1-3. (a) Ko e heigoa tumau e mena ka tuku fakamua e tautolu? (e) Ko e heigoa e tau paleko pauaki ne fehagai mo lautolu ne fakaako e vagahau foou, ti ko e heigoa e tau hūhū ne lagā mai ai? (Kikite fakatino he kamataaga.)

TOKOLOGA e Tau Fakamoli a Iehova he vahā nei ne gahua tumau he lagomatai ke fakamooli e perofetaaga ke fakamatala ke he “tau motu kehe oti, mo e tau magafaoa, mo e tau vagahau kehekehe, mo e tau motu.” (Fakakiteaga 14:6) Ko koe nakai taha hane fakaako e taha vagahau foki? Fekafekau falu ko e tau misionare po ke fakamatala he motu ne manako lahi ke he lagomatai. Falu ne kamata ke o atu ke he tau feleveiaaga he fakapotopotoaga vagahau kehe he motu ni ha lautolu.

² Kua lata he tau fekafekau oti he Atua ke tuku fakamua ha lautolu a malolō fakaagaaga mo e ha lautolu a tau magafaoa. (Mataio 5:6) Ka e falu mogo ne liga lavelave lahi a tautolu ti uka ke moua e magaaho ke fai kakano lahi e fakaako fakatagata. Ka ko lautolu ne fekafekau he fakapotopotoaga vagahau kehe ne uka lahi atu foki.

³ Ko lautolu ne fekafekau he fakapotopotoaga vagahau kehe  kua lata ke fakaako e vagahau ka e lata foki a lautolu ke mailoga kua fakaako e lautolu e tau mena hokulo he Kupu he Atua. (1 Korinito 2:10) Maeke fēfē a lautolu ke taute e mena ia ka nakai maama katoa e lautolu e mena ne talahau he fakapotopotoaga? Ko e ha e tau matua Kerisiano ne fekafekau he fakapotopotoaga vagahau kehe kua lata ke mailoga kua hokotia e kupu mooli ke he tau loto he tau fanau ha lautolu?

4. Ko e heigoa ka fakahagahaga kelea e fakafetuiaga ha tautolu mo Iehova? Talahau e fakataiaga.

⁴ Ka nakai maama e tautolu e tau fakaakoaga he Tohi Tapu he vagahau kehe to hagahaga kelea lahi mahaki e mena nei ke he ha tautolu a fakafetuiaga mo Iehova. He liu a Nehemia ki Ierusalema ne mailoga e ia kua nakai maeke he falu fanau i ai ke vagahau Heperu. (Totou Nehemia 13:23, 24.) Ha kua nakai maeke e tau fanau nei ke maama e Kupu he Atua, ne lolelole fakahaga e fakafetuiaga ha lautolu mo Iehova.​—Nehemia 8:2, 8.

5, 6. Ko e heigoa ne mailoga he falu matua ne fekafekau he fakapotopotoaga vagahau kehe, ti ko e heigoa e lekua?

⁵ Falu matua Kerisiano ne fekafekau he fakapotopotoaga vagahau kehe ne mailoga kua lolelole e fakafetuiaga he tau fanau ha lautolu mo Iehova. Ha kua nakai maama katoa he tau fanau ha lautolu e tau mena ne talahau he fakapotopotoaga, kua nakai gahuahua e tau vala tala ke he tau loto ha lautolu. “Ka tutala ke he tau mena fakaagaaga,” he talahau e Pedro ne hiki e magafaoa haana ki Ausetalia mai i Aferika Toga, “kua lata ke putoia e loto mo e logonaaga.” ^[1] (Kikite tala he matahiku.)​—Luka 24:32.

⁶ Ka totou a tautolu he vagahau kehe, liga nakai putoia e tau logonaaga ha tautolu tuga he totou a tautolu ke he vagahau ha tautolu. Ha kua uka foki ke matutaki ke he vagahau kehe, maeke a tautolu ke lolelole lahi ati lauia kelea ha tautolu a tapuakiaga ki a Iehova. Ke maeke a tautolu ke tumau e manako malolō ke fekafekau he fakapotopotoaga vagahau kehe, manako foki a tautolu ke puipui ha tautolu a fakafetuiaga mo Iehova.​—Mataio 4:4.

