TALA KE HE MOUI
Fakamonuina Lahi e Iehova e Fifiliaga Haaku
Ko e 1939. Mamatike a mautolu he tulotopō ti fenoga atu ke molea taha e tulā ke he taone tote ha Joplin he faahi toga ki lalo i Missouri, U.S.A. Kamata a mautolu ke tuku fakaeneene e tau tuleke i lalo he tau gutuhala he tau fale oti i ai. He oti ai ne o atu a mautolu he motokā ke feleveia mo e falu matakau foki. Kua aho tuai mogonei. Ka ko e ha ne ō a mautolu he gahua fakamatala he aho ia ato hake e laā ti toka fakamafiti e matakavi? To tala atu e au he mogo fakamui.
KUA fanau au he 1934. Ko e tau matua haaku ko Fred mo Edna Molohan ko e tau Tagata Fakaako Tohi Tapu (Tau Fakamoli a Iehova) ke 20 e tau. Fakaaue au ha kua fakaako e laua au ke fakaalofa ki a Iehova. Nonofo a mautolu i Parsons, ko e taone tote he faahi toga ki uta i Kansas. Teitei ni e tau tagata oti he fakapotopotoaga ha mautolu ko e tau matakainaga fakauku. Ō tumau e magafaoa ha mautolu ke he tau feleveiaaga mo e gahua fakamatala. He afiafi Faiumu, fa gahua a mautolu ke he puhalatū, ne fakahigoa mogonei ko e fakamatala ke he toloaga tagata. Falu mogo ne mategūgū a mautolu ka e uta tumau e Tete a mautolu ke kai asekulimi he mogo ka oti.
Ko e fakapotopotoaga tote ha mautolu ne lahi e fonua ti loga e taone ikiiki mo e tau faama. Nakai mai e tupe ke lata mo e tau tohi ha mautolu, ka e mai he falu tagata gahua fonua e tau lakau kai ne tō e lautolu i kaina, tau fufua moa (oko mai laia he fata), po ke pihia mo e tau moa momoui. Fitā a Tete he foaki e tupe ma e tau tohi, ti ko e tau mena kai nei ne lagomatai ke fagai aki e magafaoa.
TAU MATAGAHUA FAKAMATALA
Fai lapakofe fakatagi e tau matua haaku ke fakaaoga he gahua fakamatala. Tote lahi au ke fakaaoga ai, ka e fiafia au he lagomatai a Tete mo Mami ke tā e tau tapakiaga he tau lauga he Matakainaga ko Rutherford he tau liu aahi atu mo e tau fakaako Tohi Tapu.
Mo e matua taane mo e matua fifine haaku i mua he motokā leo taogo
Tuku e Tete e speaker lahi i luga he ha mautolu a motokā, ko e Ford he 1936, ti eke e ia mo motokā leo taogo. Mitaki lahi ai ma e gahua. Fa tā fakamua e mautolu e leo kofe ke logona he tau tagata, to tā mogoia e lauga Tohi Tapu. Mole ia, ti foaki e mautolu e tau tohi ke he tau tagata ne fiafia.
He taone tote ko Cherryvale, Kansas, ne fakaholo e Tete e motokā leo taogo ke he paaka he
taone ne tokologa e tagata ne okioki ai he tau Aho Tapu. Hau e leoleo ti tala age kua maeke ni a ia ke fakaaoga e motokā leo taogo i fafo he paaka. Hiki e Tete e motokā ke he taha puhalatū ne tata ke he paaka ke maeke agaia e tau tagata i ai ke logona mitaki e polokalama. Fiafia tumau au ke fakalataha mo Tete mo e taokete lahi haaku ko Jerry he tau magaaho pihia.He tau tau ia, taute e mautolu e tau matagahua pauaki he tau matakavi ne totoko lahi e tau tagata. He totoku e au he kamataaga, mamatike a mautolu he tulotopō ti tuku fakaeneene e tau tuleke po ke tau tohi ikiiki i lalo he tau gutuhala he tau kaina he tau tagata. He oti, ne feleveia a mautolu i fafo he taone ke kitia kaeke kua fai tagata ne tapaki he leoleo.
