1. Ko e ha kua latatonu a Iehova ke moua e mahani fakamooli katoatoa ha tautolu?

KUA latatonu a Iehova ke moua e mahani fakamooli katoatoa ha tautolu ha kua tufuga mo e kua foaki e ia e moui ki a tautolu. (Fakakite. 4:11) Ka e fehagai a tautolu mo e paleko. Pete he fakaalofa mo e fakalilifu a tautolu ki a Iehova, liga kua futia kehe a tautolu he foaki e mahani fakamooli katoatoa ne kua latatonu mo ia. Lata a tautolu ke maama e puhala ka tupu e mena ia. Ka e fakamua, kia fakatutala a tautolu ke he falu vala ne putoia e mahani fakamooli katoatoa.

2. Hagaao ke he Esoto 34:14 (NW), ko e heigoa ka taute e tautolu ka mahani fakamooli katoatoa a tautolu ki a Iehova?

² I loto he Tohi Tapu, ko e mahani fakamooli ke he Atua kua hagaao ke he fakaalofa hokulo ki a ia. Ka mahani fakamooli katoatoa a tautolu ki a Iehova, to tapuaki hokoia a tautolu ki a ia. To nakai fakaatā e tautolu ha tagata po ke ha mena ke fakatauhele e tau loto ha tautolu.​—Totou Esoto 34:14. *

3. Ko e ha kua nakai fakateaga e mahani fakamooli ha tautolu ki a Iehova?

³ Ko e ha tautolu a mahani fakamooli ki a Iehova kua nakai fakateaga. Ko e ha? Ha kua fakavē ai ke he tau vala tala mooli ne fakaako e tautolu hagaao ki a ia. Kua nava a tautolu ke he tau mahani ofoofogia haana. Iloa mo e talia e tautolu e tau mena ne fiafia mo e vihiatia e ia. Maama mo e lalago e tautolu e finagalo haana ma tautolu. Logona hifo e tautolu e lilifu kua fakaatā e ia a tautolu ke eke mo tau kapitiga haana. (Sala. 25:14) Ko e tau mena oti ne fakaako e tautolu hagaao ke he ha tautolu a Tufuga kua fakatata lahi a tautolu ki a ia.​—Iako. 4:8.

4. (a) Ko e heigoa kua fakaaoga he Tiapolo ke fakalolelole e mahani fakamooli ha tautolu ki a Iehova? (e) Ko e heigoa ka fakatutala a tautolu he vala tala nei?

 ⁴ Kua pule e Tiapolo ke he fakatokaaga nei, ti fakaaoga ai e ia ke fakamakona e tau manako pauaki mo e tau lolelole fakatino ha tautolu. (Efeso 2:1-3; 1 Ioa. 5:19) Ko e foliaga haana ke vevehe e fakaalofa ha tautolu ti nakai katoatoa e mahani fakamooli ha tautolu ki a Iehova. Kia fakatutala a tautolu ke he ua e puhala ne liga taute he Tiapolo e mena nei. Fakamua, kamatamata e ia a tautolu ke tutuli e tau monuina, mo e uaaki kua lali a ia ke fakaohooho a tautolu ke taute e tau fifiliaga kelea ke he tau fakafiafiaaga.

5. Ko e ha kua lata a tautolu ke puipui mai he feaki e manako lahi ke he tau tupe?

⁵ Ko e manako pauaki ha tautolu ke lahi e mena ke kai, mitaki e tau mena tui ke tui, mo e mitaki e fale ke nofo ai. Ka e lata a tautolu ke puipui mai he feaki e manako lahi ke he tau tupe. Tokologa he lalolagi ha Satani kua “velevele koloa” he manako lahi ke he tau tupe mo e tau mena kua maeke e tupe ke fakatau. (2 Timo. 3:2) Iloa e Iesu liga to kamatamata e tau tutaki haana ke feaki e manako nei. “Nakai maeke ia taha ke fekafekau ke he na iki tokoua,” he talahau e Iesu, “ha ko e mena fakavihia e ia taha, ka e fakaalofa ke he taha; ka nakai pihia, ti pipiki atu a ia ke he taha, ka e fakateaga ke he taha. Nakai maeke ia mutolu ke fekafekau ke he Atua mo Mamone.” (Mata. 6:24) Ko e tagata kua tapuaki ki a Iehova ka e lahi foki e magaaho mo e laliaga ke moua e tau monuina he lalolagi nei, kua eketaha a ia ke fekafekau ke he ua e iki. To nakai foaki e ia e mahani fakamooli katoatoa ki a Iehova.