7. Lali fēfē e tau Papelonia ke fakaohooho a Tanielu ke talitonu e aga fakamotu mo e lotu ha lautolu?

⁷ He mogo ne fakapaea a Tanielu mo e tau kapitiga haana ki Papelonia, ne eketaha e tau tagata Papelonia ke fakaohooho a lautolu ke talia e aga fakamotu mo e lotu ha lautolu. Fēfē? Ne fakaako he tau tagata Papelonia ki a lautolu e “vagahau he tau tagata Kaletaia” ti age ki a lautolu e tau higoa Papelonia. (Tanielu 1:3-7) Ko e higoa foou ha Tanielu ne hagaao ki a Pele, ko e atua pauaki i Papelonia. Ti manako e Patuiki ko Nepukanesa ke talitonu a Tanielu kua mua atu e malolō he atua Papelonia ke he haana a Atua ko Iehova.​—Tanielu 4:8.

8. Tumau fēfē a Tanielu ke malolō e fakafetuiaga haana mo Iehova?

⁸ I Papelonia, ne age ki a Tanielu e tau mena kai lolo he patuiki. Ka e “manatu” po ke, mauokafua e loto haana ke nakai liuliu ke he fakatufono he Atua. (Tanielu 1:8) Ha kua tumau e fakaako haana ke he “tau tohi” faka-Heperu, ne tumau e fakafetuiaga haana mo Iehova ke malolō he nofo he motu kehe. (Tanielu 9:2) Kavi ke he 70 e tau he mole he hau a ia ki Papelonia, ne iloa agaia a ia ke he  higoa Heperu haana ko Tanielu.​—Tanielu 5:13.

9. Ko e heigoa e aga ke he Kupu he Atua ne moua he tagata tohia he Salamo 119?

⁹ Ko e tagata tohia he Salamo 119 ne fakauka he mogo ne ekefakakelea he tau tagata he fale patuiki a ia. Ka e moua e ia e malolō he Kupu he Atua, ti lagomatai he mena ia a ia ke kehe mai he falu. (Salamo 119:23, 61) Ne fakaatā e ia e tau kupu he Atua ke lauia hokulo e tau logonaaga haana.​—Totou Salamo 119:11, 46.

10, 11. (a) Ko e heigoa kua lata ke eke mo foliaga ha tautolu ka fakaako e Kupu he Atua? (e) Maeke fēfē a tautolu ke hokotia ke he foliaga ha tautolu? Talahau e fakataiaga.

¹⁰ Pete he liga lavelave lahi a tautolu he tau matagahua he fakapotopotoaga mo e gahuaaga, kua lata ia tautolu oti ke fai magaaho ma e fakaako fakatagata mo e tapuakiaga fakamagafaoa. (Efeso 5:15, 16) Ko e foliaga ha tautolu kua nakai lata ke totou ke loga e tau lautohi po ke tauteute hokoia he tau tali ma e feleveiaaga. Ko e foliaga ha tautolu kua lata ke fakaatā e Kupu he Atua ke lauia a tautolu mo e fakamalolō e tua ha tautolu.

¹¹ Ke hokotia ke he foliaga ha tautolu, kua lata a tautolu ke lagotatai. Ka fakaako a tautolu, kua lata a tautolu ke manamanatu nakai ni ke he tau manako he falu ka e pihia foki ke he tau manako ha tautolu. (Filipi 1:9, 10) Lata a tautolu ke mailoga ka tauteute a tautolu ma e gahua he fonua, ma e tau feleveiaaga, po ke lauga, kua liga nakai fakagahuahua e tautolu e tau mena ne totou e tautolu ki a tautolu. Ma e fakatai, pete he kamata he tagata tunu kai e tau mena kai ne taute e ia to tuku he laulau, nakai moui a ia he tau mena kai ne kamata e ia. Ka manako a ia ke tumau e malolō he tino, kua lata a ia ke tauteute tumau e tau mena kai ne lata mo e malolō tino haana. Pihia foki, ka manako a tautolu ke malolō e fakafetuiaga ha tautolu mo Iehova, kua lata a tautolu ke fakaako tumau e Tohi Tapu. Ko e fakaakoaga hokulo pihia kua fakapuke e tau manako fakatagata ha tautolu.

