka e igatia a tautolu mo e matagahua ke lologo fakaheke ki a Iehova. Kia totō hake e tohi lologo haau ki luga, lagaki hake e ulu haau, ti lologo mo e fiafia! (Esera 3:11; totou Salamo 147:1.) Loga e Fale he Kautu mogonei ne fakakite e tau kupu lologo he lapa (screen), ti lagomatai he mena nei a tautolu ke lologo fakaleo lahi. Fuluola foki ko e uhu e tau lologo he Kautu ko e vala mogonei he Aoga Fekafekau he Kautu ma e tau motua. Fakamaama he mena nei e aoga ma e tau motua ke matamua he uhu lologo he tau feleveiaaga.

10. Ko e heigoa kua lata a tautolu ke manatu ka hopoate a tautolu ke lologo fakaleo lahi?

¹⁰ Tokologa ne hopoate ke lologo fakalahi ha kua manatu a lautolu neke leo lahi  mahaki po ke nakai mitaki e tau leo ha lautolu. Ka e manamanatu ke he mena nei. “Ko e tau mena loga kua hehe ai a tautolu oti” ka vagahau, ka e nakai taofi he mena ia a tautolu he vagahau. (Iakopo 3:2) Ti ko e fakaatā he ha e tautolu e tau leo nakai mitaki ha tautolu ke taofi a tautolu he lologo fakaheke ki a Iehova?

11, 12. Maeke fēfē a tautolu ke fakaholo ki mua e uhu lologo ha tautolu?

¹¹ Liga hopoate a tautolu he lologo ha kua nakai iloa e puhala ke lologo. Ka e ha ha i ai e tau mena mukamuka ka taute e tautolu ke holo ki mua e uhu lologo ha tautolu. *​—Kikite matahui tala.

¹² Maeke a koe ke lologo fakaleo lahi mo e leo maō he fakaako e puhala ke fafagu fakamitaki. Tuga ni e hila ne foaki e malolō ke puho e fua molī, kua foaki he fafagu e malolō ke he leo haau ka vagahau po ke lologo a koe. Lata a koe ke lologo fakaleo lahi tuga ka vagahau, po ke leo lahi atu foki. (Kikite e tau manatu he Benefit From Theocratic Ministry School Education, lau 181 ke he 184 i lalo he vala mataulu “Tautaofi Fakamitaki e Hala Matagi Haau.”) Ti tala age he Tohi Tapu he falu mogo ke he tau tagata tapuaki ha Iehova ke “kalaga fiafia” ka lologo fakaheke.​—Salamo 33:1-3.

13. Fakamaama e puhala ka lologo mo e mauokafua lahi a tautolu.

¹³ He tapuakiaga magafaoa po ko koe ni, taute e mena nei: Fifili taha he tau lologo mahuiga haau mai he tohi lologo ha tautolu. Totou fakaleo lahi e tau kupu lologo ke he leo maō mo e mauokafua. Matutaki atu, he fakaaoga e leo ia foki, talahau oti e alaga kupu ia he taha e fafagu. Ti lologo e tau kupu ia ke he leo maō taha ia. (Isaia 24:14) Ko e leo lologo haau to malolō lahi, ti ko e mena mitaki a ia. Ua matakutaku po ke fuafuakelea a koe he mena ia!

14. (a) Lagomatai fēfē he hafagi fakalahi atu e gutu ha tautolu ka lologo? (Kikite puha “ Puhala ke Holo ki Mua e Uhu Lologo Haau.”) (e) Ko e heigoa e tau manatu ke kautū mai he tau lekua he leo ka lagomatai ki a koe?

¹⁴ Ke maō e leo ke lologo, lata a koe ke atāina e gutu. Ti ka lologo a koe, hafagi fakalahi e gutu haau ke lahi atu mai he mogo ka vagahau a koe. Ka ko e heigoa kua lata a koe ke taute ka logona hifo kua nakai maō po ke keē lahi e leo haau? Moua e koe e falu manatu  lagomatai he puha “Fahia Mai he Tau Paleko Pauaki,” he Benefit From Theocratic Ministry School Education, lau 184.

15. (a) Ko e heigoa e fakailoaaga ne taute he fonoaga he tau 2016? (e) Ko e heigoa falu kakano ne fakafoou e tohi lologo?

