1, 2. (a) Ko e heigoa e gahua ne mua atu e aoga he moui ha Iesu, ti ko e ha? (e) Ko e heigoa kua lata ia tautolu ke taute ke kautū ko e ‘tau ekegahua he Atua’?

KO IESU KERISO ko e tagata kamuta mo e ko e fekafekau he magaaho fakamui. (Mareko 6:3; Roma 15:8) Taute fakamitaki e ia e tau matagahua ua nei. He eke mo tagata kamuta, ne fakaako e ia e puhala ke fakaaoga e tau koloa haana ke talaga e tau mena aoga mai he tau vala akau. He eke mo fekafekau, fakaaoga e ia e iloilo hokulo haana ke he tau Tohiaga Tapu ke lagomatai e tau tagata noa ke maama e kupu mooli mai he Kupu he Atua. (Mataio 7:28; Luka 24:32, 45) He 30 e tau ha Iesu, ne oti e gahua kamuta haana ti eke mo fekafekau ha kua iloa e ia ko e gahua anei ne mua atu e aoga ka taute e ia. Pehē a ia ko e fakamatala e tala mitaki he Kautu he Atua ko e taha kakano ne fakafano mai he Atua a ia ke he lalolagi. (Mataio 20:28; Luka 3:23; 4:43) Hagaaki e moui ha Iesu ke fakamatala e tala mitaki, ti manako a ia ke he falu ke taute pihia foki.​—Mataio 9:35-38.

² Laulahi ia tautolu ne nakai ko e tau tagata kamuta, ka ko e tau fekafekau oti a tautolu ne fakaako e tala mitaki ke he falu. Aoga lahi e gahua nei ha kua putoia e Atua. Ko tautolu kua fakahigoa ko e ‘tau ekegahua he Atua.’ (1 Korinito 3:9; 2 Korinito 6:4) Talitonu a tautolu mo e salamo ne pehē: “Kua moli ni  hāu a tau kupu.” (Salamo 119:159, 160) Ko e kupu mooli e kupu ha Iehova. Kakano haia ne manako a tautolu ke mauokafua “kua fakatokatoka fakahako e kupu moli” he fekafekauaga ha tautolu. (Totou 2 Timoteo 2:15.) Ti lali tumau a tautolu ke lotomatala lahi he fakaaoga e Tohi Tapu, ko e koloa pauaki ha tautolu ke fakaako e falu hagaao ki a Iehova, Iesu, mo e Kautu. Ke lagomatai a tautolu ke kautū he fekafekauaga, foaki he fakatokatokaaga ha Iehova ki a tautolu e falu koloa aoga lahi, ti lata a tautolu ke iloa foki e puhala ke fakaaoga ai. Ko e tau koloa nei ne haia he Puha Koloa Fakaako ha tautolu.

3. Ko e heigoa kua lata a tautolu ke hagaaki ki ai he fekafekauaga, ti lagomatai fēfē he Gahua 13:48 a tautolu ke taute pihia?

³ Liga manamanatu a koe ke he kakano ne fakahigoa ai ko e Puha Koloa Fakaako nakai ko e Puha Koloa Fakamatala. Ko e “fakamatala” kua kakano ke fakailoa e fekau, ka ko e “fakaako atu” kua kakano ke fakamaama e fekau, ti maeke e tagata ke maama e mena ne logona e ia ti omoomoi ke fakagahua e mena ne fakaako e ia. He magaaho kū ne toe he fakatokaaga nei, lata a tautolu ke hagaaki ke kamata e tau fakaako Tohi Tapu mo e fakaako e kupu mooli ke he tau tagata ati eke a lautolu mo tau tutaki he Keriso. Kakano he mena nei kua lata a tautolu ke fakamakutu ke kumi a lautolu oti kua “kotofa ke he moui tukulagi” ti lagomatai a lautolu ke kamata ke fekafekau ki a Iehova.​—Totou Gahua 13:44-48.