12, 13. Ko e ha ne logona hifo he tokologa kua lagomatai lahi ke fakaako e Tohi Tapu he vagahau ni ha lautolu?

¹² Tokologa ne fekafekau he fakapotopotoaga vagahau kehe ne logona hifo kua lagomatai lahi ke fakaako tumau e Tohi Tapu he “hana ni a vagahau ne tupu mo ia.” (Gahua 2:8) Iloa foki he tau misionare ke tumau e malolō ha lautolu ke he kotofaaga ha lautolu he motu kehe, nakai falanaki ni a lautolu ke he tau mena ne logona e lautolu he tau feleveiaaga.

¹³ Ko Alain ne fakaako e vagahau Persian kavi ke he valu e tau, ne pehē: “Ka tauteute au ma e tau feleveiaaga he vagahau Persian, ne hihiga au ke hagaaki ke he vagahau hokoia. Ha kua lauia hokoia e manamanatuaga haaku ke he gahuahuaaga he iloilo, ne nakai aamotia e loto haaku ke he tau manatu fakaagaaga kua totou e au. Kakano haia ati  fakatoka tumau e au e magaaho ke fakaako e Tohi Tapu mo e falu tohi he vagahau he loto haaku.”

14. Ko e heigoa kua lata he tau matua ke mailoga mitaki, ti ko e ha?

¹⁴ Kua lata he tau matua Kerisiano ke kitia tonu kua hokotia e kupu mooli ke he tau manamanatuaga mo e tau loto he tau fanau ha lautolu. Manamanatu ki a Serge mo e hoana haana ko Muriel ne fekafekau he fakapotopotoaga vagahau kehe ke molea tolu e tau. Ne kamata a laua ke mailoga, ko e tama taane ha laua ne 17 e tau he moui kua nakai fiafia ke he gahua he fonua po ke tau feleveiaaga. “Kua fakahogohogo manava ki a ia ke fano he gahua ke he fonua he vagahau kehe, ka e he mogo fakamua na fiafia a ia ke fakamatala he vagahau motu haana, ko e vagahau Falani,” he ui e Muriel. “He mogo ne mailoga e maua e tuaga nei kua fakatauhele e holo ki mua fakaagaaga he tama taane ha maua,” he fakamaama e Serge, “ti fifili a maua ke liliu ke he fakapotopotoaga fakamua ha mautolu.”

15. (a) Ko e heigoa ka lagomatai e tau matua ke fifili kua lata a laua ke hiki e tau fakapotopotoaga? (e) Ko e heigoa e takitakiaga ne tuku mai he Teutaronome 6:5-7 ke he tau matua?

¹⁵ Ko e heigoa ka lagomatai e tau matua ke fifili ke liliu atu ke he fakapotopotoaga ne fakaaoga e vagahau kua maama mitaki he tau fanau ha laua? Fakamua, kua lata a laua ke fifili kua lahi mooli e magaaho mo e malolō ha laua ke fakaako e fanau ke fakaalofa ki a Iehova mo e fakaako foki a lautolu ke he vagahau  kehe he magaaho taha. Uaaki, liga mailoga e laua kua nakai manako e tau fanau ha laua ke fakamatala, ō he tau feleveiaaga, po ke fekafekau foki he fonua vagahau kehe. Ma e tau kakano nei, maeke he tau matua ke fifili ke liliu ke he fakapotopotoaga ne fakaaoga e vagahau kua maama mitaki he tau fanau ha laua. Ti, ka atihake he tau fanau e fakafetuiaga malolō mo Iehova, liga fifili mogoia e tau matua ke liliu ke he fakapotopotoaga vagahau kehe.​—Totou Teutaronome 6:5-7.

16, 17. Ko e heigoa ne lagomatai e falu matua ke fakaako e tau fanau ha laua hagaao ki a Iehova?

