1. Iloa fēfē e tautolu ko e gahua taute tutaki ko e gahua fakamoui?

KO E gahua taute tutaki ko e gahua fakahao moui! Iloa fēfē e tautolu? Magaaho ne poaki a Iesu he Mataio 28:19, 20, pehē a ia: “Kia o atu a . . . ke eke e tau motu oti kana mo tutaki, ti papatiso atu a lautolu.” Iloa fēfē e tautolu e aoga he papatiso? Ko e poakiaga ma lautolu hane kumi e fakamouiaga. Ko e tau tagata ka papatiso kua lata ke tua ko e fakamouiaga kua maeke ni ha ko e mate ha Iesu mo e liu tu mai. Ko e mena ia ne tala age e aposetolo ko Peteru ke he tau Kerisiano: “Ko e papatisoaga, kua fakamoui ai ainei a tautolu . . . ke he liu tu mai a Iesu Keriso.” (1 Pete. 3:21) Ti ka papatiso e tutaki foou, kua amanaki a ia ke moui tukulagi.

2. Ko e puhala fe kua eke a tautolu mo tau faiaoga he 2 Timoteo 4:1, 2?

² Ke taute tutaki, lata a tautolu ke feaki e puhala fakaako atu. (Totou 2 Timoteo 4:1, 2.) Ko e ha? Ha kua poaki a Iesu ki a tautolu: “Kia o atu a . . . ke eke e tau motu oti kana mo tutaki, . . . ti fakaako atu a mutolu kia lautolu.” Pehē e aposetolo ko Paulo “kia tumau” he gahua ia, “ha ko e mena ka eke e koe e mena ia ti fakamoui ai e koe a koe, katoa mo lautolu kua fanogonogo kia koe.” Ko e kakano mitaki ati pehē a Paulo: ‘Kia mataala, a koe kia koe ni, katoa mo e hau a fakaako atu.’ (1 Timo. 4:16) Ha kua matutaki e fakaako atu ke he taute tutaki, manako a tautolu ke mitaki lahi mahaki e fakaako atu.

3. He vala tala nei, ko e heigoa ka fakatutala a tautolu hagaao ke he puhala ke taute e tau fakaako Tohi Tapu?

³ Kua fakaako tumau e tautolu e kupu mooli i loto he Tohi Tapu ke he tau tagata tokologa. Ka e pehē e vala tala fakamua,  manako a tautolu ke iloa e puhala ka lagomatai e tokologa ke eke mo tau tutaki papatiso ha Iesu Keriso. He vala tala nei, to fakatutala a tautolu ke he lima foki e vala kua lata e tau faiaoga takitaha ke taute ke lagomatai e tagata fakaako ke holo ki mua ke papatiso.

4. Ko e ha kua lata e faiaoga ke ua lahi e tutala ka taute e fakaako Tohi Tapu? (Kikite foki e matahui tala.)

⁴ Fiafia a tautolu ke he mena ne fakaako mai he Kupu he Atua. Ti liga manako a tautolu ke tutala fakalahi hagaao ke he tau mena ne fiafia a tautolu ki ai. Ka e he taute e Fakaakoaga Kolo Toko, Fakaakoaga Tohi Tapu he Fakapotopotoaga, po ke fakaako Tohi Tapu he kaina, kua nakai lata e tagata ne taute ke lahi e tutala. Ke fakaatā e Tohi Tapu ke fakaako, lata e faiaoga ke mataala ke ua fakamaama e tau mena oti ne iloa e ia ke he tau kupu Tohi Tapu. * (Ioane 16:12) Fakatatai e iloilo ke he Tohi Tapu ne iloa e koe he magaaho ia to papatiso mo e mena ne iloa e koe mogonei. Liga he magaaho ia, maama ni e koe e tau matapatu fakaakoaga. (Hepe. 6:1) Loga tuai e tau he fakaako e koe e tau mena ne iloa e koe mogonei ti ua lali ke fakaako lagataha e tau mena oti ke he tagata fakaako foou.

5. (a) Lagotatai mo e 1 Tesalonia 2:13, ko e heigoa kua manako a tautolu ke he tagata fakaako ke maama mai he fakaakoaga haana? (e) Fakamafana fēfē e tautolu e tagata fakaako ke tutala hagaao ke he tau mena hane fakaako e ia?