4. Moua fēfē e tautolu a lautolu ne “kotofa ke he moui tukulagi”?

⁴ Moua fēfē e tautolu a lautolu ne “kotofa ke he moui tukulagi”? Ma e tau Kerisiano fakamua, ko e puhala hokoia ke moua e tau tagata ia ko e fakamatala. Pehē a Iesu ke he tau tutaki haana: “Ko e māga, po ke magamotu ke hohoko atu a mutolu ki ai, kia hūhū po ko hai ha i ai kua lata.” (Mataio 10:11) Lata a tautolu ke taute pihia he vahā nei. Mooli, kaeke ko e tau tagata kua nakai loto fakamooli, fakatokoluga, po ke nakai manamanatu lahi a lautolu ke he Atua, kua nakai amanaki a tautolu ki a lautolu ke fanogonogo ke he tala mitaki. Kumi a tautolu ke he tau tagata kua loto fakamooli, fakatokolalo, mo e manako lahi ke iloa e kupu mooli. Fakatatai e kumi ha tautolu ma e tau tagata ke he mena ne lata a Iesu ke taute he gahua kamuta a ia. Ato talaga e ia e taha mena tuga e nofoa, gutuhala, akau hahamo, po ke falu mena foki, lata fakamua a ia ke kumi e vala akau hako. Maeke a ia ke tamai e puha koloa ti fakaaoga e tau lotomatala haana ke talaga ai. He puhala pihia he vahā nei, lata a tautolu ke kumi e tau tagata loto fakamooli, ti fakaaoga mogoia e tau koloa mo e tau lotomatala ha tautolu ke lagomatai a lautolu ke eke mo tau tutaki.​—Mataio 28:19, 20.

5. Ko e heigoa kua lata a tautolu ke iloa hagaao ke he tau koloa he Puha Koloa Fakaako ha tautolu? Fakatai. (Kikite tau fakatino he kamataaga.)

⁵ He puha koloa, igatia e koloa mo e fai aoga pauaki. Ma e fakatai, manamanatu ke he tau koloa ne fakaaoga e Iesu ko e tagata kamuta. * (Kikite matahui tala.) Lata a ia ke ha ha i ai e tau koloa ke fuafua, fakamailoga, hele, vilo, mo e talai fakapakapaka e vala akau, ti pihia mo e tau koloa ke fakatatai mo e tuku fakalataha e tau lapa akau. Pihia foki, igatia e koloa he Puha  Koloa Fakaako ha tautolu mo e fai aoga pauaki. Kia kumikumi la ke he puhala ke fakaaoga e tau koloa aoga lahi nei.

6, 7. (a) Puhala fe kua fakaaoga e koe e tau laupepa matutaki? (e) Ko e ha kua fakaaoga e tautolu e tau uiina ke he fakapotopotoaga?

⁶ Tau Laupepa Matutaki. Ikiiki e tau mena nei ka ko e tau koloa lauia mitaki lahi ne tala age ke he tau tagata hagaao ki a tautolu mo e takitaki a lautolu ke he ha tautolu a faahi kupega hila he jw.org. He faahi kupega hila ha tautolu, maeke a lautolu ke lahi e mena ka fakaako hagaao ki a tautolu mo e ole foki ke fakaako Tohi Tapu. Molea e 400,000 tagata ne ole ma e fakaako Tohi Tapu he jw.org, ti totou teau foki he tau aho takitaha! Maeke a koe ke uta mo koe e falu laupepa matutaki ti fakaaoga ai he tutala ke he tau tagata ne feleveia mo koe he aho.

