1-2. (a) Ko e heigoa ka lagomatai a tautolu ke fakauka he taha aho mo e taha aho? Fakamaama. (e) Ko e heigoa ka fakatutala a tautolu he vala tala nei?

“KO E magaaho ka manamanatu au ke he kamatamata ne lauia ai au, iloa e au kua nakai maeke au ke fehagai tokotaha ki ai.” Kua talahau pihia nakai a koe? Tokologa ia tautolu ne pihia. Liga talahau e koe he mole e manamanatu ke he puhala ne maeke a koe ke fahia ke he gagao hagahaga kelea lahi po ke mate he fakahele. Ka liu a koe ke manamanatu ki ai, logona hifo e koe kua maeke ni ke fakauka he taha aho mo e taha aho ha ko e agaaga tapu ha Iehova ne foaki ki a koe e “lahi ue atu he malolo.”​—2 Kori. 4:7-9.

² Falanaki foki a tautolu ke he agaaga tapu ke lagomatai a tautolu ke totoko e fakaohoohoaga he lalolagi kelea nei. (1 Ioa. 5:19) Lafi ki ai, kua taufetului a tautolu ke tau atu ke he malolō he “tau agaga kelea.” (Efeso 6:12) He tokaloto e tau peehiaga oti nei, to fakatutala a tautolu ke he ua e puhala kua lagomatai he agaaga tapu a tautolu. To fakatutala foki a tautolu ke he mena ka taute e tautolu ke aoga katoatoa mai he agaaga tapu.

3. Ko e heigoa taha puhala kua lagomatai e Iehova a tautolu ke fakauka ke he tau kamatamata?

³ Lagomatai he agaaga tapu ha Iehova a tautolu he foaki mai e malolō ke taute aki e tau matagahua ha tautolu pete e tau kamatamata. Logona hifo he aposetolo ko Paulo kua maeke a ia ke fakatumau ke gahua pete e tau kamatamata haana ha kua falanaki a ia ke he “malolo a Keriso.” (2 Kori. 12:9) He fenoga misionare ke uaaki ha Paulo, ne gahua malolō a ia ke fakamatala ti pihia foki mo e gahua tupe ke leveki aki a ia. Nofo a ia i Korinito he kaina ha Akula mo Pisila. Ko e tau tagata tā fale ie a laua. He gahua pihia a Paulo, ne gahua vala magaaho a ia mo laua. (Gahua 18:1-4) Foaki he agaaga tapu ki a Paulo e malolō  ke gahua tupe mo e taute e fekafekauaga haana.

4. Hagaao ke he 2 Korinito 12:7e-9, ko e heigoa e taufetului ha Paulo?

⁴ Totou 2 Korinito 12:7e-9. He tau kupu tohi nei, ko e heigoa e kakano ha Paulo he pehē a ia kua taufetului a ia mo e “mena mahukihuki ke he tino”? Ka fai mena ne tuina e tino haau ti mau i loto, to mamahi lahi a koe. Ti pehē a Paulo kua fehagai a ia mo e kamatamata mamahi haana. Fakahigoa e ia e kamatamata nei “ko e agelu a Satani” ne “tatuki” tumau a ia. Liga nakai ko Satani po ke tau agelu fakatemoni haana ne fakatupu e tau kamatamata ha Paulo, kua tuga ko e hohoka fakalahi atu e mahukihuki ke he tino haana. Ka ko e mogo ne mailoga he tau agaaga kelea ia e “mena mahukihuki” kua liga fiafia a lautolu ke popoka fakahokulo atu ai, ti holo ki mua e mamahi ha Paulo. Ko e heigoa ne taute e Paulo?

5. Tali atu fēfē a Iehova ke he tau liogi ha Paulo?

⁵ Fakamua, manako a Paulo ke utakehe e “mena mahukihuki.” Talahau e ia: “Ne ole atu lagatolu au ke he Iki [Iehova] . . . kia fano kehe ai a ia ia au.” Ka e pete e tau liogi ha Paulo, kua tumau agaia e mena mahukihuki he tino haana. Kakano kia e mena nei kua nakai tali e Iehova e tau liogi ha Paulo? Nakai pihia. Tali e Iehova e tau liogi haana. Nakai utakehe e Iehova e lekua ka e foaki e ia ki a Paulo e malolō ke fakauka ki ai. Pehē a Iehova: “Kua fakakatoatoa haku a malolo ke he lolelole.” (2 Kori. 12:8, 9) Mo e lagomatai he Atua, maeke a Paulo ke fakatumau e fiafia mo e mafola haana he loto!​—Filipi 4:4-7.