Ko e taha vala fiafia he fekafekauaga ha mautolu ko e foleni ne fakailoa he tau vala tala. Tui e mautolu e tau lapa fakailoa lalahi ti foleni he taone. Manatu e au e taha magaaho ne o mai e tau matakainaga ke he taone ha mautolu mo e foleni he tui e tau fakamailoga ne pehē “Religion Is a Snare and a Racket.” Kamata a lautolu he kaina ha mautolu ti o hui kavi ke he taha mo e hafa e kilomita he taone ti liliu mai ki a mautolu. Fiafia ai, nakai fai ne taofi a lautolu ka e tokologa e tagata ne fia iloa hagaao ke he mena ne tupu.
TAU FONOAGA HE MOGO NE TOTE AU
Fa fenoga e magafaoa ha mautolu ki Texas ke he tau fonoaga. Gahua a Tete he kamupanī leluē ti heke noa a mautolu he tuleni ke o atu ke he tau fonoaga mo e ahiahi e tau magafaoa ha mautolu. Ko e tugaane lahi ha Mami ko Fred Wismar mo e hoana haana ko Eulalie ne nonofo i Temple, Texas. Iloa he agikolo ko Fred e kupu mooli he mataulu he atu tau 1900 he mogo ne fuata a ia ti papatiso, mo e tala age ke he lafu haana ne putoia foki e matua fifine haaku hagaao ke he mena ne fakaako e ia. Ko e tau matakainaga i Texas ne iloa mitaki e agikolo ko Fred ha ko ia ko e fekafekau he faahi motu (mogonei ne fakahigoa ko e leveki takaiaga). Ko ia kua totonu, fiafia, mo e makutu ti ko e fakafifitakiaga mitaki lahi ki a au.
He 1941, ne o atu a mautolu he tuleni ki St. Louis, Missouri ke he fonoaga lahi. Uiina ke he tau tama ikiiki oti ke nonofo auloa i mua ke logona e lauga “Children of the King” he Matakainaga ko Rutherford. He matahiku he lauga haana ko e tau fanau toko 15,000 ne moua e taha mena ofogia lahi. Ne tufa he Matakainaga ko Rutherford mo e kau gahua haana ki a mautolu oti e tohi foou ko e Children.
Ia Aperila 1943, ne o atu a mautolu ke he Toloaga “Call to Action” i Coffeyville, Kansas. Logona e mautolu e fakailoaaga i ai ke he tau fakapotopotoaga oti to fai aoga foou, ko e Aoga Fekafekau Fakateokarasi. Moua foki e mautolu e tohi tote ne 52 e fakaakoaga ka fakaaoga ai he aoga. He lotoga he tau ia ne taute e au e lauga fakamua haaku. Uho foki e toloaga ia ki a au ha kua papatiso au mo e falu foki he vai namo makalili he faama ne tata mai.
MANAKO AU KE FEKAFEKAU HE PETELI
Ne oti e aoga tokoluga haaku he 1951 mo e lata ke fifili e mena ka taute e au he moui haaku. Ko e taokete haaku ko Jerry ne fitā e fekafekau he Peteli. Manako lahi foki au ke fano ke he Peteli ti fakafano atu e au haaku tohi ole. Nakai leva he mole, ne uiina au ke he Peteli ti kamata ke fekafekau i ai ia Mati 10, 1952. Ko e fifiliaga mitaki lahi anei ne lagomatai au ke fekafekau fakalahi ke he Atua.
