1. Ko e heigoa ka taute e Iehova ke fakahoko aki haana a finagalo?

MAEKE a Iehova ke taute ha mena kua latatonu ke fakahoko aki haana a finagalo. Tuga anei, ko Iehova kua eke mo Faiaoga, ko e Fakamafana, mo e Evagelia, ko e falu ni anei he tau matagahua loga haana. (Isaia 48:17; 2 Kori. 7:6; Kala. 3:8) Ka e fa fakaaoga e ia e tau tagata ke taute e finagalo haana. (Mata. 24:14; 28:19, 20; 2 Kori. 1:3, 4) Maeke foki a Iehova ke foaki ki a tautolu e iloilo mo e malolō kua lata ke taute ha mena kua latatonu ke fakamooli aki haana finagalo. Ko e tau vala oti anei he kakano he higoa ha Iehova, tuga he talahau he tokologa he tau tagata pulotu.

2. (a) Ko e ha he falu magaaho ne fakauaua a tautolu kua fakaaoga e Iehova a tautolu? (e) Ko e heigoa ka fakatutala a tautolu he vala tala nei?

² Manako oti a tautolu ke fai aoga ki a Iehova, ka e falu ne liga fakauaua kua fakaaoga e Iehova a lautolu. Ko e ha? Ha kua logona hifo e lautolu kua nakai maeke a lautolu ke lahi e mena ke taute ha ko e tau tau he moui, tau tutūaga, po ke tau lotomatala. He taha faahi, liga fiafia e falu ke he tau mena kua fitā he taute e lautolu ti kaumahala ke kitia e lata ke holo ki mua. He vala tala nei, to fakatutala a tautolu ke he puhala ka lagomatai e Iehova e ha tagata ke fakamooli e finagalo haana. To kumikumi foki a tautolu ke he tau tala he Tohi Tapu ke he puhala kua foaki e Iehova ke he haana a tau fekafekau taane mo e fifine e manako mo e malolō ke gahua. Fakahiku aki, to fakatutala a tautolu ke he puhala ka fakaatā e tautolu a Iehova ke fakaaoga a tautolu.

3. Ke he mena ne talahau ia Filipi 2:13, liga foaki fēfē e Iehova ki a tautolu e manako ke gahua?

³ Totou Filipi 2:13. * Maeke a Iehova ke foaki ki a tautolu e manako ke gahua. To taute fēfē e ia e mena nei? Liga iloa e tautolu e mena pauaki kua lata ke lagomatai i loto he fakapotopotoaga. Po ke totou he tau motua e tohi mai he la ofisa hagaao ke he mena kua lata ke lagomatai he taha fakapotopotoaga foki. He tali ki ai, liga hūhū hifo a tautolu, ‘Ko e heigoa ka taute e au ke lagomatai?’ Po ke liga uiina a tautolu ke talia e kotofaaga paleko, ka e fakauaua a tautolu to maeke nakai a tautolu ke taute ai. Po ke he mole e totou he vala he Kupu he Atua, liga manamanatu a tautolu, ‘Fakagahua fēfē e au e manatu nei he Tohi Tapu ke lagomatai e falu?’ To nakai peehi e Iehova a tautolu ke taute ha mena taha. Ka ko e magaaho ka kitia e ia kua makai a tautolu ke kumikumi hifo ki ai, to foaki e Iehova ki a tautolu e manako ke hokotia ki ai mo e fakagahua.

4. Maeke fēfē a Iehova ke foaki ki a tautolu e malolō ke gahua?

⁴ Foaki foki e Iehova ki a tautolu e malolō ke gahua. (Isaia 40:29) Maeke a ia ke foaki mai e agaaga tapu haana ke fakaholo ki mua e tau lotomatala pauaki ha tautolu. (Esoto 35:30-35) Puhala he fakatokatokaaga haana, maeke a Iehova ke fakaako a tautolu ke taute e tau gahua haana. Ka nakai iloa tonu e koe e puhala ke taute aki e kotofaaga, ole ma e lagomatai. Pihia foki, atāina ke ole ke he ha tautolu a Matua fakamokoi he lagi ke moua e “lahi ue atu he malolo.” (2 Kori. 4:7; Luka 11:13) Loga e fakafifitakiaga he Tohi Tapu ke he puhala kua lagomatai e Iehova e tau tagata taane mo e tau fifine he foaki ki a lautolu e manako mo e malolō ke gahua. He fakatutala a tautolu ke he falu he tau tala nei, lali ke manamanatu ke he tau puhala ka fakaaoga e Iehova a koe ke he puhala pihia.