⁷ Tau Uiina. Ko e uiina ne lomi ke hohoko mai ke he tau feleveiaaga ha tautolu ne pehē: “Kua uiina a koe ke fakaako e Tohi Tapu mo e Tau Fakamoli a Iehova.” Ti talahau foki kua maeke a koe ke taute e mena nei he “tau feleveiaaga ha mautolu” “po ke mo e faiaoga fakaako.” Ti tala age he uiina ke he tau tagata hagaao ki a tautolu mo e uiina foki a lautolu kua “fia kai mo e fia inu ke he mahani tututonu” ke fakaako e Tohi Tapu mo tautolu. (Mataio 5:6) Mooli, kua hafagi ke he tau tagata ke o mai ke he tau feleveiaaga ha tautolu he talia po ke nakai talia e lautolu ke fakaako e Tohi Tapu. Ka o mai a lautolu ke he tau feleveiaaga ha tautolu, kitia e lautolu to lahi mahaki e mena ka fakaako e lautolu hagaao ke he Tohi Tapu.

8. Ko e ha kua aoga ma e tau tagata ke lagataha e o mai ke he tau feleveiaaga? Talahau e fakatai.

⁸ Kua aoga ke uiina tumau e tautolu e tau tagata ke lagataha e o mai ke he tau feleveiaaga ha tautolu. Ko e ha? Ha ko e mena ka o mai a lautolu, to kitia e lautolu kua fakaako he Tau Fakamoli a Iehova e kupu mooli mai he Tohi Tapu ti lagomatai e tau tagata ke iloa e Atua, ka e nakai pihia e tau lotu fakavai. (Isaia 65:13) Ma e fakatai, ko e hoa mau i United States ne higoa ko Ray mo Linda ne mailoga e kehekehe nei he falu tau kua mole. Talitonu a laua ke he Atua ti manako ke iloa mitaki a Ia. Fifili a laua ke ahiahi atu ke he tau fale tapu oti he taone ha laua mo e ua e mena ne kumi ki ai ato fakalataha ke he taha lotu. Fakamua, lata a laua ke fakaako taha e mena i loto he fale tapu, mo e ke uaaki, ko e tau tagata he tapu kua lata ke tui e tau tapulu tuga e tau tagata ne kua totoku ke fekafekau ke he Atua. Totou tau ne kumi a laua ha kua loga lahi e tau fale tapu. Ka e nakai fiafia a laua. Nakai fai mena ne fakaako e laua, ti tui he tau tagata he tapu e tau tapulu nakai lilifu. He mole e ahiahi atu ha laua ke he fale tapu fakahiku, fano a Linda ke gahua tupe ka e fano a Ray ki kaina. He liu a Ray ki kaina, ne mailoga e ia e Fale he Kautu. Manatu a ia, ‘Toka la ke fina atu au ki loto mo e kitia e mena ne tupu i ai.’ Mooli, ko e mena mitaki lahi anei ne tupu! Ko e tau tagata oti he Fale he Kautu kua totonu mo e kapitiga ti tauteute ke he tau tapulu kua gali. Nofo a Ray he tau nofoa i mua mo e fiafia ke he tau mena ne fakaako e ia! Fakamanatu he mena nei ki a tautolu e talahauaga he aposetolo ko Paulo hagaao ke he tagata ne hau fakapā ke he fakapotopotoaga ne pehē: “Ko e moli ha ha ia mutolu e Atua.” (1 Korinito 14:23-25) Hau a Ray ke he tau  feleveiaaga he tau Aho Tapu oti tali mai he mogoia. Ti kamata a ia ke hau ke he tau feleveiaaga oti he tau vahā tapu. Kamata foki a Linda ke hau he tau feleveiaaga, ti pete kua 70 tumā e tau tau ha laua, fakaako e laua e Tohi Tapu ti papatiso.

9, 10. (a) Ko e ha e tau tuleke kua mukamuka ke fakaaoga? (e) Fakamaama e puhala ke fakaaoga e tuleke Ko e Heigoa e Kautu he Atua?