Amanaki au ke gahua he faahi lomi tohi ke lagomatai ke taute e tau mekasini mo e falu tohi foki. Ka e nakai hokotia au ke taute e mena ia. Ne kotofa au ke gahua ko e tagata tufa kai mo e he peito he mogo fakamui. Fiafia au ke he gahua nei ti loga e mena ne iloa. Gahua vala magaaho a mautolu ti fai magaaho au ne nakai gahua he aho. Fa fano au ke he fale toka tohi he Peteli ti fakaaoga loga e tau tohi i ai ke taute e fakaako fakatagata haaku. Lagomatai he mena nei au ke fakamalolō e tua haaku mo e fakafetuiaga mo
Iehova. Eketaha foki au ke leva e fekafekau ki a Iehova he Peteli. Ne toka e Jerry e Peteli he 1949 ti mau mo Patricia, ka e nonofo tata a laua i Brooklyn ti lagomatai mo e fakamafana ki a au he foou agaia au ke he Peteli.Nakai leva he hau au ke he Peteli, ne kamata e tau matakainaga taane ke kumi e tau matakainaga he Peteli ke lafi ke he tau tagata lauga he Peteli. Ko e tau matakainaga taane nei ne kotofa ke ahiahi e tau fakapotopotoaga ne hoko ke he 320 e kilomita he mamao mai i Brooklyn. Lauga a lautolu ke he tau tagata i ai ti gahua fakamatala mo e fakapotopotoaga. Ko au taha he tau matakainaga taane ne fifili. Hopoate ai, ne kamata au ke taute e tau ahiahi nei mo e lauga ke he tau tagata. He magahala ia ne taha e tulā he tau lauga ke he tau tagata. Fa fina atu au he tuleni ke he tau fakapotopotoaga. Manatu mitaki e au e taha afiafi Tapu he vahā makalili he 1954. Ne heke au he tuleni ne liu ki New York ti lata ke hoko ke he Peteli he magaaho afiafi. Ka e he liu au, ne tō e afā ti malolō lahi e matagi mo e sinō. Ko e enisini hila he tuleni ne nakai gahua ti nakai hoko atu au ki New York City ato tā e matahola lima he mogo pogipogi he Aho Gofua. Ne fano au he tuleni holo hala kelekele mai he tuaga tuleni ki Brooklyn ti fina atu agataha ke gahua he peito. Mule fakatote au ti lahi e mategūgū ha kua nakai mohe au he pō katoa. Ka ko e fiafia haaku he fekafekau ke he tau fakapotopotoaga mo e feleveia mo e tau matakainaga tokologa kua uho lahi ke he ha mena ne taute e au.
Tauteute ke fakapuloa mai he leo taogo WBBR
He tau tau fakamua haaku he Peteli, ne kamata foki au ke fakalataha ke he polokalama fakaako Tohi Tapu ne fakapuloa he tau faahi tapu takitaha he ha mautolu a leo taogo ko e WBBR. Ko e fale letiō he foloa ke uaaki he 124 Columbia Heights. Ko e Matakainaga ko Alexander H. Macmillan ne fekafekau he Peteli ke loga e tau tau ne fakalataha tumau ke he tau polokalama letiō nei. Fa mahani a mautolu ke ui a ia ko Matakainaga Mac. Ko ia ko e fakafifitakiaga mitaki lahi mahaki ma mautolu e tau matakainaga taane fuata he Peteli ha kua fakatumau a ia ke mahani fakamooli pete ni e tau mena vihi loga.
Fakaaoga e mautolu e tau laupepa fakailoa nei ma e WBBR
He 1958, ne hiki e kotofaaga haaku ti kamata ke gahua fakalataha mo e tau tagata ne kautū mai he Aoga Kiliata. Lagomatai e au e tau tagata fakamakutu nei ke moua e tau visa ha lautolu, ti fakatokatoka e au e tau fakaholoaga he tau fenoga ha lautolu. Ko e ō he vakalele kua tauuka lahi he magahala ia ti laulahi he tau tagata ne kautū ne ō ki Africa mo Asia ne fenoga atu he tau toga lau koloa. Loga e tau he mole ne tau laukauka e tau vakalele, ti laulahi he tau misionare ne fenoga atu he vakalele ke he tau kotofaaga ha lautolu.