5. Ko e heigoa kua fakaako e tautolu mai he puhala mo e magaaho ne fakaaoga e Iehova a Mose ke fakahao e tau tagata Haana?

⁵ Fakaaoga e Iehova a Mose ke fakahao e tau Isaraela. Ka ko e magaaho fe ne fakaaoga e Iehova a ia? Magaaho kia ne logona hifo e Mose kua moua e ia e “fakaako . . . ke he iloilo oti ni he tau tagata Aikupito”? (Gahua 7:22-25) Nakai, fakaaoga e Iehova a Mose he mole laia e fakahakohako e Ia a Mose ke eke mo tagata mahani fakatokolalo mo e loto holoilalo. (Gahua 7:30, 34-36) Foaki e Iehova ki a Mose e loto malolō ke vagahau ke he pule malolō lahi i Aikupito. (Esoto 9:13-19) Ko e heigoa kua fakaako e tautolu mai he puhala mo e magaaho ne fakaaoga e Iehova a Mose? Fakaaoga e Iehova a lautolu kua fakakite e tau mahani faka-Atua mo e kua falanaki ki a ia ma e malolō.​—Isaia 12:2.

6. Ko e heigoa kua fakaako e tautolu mai he puhala ne fakaaoga e Iehova a Pasili ke lagomatai e Patuiki ko Tavita?

⁶ Fai senetenari he mole, fakaaoga e Iehova a Pasili ke lagomatai e Patuiki ko Tavita. Ne ‘fia kai mo e nakai fahia, mo e fia inu’ a Tavita mo e tau tagata haana he fehola a lautolu mai he tama taane ha Tavita ko Apisaloma. Fakalataha mo e falu, ko Pasili kua fuakau mogonei ka e foaki e ia e moui haana ke lagomatai a Tavita mo e matakau. Nakai manatu a Pasili ha kua fuakau a ia, kua nakai fai aoga ki a Iehova. Ka e fakaaoga fakamitaki e ia e tau mena ne ha ha ia ia ke lagomatai e tau fekafekau he Atua ne kua lata. (2 Samu. 17:27-29) Ko e heigoa e fakaakoaga ma tautolu? Pete ni e tau tau moui ha tautolu, maeke a Iehova ke fakaaoga a tautolu ke fakapuke e tau manako he tau matakainaga he  matakavi po ke he falu motu ne nakai lahi e tau levekiaga. (Fakatai 3:27, 28; 19:17) Pete foki ka nakai hokotia a tautolu ke lagomatai fakahako a lautolu, maeke a tautolu ke foaki e tau mena fakaalofa ke he gahua he lalolagi katoa ke lagomatai he magaaho mo e matakavi kua latatonu.​—2 Kori. 8:14, 15; 9:11.

7. Fakaaoga fēfē e Iehova a Simeona, ti atihake fēfē a tautolu he iloa e mena ia?

⁷ Mavehe a Iehova ki a Simeona, ko e tagata fakamooli kua motua i Ierusalema, to nakai mate a ia ato kitia e ia e Mesia. Liga atihake lahi he maveheaga ia a Simeona ha kua leva tuai e fakatali haana ke he Mesia. Kua moua e ia e palepale ha ko e tua mo e fakauka haana. He taha aho, “ko e Agaga” ati fano ai a ia ke he faituga. Ne kitia e Simeona i ai e tama mukemuke ko Iesu, ti fakaaoga e Iehova a ia ke talahau e perofetaaga hagaao ke he tama nei ka eke mo Keriso. (Luka 2:25-35) Pete he liga nakai leva e moui ha Simeona ke kitia a Iesu ne taute e fekafekauaga haana he lalolagi, ka e loto fakaaue a ia ke he kotofaaga ne moua, mo e to loga atu foki e mena mitaki ka moua e ia anoiha! He lalolagi foou, to kitia he tagata fakamooli ia e tuaga patuiki ha Iesu kua eke mo fakamonuina ke he tau magafaoa oti he lalolagi. (Kene. 22:18) Maeke foki a tautolu ke loto fakaaue ma e ha kotofaaga ne foaki e Iehova ki a tautolu he fekafekauaga haana.