⁵ Manako a tautolu ke he tagata fakaako ke maama e mena ne fakaako e ia mai he Tohi Tapu. (Totou 1 Tesalonia 2:13.) Taute fēfē e tautolu e mena ia? Fakamafana e tagata fakaako ke tutala hagaao ke he tau mena kua fakaako e ia. He nakai fakamaama tumau e tau kupu Tohi Tapu ke he tagata fakaako, ole ki a ia ke fakamaama e falu kupu tohi ki a koe. Lagomatai e tagata fakaako ke kitia e puhala kua aoga e Kupu he Atua ki a ia ni. Hūhū e tau hūhū fakalagalaga ke maeke a ia ke tutala ke he tau mena kua manamanatu po ke logona hifo e ia hagaao ke he tau kupu tohi kua totou e ia. (Luka 10:25-28) Ma e fakatai, hūhū ki a ia: “Lagomatai fēfē he kupu tohi nei a koe ke kitia taha he tau mahani ha Iehova?” “Aoga fēfē a koe mai he kupu mooli nei he Tohi Tapu?” “Fēfē e logonaaga haau ke he mena kua fakaako e koe?” (Fakatai 20:5) Ko e mena ne mua e aoga ko e lahi he fiafia mo e fakagahua e tau mena ne iloa e ia, ka e nakai ko e lahi he mena ne iloa e ia.

6. Ko e ha kua liga mitaki ke uta e faiaoga lotomatala mo tautolu ke he fakaako Tohi Tapu?

⁶ Ka taute e fakaako Tohi Tapu, kua uta nakai e koe e tau tagata fakailoa ko e tau faiaoga  lotomatala? Ka taute pihia, ole ke he manatu ha lautolu ke he puhala kua taute e koe e fakaakoaga mo e puhala kua fakaaoga fakamitaki e koe e Tohi Tapu. Lata a koe ke fakatokolalo ka manako a koe ke fakaholo ki mua e tau puhala fakaako haau. (Fakatatai Gahua 18:24-26.) Mole ia, ole ke he tagata fakailoa lotomatala kaeke kua maama he tagata fakaako e mena haana hane fakaako. Maeke foki a koe ke ole ke he tagata fakailoa ia ke taute e fakaakoaga ka nakai ha ha i ai a koe he taha po ke loga e faahi tapu. To matutaki ke taute tumau e fakaako mo e to peehi ke he tagata fakaako e aoga he fakaakoaga haana. Ua logona hifo ko e fakaakoaga “haau” anei ti nakai maeke ha tagata ke taute ai. Kua manako a koe ma e mitaki he tagata fakaako ti maeke a ia ke holo ki mua tumau he fakaako e kupu mooli.

7. Ko e heigoa ka lagomatai e tagata fakaako ke fiafia ke he mena kua fakaako e ia?

⁷ Lata e tagata fakaako ke kitia e hakahakau haau mo e logona e mauokafua haau ke he kupu mooli he Tohi Tapu. (1 Tesa. 1:5) Ti liga fiafia a ia ke he mena ne fakaako. Ka latatonu, tala age e puhala kua lagomatai e moui haau he fakaaoga e tau matapatu fakaakoaga he Tohi Tapu. To mailoga e ia na ha ha he Tohi Tapu e takitakiaga aoga kua uho lahi foki.

8. Ko e heigoa foki ka taute e koe ke lagomatai e tagata fakaako Tohi Tapu, mo e ko e ha kua taute pihia e koe?

⁸ He fakaako Tohi Tapu, tala age ke he tagata fakaako e tau mena tutupu mooli he moui ha lautolu ne fehagai mo e tau paleko ne tatai ke he haana mo e kua kautū ai. Maeke foki a koe ke tamai mo koe e taha tagata he fakapotopotoaga ne liga aoga e fakafifitakiaga ke he tagata fakaako. Po ke moua e koe e tau iloaaga mafanatia he jw.org he tau fufuta “Hiki he Tohi Tapu e Tau Momoui.” * Ko e tau vala tala mo e tau vitiō pihia ka lagomatai e tagata fakaako ke kitia e pulotu ke fakagahua e tau matapatu fakaakoaga he Tohi Tapu he moui haana.