¹⁶ Falu matua ne moua e puhala ke fakaako e tau fanau ha laua hagaao ki a Iehova he vagahau ni ha lautolu ka e ō he tau feleveiaaga he fakapotopotoaga po ke matakau vagahau kehe. Ko Charles e matua taane he tau tama fifine tokotolu he 9 ke he 13 e tau tau he moui. Ne ō a lautolu he matakau vagahau Lingala. Pehē a ia: “Ko e fifiliaga ha maua ke taute e tau magaaho fakaako mo e tapuakiaga magafaoa mo e fanau ha maua he vagahau ni ha mautolu. Ka e putoia foki e maua e tau magaaho fakamahani mo e pelē he vagahau Lingala ke maeke a lautolu ke fakaako e vagahau nei ka e fiafia he magaaho taha.”

¹⁷ Ko Kevin ko e matua taane ne tokoua e tama fifine ne lima mo e valu e tau tau he moui. Ne eketaha a ia ke fakaako a laua ke he kupu mooli ha kua nakaila maama katoatoa he tau tama fifine e tau feleveiaaga he fakapotopotoaga vagahau kehe ne ō e magafaoa ki ai. Pehē a ia: “Ne fakaako fakatagata e  hoana haaku mo au mo e tau tama fifine tokoua ha maua he vagahau Falani, ko e vagahau he tau loto ha laua. Fakatoka foki e maua e foliaga ke ō he feleveiaaga vagahau Falani lagataha he mahina, ti fakaaoga e tau fenoga evaeva ha mautolu ke ō he tau fonoaga ne taute he vagahau ha mautolu.”

18. (a) Maeke fēfē he Roma 15:1, 2 ke lagomatai a koe ke taute e fifiliaga pulotu ka lagomatai e tau fanau haau? (e) Ko e heigoa e tau lagomataiaga ne talahau he falu matua? (Kikite tala he matahiku.)

¹⁸ Igatia e magafaoa mo e fifili e mena ne mitaki lahi mahaki ma e tau fanau mo e ha lautolu a fakafetuiaga mo Iehova. ^[2] (Kikite tala he matahiku.) (Kalatia 6:5) Pehē a Muriel, pete kua manako mooli a ia mo e taane haana ke tumau e fekafekau he fakapotopotoaga vagahau kehe, ne fifili a laua ke hiki ke maeke ke lagomatai e tama taane ha laua ke fakamalolō haana a fakaalofa ki a Iehova. (Totou Roma 15:1, 2.) Iloa e Serge mogonei kua hako e fifiliaga ha laua ne taute. Pehē a ia: “Mai he magaaho ne liliu a mautolu ke he fakapotopotoaga vagahau Falani kua hakahakau fakaagaaga e tama taane ha maua ti papatiso. Fekafekau a ia mogonei ko e paionia tumau. Manamanatu foki a ia mogonei ke liu atu ke he matakau vagahau kehe!”

19, 20. Maeke fēfē a tautolu ke fakakite kua fiafia a tautolu ke he Kupu he Atua?

¹⁹ Fakaalofa a Iehova ke he tau tagata oti. Taute e ia e Tohi Tapu ke moua he tau vagahau loga ti maeke e “tau tagata oti kana” ke moua e iloilo tonu he kupu mooli. (1 Timoteo 2:4) Iloa e Iehova ko e fakafetuiaga ha tautolu mo ia ka fakamalolō he totou e tautolu e Tohi Tapu ke he vagahau kua maama mitaki e tautolu.

²⁰ Igatia a tautolu oti mo e eketaha ke tumau e malolō he fakafetuiaga mo Iehova. Maeke a tautolu ke taute e mena nei ka fakaako tumau e Tohi Tapu he vagahau kua maama mitaki e tautolu. To maeke foki a tautolu ke lagomatai e tau magafaoa ha tautolu ke fakatumau e malolō fakaagaaga ha lautolu, mo e to fakakite e tautolu kua fiafia mooli a tautolu ke he Kupu he Atua.​—Salamo 119:11.