6. Ko e heigoa ka fakaako mai e tautolu he tau kupu ha Iesu ke he fakapotopotoaga i Laotikaia?

⁶ Tata ke he matahiku he senetenari fakamua V.N., ko e tau tagata he fakapotopotoaga  he maaga ha Laotikaia ne vagahau fakatokoluga: “Kua maukoloa au, kua fakaloga mai haku a tau mena, kua nakai nofogati foki au he taha mena taha.” Ka e he fofoga ha Iehova mo Iesu, “kua malaia a [lautolu], mo e matematekelea, mo e nofogati, mo e matapouli, mo e nakai fai felevehi.” Fakatonu e Iesu a lautolu, nakai ha kua maukoloa a lautolu ka ko e manako lahi ha lautolu ke he tau koloa ne moumou e fakafetuiaga ha lautolu mo Iehova. (Fakakite. 3:14-17) Ka mailoga e tautolu kua tupu e manako ke he tau koloa he tau loto ha tautolu, lata a tautolu ke fakamafiti ke fakahako e manamanatuaga ha tautolu. (1 Timo. 6:7, 8) Ka nakai, to mahaga e loto ha tautolu ti nakai talia e Iehova e tapuakiaga ha tautolu. Kua lata a ia mo e “[“mahani fakamooli katoatoa,” NW].” (Teu. 4:24) Maeke fēfē ke galo e lagotatai ha tautolu hagaao ke he onoonoaga ke he tau tupe?

7-9. Ko e heigoa kua fakaako e koe mai he mena ne tupu ke he motua ne higoa ko David?

⁷ Manamanatu ke he fakafifitakiaga ha David, ko e motua gahua lahi ne nofo i Amerika. Fakamaama e ia kua gahua malolō a ia. Holo hake e tuaga haana he kamupanī ti moua e palepale ko e taha he tau tagata gahua mitaki he motu he kamupanī ia. “He magahala ia, manatu au ko e tau palepale nei ko e fakamooliaga he monuina ha Iehova,” he ui e David. Ka e pihia nakai?

⁸ Kamata a David ke mailoga fakahaga e kelea he gahua haana ke he tuaga kapitiga haana mo Iehova. “He tau feleveiaaga mo e pihia ke he gahua he fonua, mailoga e au kua manamanatu au ke he tau lekua he gahua tupe haaku,” he ui e ia. “Loga e tupe haaku, ka e lahi mahaki foki e fakaatukehe, ti lekua e fakamauaga haaku.”

⁹ Mailoga e David kua lata a ia ke liu kitekite  ke he tau mena ne mua e aoga ki a ia. “Taute e au e fifiliaga mauokafua ke fakahako e tuaga haaku,” he ui e ia. Manako a David ke liu fakatokatoka e fakaholoaga he gahua tupe haana ti fakakite e ia e pulega haana ke he takitaki gahua. Ko e fua? Ne fakaoti a David mai he gahua haana! Fēfē e tali haana? “He aho hake, tuku e ole haaku ke matutaki e paionia fakakū,” he ui e ia. Ke leveki aki a laua, ne kamata a David mo e hoana haana ke gahua fakameā. Nakai leva, kamata a ia ke paionia tumau, ti fakalataha e hoana haana he mogo fakamui mo ia he gahua paionia. Fifili e hoa nei ke taute e gahua tupe ne onoono hifo e tokologa ki ai, ka ko e gahua tupe ne taute e laua kua nakai mua e aoga ki a laua. Pete he tote e totogi ha laua ne moua mogonei, lahi ni e tupe ha laua he tau mahina takitaha ke totogi aki e tau fakamoleaga ha laua. Manako a laua ke tuku fakamua a Iehova, ti mailoga e laua kua leveki e Ia a lautolu kua tuku fakamua e tau mena he Kautu.​—Mata. 6:31-33.

10. Puipui fēfē e tautolu e tau loto ha tautolu?

¹⁰ Pete ni he tote po ke lahi e tau koloa fakatino ha tautolu, lata a tautolu ke puipui e tau loto ha tautolu. Fēfē? Ua feaki e manako lahi ke he tau koloa. Ua fakaatā e gahua tupe ke mua atu e aoga ke he fekafekauaga haau ki a Iehova. Iloa fēfē e koe kua tupu e mena ia ki a koe? Falu hūhū ka hūhū hifo ki a koe: ‘Fa manamanatu nakai au ke he gahua tupe haaku ka haia au he tau feleveiaaga po ke gahua he fonua? Tupetupe tumau kia a au to lahi nakai e tupe haaku ke lata mo e tau mogo i mua? Ko e tupe mo e tau koloa fakatino kia ne fakatupu e tau lekua ki a au mo e hoa haaku? To makai nakai au ke taute e gahua tupe ne onoono hifo e tau tagata ki ai ka fakaatā au ke lahi e fekafekauaga ki a Iehova?’ (1 Timo. 6:9-12) Ka manamanatu ke he tau hūhū ia, kia manatu e tautolu kua fakaalofa a Iehova ki a tautolu ti mavehe mai ki a lautolu kua mahani fakamooli ki a ia: “Nakai tuai toka ni e au a koe, nakai tuai tiaki ni e au a koe.” Ko e mena haia ne tohi he aposetolo ko Paulo: “Kia noa ha mutolu a mahani mo e velevelekoloa.”​—Hepe. 13:5, 6.