6. (a) Liga to tali fēfē e Iehova e tau liogi ha tautolu? (e) Ko e heigoa e tau maveheaga ne moua he tau kupu tohi ne tū ai kua foaki ki a koe e malolō?

⁶ Tuga a Paulo, kua olelalo nakai a koe ki a Iehova ke laveaki mai he kamatamata? Kaeke kua olelalo fakamakamaka a koe ka e tumau agaia e lekua po ke holo ki mua e kelea, tupetupe kia a koe kua liga nakai fiafia a Iehova ki a koe? Ka pihia, manatu e fakafifitakiaga ha Paulo. Tuga ni he tali e Iehova e tau liogi ha Paulo, to tali foki e Ia e tau liogi haau! To liga nakai utakehe e Iehova e lekua. Ka e puhala he agaaga tapu, to foaki e ia ki a koe e malolō kua lata ke fakauka ke he kamatamata. (Sala. 61:3, 4) Liga to “palu hifo” a koe, ka e to nakai tiaki e Iehova a koe.​—2 Kori. 4:8, 9; Filipi 4:13, NW.

7-8. (a) He puhala fe kua tuga e matagi e agaaga tapu? (e) Fakamaama fēfē e Peteru e gahuahuaaga he agaaga tapu?

⁷ Ko e heigoa foki taha puhala kua lagomatai he agaaga tapu a tautolu? Tuga e matagi hahau he tahi loka, kua omoomoi he agaaga tapu a tautolu ki mua ka lauia he tau kamatamata uka ke hokotia ke he lalolagi foou he Atua.

⁸ Ko e tagata takafaga ika e aposetolo ko Peteru ne mahani ke fano toga. Ti aoga lahi ke mailoga kua fakamaama e ia e gahuahuaaga he agaaga tapu he fakaaoga e tau kupu ne felauaki mo e fano toga. Tohi e ia: “Nakai ko e loto he tau tagata ne tuku mai ai e tau perofetaaga i tuai, ka ko e tau tagata tapu he Atua ne vagavagahau mai he omoi a lautolu he Agaga Tapu.” Ko e kupu Heleni ne fakaliliu “omoi” ne kakano “fakaholo atu ki mua.”​—2 Pete. 1:21.

9. Ko e heigoa e fakatino ne moua e Peteru he fakaaoga e talahauaga “omoi” he agaaga tapu?

⁹ Ko e heigoa e fakatino ne moua e Peteru he fakaaoga e talahauaga “omoi” he agaaga tapu? Ko e tau kupu taha ia foki he vagahau Heleni ne fakaaoga e Luka, ko e tagata tohia he tohi ha Gahua ke fakamaama e foulua, po ke toga taulā ne “tafea” he matagi. (Gahua 27:15) Ti ko e mogo ne tohi e Peteru hagaao ke he tau tagata tohia he Tohi Tapu ne “fakaholo ki mua,” kua fakaaoga e ia e “kupu fakatai ke he toga he tahi,” tuga ne talahau he taha tagata pulotu hagaao ke he Tohi Tapu. Pehē a Peteru, kua  tuga ni e toga ne tafea, po ke holo he matagi ke hokotia ke he matakavi ne fano ki ai, pihia foki e tau perofeta mo e tau tagata tohia he Tohi Tapu ne omoomoi he agaaga tapu ke taute e matagahua ha lautolu. Pehē e tagata pulotu taha ia: “Kua tuku hake he tau perofeta e tau lā he tau toga ha lautolu.” Taute e Iehova e vala haana. Foaki e ia e “matagi,” po ke agaaga tapu. Taute he tau tagata tohia he Tohi Tapu e vala ha lautolu. Gahua fakalataha a lautolu mo e takitakiaga he agaaga ia.

10-11. Ko e heigoa e tau lakaaga ua kua lata a tautolu ke taute ke tumau e takitakiaga he agaaga tapu? Fakatai.

¹⁰ Mooli, ko e magaaho ke fakamau hifo e Tau Tohiaga Tapu kua nakai liu tohi foki mogonei. Ka e gahuahua agaia e malolō he agaaga tapu ke he tau tagata he Atua. Taute agaia e Iehova e vala haana. Aoga fēfē a tautolu mai he agaaga tapu he Atua? Lata a tautolu ke iloa mooli kua taute tumau e tautolu e vala ha tautolu. Taute fēfē e tautolu e mena ia?

