KO E tagata fuafua matagi ne matakite ke he fakatino he matagi. Kitia e ia e afā malolō lahi hane hoko mai vave ke he matakavi ne tokologa e tagata. Ha kua tupetupe a ia ke he haohao mitaki he tau tagata, eketaha a ia ke hataki a lautolu neke tomui lahi.

Ke he puhala taha ia, hane hataki e Iehova mogonei ke he tau tagata he lalolagi hagaao ke he “afā” ne hagahaga kelea lahi ke he ha vala tala kua logona e lautolu he fuafua matagi. Taute fēfē e ia? Ti iloa fēfē e tautolu kua lahi e magaaho ne foaki e ia ke he tau tagata ke taute e taha mena? Ke moua e tau tali, kia manamanatu a tautolu ke he falu hatakiaga ne foaki e Iehova he vahā i tuai.

He tau vahā Tohi Tapu, hataki e Iehova hagaao ke he “tau afā,” po ke tau gahua fakafili kehekehe ka tuku atu e ia ki a lautolu ne nakai omaoma pauaki ke he tau poakiaga haana. (Fakatai 10:25; Iere. 30:23) He tau tuaga takitaha, ne fakailoa tuai e ia ke he tau tagata ka lauia ai ti tala age ki a lautolu ke taute e tau hikiaga ne fakatatau ke he finagalo haana. (2 Patu. 17:12-15; Nehe. 9:29, 30) Ke lagomatai e tau tagata ke taute e tau hikiaga nei, fa fakaaoga e ia e tau fekafekau fakamooli haana he lalolagi ke fakailoa e tau fakafiliaga haana mo e fakakite e latatonu ha lautolu ke omaoma.​—Amosa 3:7.

Ne eke a Noa mo taha he tau fekafekau fakamooli ia. Ke he loga e tau tau, ne hataki fakamalolō e ia ke he tau tagata mahani feuaki mo e favale he magahala haana hagaao ke he Fakapuke he lalolagi katoa ka hoko mai. (Kene. 6:9-13, 17) Tala age foki e ia e mena kua lata ia lautolu ke taute ke hao mai, ti kua ui a ia he mogo fakamui “ko e ogo he tututonu.”​—2 Pete. 2:5.

Pete ne tau laliaga ha Noa, ko e tau tagata he lalolagi ia ato Fakapuke ne fakaheu e fekau mai he Atua. Fakakite e lautolu kua nakai ha ha ia lautolu e tua. Ko e fua, mamate a lautolu he mogo ne “hoko mai e fakapuke, mo e uta kehe a lautolu oti.” (Mata. 24:39; Hepe. 11:7) He tata mai e fakaotiaga ha lautolu, nakai maeke ia lautolu ke totoku kua kaumahala e Atua ke hataki a lautolu.

He falu magaaho, hataki e Iehova e tau tagata takitokotaha he magaaho kū ato kamata e “afā” he fakafiliaga haana. Pete ia, ne taute e ia ke lahi e magaaho ke tali atu a lautolu ka lauia ai. Ke fakatai, foaki tuai e ia e tau hatakiaga ke he Tau Malaia ne Hogofulu ne fakahoko ki Aikupito i tuai. Ko e taha fakatai, fakafano e Iehova a Mose mo Arona ke hataki a Farao mo e tau fekafekau haana hagaao ke he malaia ke fituaki, ko e uha tuli kelea lahi. Ko e tō laia e uha tuli he aho hake, ti lahi nakai e magaaho ne foaki he Atua ki a lautolu ke moua e fakamaluaga ke hao mai he afā? Pehē e Tohi Tapu: “Ko ia ha he tau fekafekau a Farao ne matakutaku ke he kupu a Iehova, kua tala age a ia ke fehola hana tau fekafekau, mo e hana tau manu ke he tau fale; Ka ko ia kua fakateaga ke he kupu a Iehova, kua toka ai e ia hana tau fekafekau, mo e hana tau manu ke he fonua.” (Esoto 9:18-21) Maaliali ai, lahi e magaaho ne foaki e Iehova e hatakiaga ke maeke ia lautolu ne tali atu mafiti ke hao mai he malaia.

