1. Ko e heigoa kua fakaatā e Iehova a tautolu ke taute?

KUA fakaatā e Iehova a tautolu ke fifili e puhala ha tautolu he moui. Fakaako e ia a tautolu ke taute e tau fifiliaga mitaki, ti lagomatai e ia a tautolu ke kautū ka taute e tautolu e tau fifiliaga kua fakafiafia a ia. (Sala. 119:173) Ko e lahi e fakagahua e tautolu e pulotu i loto he Kupu he Atua, to holo ki mua a tautolu he taute e tau fifiliaga mitaki.​—Hepe. 5:14.

2. Ko e heigoa e taufetului ne liga fehagai mo tautolu he mole e taute e tautolu e fifiliaga?

² Pete foki ka taute e tautolu e fifiliaga kua iloilo, liga taufetului a tautolu ke fakaoti e mena ne kamata e tautolu. Manamanatu ke he falu fakataiaga: Ko e matakainaga taane fuata ne fifili ke totou e Tohi Tapu katoa. Mitaki a ia he falu faahi tapu gahoa ka e oti noa. Ko e matakainaga fifine ne fifili ke fekafekau ko e paionia tumau ka e fakatolomaki e ia e aho ka kamata ai. Ko e kau he tau motua ne taute e fifiliaga auloa ke putoia lahi ke he ahiahi leveki ki a lautolu he fakapotopotoaga ka e loga e mahina he mole kua nakaila fai mena a lautolu ne taute. Kehekehe e tau tutūaga nei, ka e fai mena ne tatai oti a lautolu. Nakai fakagahua katoatoa e lautolu e tau fifiliaga ia. Ko e tau Kerisiano he senetenari fakamua i Korinito ne fehagai mo e paleko pihia. Mailoga e mena kua fakaako mai ai e tautolu.

3. Ko e heigoa e fifiliaga ne taute he tau tagata Korinito, ka ko e heigoa e mena ne tupu?

³ Kavi ke he 55 V.N., ne taute he tau tagata Korinito e fifiliaga aoga lahi. Iloa e lautolu kua matematekelea e tau matakainaga ha lautolu i Ierusalema mo Iutaia he tau tutūaga uka mo e hoge ti kua oko he falu fakapotopotoaga e tau tupe ke lagomatai a lautolu. Mai he totonu mo e fakamokoi, fifili e tau tagata Korinito ke foaki e tau tupe mo e ole ke he aposetolo ko Paulo e  mena kua lata ia lautolu ke lagomatai. Fakafano e ia e tau poakiaga ke he fakapotopotoaga ti kotofa a Tito ke lagomatai ke oko e tau tupe. (1 Kori. 16:1; 2 Kori. 8:6) Ka e fai mahina he mole, ne iloa e Paulo kua nakaila taute he tau tagata Korinito e mena nei. Ko e fua, to nakai mau e mena fakaalofa ha lautolu he magaaho tonu ke uta ki Ierusalema fakalataha mo e tau mena fakaalofa he falu fakapotopotoaga.​—2 Kori. 9:4, 5.

4. He fakamaama ia 2 Korinito 8:7, 10, 11, ko e heigoa ne fakamalolō e Paulo e tau tagata Korinito ke taute?

⁴ Taute he tau tagata Korinito e fifiliaga mitaki ti nava e Paulo a lautolu ha ko e tua malolō mo e manako mooli ha lautolu ke fakamokoi. Ka e fakamalolō foki e ia a lautolu ke fakaoti e mena ne kamata e lautolu. (Totou 2 Korinito 8:7, 10, 11.) Fakaako mai a tautolu he mena ne tupu ki a lautolu na maeke foki e tau Kerisiano fakamooli ke taufetului ke fakagahua e fifiliaga mitaki.

5. Ko e heigoa e tau hūhū ka tali e tautolu?

⁵ Tuga e tau tagata Korinito, liga uka ia tautolu ke taute e tau mena ne fifili e tautolu. Ko e ha? Ha ko e nakai mitaki katoatoa ti liga fakatolomaki tumau e tautolu. Po ke tau mena tupu fakaofo ti liga uka ia tautolu ke taute e tau mena ne fifili e tautolu. (Fakama. 9:11; Roma 7:18) Manamanatu fēfē a tautolu ke he fifiliaga mo e mailoga kaeke kua lata a tautolu ke hikihiki ai? Ti lauia mitaki fēfē a tautolu he fakaoti e mena kua kamata e tautolu?

6. Magaaho fe ka lata a tautolu ke hikihiki e fifiliaga?

⁶ To nakai hiki e tautolu e falu fifiliaga aoga lahi. Ma e fakatai, pipiki mau a tautolu ke he fifiliaga ha tautolu ke fekafekau ki a Iehova, ti eketaha a tautolu ke mahani fakamooli ke he hoa mau ha tautolu. (Mata. 16:24; 19:6) Ka ko e falu fifiliaga ne liga lata ke hikihiki. Ko e ha? Ha kua hiki e tau tutūaga. Ko e heigoa e tau lakaaga ka lagomatai a tautolu ke taute e tau fifiliaga mitaki lahi?

