1-2. (a) Ko e heigoa ka nakai leva ti fakailoa he tau motu? (e) Ko e heigoa e tau hūhū kua lata ke tali?

MANAMANATU ko e fakailoa laia he tau motu e ‘mafola mo e nakai haofia’ ne kua leva e amanaki ki ai. Liga fakatokoluga a lautolu kua haohao mitaki e lalolagi. To manako e tau motu ke manamanatu a tautolu kua fakamafola e lautolu e tuaga he lalolagi. Ka e nakai maeke a lautolu ke taofi e mena ka mui mai! Ko e ha? Hagaao ke he perofetaaga he Tohi Tapu, kua “hokotia fakalutukia ai a lautolu he mahaikava, . . . ti nakai fakai ke hao a lautolu.”​—1 Tesa. 5:3.

² Ha ha i ai e tau hūhū aoga ne lata ke tali: Ko e heigoa ka tupu he magaaho ‘matematekelea lahi’? Ko e heigoa kua amanaki a Iehova ke taute e tautolu he magaaho ia? Ti mautauteute fēfē a tautolu mogonei ke tumau e fakamooli he magaaho matematekelea lahi?​—Mata. 24:21.

3. Hagaao ke he Fakakiteaga 17:5, 15-18, to moumou fēfē he Atua a ‘Papelonia Lahi’?

³ Totou Fakakiteaga 17:5, 15-18. To moumou mooli a ‘Papelonia Lahi’! He totoku fakamua, to nakai puipui he tau motu e tau mena ka tutupu he magaaho tonu ia. Ko e ha? Ha ko e mena to “tuku atu he Atua ke he tau loto ha lautolu ke eke hana finagalo.” Ko e heigoa e finagalo ia? Ke moumou e kautu he tau lotu fakavai he lalolagi, putoia e Kerisitenitome. * To  tuku he Atua e finagalo haana ke he tau loto he “tau hoe foki ne hogofulu” he “manu favale kula.” Ko e tau hoe ne hogofulu kua hukui e tau malolō fakapolitika oti ne lalago e “manu favale” ko e United Nations. (Fakakite. 17:3, 11-13; 18:8) Ka fuluhi e tau malolō fakapolitika ia ke he lotu fakavai, to fakamailoga he mena ia e kamataaga he matematekelea lahi. Ko e mena matakutakuina mooli ka lauia e lalolagi.

4. (a) Ko e heigoa kua liga talahau he tau motu e kakano ne totoko e lautolu e lotu fakavai? (e) Liga ko e heigoa ka taute he tau tagata ne putoia fakamua he tau lotu ia?

⁴ Nakai iloa e tautolu e tau kakano ne liga talahau he tau motu e totokoaga ha lautolu ki Papelonia Lahi. Liga pehē a lautolu ko e tau lotu he lalolagi kua fakatauhele e mafola mo e fakaohooho tumau e tau mena fakapolitika. Po ke liga pehē a lautolu ko e tau fakatokatokaaga fakalotu ia kua loga lahi mahaki e tau monuina mo e tau koloa. (Fakakite. 18:3, 7) Tuga kua tonu ko e totokoaga nei kua nakai kakano to moumou e tau tagata oti he tau lotu ia. Ka e tuga ko e tau motu ka moumou e tau fakatokatokaaga fakalotu. Ka fakaotioti e tau fakatokatokaaga ia, ko e tau tagata ne putoia fakamua i ai ka mailoga kua nakai fakamooli e tau takitaki lotu ia ki a lautolu ti tuga kua lali a lautolu ke fakamamao mai he tau lotu ia.