¹⁵ Ko e tau tagata oti ne o atu ke he fonoaga he tau 2016 ne fiafia he mogo ne fakailoa he Matakainaga ko Stephen Lett he Kau Fakatufono e tohi lologo foou ne mataulu “Sing Out Joyfully” to Jehovah. Fakamaama he Matakainaga ko Lett e taha kakano ne lata a tautolu mo e tohi lologo foou ha kua fakafoou e New World Translation of the Holy Scriptures. Ne hiki e tau kupu lologo ke utakehe e tau talahauaga ne nakai fai i loto he New World Translation. Lafi foki ki ai e tau lologo foou hagaao ke he gahua fakamatala mo e lukutoto. Ha ko e uhu lologo foki e vala uho lahi he tapuakiaga ha tautolu, kua manako e Kau Fakatufono ke taute e tohi lologo ne kakano mitaki lahi mahaki. Ti ko e kili kua tatai ai ke he New World Translation.

16, 17. Ko e heigoa falu hikiaga he tohi lologo foou?

¹⁶ Ke mukamuka e tohi lologo ke fakaaoga, ne tuku fakavahega e tau lologo ke he tau matakupu. Ma e fakatai, ko e tau lologo 12 fakamua kua hagaao ki a Iehova, ko e tau lologo 8 ne mui mai kua hagaao ki a Iesu mo e lukutoto, pihia mo e falu foki. Ha ha i ai e tohiaga katoa he tau matakupu oti he  kamataaga he tohi lologo. Ma e fakatai, lagomatai foki e mena nei ka manako e matakainaga taane ke fifili e lologo ma e lauga ke he tau tagata.

¹⁷ Ke lagomatai e tau tagata oti ke lologo mai he loto, falu he tau kupu lologo ne hiki ke maeke e fekau he tau lologo ke maama mitaki. Ko e tau kupu ne nakai fa mahani lahi ke fakaaoga tuga e kupu “shall” ne kua utakehe. Pihia foki, ko e lologo ne mataulu “Long-Suffering” ne hukui aki “Exercise Patience,” mo e hikihiki foki e tau kupu lologo. Ti kua latatonu ke hiki e mataulu he lologo “Guard Your Heart” mai he poakiaga ke he talahauaga “We Guard Our Hearts.” Ko e ha? Ha ko e mogo fakamua, ka lologo he tagata e tau kupu he lologo nei kua tala age a ia ke he falu e mena ke taute. Liga fakafuafuakelea ki a lautolu ne foou, lautolu ne fiafia, lautolu ne ikiiki, mo e tau matakainaga fifine he tau feleveiaaga, tau toloaga, mo e tau fonoaga ha tautolu. Ti ko e mataulu mo e tau kupu lologo kua hiki.

18. Ko e ha kua lata a tautolu ke fakaako e tau lologo he tohi lologo foou ha tautolu? (Kikite matahui tala.)

¹⁸ Loga e tau lologo he “Sing Out Joyfully” to Jehovah kua tuga e tau liogi. Ko e tau lologo nei ka lagomatai a koe ke tala age ki a Iehova e tau logonaaga haau. To lagomatai he falu lologo a tautolu ke fakalagalaga e “fakaalofa mo e tau gahua mitaki.” (Heperu 10:24) Manako a tautolu ke iloa e tau fakatokaaga he lologo, tau leo fakatagi, mo e tau kupu lologo ha tautolu. Taha puhala ka taute e tautolu e mena nei ko e fanogonogo ke he tau tapakiaga he tau matakainaga ne uhu e tau lologo. Moua e tau tapakiaga nei he jw.org. Ka uhu e koe e tau lologo i kaina, maeke a koe ke iloa ke lologo ti mauokafua he lologo mai he loto. *​—Kikite matahui tala.

19. Maeke fēfē a lautolu oti he fakapotopotoaga ke tapuaki ki a Iehova?

¹⁹ Manatu ko e uhu lologo ko e vala aoga lahi he tapuakiaga ha tautolu. Ko e puhala malolō ke fakakite ki a Iehova kua fakaalofa a tautolu ki a ia ti fakaaue ke he tau mena oti ne taute e ia ma tautolu. (Totou Isaia 12:5.) Ka lologo fiafia a koe, kua fakamafana e koe e falu ke taute pihia foki. Ko lautolu oti he fakapotopotoaga ne ikiiki, momotua, po ke foou ki loto he kupu mooli ka tapuaki ki a Iehova he puhala nei. Kia nakai fakauaua ke lologo mai he loto. Omaoma ke he takitakiaga he salamo kua pehē: “Kia lologo atu kia Iehova.” Ē, kia lologo mo e fiafia!​—Salamo 96:1.