1-2. Muitua fēfē e tautolu e fakatonuaga ia Tau Fakatai 4:25? Talahau e fakatai.

MANAMANATU ke he tau mena nei ne tupu. Ko e matakainaga fifine motua ne manatu e tau magaaho mitaki he moui haana fakamua. Pete kua paleko lahi e moui haana mogonei, matutaki a ia ke taute e tau mena oti kua maeke a ia ma Iehova. (1 Kori. 15:58) Manamanatu a ia he tau aho takitaha ki a ia mo e tau fakahele haana ka momoui auloa he lalolagi foou ne kua mavehe. Manatu he taha matakainaga fifine e mamahi haana ha ko e mena ne talahau he taha matakainaga, ka e fifili a ia ke fakatoka kehe e ita. (Kolo. 3:13) Mailoga lahi he matakainaga taane e tau hehē haana kua mole ka e hagaaki mogonei ke fakatumau e mahani fakamooli.​—Sala. 51:10.

² Ko e heigoa e tau mena ne tatai e tau Kerisiano tokotolu nei? Manatu e lautolu e tau mena ne tutupu he tau momoui ha lautolu he mogo fakamua ka e nakai manamanatu tumau a lautolu ki ai. “Kitekite fakahako atu” ni a lautolu ke he vahā i mua.​—Totou Tau Fakatai 4:25.

3. Ko e ha kua lata a tautolu ke “kitekite fakahako atu” ke he vahā i mua?

³ Ko e ha kua aoga ke “kitekite fakahako atu” ke he vahā i mua? Tuga ne tagata ka nakai maeke ke fano fakahako he laini ka onoono tumau a ia ki tua, ti nakai maeke a tautolu ke holo ki mua he gahua ha Iehova ka manamanatu tumau a tautolu ke he moui ha tautolu he mogo fakamua.​—Luka 9:62.

4. Ko e heigoa ka fakatutala a tautolu he vala tala nei?

⁴ He vala tala nei, to fakatutala a tautolu ke he tolu e matahele ka omoomoi a tautolu ke manamanatu tumau ke he moui fakamua. Ko e tau mena ia ko e: (1) manatu e moui fakamua (nostalgia), (2) ita, mo e (3) molea e logonaaga agahala. He tau tuaga takitaha, to kitia e tautolu e puhala ka lagomatai he tau matapatu fakaakoaga he Tohi Tapu a tautolu ke nakai tākele  ke he “tau mena kua mole atu, ka e oho atu . . . ke he tau mena ha i mua.”​—Filipi 3:13.

5. Ko e heigoa e matahele ne hataki he Fakamatalaaga 7:10?

⁵ Totou Fakamatalaaga 7:10. Mailoga kua nakai talahau he kupu tohi nei kua hepe ke hūhū: “Ko e heigoa e mena ne mitaki he tau aho fakamua ke he tau aho nai?” Ko e tau manatu mitaki ko e mena fakaalofa mai ia Iehova. Ka e totou he kupu tohi: “Ua pehe a koe, Ko e heigoa e mena ne mua e mitaki he tau aho fakamua ke he tau aho nai?” Ha ko e matahele anei ka fakatatai e tautolu e tau tuaga fakamua ke he tau tuaga ha tautolu mogonei mo e pehē kua kelea lahi mahaki e tau mena oti mogonei. Ko e taha fakaliliuaga he Tohi Tapu ke he kupu nei: “Ua hūhū, ‘Oi, ko e ha ne mitaki lahi mahaki e tau mena i tuai?’ Nakai ko e hūhū pulotu anei.”

6. Ko e ha kua nakai pulotu ke manamanatu tumau kua mua e mitaki he tau momoui ha tautolu he mogo fakamua? Talahau e fakatai.