⁹ Tau Tuleke. Valu e tuleke i loto he puha koloa ha tautolu. Mukamuka ke fakaaoga ai, ti gahua mitaki ke kamata aki e tau fakatutalaaga. He fakatoka mai e tuleke fakamua he 2013, kavi ke he lima e piliona he tau tuleke ia kua lomi! Tatai oti e fakatokaaga he tau tuleke nei. Ti ka iloa e koe e puhala ke fakaaoga e taha, to maeke a koe ke fakaaoga oti ai! Maeke fēfē a koe ke fakaaoga e tuleke ke kamata e fakatutalaaga mo e taha tagata?

¹⁰ Liga manako a koe ke fakaaoga e tuleke Ko e Heigoa e Kautu he Atua? Fakakite ke he tagata e hūhū i mua ti pehē: “Kua manamanatu nakai a koe na ko e heigoa e Kautu he Atua? To pehē kia a koe . . . ?” Ti hūhū ko e tali fe he tau tali ne tolu ka fifili e ia. He nakai pehē kua hako po ke hepe e tali haana, hafagi e tuleke ki loto he vala “Talahau he Tohi Tapu” ti totou e tau kupu tohi ha Tanielu 2:44 mo e Isaia 9:6. He matahiku he fakatutalaaga ha mua, talahau e hūhū he lau i tua i lalo he mataulu “Ke Manamanatu ki Ai”: “To fēfē e moui i lalo hifo he pule he Kautu he Atua?” Maeke a koe ke tali e hūhū ia he fakatutalaaga kahau. Ka liu a mua ke feleveia, maeke a koe ke fakaaoga e fakaakoaga 7 he porosua Tala Mitaki Mai he Atua!, ko e taha he tau koloa ha tautolu ke kamata e tau fakaako Tohi Tapu.

11. Ko e heigoa he tau mekasini ha tautolu kua talaga ke taute, ti ko e heigoa kua lata a tautolu ke iloa hagaao ki ai?

¹¹ Tau Mekasini. Ko e tau mekasini Ko e Kolo Toko mo e Awake! ne mua atu e lahi he lomi mo e fakaliliu he lalolagi! Ha kua totou he tau tagata he tau motu kehekehe loga e tau mekasini nei, ko e tau vala tala i mua kua talaga ke fakalagalaga e tau tagata he tau matakavi oti. Lata a tautolu ke fakaaoga e tau mekasini nei ke lagomatai e tau tagata ke hagaaki ke he mena ne mua e aoga lahi ke he moui he vahā nei. Ka e fakamua, kia iloa e tautolu ko e vahega tagata fe kua lata ma e tau mekasini kua talaga.

12. (a) Talaga e Awake! ke lata mo hai, ti ko e heigoa e foliaga? (e) Ko e heigoa e tau iloaaga mitaki haau he fakaaoga e koloa nei?

¹² Ko e Awake! kua talaga ma e tau tagata ne tote po ke nakai iloa e Tohi Tapu. Liga nakai iloa e lautolu e tau fakaakoaga Kerisiano, liga nakai falanaki mooli a lautolu ke he lotu, po ke liga nakai mailoga e lautolu na maeke e Tohi Tapu ke lagomatai e tau momoui fakatagata ha lautolu. Taha e matapatu foliaga he Awake! ko e fakalagalaga e tagata totou na fai Atua. (Roma 1:20; Heperu 11:6) Lali ai foki ke lagomatai e tagata totou ke tua ko e Tohi Tapu ‘ko e kupu he Atua, ko e moli ni haia.’ (1 Tesalonia 2:13) Tolu e fufuta he 2018 ne ha ha ai e tau mataulu nei: “The Way of Happiness,” “12 Secrets of Successful Families,” mo e “Help for Those Who Grieve.”

13. (a) Talaga e fufuta ma e fonua he Ko e Kolo Toko ke lata mo hai? (e) Ko e heigoa e tau iloaaga mitaki haau he fakaaoga e koloa nei?