¹¹ Manamanatu ke he fakatai nei. Ke aoga mai he matagi kua lata e tagata fano toga ke taute ua e mena. Fakamua, fakatila e ia e toga haana ke he hala ne agi mai e matagi. Ha ko e mena to nakai holo e toga haana kaeke nofo mau he uaafo, mamao mai he mena ne agi e matagi. Uaaki, lata a ia ke tuku hake mo e hafagi fakalahi e tau lā haana. Pete ne agi e matagi, to holo ni e toga haana ki mua ka poka he matagi e tau lā. Pihia foki, to fakauka ni a tautolu he fekafekauaga ha Iehova ha ko e lagomatai he agaaga tapu. Ke aoga mai he agaaga ia, lata a tautolu ke taute ua e lakaaga. Fakamua, lata ke tuku ne tautolu a tautolu he puhala he agaaga he Atua he fai vala ke he tau matagahua ne takitaki he agaaga ia. Uaaki, lata ke “tuku hake e tau lā ha tautolu” mo e hafagi fakalahi ai he eketaha ke taute katoatoa e tau matagahua nei. (Sala. 119:32) Ka taute e tautolu e tau lakaaga nei, to omoi he agaaga tapu a tautolu ke fehagai mo e tau totokoaga mo e tau kamatamata ti lagomatai a tautolu ke fakauka fakamooli he puhala ke he lalolagi foou he Atua.

12. Ko e heigoa ha tautolu mogonei ka fakatutala ki ai?

 ¹² Kua fakatutala tuai a tautolu ke he ua e puhala ne lagomatai he agaaga tapu a tautolu. Foaki mai he agaaga tapu ki a tautolu e malolō mo e lagomatai a tautolu ke fakamooli tumau he fehagai mo e tau kamatamata. Fakaholo ki mua foki he agaaga tapu a tautolu mo e lagomatai a tautolu ke fakatumau he puhala ke he moui tukulagi. To fakatutala a tautolu mogonei ke he fā e mena kua lata a tautolu ke taute ke aoga katoatoa mai he agaaga tapu.

13. Hagaao ke he 2 Timoteo 3:16, 17, ko e heigoa ka taute he Tohi Tapu ma tautolu, ka ko e heigoa kua lata a tautolu ke taute?

¹³ Fakamua, fakaako e Kupu he Atua. (Totou 2 Timoteo 3:16, 17.) Kua fakaliliu e talahauaga Heleni ‘mai he agaga he Atua’ ke kakano ko e “fafagu he Atua.” Fakaaoga he Atua e agaaga ke “fafagu” haana tau manatu ke he tau loto he tau tagata tohia Tohi Tapu. Ka totou e tautolu e Tohi Tapu mo e manamanatu fakahokulo ke he mena kua totou e tautolu, ko e tau fakaakoaga he Atua kua hokotia ke he tau manamanatuaga mo e tau loto ha tautolu. Ko e tau manatu omoomoi ia kua fakalagalaga a tautolu ke fakatatau e tau momoui mo e finagalo he Atua. (Hepe. 4:12) Ke aoga katoatoa mai he agaaga tapu, lata a tautolu ke fakatoka e taha magaaho ke fakaako tumau e Tohi Tapu mo e manamanatu fakahokulo ke he mena kua totou e tautolu. To fakalagalaga he Kupu he Atua e tau mena oti kua vagahau mo e taute e tautolu.

14. (a) Ko e ha ne kua pehē a tautolu kua agi ki ai e matagi he tau feleveiaaga Kerisiano ha tautolu? (e) Puhala fe kua o mai a tautolu ke he tau feleveiaaga mo e kua “hafagi e tau lā”?

¹⁴ Uaaki, tapuaki auloa ke he Atua. (Sala. 22:22) Kakano ai, ko e tau feleveiaaga Kerisiano ha tautolu ko e tau matagahua ne agi ki ai e matagi. Kua ha ha i ai e agaaga ha Iehova he tau feleveiaaga. (Fakakite. 2:29) Ko e ha ne talahau pihia a tautolu? Kakano ka fakalataha a tautolu ke tapuaki mo e tau matakainaga Kerisiano, liogi a tautolu ma e agaaga tapu, uhu e tautolu e tau lologo he Kautu ne fakavē ke he Kupu he Atua, ti fanogonogo a tautolu ke he tau fakaakoaga ne fakavē ke he Tohi Tapu ne lauga mai he tau matakainaga taane ne kua kotofa he agaaga tapu. Ti ko e agaaga tapu taha ia ne lagomatai e tau matakainaga fifine ke tauteute mo e fakatoka mai e tau vala ha lautolu. Ke aoga katoatoa mai he agaaga tapu, kua lata a tautolu ke mautauteute ke fai vala he tau feleveiaaga. He puhala ia, kua o mai a tautolu ke he tau feleveiaaga mo e tuga kua “hafagi e tau lā.”