⁶ Ko e ha kua nakai pulotu ke manamanatu tumau kua mua e mitaki he tau momoui ha tautolu he mogo fakamua? Maeke he manatu e moui fakamua ke omoomoi a tautolu ke manatu ni e tau mena mitaki he mogo fakamua. Po ke omoomoi a tautolu ke nimo e tau mena uka ne fa fehagai mo tautolu. Ma e fakatai, mailoga e tau Isaraela i tuai. He mole e o kehe i Aikupito, ne mafiti a lautolu ke nimo e moui uka ha lautolu i ai. Ka e hagaaki a lautolu ke he tau mena kai mitaki ne kai fiafia e lautolu. Pehē a lautolu: “Kua manatu e tautolu ke he tau ika ne kai fakahanoa ai e tautolu i Aikupito; ko e tau fua kukama foki, mo e tau fua meleni, mo e tau fua liki, mo e tau fua aniani, mo e tau fua kalika.” (Nume. 11:5) Ka e “kai fakahanoa” mooli nakai e lautolu e tau mena kai ia? Nakai. Ne matematekelea lahi e tau Isaraela he magaaho ia ha kua pehia lahi mahaki a lautolu he eke mo tau tupa i Aikupito. (Esoto 1:13, 14; 3:6-9) Ka e nimo e lautolu he mogo fakamui e tau mena uka ia ti loto lahi ke he moui ha lautolu he mogo fakamua. Fifili a lautolu ke hagaaki ke he tau aho fakamua ne mitaki ka e nakai hagaaki ke he tau mena mitaki  ne taute e Iehova ma lautolu. Nakai fiafia a Iehova ke he tau aga ha lautolu.​—Nume. 11:10.

7. Ko e heigoa ne lagomatai e taha matakainaga fifine ke kalo kehe he matahele ke manatu e moui fakamua?

⁷ Kalo kehe fēfē a tautolu he matahele ke manatu e moui fakamua? Mailoga e fakataiaga he matakainaga fifine ne kamata ke gahua he Peteli i Brooklyn he 1945. Fai tau he mole ti mau a ia mo e matakainaga taane he Peteli mo e fekafekau tokoua i ai ke he loga e tau tau. Ka e he 1976 ne gagao lahi e taane haana. Pehē a ia he mailoga he taane haana kua teitei ke mate, ne talahau he taane e falu fakatonuaga mitaki ke lagomatai aki a ia ke he tuaga takape haana. Tala age e taane ki a ia: “Fiafia e fakamauaga ha taua. Nakai tokologa e tagata ne moua e logonaaga pihia.” Ka e tomatoma foki he taane: “Manatu ke he tau magaaho mitaki, ka e ua tākele ke he moui fakamua ia. Fai magaaho to maulu fakahaga e logonaaga haau. Ua mamahi lahi e loto mo e momoko ke he mena ne tupu ki a koe. Fakaaue ha kua moua e koe e tau fiafia mo e tau monuina nei. . . . He manatu e tau mena ia ko e mena fakaalofa he Atua ki a taua.” Talia nakai e koe kua mitaki e fakatonuaga nei?

8. Aoga fēfē e matakainaga fifine he nakai tākele ke he moui fakamua?

⁸ Tokaloto he matakainaga fifine e tau kupu ia. Fekafekau fakamooli a ia ki a Iehova ato mate a ia he 92 e tau he moui. Fai tau to mate, pehē a ia: “He liu ono ki tua ke he 63 e tau he gahua mau ki a Iehova, maeke au ke talahau kua fiafia moolioli e moui haaku.” Ko e ha? Fakamaama e ia: “Ko e mena ne taute he moui ke fiafia mooli ko e ha tautolu a tau matakainaga fulufuluola mo e amaamanakiaga he momoui mo e tau matakainaga ha tautolu ke he lalolagi parataiso he fekafekau tumau ki a Iehova, ko e ha tautolu a Tufuga Homo Ue Atu mo e Atua mooli tokotaha.” * Ko e fakafifitakiaga mitaki lahi mahaki he taha ne kitekite fakahako atu ke he vahā i mua!

9. Hagaao ke he Levitika 19:18, liga ko e magaaho fe kua uka pauaki a tautolu ke fakatoka kehe e ita?

⁹ Totou Levitika 19:18. Fa uka a tautolu ke fakatoka kehe e ita kaeke ko e matakainaga, kapitiga tata, po ke magafaoa ne fai mena kelea ne taute ki a tautolu. Ma e fakatai, tukupau hehē he taha matakainaga e matakainaga fifine he kaihā e tupe haana. Fakamui ne fakamolemole e matakainaga ka e tumau ni e ita he matakainaga fifine ne lauia he tukupau. Kua logona pihia nakai a koe? Pete kua nakaila feleveia a tautolu mo e tuaga pihia, laulahi ia tautolu ne liga logona hifo e ita ti talitonu to nakai maeke a tautolu ke fakatoka kehe e ita.