9. Fakamafana fēfē e koe e tagata fakaako ke tala age e mena ne fakaako e ia ke he magafaoa mo e tau kapitiga haana?

⁹ Ka mau e tagata fakaako, kua fakaako foki nakai e tokoua haana? Ka nakai, uiina e tokoua haana ke nofo he fakaakoaga. Fakamafana e tagata fakaako haau ke talahau e tau mena ne fakaako e ia ke he magafaoa mo e tau kapitiga haana. (Ioane 1:40-45) Fēfē? Liga hūhū a koe:  “To fakamaama fēfē e koe e kupu mooli nei ke he magafaoa haau?” po ke “Ko e heigoa e kupu tohi ka fakaaoga e koe ke fakakite e mena nei ke he kapitiga?” He puhala pihia, to fakamahani e koe e tagata fakaako ke eke mo faiaoga. Ti ka hokotia a ia, to maeke a ia ke fakalataha ke he gahua he fonua ko e tagata fakailoa nakaila papatiso. Maeke a koe ke hūhū ke he tagata fakaako kua iloa nakai e ia ha tagata foki ne manako ke fakaako Tohi Tapu. Ka iloa e ia, matutaki mafiti atu ke he tagata mo e foaki ki a ia e fakaakoaga. Fakakite e vitiō Ko e Heigoa ne Tupu he Fakaako Tohi Tapu? *

10. He fakamaama he 1 Tesalonia 2:7, 8, muitua fēfē he faiaoga e fakafifitakiaga ha Paulo?

¹⁰ Lata e tau faiaoga ke fakakite e fiafia mooli ke he tau tagata fakaako. Onoono ki a lautolu ko e tau matakainaga fakaagaaga ha mutolu he tau mogo i mua. (Totou 1 Tesalonia 2:7, 8.) Nakai mukamuka a lautolu ke tiaki e tau kapitiga he lalolagi mo e taute e tau hikihikiaga oti kua lata ke fekafekau ki a Iehova. Lata a tautolu ke lagomatai a lautolu ke moua e tau kapitiga mooli he fakapotopotoaga. Eke mo kapitiga ke he tagata fakaako haau he fai magaaho mo ia he falu mogo foki ka e nakai ni he fakaako Tohi Tapu. Ko e hea telefoni, tohitohi he selafoni, po ke ahiahi kū he tau magaaho to hoko e tau fakaakoaga kua fakakite na manamanatu mooli a koe ki a ia.

11. Ko e heigoa kua manako a tautolu ke moua he tau tagata fakaako he fakapotopotoaga, ti ko e ha?

¹¹ Pehē ai: “Maeke e maaga katoa ke feaki e tama.” Pehē a tautolu: “Maeke e fakapotopotoaga ke moua e tutaki.” Kakano haia kua mitaki ma e tau faiaoga Tohi Tapu ke fakafeleveia e tau tagata fakaako ha lautolu ke he falu he fakapotopotoaga ka fakaohooho mitaki ki a lautolu. Maeke e tau tagata fakaako ke moua e lafiaga mo e tau tagata he Atua kua maeke ke foaki e lalagoaga mo e tau logonaaga fakaagaaga ki a lautolu. Manako a tautolu ke he tau tagata fakaako takitaha ke logona hifo ko e vala a ia he fakapotopotoaga mo e he magafaoa fakaagaaga ha tautolu. Manako a tautolu ki a ia ke futiaki ke he magafaoa fakahelehele ha tautolu he tau matakainaga Kerisiano. To mukamuka lahi a ia ke oti e lafiaga tata mo e tau tagata ne nakai lagomatai a ia ke fakaalofa ki a Iehova. (Fakatai 13:20) Ka fakaheu he tau kapitiga fakamua haana a ia, to iloa e ia na moua e ia e tau kapitiga mooli he fakatokatokaaga a Iehova.​—Mare. 10:29, 30; 1 Pete. 4:4.

12. Ko e ha kua lata a tautolu ke tutala ke he tagata fakaako hagaao ke he tukulele mo e papatiso he Kerisiano?

¹² Tutala mo e atāina ke he tukulele mo e papatiso he Kerisiano. Ha ko e foliaga ha tautolu he taute e fakaako Tohi Tapu ko e lagomatai e tagata ke eke mo tutaki papatiso. He tau mahina gahoa he taute tumau e tau fakaako Tohi Tapu mo e mua atu he kamata ke fina atu he tau feleveiaaga, lata e tagata fakaako ke maama e kakano he fakaako Tohi Tapu ke lagomatai a ia ke kamata ke fekafekau ki a Iehova ko e taha he Haana a Tau Fakamoli.

