Tau Monuina ma Lautolu ne Liliu ke he Motu ne Fanau Ai
TOKOLOGA e matakainaga ne hiki ke he falu motu ke gahua tupe he magaaho fakamua ka kua liliu tuai ke he tau motu ne o mai ai. He omoomoi he fakaalofa ki a Iehova mo e tau tagata, ne o atu a lautolu ke he tau matakavi ne manako lahi ke he tau tagata fakailoa he Kautu. (Mata. 22:37-39) Ko e heigoa e tau hikiaga ne taute e lautolu, mo e ko e heigoa e tau monuina? Ke iloa, hagaaki a tautolu ke he motu ko Cameroon he faahi lalo i Aferika.
“HE MATAKAVI HAKO KE ‘TAKAFAGA’”
He 1998 ko e matakainaga ko Onésime ne toka e motu haana ko Cameroon. Ne 14 e tau ne nofo a ia he motu kehe. He taha aho he feleveiaaga Kerisiano, ne logona e ia e fakatai hagaao ke he gahua fakamatala. Pehē e tagata lauga, “Ka tokoua e kapitiga ne takafaga ika he tau matakavi kehekehe ti taha ne loga e ika ne moua, to hiki atu nakai e kapitiga ne gahoa e ika ne moua ke he matakavi ia ne loga e ika?”
Omoomoi he fakatai ia a Onésime ke liu ki Cameroon ne tokologa e tagata ne manako ke fakaako e Tohi Tapu. Ka e tupetupe a ia. To maeke nakai a ia ke mahani mo e motu haana ko Cameroon ha kua leva e nofo he motu kehe? Ke iloa, ne fano a Onésime ki Cameroon ke ono e mahina. He 2012, ne liu a ia ke nofo i ai.
Talahau e Onésime: “Lata au ke fakamahani ke he vela mo e tau puhala he moui. He Fale he Kautu, lata au ke liu fakamahani ke nofo he tau nofoa maō. Ka e he hagaaki lahi au ke he fakaholoaga,” he talahau e ia mo e mamali, “ne nimo fakahaga e au e tau nofoa molū.”
He 2013, ne mau a Onésime mo Géraldine, ne liu ki Cameroon he mole e hiva e tau he nofo i Falani. Ko e heigoa e tau monuina ne moua he hoa nei he hagaaki e tau momoui ha laua ke he tau gahua fakaagaaga? Pehē a Onésime: “Ne o atu a maua he Aoga ma e Tau Tagata Fakamatala ti fekafekau he Peteli. He tau kua mole, ne 20 e tagata fakaako Tohi Tapu he fakapotopotoaga ha maua ne papatiso. Logona hifo e au mogonei ko au he matakavi hako ke ‘takafaga.’” (Mare. 1:17, 18) Lafi e Géraldine: “Loga lahi e tau monuina ne moua e au ke he mena kua amanaki au ki ai.”
FIAFIA HE MOUA E TAU TAMA FAKAAGAAGA
Ko Judith ne hiki atu ki Amerika ka e manako ke fakalahi e fekafekauaga haana. Talahau e ia, “He matahiku he tau ahiahi oti ke he magafaoa i Cameroon, tagi au he toka hifo e tau tagata kua kamata ke fakaako Tohi Tapu mo au.” Ka kua fakauaua a Judith ke liu ki Cameroon. Gahua totogi mitaki a
ia ti maeke ke totogi e levekiaga fakaekekafo ke lata mo e matua taane haana i Cameroon. Ka e falanaki a Judith ki a Iehova ti hiki ki Cameroon. Pehē a ia ne misi e ia e falu mena hagahaga mitaki he nofo i Amerika. Liogi a ia ki a Iehova ke lagomatai ke hiki ti kua lagomatai he fakamafanaaga ne moua e ia mai he leveki takaiaga mo e hoana haana.He liu ono ki tua, pehē a Judith, “He tolu e tau ne fiafia au he moua fā e tama fakaagaaga.” Kamata a Judith ke fekafekau ko e paionia pauaki. Mogonei kua fekafekau a ia mo e taane haana ko Sam-Castel he gahua takaiaga. Ka e kua e matua taane ha Judith? Moua e ia mo e magafaoa haana e fale gagao he taha motu ne maeke ke totogi e iihi he matua taane haana. Fiafia ai ha kua kautū e iihi.
MAILOGA E LALAGOAGA HA IEHOVA
Ko e matakainaga ko Victor ne hiki ki Kanatā. He oti e totou he vala tala he Watchtower hagaao ke he fakaakoaga tokoluga, ne manamanatu a ia ke he fakaakoaga haana. Toka e ia e fakaakoaga univesitī ke taute e fakaakoaga kū. “Maeke au ke moua vave e gahua,” he ui e ia, “mo e taute e gahua ne manako lahi au ki ai—ko e paionia.” Fakamui, mau a Victor mo Caroline ti ahiahi ki Cameroon. He ahiahi a laua ke he la ofisa i ai, ne fakamafana ki a laua ke manamanatu ke fekafekau i Cameroon. Pehē a Victor, “Nakai fai kakano a maua ke nakai talia ai mo e fitā he fakamukamuka e tau momoui ha maua ati talia e maua e uiina.” Pete e tau lekua he malolō tino ha Caroline, fifili a laua ke hiki atu.