10. Ko e heigoa ka lagomatai a tautolu ka logona hifo e ita?

¹⁰ Ko e heigoa ka lagomatai a tautolu ka logona hifo e ita? Taha mena, manatu kua kitia e Iehova e tau mena oti. Mailoga e ia e tau mena oti kua hoko ki a tautolu, pihia mo e tau nakai fakafili tonu ne lauia a tautolu. (Hepe. 4:13) Momoko a ia ki a tautolu ka matematekelea a tautolu. (Isaia 63:9) Ti mavehe e ia to utakehe katoatoa e ia e tau matematekelea ne fua mai he tau nakai fakafili tonu ne tutupu ki a tautolu.​—Fakakite. 21:3, 4.

11. Aoga fēfē ki a tautolu ka fakatoka kehe e ita?

¹¹ Manako foki a tautolu ke manatu ka fakatoka kehe e tautolu e ita, to aoga ki a tautolu. Ko e mena nai ne mailoga he matakainaga fifine ne lauia he tukupau. Fai magaaho ti fakatoka kehe e ia e ita. Mailoga e ia ka fakamagalo e tautolu e falu, to fakamagalo e Iehova a tautolu. (Mata. 6:14) Iloa e ia nakai hako e mena ne taute he matakainaga haana, ka e fifili a ia ke fakatoka kehe e ita. Ti ko e fua, fiafia lahi e matakainaga fifine ha tautolu ti maeke ke hagaaki ke he fekafekau haana ki a Iehova.

12. Ko e heigoa ne talahau ia 1 Ioane 3:19, 20?

¹² Totou 1 Ioane 3:19, 20. Lauia oti a tautolu he tau logonaaga agahala. Ma e fakatai, falu ne logona agahala ha ko e tau mena ne taute e lautolu ato fakaako e kupu mooli. Falu ne logona agahala ha ko e tau hehē ne taute e lautolu he mole e papatiso. Aga mau e tau logonaaga ia. (Roma 3:23) Manako a tautolu ke taute e mena hako. Ka ko e “tau mena loga kua hehe ai a tautolu oti.” (Iako. 3:2; Roma 7:21-23) Pete kua nakai manako a tautolu ke he logonaaga agahala, ka e fai mena mitaki e mena ia ka taute ki a tautolu. Ko e ha? Ha kua omoomoi he tau logonaaga agahala a tautolu ke fakahako e puhala moui mo e eketaha ke nakai liu taute e tau hehē.​—Hepe. 12:12, 13.

13. Ko e ha kua lata a tautolu ke puipui he molea e logonaaga agahala?

¹³ He taha faahi, kua maeke ke molea e logonaaga agahala he matutaki ke logona e agahala pete kua fakatokihala a tautolu mo e fakakite kua fakamagalo e Iehova a tautolu. Ko e agahala pihia kua hagahagakelea. (Sala. 31:10; 38:3, 4) Ko e ha? Mailoga e fakataiaga ke he taha matakainaga fifine ne taufetului he agahala ke he tau hehē haana kua mole. Pehē a ia: “Logona hifo e au kua liga nakai lata au ke eketaha ke fekafekau ki a Iehova ha kua liga tōmui lahi.” Tokologa ia tautolu ne logona hifo tuga e matakainaga fifine. Latatonu ke puipui a tautolu he matahele ke molea e logonaaga agahala. Manamanatu la ke he fiafia ha Satani ka mahala a tautolu, pete kua fakamagalo e Iehova a tautolu!​—Fakatatai 2 Korinito 2:5-7, 11.

14. Iloa mooli fēfē e tautolu kua nakai tiaki e Iehova a tautolu?

¹⁴ Ka e liga manamanatu agaia a tautolu, ‘Iloa mooli fēfē e au kua nakai tiaki e Iehova au?’ Ka hūhū pihia, kua maeke a tautolu ke  tali foki. Loga e tau kua mole, talahau he The Watchtower: “[Liga] moua e tautolu a tautolu kua fakatupetupe mo e agahala ke he loga he tau magaaho ke he falu aga kelea ne kua tokona ke he puhala fakamua ha tautolu he moui ka e nakai mailoga e tautolu. . . . Ua fakaatukehe. Ua fakahiku ke manatu kua taute e koe e agahala ne nakai maeke ke fakamagalo. Ko e mena ia ni ne manako a Satani ki a koe ke manatu. Mooli kua logona e koe e maanu mo e fakaita ki a koe ni kua fakamooli ai kua nakai fano mamao a koe. Kia nakai fakalolelole he fuluhi fakatokolalo mo e ole ke he Atua, kumi e fakamagalo mo e fakameā mo e lagomatai haana. Fina atu ki a ia tuga e tama ne fina atu ke he matua taane ka fai lekua, pete ni he lagaloga e lolelole pihia, mo e to foaki fiafia e Iehova ki a koe e lagomatai ha ko e haana a fakaalofa noa.” *

15-16. Logona hifo fēfē e falu ka mailoga kua nakai tiaki e Iehova a lautolu?