8. Liga fakaaoga fēfē e Iehova a tautolu tuga ne fakaaoga e ia a Panapa?

⁸ He senetenari fakamua V.N., ko e tagata fakamokoi ko Iose ne fakaatā a ia ke fakaaoga e Iehova. (Gahua 4:36, 37) Liga kua iloilo lahi a Iose he fakamafana e falu ti fakahigoa he tau aposetolo a ia ko Panapa, kakano ko e ‘Tagata he Fakamafanaaga.’ Ma e fakatai, he eke a Saulo mo Kerisiano, tokologa e matakainaga ne matakutaku ke o atu ki a ia ha kua talahaua a ia ko e tagata favale ke he tau fakapotopotoaga. Ka ko e tagata loto molū ko Panapa ne lagomatai a Saulo ati loto fakaaue lahi mahaki a Saulo ke he haana totonu. (Gahua 9:21, 26-28) Fakahiku, ko e tau motua i Ierusalema ne kitia e latatonu ke fakamafana e tau matakainaga ke hoko atu ki Anetioka i Suria. Ko hai ne fakafano atu e lautolu? Ko Panapa! Mitaki e fifiliaga ha lautolu. Tala mai ki a tautolu ko Panapa kua “tomatoma atu kia lautolu oti kana, kia toka ke he tau loto ha lautolu kia pipiki atu ke he Iki.” (Gahua 11:22-24) Pihia foki mogonei, maeke a Iehova ke lagomatai a tautolu ke eke mo “tagata he fakamafanaaga” ke he tau matakainaga Kerisiano. Ma e fakatai, liga fakaaoga e ia a tautolu ke fakamafana a lautolu ne kua mamate e tau fakahele. Po ke liga omoomoi e ia a tautolu ke ahiahi po ke hea telefoni atu ke he taha kua gagao po ke fakaatukehe ke tala age ki ai e tau kupu mafanatia. To fakaatā nakai e koe a Iehova ke fakaaoga a koe ke tuga a Panapa?​—1 Tesa. 5:14.

9. Ko e heigoa kua fakaako e tautolu mai he puhala ne lagomatai e Iehova e matakainaga taane ko Vasily ke eke mo leveki fakaagaaga lotomatala?

⁹ Lagomatai e Iehova e matakainaga taane ko Vasily ke eke mo leveki fakaagaaga lotomatala. He kotofa a Vasily ke eke mo motua he 26 e tau tau he moui, ne matakutaku a ia he manatu kua nakai hokotia e lotomatala haana ke lagomatai fakaagaaga e fakapotopotoaga, mua atu a lautolu ne kua lauia he tau tuaga uka. Ka e moua e ia e fakamahaniaga aoga lahi mai he tau motua lotomatala mo e he fina atu ke he Aoga Fekafekau he Kautu. Eketaha a Vasily ke holo ki mua. Tuga anei, tohi hifo e ia e tau foliaga ikiiki. He hokotia a ia ki ai, ne kautū fakahaga a ia ke he tau matakutaku haana. Pehē a ia mogonei: “Ko e mena ne matakutaku au he magahala ia kua moua e au e fiafia lahi mogonei. He lagomatai e Iehova au ke moua e kupu tohi kua hako ke fakamafana e matakainaga he fakapotopotoaga, tamai he mena ia ki a au e fiafia lahi.” Tau matakainaga taane, ke tuga a Vasily  to fakaatā e koe a koe ke fakaaoga e Iehova, ti lahi e lotomatala ka foaki atu e Ia ki a koe ke leveki aki e tau matagahua he fakapotopotoaga.