Kamata a Victor mo Caroline ke fekafekau ko e tau paionia tumau ke lagomatai e tau tagata tokologa ne fiafia he fonua. Fai magaaho a laua ne fakaaoga he tau tupe ne fakaputu. Mole ia, ne fai mahina he ō ki Kanatā ke gahua ke maeke a laua ke liliu ki Cameroon ke matutaki e paionia. Ko e heigoa e tau monuina ne moua e laua? O atu a laua he Aoga ma e Tau Tagata Fakamatala, fekafekau ko e tau paionia pauaki, mo e fekafekau mogonei ko e tau tagata gahua talaga. Ui e Victor, “He toka hifo e moui hagahaga mitaki kua maeke a maua ke mailoga e lalagoaga ha Iehova.”
KO E FIAFIA KE LAGOMATAI E TAU TAGATA KE TUKULELE E TAU MOMOUI KI A IEHOVA
He 2002, ko Alain ko e tagata fakaako he univesitī i Sihamani ne totou e tuleke Youths—What Will You Do With Your Life? Omoomoi a ia he tau vala tala i loto ke fakatoka e tau foliaga foou. He 2006, ne fina atu a ia he Aoga Fakaako Fekafekau ti kotofa ki Cameroon ko e motu ne fanau a ia.
I Cameroon, moua e Alain e gahua vala magaaho. Fakamui, moua e ia e gahua ne totogi mitaki ka kua tupetupe a ia neke tote e magaaho he fekafekauaga haana. Ti ko e magaaho ne uiina a ia ke fekafekau ko e paionia pauaki, ne talia agataha e ia. Foaki he takitaki gahua ke tuku hake e totogi ha Alain ka e tumau ni a ia ke he fifiliaga haana. Fakamui, ne mau a Alain mo Stéphanie ne leva e nofo i Falani. Ko e heigoa e tau mena uka ne moua e Stéphanie he hiki ki Cameroon?
Pehē a Stéphanie: “Lauia e malolō tino haaku he falu lekua mo e tau allergy, ka e moua tumau e au e tuluiaga mo e totokaaga.” Moua he hoa e palepale mitaki ma e fakauka ha laua. Talahau e Alain: “He ō
a maua ke fakamatala he maaga mamao ko Katé, moua e maua e falu tagata ne manako ke fakaako e Tohi Tapu. Fakamui, maeke a maua ke taute e tau fakaako Tohi Tapu mo lautolu he telefoni. Tokoua he tau tagata fakaako Tohi Tapu nei ne papatiso, ti fakatū e matakau he tau tagata fakailoa.” Lafi e Stéphanie: “Ko e tuaga fiafia lahi mahaki ke lagomatai e tau tagata ke tukulele e tau momoui ki a Iehova. He fekafekau hinei, kua logona tumau e maua e fiafia ia.” Mogonei, ne fekafekau a Alain mo Stéphanie he gahua takaiaga.“TAUTE E MAUA E MENA KUA LATATONU KE TAUTE”
Ko Gisèle ne papatiso he magaaho ne fano he aoga ekekafo i Italia. Nava lahi a ia he moui mukamuka he hoa paionia ne fakaako Tohi Tapu mo ia, ti manako a ia ke fakalahi e fekafekauaga. Kamata a Gisèle ke paionia tumau ka e fakaoti agaia he aoga haana.
Manako a Gisèle ke liu ki Cameroon ke fakalahi e fekafekauaga ki a Iehova ka e tupetupe a ia. Pehē a ia, “Lata au ke fakahui e tonuhia haaku ke nofo i Italia mo e vevehe kehe mai he tau kapitiga mo e magafaoa haaku i ai.” Pete ia, ne liu a Gisèle ki Cameroon ia Me 2016. Fai magaaho he mole, ne mau a ia mo Léonce, ti fakamafana he la ofisa i Cameroon e hoa ke hiki ki Ayos, ko e taone ne manako lahi ke he tau tagata fakamatala he Kautu.
Fēfē e moui i Ayos? Talahau e Gisèle: “Fa loga e faahi tapu ne ai fai hila ti mamate e tau selafoni ha maua. Laulahi he tau magaaho ne nakai gahua ai. Fakaako au ke kaitunu he gutuafi, ti ō a maua mo e tau huilapa mo e tau kasa ke utu vai he pō ha kua nakai tokologa e tagata.” Fahia fēfē e hoa? Pehē a Gisèle: “Ko e agaaga ha Iehova, lalagoaga he hoa mau, mo e fakamafanaaga mo e foakiaga fakatupe he falu mogo mai he magafaoa mo e tau kapitiga ne lagomatai a maua.”
Fiafia nakai a Gisèle he liu ke he motu ne fanau a ia? “Ē! Fiafia lahi,” he ui e ia. “Fai mena uka he kamataaga mo e loto lolelole, ka ko e mogo ne kautū ki ai ne logona hifo e maua kua taute e maua e mena kua latatonu ke taute. Falanaki a maua ki a Iehova mo e logona hifo e tata lahi ki a ia.” O atu a Léonce mo Gisèle ke he Aoga ma e Tau Tagata Fakamatala ti fekafekau fakakū a laua mogonei ko e tau paionia pauaki.
Tuga e tau tagata takafaga ika ne gahua fakamalolō he tau tuaga kehekehe ke moua e tau ika loga, ko lautolu ne liliu ke he tau motu ne fanau ai kua makai ke taute e tau hikiaga ke lagomatai e tau tagata ne loto hako ke talia e fekau he Kautu. To manatu mooli e Iehova e tau tagata fakailoa nei ne gahua malolō ha ko e fakaalofa ne fakakite e lautolu ma e haana higoa. (Nehe. 5:19; Hepe. 6:10) Ka nofo a koe he motu kehe ka e manako lahi ke he tau tagata fakailoa he Kautu he motu ne fanau a koe, maeke nakai a koe ke liu? Ka liu a koe, to fakamonuina e Iehova a koe.—Fakatai 10:22.