¹⁵ Tokologa e tau tagata ha Iehova kua moua e mafanatia he mailoga kua nakai tiaki e Iehova a lautolu. Ma e fakatai he falu tau kua mole, taha e matakainaga taane ne fakalagalaga he tala ne tohi he tau fufuta vala tala “Hiki he Tohi Tapu e Tau Momoui.” He vala tala, talahau he matakainaga fifine ha ko e mena ne tupu ki a ia he mogo fakamua na uka a ia ke talitonu kua fakaalofa a Iehova ki a ia. Taufetului a ia ke he tau logonaaga pihia ke he loga e tau tau he mole e papatiso. Ka e he manamanatu fakahokulo a ia ke he lukutoto ne kamata a ia ke hiki e kitiaaga haana. *

¹⁶ Lagomatai fēfē he tala haana e matakainaga taane? Tohi e ia: “He tote, uka lahi au ke totoko e kitekite ke he tau fakatino telefua. Liu au kitekite ki ai he mogo kua mole. Kumi lagomatai au ke he tau motua Kerisiano, ti holo ki mua e totoko haaku ke he lekua. Fakamafana he tau motua au ke he fakaalofa mo e fakaalofa noa he Atua. Ka e falu mogo, logona hifo agaia e au e nakai aoga ke tuga kua nakai fakaalofa a Iehova ki a au. Lagomatai mooli ki a au he totou e tala he [matakainaga fifine nei]. Mailoga e au mogonei ka manamanatu au kua nakai fakamagalo he Atua au, tuga na pehē  au kua nakai maeke e poa he Tama haana ke ufiufi e tau agahala haaku. Hehele e au e vala tala nei ke maeke au ke totou mo e manamanatu fakahokulo ki ai ka logona hifo e au e nakai aoga.”

17. Kalo kehe fēfē e aposetolo ko Paulo he matahele ke molea e logonaaga agahala?

¹⁷ Ko e tau tala tuga anei kua fakamanatu ki a tautolu e aposetolo ko Paulo. Ato eke a ia mo Kerisiano, ne loga e agahala kelea lahi mahaki ne taute e ia. Manatu e Paulo e tau mena ne taute e ia ka e nakai manamanatu tumau a ia ki ai. (1 Timo. 1:12-15) Onoono a ia ke he lukutoto ko e mena fakaalofa fakatagata ki a ia. (Kala. 2:20) Kalo kehe a Paulo he matahele ke molea e logonaaga agahala ti hagaaki ke fekafekau katoatoa ki a Iehova.

18. Ko e heigoa kua fakaako e tautolu mai he vala tala nei?

¹⁸ Ko e heigoa kua fakaako e tautolu mai he kumikumi ke he tau matahele ne fakatutala he vala tala nei? (1) Ko e tau manatu mitaki ko e fakamonuinaaga mai ia Iehova; ka e pete he mitaki e moui ha tautolu he mogo fakamua to mua atu e mitaki e vahā i mua ha tautolu he lalolagi foou. (2) Liga fakamamahi he falu a tautolu, kaeke ke fifili a tautolu ke fakamagalo, to maeke a tautolu ke holo ki mua. (3) Taofi he molea e logonaaga agahala a tautolu ke fiafia he fekafekau ki a Iehova. Ke tuga a Paulo, lata a tautolu ke talitonu kua fakamagalo e Iehova a tautolu.

19. He lalolagi foou, iloa fēfē e tautolu to nakai manatu e tautolu e tau hehē kua mole?

¹⁹ Moua e tautolu e amaamanakiaga ke moui tukulagi. He lalolagi foou he Atua, to nakai manatu e tautolu e tau hehē ha tautolu kua mole. He magaaho ia, pehē e Tohi Tapu: “Nakai tuai manatu ke he tau mena fakamua.” (Isaia 65:17) Manamanatu la: Falu ia tautolu mogonei kua fuakau he fekafekau ki a Iehova, ka e he lalolagi foou to liu a tautolu ke fuata. (Iopu 33:25) Ko e mena ia, eketaha ke ua manamanatu tumau ke he moui fakamua. Ka e kitekite fakahako atu a tautolu ke momoui he lalolagi foou!