10. Ko e heigoa ne taute e Apikaila, ti ko e heigoa e fakaakoaga kua iloa e tautolu mai he fakafifitakiaga haana?

¹⁰ Ko Tavita mo lautolu ne fakamooli ki a ia ne tutuli he Patuiki ko Saulo, ti lata a lautolu ke lagomatai. Ole e tau tagata taane ha Tavita ke he Isaraela maukoloa ko Napalu ma e mena kai tote, ko e mena kua maeke he tagata ke foaki. Logona hifo e lautolu e atāina ke ole ha kua puipui e lautolu e tau fuifui manu ha Napalu he tutakale. Ka e nakai talia e Napalu ne mahani lotokai ke foaki ki a lautolu ha mena. Ita lahi mahaki a Tavita ti lali a ia ke kelipopo a Napalu mo e tau tagata taane oti he magafaoa haana. (1 Samu. 25:3-13, 22) Ka ko e hoana fulufuluola ha Napalu ko Apikaila ne manamanatu. He fakakite e loto malolō lahi, ne fakaveli a Apikaila ke he na ve ha Tavita ti olelalo ki a ia ke nakai fakamaligi toto he taui atu. Ne fakatonu fakailoilo e Apikaila a ia ke falanaki ki a Iehova ke lagomatai. Ko e tau kupu fakatokolalo mo e tau gahua fakailoilo ha Apikaila ne aamotia e loto ha Tavita. Mailoga mooli e ia ko Iehova ne fakafano age a Apikaila. (1 Samu. 25:23-28, 32-34) Feaki e Apikaila e tau mahani ne kua aoga a ia ki a Iehova. Pihia foki, ko e tau matakainaga fifine Kerisiano ne feaki e aga fakailoilo mo e manamanatu ka fakaaoga e Iehova ke atihake e tau magafaoa ha lautolu mo e falu he fakapotopotoaga.​—Fakatai 24:3; Tito 2:3-5.

11. Ko e heigoa ne taute he tau tama fifine ha Saluma, ti ko hai mogonei kua fifitaki a lautolu?

¹¹ Loga e senetenari fakamui, ko e tau tama fifine ha Saluma ne fakalataha mo lautolu ne fakaaoga e Iehova ke liu ati e tau kaupā i Ierusalema. (Nehe. 2:20; 3:12) Pete ko e iki e matua taane he tau tama fifine ha Saluma, kua makai a lautolu ke taute e gahua uka mo e hagahaga kelea ia. (Nehe. 4:15-18) Kehe mamao mo e tau tagata taane matalahi i Tikoa ne “nakai lagomatai ai e lautolu ke he gahua”! (Nehe. 3:5) Manamanatu la ke he fiafia ne logona hifo he tau tama fifine ha Saluma he magaaho ne mau e tau kaupā he 52 ni e aho! (Nehe. 6:15) He vahā ha tautolu, ko e tau matakainaga fifine fakamakai kua fiafia ke lagomatai he taute e tau fekafekauaga pauaki, tuga e talaga mo e fakafoou he tau fale ne tukulele ki a Iehova. Ko e lotomatala, fakamakutu, mo e mahani fakamooli ha lautolu kua aoga lahi ke kautū e gahua nei.

12. Liga fakaaoga fēfē e Iehova a tautolu tuga he fakaaoga e ia a Tapita?

¹² Fakalagalaga e Iehova a Tapita ke puke he “tau gahua mitaki mo e tau mena fakaalofa,” mua atu ke lata ma e tau takape. (Gahua 9:36) Ha ko e haana a lahi he fakamokoi mo e totonu, tokologa ne maanu he mogo ne mate a ia. Ka e molea e fiafia ha lautolu he magaaho ne fakaliu tu mai he aposetolo ko Peteru a ia. (Gahua 9:39-41) Ko e heigoa kua fakaako e tautolu mai ia Tapita? He fuata po ke motua, tagata taane po ke fifine, kua maeke a tautolu oti ke taute e tau mena kua aoga ke lagomatai e tau matakainaga ha tautolu.​—Hepe. 13:16.