Ne hataki foki a Farao mo e tau fekafekau haana ato fakahoko e malaia ke hogofuluaki. Ka e fakaheu noa ni e lautolu e hatakiaga. (Esoto 4:22, 23) Ko e fua, ne mamate e tau tama uluaki ha lautolu. Kua momoko lahi mahaki e mena ia! (Esoto 11:4-10; 12:29) Lahi nakai e magaaho ma lautolu ke muitua ke he hatakiaga? Ē! Kua hataki agataha e Mose e tau Isaraela hagaao ke he malaia ke hogofuluaki ka hoko mai ti tala age ai e puhala ke fakahao ha lautolu a tau magafaoa. (Esoto 12:21-28) Tokofiha e tagata ne  omaoma ke he hatakiaga? Hagaao ke he falu fuafuaaga, tolu e miliona he tau tagata, putoia foki e tau Isaraela mo e “tau tagata kehe tokologa,” ko lautolu ne nakai ko e tau Isaraela mo lautolu ko e tau Aikupito ne hao he fakafiliaga he Atua ti o kehe mai i Aikupito.​—Esoto 12:38.

He fakakite he tau fakatai nei, ne taute tumau e Iehova ma e tau tagata ke lahi e magaaho ke omaoma ke he tau hatakiaga haana. (Teu. 32:4) Ko e heigoa e kakano he Atua ke taute e mena ia? Fakamaama he aposetolo ko Peteru ko Iehova kua “nakai finagalo a ia ke malaia taha, ka kia hohoko oti kana ke he tokihala.” (2 Pete. 3:9) Ē, manamanatu mooli e Atua ke he tau tagata. Manako a ia ke fakatokihala a lautolu mo e fakagahua e fakatonuaga haana ato hoko mai e fakafiliaga haana.​—Isaia 48:17, 18; Roma 2:4.

Mogonei, lata e tau tagata oti ke omaoma foki ke he hatakiaga uho lahi kua fakailoa ke he lalolagi katoa. He ha ha a Iesu he lalolagi, hataki e ia to nakai leva ti moumou e fakatokaaga nei he vahā he ‘matematekelea lahi.’ (Mata. 24:21) Hagaao ke he fakafiliaga ia he vahā i mua, foaki e Iesu e perofetaaga ne fakamaama fakamaaliali e tau mena ka amanaki e tau tutaki haana ke kitia mo e ka tutupu he tata mai e magaaho ia. Fakamaama foki e Iesu e tau mena tutupu aoga lahi kua kitia e tautolu mogonei.​—Mata. 24:3-12; Luka 21:10-13.

Fakatatau mo e perofetaaga ia, kua omoomoi e Iehova e tau tagata oti mogonei ke omaoma ke he takitakiaga fakaalofa Haana. Manako a ia ma e tau tagata omaoma ke moua e moui ne mitaki lahi mogonei ti pihia mo e tau monuina anoiha he lalolagi tututonu foou haana. (2 Pete. 3:13) Ke tua ke he tau maveheaga ha Iehova, foaki e ia e fekau fakahao moui he “tala mitaki nai he kautu,” ne talahau tuai e Iesu to “fakamatala atu . . . ke he lalolagi oti, ke eke mo talahau ke he tau atu motu oti.” (Mata. 24:14) Kua fakatokatoka he Atua e tau tagata tapuaki mooli haana ke “talahau,” po ke fakamatala e fekau nei he Atua ke he kavi 240 e motu. Manako a Iehova ke he tau tagata oti ke omaoma ke he hatakiaga mo e hao mai he “afā” hane hau he fakafiliaga tututonu haana.​—Sefa. 1:14, 15; 2:2, 3.

Ko e hūhū aoga mogoia, nakai ko e lahi he magaaho ne foaki e Iehova ke he tau tagata ke omaoma ke he tau hatakiaga haana. Fakakite mai he tau mena ne tutupu, ne foaki pihia tumau e ia. Ka ko e hūhū aoga lahi: To omaoma nakai e tau tagata ke he hatakiaga he Atua he fai magaaho agaia? Kia matutaki a tautolu ko e tau utafekau he Atua ke lagomatai e tau tagata tokologa ke hao mai he fakaotiaga he fakatokaaga nei.