5. Ko e heigoa kua mavehe mai e Iehova hagaao ke he matematekelea lahi, ti ko e ha?

⁵ Nakai fakakite he Tohi Tapu e loa he moumouaga ha Papelonia Lahi, ka e iloa e tautolu to fakahoko ai ke he magaaho kū. (Fakakite. 18:10, 21) Mavehe e Iehova to ‘fakakūkū e tau aho’ he matematekelea lahi ke fakahao e “tau tagata kua fifili” e ia mo e lotu mooli. (Mare. 13:19, 20) Ka ko e heigoa kua amanaki a Iehova ki a tautolu ke taute he kamataaga he matematekelea lahi ke hoko ke he tau i Amaketo?

6. Ko e ha ne nakai koenaia ke vevehe kehe he lotu fakavai?

⁶ He fakatutala he vala tala fakamua, amanaki a Iehova ke he tau tagata tapuaki haana ke vevehe kehe mai a lautolu i Papelonia Lahi. Ka e fai mena foki kua lata he nakai ni vevehe  kehe mo e lotu fakavai. Lata a tautolu ke eketaha ke fakatokoluga e lotu mooli, ko e tapuakiaga meā ha Iehova. Manamanatu ke he ua e puhala ka taute e tautolu e mena ia.

7. (a) Fakatumau fēfē a tautolu ke mauokafua ke he tau tutūaga he mahani tututonu ha Iehova? (e) Fakamaama fēfē he Heperu 10:24, 25 e aoga he ha tautolu a feleveiaaga auloa, mua atu he magaaho tonu nei?

⁷ Fakamua, lata a tautolu ke fakatumau e mauokafua ma e tau tutūaga he mahani tututonu ha Iehova. Nakai maeke a tautolu ke talia e tau mahani mo e tau tutūaga he lalolagi. Ma e fakatai, nakai talia e tautolu ha mahani feuaki, putoia e fakamauaga he tau tagata taane ke he tau tagata taane mo e tau fifine ke he tau fifine mo e falu puhala moui fakasotoma. (Mata. 19:4, 5; Roma 1:26, 27) Uaaki, lata a tautolu ke matutaki ke tapuaki mo e tau matakainaga Kerisiano ha tautolu. Taute e tautolu e mena nei he ha magaaho kua maeke, he ha tautolu a tau Fale he Kautu, po ke tau kaina nonofo, po ke matakavi ko tautolu hoko tautolu ni. Pete ni e tau mena ka tutupu, kia nakai fakalolelole he o atu ke he tau feleveiaaga ke tapuaki auloa. Lata a tautolu ke fakalataha auloa he “au atu ai foki he pihia ha kua kitia e [tautolu] kua tata tuai e aho.”​—Totou Heperu 10:24, 25.

8. To liga hiki fēfē e fekau ha tautolu he tau mogo i mua?

⁸ He magaaho matematekelea lahi, to liga hiki e fekau kua fakailoa e tautolu. Mogonei, fakamatala e tautolu e tala mitaki he Kautu mo e eketaha a tautolu ke taute tutaki. Ka ko e magaaho ia, to liga fakailoa e tautolu e fekau malolō lahi tuga e tau uha tuli. (Fakakite. 16:21) Liga to fakailoa e tautolu e matematekelea lahi ka hoko ke he lalolagi ha Satani. Nakai leva, to iloa maaliali e tautolu e fekau mo e puhala ka fakailoa ai e tautolu. To fakaaoga nakai e tautolu e tau puhala pihia kua fakaaoga e tautolu ke molea e teau he tau tau ke fakamatala mo e fakaako atu? Po ke to fakaaoga e tautolu e falu puhala foki? To fakatali a tautolu ke kitia. Pete ni e mena ka tupu, to liga ha ha ia tautolu e kotofaaga ke fakailoa fakamalolō e fekau he fakafiliaga ha Iehova!​—Eseki. 2:3-5.