11. Ko e heigoa ka taute he fakafiafiaaga ke he tagata?

¹¹ Manako a Iehova ki a tautolu ke fiafia e moui, ti lagomatai he tau fakafiafiaaga a tautolu ke taute pihia. Pehē e Kupu he Atua kua “nakai fai mena mitaki ke he tagata, ka kia kai ai e ia mo e inu, mo e fakafiafia hana loto ke he tau mena mitaki he hana tau gahua.” (Fakama. 2:24) Ka e lahi e lauia kelea he tau fakafiafiaaga loga he lalolagi ki a tautolu. Kua fakatote  hifo e tau tutūaga he tau mahani he tau tagata, ka e fakaohooho a lautolu ke fiafia po ke manako lahi foki ke he tau mena ne vihiatia he Kupu he Atua.

12. Hagaao ke he 1 Korinito 10:21, 22, ko e ha kua lata a tautolu ke fifili fakamitaki e tau fakafiafiaaga ha tautolu?

¹² Manako a tautolu ke foaki ki a Iehova e mahani fakamooli katoatoa, ti nakai kai a tautolu mai he ‘laulau ha Iehova’ mo e “laulau he tau temoni.” (Totou 1 Korinito 10:21, 22.) Ko e kai e mena kai mo e taha tagata ko e fakamailoga he kapitiga. Ka fifili e tautolu e fakafiafiaaga ne fakalagalaga e favale, fakataulatua, mahani feuaki, po ke tau manako mo e tau aga he tino, tuga kua kai a tautolu he tau mena kai ne tauteute he tau fī he Atua. Ti ko e fua, nakai ni fakahagahaga kelea e tautolu a tautolu ka e fakahagahaga kelea foki e tuaga kapitiga ha tautolu mo Iehova.

13-14. Fakavē ke he Iakopo 1:14, 15, ko e ha kua lata a tautolu ke fakaeneene ke he fakafiafiaaga ne fifili e tautolu? Fakatai.

¹³ Fakatutala ke he falu puhala pauaki kua tuga e tau mena kai e tau fakafiafiaaga. Ka kai a tautolu, maeke a tautolu ke fifili e tau mena kai ka tuku ke he tau gutu. Ka folo mogoia e tautolu e tau mena kai, to tavili ai e tau mena kai ia ti lauia e tau tino ha tautolu. Ko e tau mena kai mitaki ka foaki ki a tautolu e tau tino malolō; ko e tau mena kai kelea ka foaki ki a tautolu e nakai tino malolō. Nakai kitia mafiti e tau mena ka tutupu, ka e to kitia ai he magaaho fakamui.

¹⁴ Pihia foki, ka fifili e tautolu e tau fakafiafiaaga ha tautolu, maeke a tautolu ke fifili e tau mena ne tuku e tautolu he tau manamanatuaga. Ka mole ia, to lauia e tau manamanatuaga mo e tau loto ha tautolu. Ko e tau fakafiafiaaga mitaki ka atihake a tautolu; ka ko e tau fakafiafiaaga nakai atihake to fakamamahi a tautolu. (Totou Iakopo 1:14, 15.) Ko e tau lauiaaga kelea to nakai kitia mafiti, ka e to kitia ai he mogo fakamui. Kakano haia ne hataki he Tohi Tapu a tautolu: “Aua neke fakahehe ai . . . kua nakai fakavai e taha e Atua; ha ko e mena kua gana he tagata, ko e mena ia ni ke helehele mai ai e ia; Ha ko ia kua gana e tau mena ke lata mo e hana ni a tino, to helehele mai ai e ia ke he tino e mena ke popo.” (Kala. 6:7, 8) Aoga mooli ma tautolu ke tiaki e tau fakafiafiaaga oti ne fakalagalaga e tau mena ne vihiatia e Iehova!​—Sala. 97:10.