¹³ Ko e foliaga pauaki he fufuta ma e fonua  he Ko e Kolo Toko ko e fakamaama e tau fakaakoaga he Tohi Tapu ke he tau tagata ne fitā he fakalilifu e Atua mo e Tohi Tapu. Liga fai mena a lautolu ne iloa hagaao ke he Tohi Tapu ka e nakai hako e maamaaga ha lautolu ke he mena ne fakaako i ai. (Roma 10:2; 1 Timoteo 2:3, 4) Tolu e fufuta he 2018 ne tali e tau hūhū nei: “Aoga Agaia Nakai e Tohi Tapu Mogonei?,” “To Fēfē e Vahā Anoiha?,” mo e “Leveki Kia he Atua a Koe?”

14. (a) Ko e heigoa e tau vitiō fā he Puha Koloa Fakaako ha tautolu ne talaga ke taute? (e) Ko e heigoa e tau iloaaga mitaki haau he fakakite e tau vitiō nei?

¹⁴ Tau Vitiō. He vahā ha Iesu, ko e tau koloa ni he tagata kamuta ko e tau koloa fakaaoga lima. Ka ko e mogonei, kua moua foki he tau tagata kamuta e tau koloa ne fakaaoga he malolō hila, tuga e tau matini ke hele, vilo, mo e fakamomole. Ka fakamatala a tautolu he vahā nei, lafi ke he tau tohi ne lomi, kua moua e tautolu e tau vitiō fulufuluola ke fakakite ke he tau tagata. Fā e vitiō he puha koloa ha tautolu: Ko e Ha ne Fakaako e Tohi Tapu?, Ko e Heigoa ne Tupu he Fakaako Tohi Tapu?, Ko e Heigoa ne Tupu he Fale he Kautu?, mo e Jehovah’s Witnesses​—Who Are We? Falu ne gahua mitaki he aahi atu fakamua, ka e falu kua maeke ke fakaaoga he tau liu aahi atu. Ko e tau koloa mitaki lahi e tau vitiō nei ha kua fakalagalaga e tau tagata ke fakaako e Tohi Tapu mo e o mai ke he tau feleveiaaga ha tautolu.

15. Puhala fe ne lauia e tau tagata he kitekite ke he taha he tau vitiō ha tautolu ke he vagahau ni ha lautolu? Talahau e tau fakatai.

¹⁵ Tuga e fakatai, taha e matakainaga fifine ne feleveia mo e fifine ne hiki mai i Micronesia ti ko e vagahau fakamua haana ko e vagahau Yap. Fakakite he matakainaga ki a ia e vitiō Ko e Ha ne Fakaako e Tohi Tapu? he vagahau Yap. Mogo ne kamata e vitiō, pehē e fifine: “Ko e vagahau haaku a ē. Ofoofogia au! Mailoga e au he leo haana ko ia mai he aelani haaku. Vagahau e ia e vagahau haaku!” Mole ia, pehē e fifine to totou e ia mo e kitekite e tau mena oti he vagahau haana he jw.org. (Fakatatai Gahua 2:8, 11.) Taha fakatai foki ko e matakainaga fifine i United States ne nofo e nefiu he taha motu kehe. Fakafano e ia ki ai e link he vitiō taha ia he vagahau haana. Kitekite he nefiu e vitiō ti meli hila ki ai: “Ko e vala hagaao ke he malolō kelea ne pule ke he lalolagi ne manamanatu lahi au ki ai. Ne fakapuke e au e ole ke fakaako Tohi Tapu.” Omoomoi lahi e mena nei ha kua nofo a ia he motu ne fakakaupā e gahua ha tautolu!

16. Fakamaama e kakano pauaki he tau porosua takitaha: (a) Fanogonogo ke he Atua mo e Moui Tukulagi. (e) Tala Mitaki Mai he Atua! (i) Ko Hai kua Taute e Finagalo ha Iehova he Vahā Nei?