9. Liga tali fēfē e tau motu ke he fekau ha tautolu, ka ko e heigoa ka iloa mooli e tautolu?

⁹ Liga to fakaita he fekau ha tautolu e tau motu ti lali ai ke fakanono katoatoa a tautolu. Tuga ni he falanaki a tautolu ki a Iehova ma e lalagoaga he gahua fakamatala ha tautolu mogonei, to lata a tautolu ke moua e lalagoaga haana he magaaho ia. Maeke a tautolu ke iloa mooli to fakapuke he Atua a tautolu aki e malolō ke taute e finagalo haana.​—Mika 3:8.

10. He talahau tuai ia Luka 21:25-28, to tali atu fēfē e laulahi he tau tagata ke he mena ka tupu he magaaho matematekelea lahi?

¹⁰ Totou Luka 21:25-28. He magaaho matematekelea lahi, to ofo e tau tagata he kitia e tau mena oti ne manatu a lautolu he taha magaaho kua mauokafua lahi he lalolagi kua kamata ke malolo hifo. To “mamahi” po ke, tupetupe a lautolu he matakutaku ma e tau momoui ha lautolu he hokotia a lautolu ke he magaaho kelea muitui he fakamauaga he tagata. (Sefa. 1:14, 15) He magaaho ia, to liga holo ki mua e uka he moui, pihia foki ma e tau tagata ha Iehova. Ha kua fakatumau a tautolu ke nakai fai vala he lalolagi, liga to matematekelea a tautolu. Liga to nakai ha ha ia tautolu falu lagomatai kua lata.

11. (a) Ko e ha kua hagaaki tumau ai ke he Tau Fakamoli a Iehova? (e) Ko e ha kua nakai lata a tautolu ke matakutaku ke he matematekelea lahi?

¹¹ He taha magaaho, ko e tau tagata ne kua moumou e tau lotu ne liga ita ha kua tumau e Tau Fakamoli a Iehova ke tapuaki. Manamanatu la a tautolu ke he miha ne liga tupu  mai he mena ia, ti putoia foki ke he tau tala utafano he initanete. To vihiatia he tau motu mo e ha lautolu a pule ko Satani a tautolu ha ko e lotu ni ha tautolu kua hao. To nakai kautū e foliaga ha lautolu ke utakehe e tau lotu oti mai he lalolagi. To hagaaki tumau a lautolu ki a tautolu. He magaaho nei, to taute he tau motu e matagahua ha Koku ha Makoku. * To fakapotopoto auloa a lautolu ke totoko favale atu ke he tau tagata ha Iehova. (Eseki. 38:2, 14-16) Liga to kamata a tautolu ke tupetupe ke he mena ka tupu he magaaho matematekelea lahi ha kua nakai iloa e tautolu e tau mena ha lautolu ka taute. Ka e taha e mena kua mooli: Nakai lata a tautolu ke matakutaku ke he matematekelea lahi. To foaki e Iehova ki a tautolu e tau fakatonuaga ke moua e fakamouiaga. (Sala. 34:19) To maeke a tautolu ke “kitekite hake mo e haga hake” he iloa ai kua “tata tuai ha [tautolu] a fakamouiaga.” *

12. Tauteute fēfē he “fekafekau fakamoli mo e loto matala” a tautolu ke lata mo e mena ka tupu he vahā anoiha?

¹² Ko e “fekafekau fakamoli mo e loto matala” hane tauteute a tautolu ke tumau e fakamooli he matematekelea lahi. (Mata. 24:45) Kua taute e mena nei ke he loga e tau puhala, ka e manamanatu ke he taha e fakataiaga: ko e tau fakaholoaga he tau fonoaga ha tautolu he 2016-2018. He tau fakaholoaga ia, kua fakamafana mai ke fakamalolō e tau mahani kua lata mo tautolu he tata a tautolu ke he aho a Iehova. Fakatutala fakakū la ke he tau mahani ia.