15. Ko e heigoa e mena fakaalofa kua foaki e Iehova ma tautolu ke fakaaoga?

¹⁵ Tokologa e tagata ha Iehova ne fiafia he kitekite ke he JW Broadcasting^®, ko e fakaholoaga ha tautolu he Initanete ne atihake. Ko e matakainaga fifine ko Marilyn ne pehē: “Lagomatai he JW Broadcasting a au ke moua e onoonoaga mitaki lahi, ti nakai lata au ke hakahaka e tau mena ne kitekite e au. Ka matimati po ke loto lolelole au, moua e au e lauga fakamafana po ke fakaholoaga he Tapuakiaga Pogipogi ke kitekite. Taute he mena ia au ke logona hifo e tata lahi ki a Iehova mo e haana fakatokatokaaga. Hiki katoatoa he foakiaga he JW Broadcasting e moui haaku.” Aoga nakai a koe he mena fakaalofa ha Iehova? Lafi ke he fakaholoaga foou he tau mahina takitaha, fakakite he JW Broadcasting e tau fakaholoaga loga he tau autiō mo e tau vitiō ti pihia mo e tau lologo atihake ke onoono mo e fanogonogo ki ai he ha magaaho.

16-17. Ko e ha kua lata ia tautolu ke tautaofi fakamitaki e lahi he magaaho kua fakaaoga e tautolu ke he fakafiafiaaga, ti taute fēfē e tautolu?

¹⁶ Lata a tautolu ke mataala ke tautaofi e tau vahega fakafiafia ti pihia mo e lahi e magaaho kua fakaaoga e tautolu ke he tau fakafiafiaaga. Ka nakai mataala, liga to lahi e magaaho ha tautolu ka fakamole ke he tau fakafiafiaaga ka e nakai ke fekafekau ki a Iehova. Tokologa ne paleko ke tautaofi e lahi he magaaho ne fakaaoga e lautolu ke he tau fakafiafiaaga. Ko e  matakainaga fifine ko Abigail ne 18 e tau tau he moui ne pehē: “Lagomatai he kitekite TV au ke okioki he oti e gahua lahi he aho. Kaeke ke nakai fakaeneene au, to loga e tulā ka nofo au i mua he TV.” Ko e matakainaga taane fuata ko Samuel ne pehē: “Kitekite tumau au ke he loga e tau vitiō kūkū he Initanete. Kamata au he kitekite e taha ti nakai mailoga e au ne tolu po ke fā e tulā kua mole.”

¹⁷ Maeke fēfē a koe ke tautaofi e lahi he magaaho ne fakaaoga e koe he fakafiafiaaga? Ko e lakaaga fakamua ke iloa ko e lahi fēfē e magaaho ne fakaaoga e koe he fakafiafia. He ha he fakamau hifo ke he taha e faahi tapu? Tohi hifo he kalena e tau tulā loga ne fakaaoga e koe he kitekite TV, onoono ke he Initanete, mo e pelē he matini utafano haau. Kaeke logona hifo e koe kua molea e lahi he magaaho ne fakamole e koe, lali ke taute e fakaholoaga. Fakatoka e magaaho ke tuku fakamua e tau mena ne mua e aoga, ti tuku mogoia e tau magaaho fakafiafia. Uaaki, ole ki a Iehova ke lagomatai a koe ke tapiki mau ke he fakaholoaga haau. Puhala ia to moua e koe e magaaho mo e malolō kua lata ma e fakaako fakatagata he Tohi Tapu, tapuakiaga he magafaoa, tau feleveiaaga, mo e fekafekau ki a Iehova he gahua fakamatala mo e fakaako atu. Liga to tote e logonaaga tokihala haau ke he magaaho ne fakaaoga e koe ke he fakafiafiaaga.

18-19. Fakakite fēfē e tautolu kua mahani fakamooli katoatoa a tautolu ki a Iehova?

¹⁸ Mole e tohi hagaao ke he moumouaga he lalolagi ha Satani ti hoko mai e lalolagi foou, pehē e aposetolo ko Peteru: “Ko e tau fakahelehele na e, ha ha ne fakatalitali ke he tau mena ia, kia lalilali atu a mutolu, kia moua e ia a mutolu mo e monuina, kua nakai fai ila, mo e nakai talahaua kelea.” (2 Pete. 3:14) Ka omaoma a tautolu ke he fakatonuaga ia ti eketaha ke fakatumau e meā he mahani mo e tuaga fakaagaaga, fakakite ai kua mahani fakamooli katoatoa a tautolu ki a Iehova.

¹⁹ Ko Satani mo e fakatokaaga haana to matutaki ke kamatamata a tautolu ke hiki e tau mena ne mua atu e aoga ki a tautolu. (Luka 4:13) Ka e pete e tau paleko ne fehagai mo tautolu, to nakai fakaatā e tautolu ha tagata po ke ha mena ke fakatauhele e tuaga ha Iehova he tau loto ha tautolu. Eketaha a tautolu ke foaki ki a Iehova e mena kua latatonu ni mo Ia​—ko e ha tautolu a mahani fakamooli katoatoa!