7. Ko e heigoa ha tautolu kua lata ke liogi ke moua, mo e ko e ha?

⁷ Liogi ma e iloilo. Omoomoi e Iehova a Iakopo ke tohi: “Kaeke ha ha ia mutolu taha kua nakai fai iloilo, kia ole atu a ia ke he Atua; ko ia kua foaki mai mo e totonu ke he tau tagata oti.” (Iako. 1:5) Ko e mena ne tupu, kua “nakai fai iloilo” a tautolu oti. Ti falanaki ki a Iehova ka taute e tautolu e fifiliaga mo e magaaho ka hikihiki ai e fifiliaga ia. To lagomatai e Iehova a koe ke taute e tau fifiliaga kua iloilo.

8. Ko e heigoa e kumikumi kua lata ke taute fakamua e tautolu to taute e fifiliaga?

⁸ Taute e kumikumi fakamakutu. Fakakia ke he Kupu he Atua, totou e tau tohi he fakatokatokaaga ha Iehova, ti tutala ke he tau tagata ne falanaki a koe ki ai. (Fakatai 20:18) Uho lahi e kumikumi fakamua ia to taute e fifiliaga ke hiki e tau gahua, hiki ke he taha matakavi, po ke fifili e fakaakoaga kua latatonu ke lagomatai a koe he fekafekauaga haau ki a Iehova.

9. Aoga fēfē a tautolu ka mahani fakamooli ki a tautolu ni?

⁹ Hakahaka e tau fatuakiloto haau. Ko e tau fatuakiloto ha tautolu kua aoga lahi ki a Iehova. (Fakatai 16:2) Manako a ia ki a tautolu ke mahani fakamooli ke he tau mena oti kana. Ti ka taute e tautolu e tau fifiliaga, manako foki a tautolu ke mahani fakamooli ki a tautolu ni mo e falu hagaao ke he tau fatuakiloto ha tautolu. Ka nakai mahani fakamooli katoatoa a tautolu, to liga uka a tautolu ke fakamooli e fifiliaga. Ma e fakatai, ko e matakainaga taane fuata ne liga fifili ke paionia tumau. Ka e fai magaaho he mole, taufetului a ia ke moua e tau tulā fafati ti nakai lahi e fiafia haana ke he gahua fakamatala. Liga manatu a ia ko e  fatuakiloto pauaki haana ke paionia ko e manako haana ke fakafiafia a Iehova. Ka e liga kia kua omoomoi pauaki a ia he manako ke fakafiafia e tau matua haana po ke ha tagata ne nava e ia?

10. Ko e heigoa kua lata ke taute e tau hikihikiaga?

¹⁰ Manamanatu ke he tuaga he tagata fakaako Tohi Tapu ne fifili ke oti e ula. Fakamua, nakai ula a ia ke he taha po ke ua e faahi tapu, pete he uka, ka e liu ni a ia ula foki. Fakahiku ai kua kautū a ia! Ko e fakaalofa haana ki a Iehova mo e manako ke fakafiafia a Ia ne lagomatai ke totoko e ula.​—Kolo. 1:10; 3:23.

11. Ko e ha kua lata a koe ke fai foliaga pauaki?

¹¹ Kia hagaaki. Ka hagaaki pauaki a koe, to liga hokotia a koe ke he foliaga haau. Ma e fakatai, liga fifili a koe ke totou tumau e Tohi Tapu. Ka nakai fai fakaholoaga pauaki a koe, to nakai hokotia a koe ke he foliaga haau. * Po ke liga fifili e tau motua he fakapotopotoaga ke ahiahi leveki tumau atu ke he fuifui mamoe, ka e fai magaaho he mole kua nakaila taute e lautolu e fifiliaga ia. Ke kautū, maeke a lautolu ke hūhū hifo pehē: “Mailoga nakai e mautolu e tau matakainaga kua aoga pauaki mai he tau ahiahi ha mautolu? Kua fakatoka nakai e mautolu e magaaho pauaki ke ahiahi ki a lautolu?”

12. Ko e heigoa kua liga lata a tautolu ke taute, ti ko e ha?

¹² Kia mooli. Nakai fai ia tautolu ne moua e magaaho, tau koloa, po ke malolō ke taute e tau mena oti kua manako a tautolu ki ai. Kia mooli mo e iloa tonu. Ka latatonu, maeke a koe ke hiki e fifiliaga ne mailoga e koe kua nakai hokotia a koe ke taute. (Fakama. 3:6) Kaeke ke liu a koe ke kitekite ke he fifiliaga haau ti hikihiki ka lata, mo e logona hifo e koe kua maeke ke taute ai. Lima la e lakaaga ka lagomatai a koe ke fakaoti e mena ne kamata e koe.

13. Moua fēfē e koe e malolō kua lata ke fakamooli e fifiliaga?

¹³ Liogi ke moua e malolō ke taute. Foaki atu he Atua ki a koe e ‘loto ke gahua’ mo e ke fakamooli e fifiliaga haau. (Filipi 2:13) Ti ole ki a Iehova ma e agaaga tapu haana ke foaki ki a koe e malolō kua lata. Matutaki ke liogi pete he tuga kua mule e tali he ole haau. Pehē a Iesu: “Kia ole atu a mutolu, ti foaki mai ai [agaaga tapu] kia mutolu.”​—Luka 11:9, 13.