13. Maeke fēfē ke fakamalolō e mahani fakamooli ha tautolu ki a Iehova, ti ko e ha kua lata ke taute ai he magaaho nei?

¹³ Mahani fakamooli: Ko e matapatu he fakaholoaga he fonoaga he 2016 ko e “Remain Loyal to Jehovah!” Fakaako he fakaholoaga nei ki a tautolu kaeke ke malolō e fakafetuiaga fakatagata mo Iehova, to mahani fakamooli a tautolu ki a ia. Fakamanatu mai kua maeke a tautolu ke fakatata ki a Iehova puhala he liogi mai he loto mo e fakaako fakamakutu ke he Kupu haana. He taute pihia kua foaki ki a tautolu e malolō ke kautū foki ke he tau kamatamata uka. He tata mai e moumouaga ke he fakatokaaga ha Satani, amanaki a tautolu ke fehagai mo e tau kamatamata uka foki he mahani fakamooli ke he Atua mo e haana Kautu. To liga matutaki e tau tagata ke vā a tautolu. (2 Pete. 3:3, 4) Maeke e mena nei ke tupu mooli he kamatamata fakalahi e tuuho ha tautolu. Lata ke fakamalolō e mahani fakamooli ha tautolu he magaaho nei ke maeke a tautolu ke fakatumau e mahani fakamooli he magaaho matematekelea lahi.

14. (a) Ko e heigoa e hikiaga ka hoko hagaao ke he tau matakainaga taane kua takitaki ke he lalolagi? (e) Ko e ha kua lata a tautolu ke mahani fakamooli he magaaho ia?

¹⁴ He magaaho matematekelea lahi, to fai hikiaga ke he tau matakainaga taane kua takitaki ke he lalolagi. He taha magaaho, ko lautolu oti ne fakauku ne haia agaia he lalolagi to fakapotopoto ke he lagi ke fakalataha ke he tau i Amaketo. (Mata. 24:31; Fakakite. 2:26, 27) Kakano ai ko e Kau Fakatufono to nakai ha ha mo tautolu he lalolagi. Ka ko e moto tagata tokologa to fakatumau ke fakatokatoka. Ko e tau matakainaga taane ne latatonu mai he tau mamoe kehe ka takitaki. To lata a tautolu ke fakakite e mahani fakamooli  ha tautolu he lalago e tau matakainaga taane nei mo e muitua ke he fakatonuaga ha lautolu ne puhala mai he Atua. Ko e fakamouiaga ha tautolu to fakavē ke he mena ia!

15. Maeke fēfē ke fakamalolō e fakauka ha tautolu, ti ko e ha kua aoga ke taute pihia he magaaho nei?

¹⁵ Fakauka: Ko e matapatu he fakaholoaga he fonoaga he 2017 ko e “Don’t Give Up!” Lagomatai he fakaholoaga nei ke fakamalolō e mauokafua ha tautolu ke tumau ke he tau kamatamata. Fakaako a tautolu ko e fakauka ha tautolu kua nakai fakavē ke he tau tutūaga mitaki. Maeke ke fakamalolō e fakauka ha tautolu he falanaki ki a Iehova. (Roma 12:12) Kia nakai nimo e tautolu e maveheaga ha Iesu: “Ko ia ke tumau ato hoko ke he fakaotiaga, to fakamoui na ia.” (Mata. 24:13) Ko e maveheaga nei kua lata a tautolu ke fakatumau e fakamooli pete ne tau paleko kua fehagai mo tautolu. He fakauka ke he tau kamatamata takitaha mogonei, maeke a tautolu ke malolō lahi ato hoko e matematekelea lahi.

16. Ko e heigoa ne fakavē ki ai e loto malolō ha tautolu, ti maeke fēfē ke fakamalolō e loto malolō ha tautolu he magaaho nei?