13. Ko e heigoa e tau lakaaga kua taute he tagata fakaako he holo ki mua a ia ke papatiso?

¹³ Lagomatai e tagata fakaako ke hokotia ke he foliaga ke papatiso! Fakamua, iloa mo e fakaalofa e tagata fakaako ki a Iehova mo e tua ki a Ia. (Ioane 3:16; 17:3) Ti fakatū he tagata fakaako e fakafetuiaga mo Iehova mo e kamata ke matutaki mo e fakapotopotoaga. (Hepe. 10:24, 25; Iako. 4:8) Fakahiku ko e tagata fakaako kua tiaki e tau mahani kelea mo e tokihala ke he haana tau agahala. (Gahua 3:19) Ka ko e tua haana mogonei kua omoomoi a ia ke tala age e kupu mooli ke he falu. (2 Kori. 4:13) Ti tukulele e ia a ia ki a Iehova mo e fakamailoga e tukulele haana he papatiso. (1 Pete. 3:21; 4:2) Ti ko e aho fiafia lahi ma e tau tagata oti! He taute he tagata fakaako e tau lakaaga takitaha ke hokotia ke he foliaga haana, nava fakamooli mo e fakamafana ki a ia ke fakatumau e holo ki mua he puhala hako.

14. Manamanatu fēfē e faiaoga ke he holo ki mua he tagata fakaako?

¹⁴ Lata a tautolu ke fakauka ka lagomatai e tagata fakaako ke holo ki mua ke tukulele mo e papatiso. Ka e he taha magaaho, lata a tautolu ke iloa kua ha ha ia ia e manako ke fekafekau ki a Iehova ko e Atua. Kitia nakai e koe e tau fakamailoga hane lali e tagata fakaako ke omaoma ke he tau poakiaga ha Iesu? Po ke manako noa ni kia a ia ke iloa e tau vala tala he Tohi Tapu?

15. Ko e heigoa e tau fakamailoga he holo ki mua kua lata e faiaoga ke iloa ke he tagata fakaako?

¹⁵ Kumikumi tumau ke he holo ki mua he tagata fakaako. Ma e fakatai, fakakite kia e ia e tau logonaaga haana ki a Iehova? Liogi nakai a ia ki a Iehova? (Sala. 116:1, 2) Fiafia nakai a ia he totou e Tohi Tapu? (Sala. 119:97) Fano tumau nakai a ia he tau feleveiaaga? (Sala. 22:22) Kua  taute nakai e ia e tau hikihikiaga kua lata he puhala moui haana? (Sala. 119:112) Kua tala age nakai e ia e mena haana ne fakaako ke he magafaoa po ke tau kapitiga? (Sala. 9:1) Mua atu, manako nakai a ia ke eke mo taha he Tau Fakamoli a Iehova? (Sala. 40:8) Ka nakai holo ki mua e tagata fakaako he tau faahi oti nei, fakailoilo he lali ke iloa e kakano mo e tutala totonu ka e vagahau fakahako ki a ia. *

16. Liga ko e heigoa kua fakakite kua lata e fakaako Tohi Tapu ke fakaoti?

¹⁶ Kumikumi tumau po kua lata a koe ke matutaki ke fakaako mo e taha tagata. Hūhū hifo: ‘Kaumahala kia e tagata fakaako ke tauteute ma e fakaakoaga? Nakai kia manako a ia ke fano he tau feleveiaaga? Ha ha agaia kia ia ia e tau aga kelea? Ko ia agaia kia he lotu fakavai?’ Kaeke ko e tali ē, ko e matutaki ke fakaako mo ia to tuga e lali ke fakaako e tagata ke kakau ka e nakai manako a ia ke pala! Ka nakai loto fakaaue mooli e tagata fakaako ke he mena kua fakaako e ia ti nakai makai ke taute e tau hikihikiaga, ti ko e heigoa e kakano he matutaki ke fakaako mo ia?

17. Hagaao ke he 1 Timoteo 4:16, ko e heigoa kua lata ke taute he tau faiaoga Tohi Tapu oti?

¹⁷ Aoga lahi e kotofaaga ha tautolu ke taute tutaki, ti manako a tautolu ke lagomatai e tau tagata fakaako Tohi Tapu ha tautolu ke holo ki mua ke papatiso. Kakano haia kua fakaatā e tautolu e Tohi Tapu ke fakaako mo e to hakahakau mo e mauokafua a tautolu he fakaako. To fakamafana e tautolu e tagata fakaako ke moua e tau kapitiga he fakapotopotoaga. Mo e to fakamaama e tautolu e foliaga he tukulele mo e papatiso, mo e manamanatu tumau ke he holo ki mua he tagata fakaako. (Kikite puha  “Mena kua Lata he Tau Faiaoga ke Taute ke Hokotia e Tau Tagata Fakaako ke Papatiso.”) Fiafia a tautolu ha kua fai vala he gahua fakamoui nei! Kia eketaha a tautolu ke taute e fakaako Tohi Tapu holo ki mua ke papatiso.