15. Fai vala fēfē e agaaga tapu he gahua fakamatala?

¹⁵ Toluaki, taute e gahua fakamatala. Ka fakaaoga e tautolu e Tohi Tapu he gahua fakamatala mo e fakaako atu, kua fakaatā e tautolu e agaaga tapu ke fai vala he fekafekauaga ha tautolu. (Roma 15:18, 19) Ke aoga katoatoa mai he agaaga he Atua, lata a koe ke fai vala tumau he gahua fakamatala ti fakaaoga e Tohi Tapu ka maeke. Taha puhala ke fai kakano lahi e fekafekauaga haau ko e fakaaoga e tau tutalaaga fakataitai he Life and Ministry Meeting Workbook.

16. Ko e heigoa e puhala pauaki ke moua e agaaga tapu?

¹⁶ Fāaki, liogi ki a Iehova. (Mata. 7:7-11; Luka 11:13) Ko e puhala pauaki ke moua e agaaga tapu ko e ole ki a Iehova he liogi. Nakai fai mena ke taofi e tau liogi ha tautolu ke hoko atu ki a Iehova po ke taofi e mena fakaalofa mitaki he agaaga he Atua ke hoko mai ki a tautolu, nakai fai kaupā he fale puipui ti nakai maeke foki a Satani. (Iako. 1:17) Lata ke liogi fēfē a tautolu ke maeke ke aoga katoatoa mai he agaaga tapu? Ke tali, kia kumikumi fakalaulahi la a tautolu ke he matakupu he liogi he  fakatutala ke he fakatai ne moua ni he Evagelia ha Luka. *

17. Ko e heigoa e fakaakoaga hagaao ke he liogi ka iloa e tautolu mai he fakatai ha Iesu ne fakamau ia Luka 11:5-9, 13?

¹⁷ Totou Luka 11:5-9, 13. Fakakite he fakatai ha Iesu e puhala kua lata a tautolu ke liogi ma e agaaga tapu. He fakatai, moua he tagata e mena kua lata mo ia “ha ko e hana ole fakamakamaka.” Nakai matakutaku a ia ke ole ke he kapitiga haana ma e lagomatai pete kua tuloto e pō. (Kikite mwbr18 Iulai, lau 8.) Fakaaoga fēfē e Iesu e fakatai nei ke he liogi? Pehē a ia: “Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu.” Ti ko e heigoa e fakaakoaga ma tautolu? Ke moua e lagomatai he agaaga tapu, lata a tautolu ke liogi fakamakamaka ke moua ai.

18. Hagaao ke he fakatai ha Iesu, ko e ha kua mauokafua a tautolu to foaki e Iehova ki a tautolu e agaaga tapu haana?

¹⁸ Ko e fakatai ha Iesu kua lagomatai mai foki ke kitia e kakano ka foaki e Iehova e agaaga tapu ki a tautolu. Ko e tagata he fakatai ne manako ke eke mo tagata leveki mitaki. Ne omoomoi a ia ke age e mena kai ke he tagata ahiahi haana ne mule ka e nakai fai mena ke age ki ai. Pehē a Iesu kua tali atu e katofia ha kua ole fakamakamaka lahi e tagata taane ma e mena kai. Ko e heigoa e kakano ha Iesu? Ka makai e tagata nakai mitaki katoatoa ke lagomatai e katofia ne ole fakamakamaka, lahi fēfē e lagomatai he Matua totonu he lagi ki a lautolu kua ole fakamakamaka ki a Ia ma e agaaga tapu! Kia liogi mo e mauokafua to tali e Iehova e ole mafiti ha tautolu ma e agaaga tapu.​—Sala. 10:17; 66:19.

19. Ko e ha kua iloa e tautolu to kautū a tautolu?

¹⁹ To iloa e tautolu pete he lali tumau a Satani ke kaumahala a tautolu, to kautū ni a tautolu. Ko e ha? Kakano kua lagomatai he agaaga tapu ke he ua e puhala. Fakamua, foaki ai ki a tautolu e malolō kua lata ke kautū ke he tau kamatamata. Uaaki, ko e malolō ne “fakapuke e tau lā ha tautolu” he lagomatai ke holo ki mua he fekafekau ki a Iehova ato hoko atu ke he lalolagi foou he Atua. Kia eketaha a tautolu ke aoga katoatoa mai he lagomatai he agaaga tapu!