¹⁶ Loto malolō: Ko e matapatu he fakaholoaga he fonoaga he 2018 ko e “Be Courageous!” Fakamanatu mai he fakaholoaga nei kua nakai fakavē e loto malolō mooli ha tautolu ke he tau lotomatala fakatagata. He fakauka, ko e loto malolō mooli kua moua mai he falanaki ki a Iehova. Fakamalolō fēfē e falanakiaga ha tautolu ki a ia? He totou e Kupu haana he tau aho takitaha mo e manamanatu fakahokulo ke he puhala ne fakahao e Iehova e tau tagata haana he vahā i tuai. (Sala. 68:20; 2 Pete. 2:9) Ka totoko e tau motu ki a tautolu he magaaho matematekelea lahi, lata a tautolu ke loto malolō mo e ke falanaki katoatoa ki a Iehova. (Sala. 112:7, 8; Hepe. 13:6) Ka falanaki a tautolu ki a Iehova he magaaho nei, to moua e tautolu e loto malolō kua lata ke fehagai mo e totokoaga ha Koku. *

17. Ko e ha kua nakai lata a tautolu ke matakutaku hagaao ki Amaketo? (Kikite fakatino he kili.)

¹⁷ He totoku he vala tala fakamua, laulahi ia tautolu kua momoui he magaaho he tau aho fakamui. Ka e ha ha foki ia tautolu e amaamanakiaga ke momoui he matematekelea lahi.  Ko e tau i Amaketo to fakakatoatoa ke hokotia ke he fakaotiaga he fakatokaaga nei. Ka e nakai fai mena ke matakutaku a tautolu. Ko e ha? Ha ko e tau he Atua anei. (Fakatai 1:33; Eseki. 38:18-20; Saka. 14:3) He foaki e Iehova e fakamailoga, to takitaki e Iesu Keriso e kau ke he tauaga. To ha ha he faahi haana a lautolu ne fakauku kua fakaliu tu mai mo e totou teau he tau agelu. To fakalataha a lautolu ke tau atu ki a Satani, haana tau temoni, mo e ha lautolu a tau kau he lalolagi.​—Tani. 12:1; Fakakite. 6:2; 17:14.

18. (a) Ko e heigoa kua fitā he talahau e Iehova? (e) Foaki fēfē he Fakakiteaga 7:9, 13-17 ki a koe e mauokafua hagaao ke he vahā anoiha?

¹⁸ Kua fitā he talahau e Iehova: “Ko e tau kanavaakau oti kua taute ke tau kia koe, nakai monuina ia.” (Isaia 54:17) “Ko e moto tagata tokologa” he tau tagata tapuaki fakamooli ha Iehova to “o mai mai he matematekelea lahi” mo e momoui! To matutaki mogoia a lautolu ke fekafekau ki a ia. (Totou Fakakiteaga 7:9, 13-17.) Loga lahi e tau kakano kua foaki he Tohi Tapu ke mauokafua a tautolu ma e vahā anoiha! Iloa e tautolu “kua leveki e Iehova a lautolu kua fakamoli.” (Sala. 31:23) Ko lautolu oti kua fakaalofa mo e fakaheke a Iehova to fiafia ke kitia a ia kua fakatokoluga e higoa tapu haana.​—Eseki. 38:23.

19. Ko e heigoa e amaamanakiaga homo ue atu kua tatali a tautolu he vahā tata mai anoiha?

¹⁹ Manamanatu ke he hikihikiaga he tau kupu he 2 Timoteo 3:2-5 ka fakamaama aki e tau tagata he lalolagi foou ne atāina mai he fakaohoohoaga ha Satani. (Kikite puha “ Puhala he Tau Tagata he Magaaho Ia.”) Ko e Matakainaga ko George Gangas * he Kau Fakatufono ne fakamaama ai ke he puhala nei: “To fēfē la e lalolagi ka tapuaki e tau tagata oti ki a Iehova! Nakai leva to moua e koe e lilifu ke moui he fakatokaaga foou. To moui a koe he tumau e moui ha Iehova. To momoui tukulagi a tautolu.” Ko e amaamanakiaga homo ue atu mooli!