¹⁶ Tau Porosua. Fakaako fēfē e tautolu e kupu mooli ke he tagata ne nakai iloa lahi ke totou po ke nakai fai tohi faka-Tohi Tapu he vagahau haana? Fakaaoga e tautolu e porosua Fanogonogo ke he Atua mo e Moui Tukulagi. * (Kikite matahui tala.) Ko e koloa mitaki lahi mahaki ke kamata e tau fakaako Tohi Tapu ko e porosua Tala Mitaki Mai he Atua! Fakakite e koe ke he tagata e tau mataulu ne 14 he lau i tua ti hūhū ki a ia ko e mataulu fe ne fiafia lahi a ia ki ai. Ti kamata ke fakaaoga e fakaakoaga ia. Kua fakaaoga nakai e koe e puhala nei ke he tau liu aahi atu  haau? Ko e porosua ke toluaki he puha koloa ha tautolu ko e Ko Hai kua Taute e Finagalo ha Iehova he Vahā Nei? Kua talaga ai ke fakaako e tau tagata fakaako Tohi Tapu hagaao ke he fakatokatokaaga ha tautolu. Ke iloa e puhala ke fakaaoga e porosua nei he tau fakaakoaga Tohi Tapu takitaha, kikite fufuta he Moui Kerisiano mo e Fekafekauaga​—Tohi Fakaaoga he Feleveiaaga ia Mati 2017.

17. (a) Ko e heigoa e kakano pauaki he tau tohi fakaako takitaha? (e) Ko e heigoa kua lata ke taute e lautolu oti ka papatiso, ti ko e ha?

¹⁷ Tau Tohi. Ka kamata e fakaako haau mo e tagata he fakaaoga e porosua, maeke a koe ke hiki he ha magaaho ke he tohi Ko e Heigoa ne Fakaako Mooli he Tohi Tapu? Lagomatai he koloa nei e tau tagata ke fakaako fakalahi hagaao ke he tau fakaakoaga he Tohi Tapu. Ka holo ki mua e tagata fakaako ti oti e tohi ia, maeke a koe ke matutaki ke fakaako e tohi ‘Kia Fakatumau a Mutolu ke he Fakaalofa he Atua.’ Fakaako he koloa nei e tagata fakaako ke he puhala ke fakagahua e tau matapatu fakaakoaga he Tohi Tapu he moui haana he tau aho takitaha. Manatu ka mole e papatiso haana, lata agaia a ia ne foou ke matutaki e fakaakoaga haana ato oti e tau tohi ua ia. To lagomatai he mena nei a ia ke malolō e tua ki a Iehova mo e fakatumau e fakamooli ki a Ia.​—Totou Kolose 2:6, 7.

18. (a) Ko e heigoa ne fakamafana he 1 Timoteo 4:16 a tautolu ke taute ko e tau faiaoga he kupu mooli, ti ko e heigoa e fua? (e) Ko e heigoa e foliaga ha tautolu he fakaaoga e Puha Koloa Fakaako ha tautolu?

¹⁸ Ha ko e Tau Fakamoli a Iehova, ha ha ia tautolu e matagahua ke fakaako e tau tagata ke he “kupu he mena moli ha he vagahau mitaki” ka takitaki a lautolu ke he moui tukulagi. (Kolose 1:5; totou 1 Timoteo 4:16.) Ke lagomatai a tautolu ke taute e mena nei, ha ha ia tautolu e Puha Koloa Fakaako mo e tau koloa kua lata mo tautolu. (Kikite “ Puha Koloa Fakaako.”) Kia eketaha a tautolu ke fakaaoga e tau koloa nei. Igatia a tautolu mo e fifili e koloa he puha koloa ke fakaaoga mo e magaaho fe ke fakaaoga ai. Ka e manatu, ko e foliaga ha tautolu ne nakai ni ko e tufa he tau tohi, ti ua age e tautolu e tau tohi ke he tau tagata ne nakai fiafia ke he fekau ha tautolu. Ko e foliaga ha tautolu ko e taute tutaki he tau tagata ne loto fakamooli, fakatokolalo, mo e manako mooli ke iloa e Atua, ko e tau tagata ne “kotofa ke he moui tukulagi.”​—Gahua 13:48; Mataio 28:19, 20.