14. Lagomatai fēfē he matapatu fakaakoaga he Tau Fakatai 21:5 a koe ke fakagahua e fifiliaga haau?

¹⁴ Fakatoka e fakaholoaga. (Totou Tau Fakatai 21:5.) Ke fakaoti e taha mena kua kamata e koe, lata a koe ke fai fakaholoaga. Ti lata a koe ke gahua fakatatau ke he fakaholoaga ia. Pihia foki, ka taute e koe e fifiliaga, tohi hifo e tau lakaaga pauaki ne manako a koe ke muitua ki ai ke fakagahua e fifiliaga ia. Ko e fakavahega e tau matagahua lalahi ke he tau matagahua ikiiki ka lagomatai a koe ke kitia e holo ki mua haau. Fakamalolō e Paulo e tau tagata Korinito ke tuku kehe e taha mena ma e tanakiaga mena fakaalofa ha lautolu he “aho fakamua he taha fahi tapu mo e taha fahi tapu” ka e nakai fakatali he lali ke oko e tau tupe he mogo ka hoko atu a ia. (1 Kori. 16:2) Ko e fakavahega e tau matagahua lalahi ke he tau matagahua ikiiki ka taute foki a koe ke ua molea e tupetupe.

15. He mole e fakatoka e fakaholoaga, ko e heigoa ka taute?

¹⁵ Ko e fakaholoaga maaliali ne tohi e koe ka lagomatai a koe ke fakagahua e tau fifiliaga haau. (1 Kori. 14:40) Tuga anei, kua poaki ke he kau he tau motua ke kotofa e motua ke fakamau hifo e tau fifiliaga takitaha he kau he  tau motua, putoia a ia kua kotofa ke fakakia mo e talahau e aho ka oti ai. Ko e tau motua kua muitua ke he fakatokaaga nei kua liga fakagahua e tau fifiliaga ha lautolu. (1 Kori. 9:26) Maeke a koe ke lali ke taute taha mena pihia ma e moui haau. Ma e fakatai, maeke a koe ke tauteute he tohi hifo e tau mena ke taute he aho mo e tuku fakapapahi e tau mena kua amanaki a koe ke taute. Lagomatai he mena nei a koe ke fakaoti e mena kua kamata e koe mo e lahi e mena ka taute he magaaho tote.

16. Ko e heigoa kua latatonu ke maeke ke fakagahua e fifiliaga haau, ti lalago fēfē he Roma 12:11 e mena nei?

¹⁶ Kia fakamakamaka a koe. Lata ke lali ke muitua e fakaholoaga haau mo e fakaoti e mena kua kamata e koe. (Totou Roma 12:11.) Tala age a Paulo ki a Timoteo “kia hagaaki” mo e “tumau ki ai” ke eke mo faiaoga mitaki. Ko e fakatonuaga ia kua aoga agaia ke he falu foliaga fakaagaaga foki.​—1 Timo. 4:13, 16.

17. Fakagahua fēfē e tautolu e Efeso 5:15, 16 he taute e fifiliaga?

¹⁷ Fakatoka fakamitaki e magaaho. (Totou Efeso 5:15, 16.) Fifili e magaaho ke fakagahua e fifiliaga haau ti tumau ki ai. Kalo kehe he fakatali ke he mogo hako ke taute; ha kua nakai fai mogo hako. (Fakama. 11:4) Fakaeneene ke nakai fakaatā e tau mena ne nakai aoga lahi ke fofō e magaaho haau mo e malolō kua lata ma e tau mena ne mua e aoga. (Filipi 1:10) Ka maeke, fakatoka e magaaho ne nakai loga e fakatauhele. Fakailoa ke he falu kua lata a koe ke fai magaaho ke manamanatu fakamitaki. Lata ke tamate e telefoni haau ti fakakia e tau meli hila po ke tau puhala matutaki tala he magaaho fakamui. *

18-19. Ko e heigoa ka fakatumau a koe ke nakai fakalolelole ke he fifiliaga mitaki ka fehagai a koe mo e tau matalekua?

¹⁸ Hagaaki ke he fakahikuaga. Ko e fua he fifiliaga haau kua tuga e matakavi he fenoga. Ka manako mooli ke hoko ke he matakavi ia, to fakatumau a koe ke fano pete ni kua pā e puhalatū ti lata ke hiki e puhala haau ne fano ai. He tuaga ia foki, ka hagaaki a tautolu ke he fakahikuaga he tau fifiliaga, to nakai fakalolelole mafiti ai ka fehagai mo e tau matalekua po ke tau hikihiki.​—Kala. 6:9.

¹⁹ Uka ke taute e tau fifiliaga mitaki, ti paleko ke fakagahua ai. Ka ko e lagomatai ha Iehova, to moua e koe e iloilo mo e malolō kua lata ke fakaoti e mena kua kamata e koe.