KE HE taone tote ha Gujarat i India, ne papatiso e matua taane ha John ko e taha he Tau Fakamoli a Iehova he tau atu tau 1950. Ka ko John, mo e tokolima he lafu haana, mo e matua fifine ha lautolu ko e tau Katolika Roma ti malolō e aga fakalotu ha lautolu. Ko e kakano nei, ne totoko e lautolu e tua he matua taane.

Taha aho, ole e matua taane ha John ki a ia ke uta e fagatohi ke he matakainaga he fakapotopotoaga. Ka e he pogipogi ia, ne mahele kelea e matalima ha John he hafagi a ia he tiniapa lahi. Ka e manako a ia ke omaoma ke he matua taane haana ti pipi e ia e matalima haana ne toto aki e kalaie ti fano a ia ke uta e fagatohi.

He hoko atu a John ke he kaina, ne age e ia e fagatohi ke he hoana he matakainaga. Ko ia taha he Tau Fakamoli a Iehova. Ne mailoga e ia e pakia he matalima ha John ti foaki e ia e lagomatai. Tamai e ia e mena ne toka ai e tau koloa pili matamotu haana, fakameā e matamotu he matalima ti pili. Tunu mogoia e ia e tī ke inu a John. He magaaho katoa ia ne tutala a ia ki a John he puhala totonu hagaao ke he Tohi Tapu.

Ha ko e totonu haana, ne kamata e tau logonaaga ha John ke hiki hagaao ke he Tau Fakamoli. Ti ua e hūhū ne tala age e John ki a ia hagaao ke he tau taofiaga he Tau Fakamoli a Iehova ne kehe mai he Lotu Katolika. Hūhū a ia ko Iesu kia ko e Atua mo e kua lata kia e tau Kerisiano ke liogi ki a Maria? Na fakaako he matakainaga fifine e vagahau Gujarati ti maeke a ia ke tali a John he vagahau ni haana. Fakakite e ia ki a John e tau tali mai he Tohi Tapu ti age ki a ia e tohi tote “This Good News of the Kingdom.”

Fakamui, he totou e John e tohi tote ti iloa e ia e mena ne totou e ia ko e kupu mooli. Fano a ia ke he akoako haana ti hūhū ki ai e tau hūhū ua ia foki. Ne ita lahi e akoako ti liti aki e Tohi Tapu a ia mo e vagahau lahi: “Eke tuai a koe mo Satani! Fakakite mai ki a au e talahauaga he Tohi Tapu nakai ko e Atua a Iesu. Fakakite mai ki a au e mena ne talahau kua nakai lata a koe ke tapuaki ki a Maria. Fakakite mai ki a au!” Ofomate a John ha kua mahani pihia e akoako. Tala age a ia ke he akoako to nakai liu a ia ke he tapu Katolika. Ti nakai liu mooli a ia!

Kamata a John ke fakaako mo e Tau Fakamoli ti talia e kupu mooli mo e kamata ke fekafekau ki a Iehova. Nakai leva, ne tokologa foki e tau tagata he magafaoa ne taute pihia. He 60 e tau he mole, ne fakamanatu agaia he pite he matalima ha John ki a ia e totonu faka-Kerisiano ne omoomoi a ia ke fekafekau ki a Iehova he moui haana.​—2 Korinito 6:4, 6.