13. Fakaaoga fēfē e Iehova e matakainaga fifine ne mahani mā ko Ruth, ti ko e heigoa ne talahau e ia?

¹³ Ko e matakainaga fifine ne mahani mā ko Ruth ne manako ke eke mo misionare. He mogo ne tote a ia, ne fakatepetepe e gahua haana he taha fale ke he taha fale he tufa e tau tuleke. “Fiafia mooli au ke he gahua nei,” he ui e ia. Ka ko e tutala ke he tau tagata he tau gutuhala mo e tala age ke he falu hagaao ke he Kautu he Atua kua uka lahi ki a ia. Pete ni he mā, ne eke a Ruth mo paionia tumau he 18 e tau tau he moui. He 1946, fina atu a ia ke he Aoga Tohi Tapu a Kiliata he Kolo Toko ti fekafekau he mogo fakamui i Hawaii mo Sapanī. Fakaaoga e  Iehova a ia he puhala malolō lahi ke fakapuloa e tala mitaki ke he tau motu ia. Molea e teitei 80 e tau tau he fakalataha ke he fekafekauaga, he talahau e Ruth: “Ko Iehova ko e punaaga he fakamafanaaga ki a au. Lagomatai e ia au ke kautū mai he mahani mā haaku. Talitonu katoatoa au kua maeke a Iehova ke fakaaoga ha tagata ne falanaki ki a Ia.”

14. Hagaao ke he Kolose 1:29, ko e heigoa kua lata a tautolu ke taute ka manako a tautolu ke fakaaoga e Iehova?

¹⁴ Tali mai he fakamauaga tala, fakaaoga e Iehova e tau fekafekau haana ke taute e tau matagahua kehekehe. Ko e heigoa ka lagomatai e ia a koe ke taute? Fakavē ni ke he fakamakai haau ke foaki fakalahi e koe a koe. (Totou Kolose 1:29.) Ka fakaatā e koe a koe, to lagomatai e Iehova a koe ke eke mo tagata fakamatala fakamakutu, ko e faiaoga mitaki, ko e matakainaga lotomatala he fakamafana, ko e tagata gahua iloilo, ko e kapitiga lalago, po ke ha mena kua manako a Ia ke fakamooli aki e finagalo Haana.

15. Tuga ni he fakaako mai he 1 Timoteo 4:12, 15, ko e heigoa kua lata e tau matakainaga taane ikiiki mogonei ke olelalo ki a Iehova ke lagomatai a lautolu ke taute?

¹⁵ Ka e kua a mutolu ma tau matakainaga taane ikiiki hane gutu atu ke he vahā fuata? Manako lahi ke he tau tagata taane hakahakau ma e tau matagahua tuga e tau fekafekau lagomatai. He tau fakapotopotoaga loga, tokologa atu e motua ke he tau fekafekau lagomatai. Maeke nakai e falu matakainaga taane ikiiki ke feaki e manako ke lalago e falu gahua he fakapotopotoaga? Falu mogo kua pehē e tau matakainaga taane, “Fiafia au ke eke mo tagata fakailoa tumau.” Ka pihia e logonaaga haau, olelalo ki a Iehova ke lagomatai a koe ke feaki e manako ke foli ke eke mo fekafekau lagomatai mo e foaki ki a koe e malolō ke taute e tau mena oti he fiafia ke gahua ki a Ia. (Fakama. 12:1) Manako a mautolu ke he lagomatai haau!​—Totou 1 Timoteo 4:12, 15.

16. Ko e heigoa kua lata ke ole e tautolu ki a Iehova, ti ko e ha?

¹⁶ Maeke a Iehova ke lagomatai a koe ke fakahoko aki e haana finagalo. Ti ole ki a ia ma e manako ke taute e gahua haana, mo e ole foki ki a ia ke foaki ki a koe e malolō kua lata. He fuata po ke motua, fakaaoga e magaaho, malolō, mo e tau koloa haau ke fakatokoluga aki a Iehova mogonei. (Fakama. 9:10) Ua fakaatā e matakutaku po ke tau logonaaga fuafuakelea ke nakai fakaaoga e tau magaaho uho lahi ke taute e fekafekauaga ha Iehova. Ko e lilifu mooli kua moua e tautolu ke fai vala tote he foaki e fakalilifu kua lata ma e ha tautolu a Matua fakahele!