Tuku fakalataha e tau tipiloma Kiliata ato hoko e fakaholoaga he kautūaga
FENOGA KE HE FONOAGA
He 1960, ne fakatokatoka e au ke nō e tau vakalele mai i United States ki Europe ma e tau fonoaga he lalolagi katoa he 1961. Lele atu au ke he taha he tau fonoaga ia i Hamburg, Germany. He oti e fonoaga, ko au mo e tokotolu
foki e matakainaga taane he Peteli ne totogi e motokā ti fakaholo atu i Germany ki Italy mo e ahiahi ke he la ofisa i Rome. I ai ne ō a mautolu ki France ke he taha faahi he tau Mouga Pyrenees ti hohoko atu ki Spain ne pā e gahua ha tautolu. Maeke a mautolu ke age ke he tau matakainaga i Barcelona e falu tohi ne kua afī e mautolu tuga ko e tau mena fakaalofa. Fiafia ha ia ke feleveia mo lautolu! I ai ne o atu a mautolu ki Amsterdam ti liliu ki New York he vakalele.He 1962, ne kotofa au ke taute e tau fakaholoaga ō fenoga ma e tau matakainaga toko 583 ka o atu ke he tau fufuta pauaki he tau fonoaga he lalolagi katoa. Ko e Toloaga nei he 1963 ko e “Everlasting Good News.” Ko lautolu ne uiina kua o atu ke he tau fonoaga i Europe, Asia, mo e South Pacific ti o atu mogoia ki Honolulu, Hawaii, ti fakahiku ki Pasadena, California. Ahiahi foki a lautolu ki Lebanon mo Jordan ma e tau fenoga kitekite pauaki he tau motu he Tohi Tapu. Fakatokatoka he faahi gahua ha mautolu e tau vakalele mo e tau hotela ti moua e tau visa kua lata.
HOA FOOU HE FENOGA
Ko e tau 1963 kua aoga lahi mahaki ki a au ma e taha kakano foki. Ia Iuni 29, ne mau e au a Lila Rogers mai i Missouri, ne hau ke he Peteli he 1960. He taha e faahi tapu he mole e mau ha maua, ne fakalataha a Lila mo au he fenoga kitekite he lalolagi ti ahiahi atu ki Greece, Egypt, mo Lebanon. I ai, fenoga a maua he vakalele ki Jordan. Ka ko e gahua ha tautolu i ai kua fakakaupā ti nakai age he tau pule he motu e tau visa ke he Tau Fakamoli a Iehova. Ti nakai iloa tonu e maua ko e heigoa e mena ka tupu ka hohoko atu a maua ki ai. Ofo a maua mo e fiafia he kitia e matakau he tau matakainaga ne tutū i luga he malē vakalele tote mo e fakamailoga lahi ne pehē “Welcome Jehovah’s Witnesses”! Ko e mena mitaki lahi mahaki ke ahiahi ke he tau motu he Tohi Tapu mo e kitia e tau matakavi ne nonofo a Aperahamo, Isaako, mo Iakopo, matakavi ne fakamatala a Iesu mo e tau aposetolo, mo e matakavi ne kamata e taofiaga Kerisiano ke holofa ‘ke he tau kalakala oti he lalolagi.’—Gahua 13:47.
Ke 55 e tau, eke a Lila mo hoa fakamooli haaku he tau kotofaaga oti ha maua. Lagaloga e ahiahi atu ha maua ki Spain mo Portugal he mogo ne pā e gahua ha tautolu i ai. Fakamafana e maua e tau matakainaga mo e age e tau tohi mo e falu a mena ne lata mo lautolu. Maeke foki a maua ke ahiahi atu ke he falu he tau matakainaga he fale puipui i Cádiz, Spain. Fiafia lahi au ha kua maeke ke foaki e lauga mafanatia ki a lautolu.
Mo Patricia mo Jerry Molohan he o atu ke he Fonoaga “Peace on Earth” he 1969
He tau tau tali mai he 1963 ne taute e au e tau fakatokaaga ma e tau fenoga ke he tau fonoaga he lalolagi katoa i Africa, Australia, Central mo South America, Europe, he Far East, Hawaii, New Zealand, mo Puerto Rico. Kua o atu a Lila mo au ke he loga e fonoaga ne nakai nimo, tuga e taha i Warsaw, Poland he 1989. Tokologa e matakainaga i Russia ne o mai ke he fonoaga lahi
ia. Ko e fonoaga fakamua anei ha lautolu! Feleveia a maua mo e tau matakainaga ne loga e tau tau he fale puipui i Soviet Union ha ko e ha lautolu a tua.Taha kotofaaga ne fiafia lahi au ki ai he ahiahi mo e fakamafana e tau magafaoa Peteli mo e tau misionare he lalolagi katoa. He ahiahi fakahiku pihia ha maua, ne ō a maua ki South Korea ti maeke ke feleveia mo e toko 50 he tau matakainaga ha tautolu ne nonofo he fale puipui i Suwon. Ne atihake oti a lautolu ti amanaki lahi ke liu fekafekau ki a Iehova mo e nakai fai fakakaupāaga. He feleveia mo lautolu kua fakamafana lahi mahaki ki a maua!—Roma 1:11, 12.
FIAFIA HA KO E MALIKITI
Kitia e au e puhala ne fakamonuina e Iehova e tau tagata haana ke he tau tau kua mole. He papatiso au he 1943, kavi ke he 100,000 e tagata fakailoa. Mogonei kua molea e 8,000,000 ne fekafekau ki a Iehova he 240 e motu. Ko e gahua malolō he tau tagata ne kautū i Kiliata ne lafi fakalahi ke he malikitiaga nei. Kua foaki ki a au e fiafia lahi ke gahua fakatata mo e tau misionare tokologa nei mo e lagomatai a lautolu ke hohoko atu ke he tau kotofaaga ha lautolu.
Fakaaue au he mogo ne fuata tote ha kua fifili au ke fakaaoga e moui haaku ke fekafekau ki a Iehova ti tuku e ole ma e Peteli. Kua fakamonuina lahi e Iehova au he tau tau oti nei. Ke he falu mena ne fiafia a maua he fekafekauaga he Peteli, maeke a Lila mo au ke fakamatala mo e tau fakapotopotoaga i Brooklyn ke molea 50 e tau ti loga foki e tau kapitiga mooli.
Matutaki au ke fekafekau he Peteli mo e lalagoaga ha Lila he tau aho takitaha. Pete kua 84 e tau haaku he moui mogonei kua fiafia au he taute agaia e gahua fai kakano lahi mo e lagomatai ke he tau tohi he la.
Mo Lila mogonei
Ko e fiafia mooli ke fakalataha ke he fakatokatokaaga ofoofogia ha Iehova mo e kitia e mooli he tau kupu ia Malaki 3:18: “Ti liliu kitia ai e mutolu kua kehe e tagata mahani tututonu, kehe e tagata mahani kelea; kua kehe a ia kua fekafekau ke he Atua, mo ia kua nakai fekafekau kia ia.” Kitia e tautolu he tau aho takitaha e lalolagi ha Satani kua tupu ki mua e kelea ti nakai fai amaamanakiaga e tau tagata mo e tote e fiafia ke he moui. Ka ko lautolu ne fakaalofa mo e fekafekau ki a Iehova ne fiafia e moui, pete he tau aho uka nei kua ha ha agaia e amaamanakiaga mooli ma e anoiha. Ko e lilifu mooli ke tala age ke he falu e tala mitaki! (Mataio 24:14) Nakai leva ti hukui he Kautu he Atua e lalolagi tuai nei aki e parataiso. Manako mooli a tautolu ke hoko mai e aho ia! To tino malolō mo e fiafia mo e to momoui tukulagi e tau tagata oti he lalolagi.