1, 2. Ko e heigoa e taufetului ne fehagai e tau fekafekau ha Iehova ki ai?

KO E tau fekafekau fakamooli oti he Atua ne taufetului, mai ia Apelu ne tututonu ke hoko ki a lautolu ne mahani fakamooli he vahā nei. Tala age e aposetolo ko Paulo ke he tau Kerisiano Heperu kua “fakauka ai a [lautolu] ke he tau lahi he tau mena matematekelea” he eketaha ke moua e taliaaga mo e monuina ha Iehova. (Heperu 10:32-34) Fakatatai e Paulo e taufetului he tau Kerisiano ki a lautolu ko e tau tagata sipote fetoko he poitufi, taufagatua, mo e taumoto i Heleni. (Heperu 12:1, 4) He vahā nei, ko tautolu ha he poitufi he moui ti fai fī ne manako ke fakatauhele mo e fakaohooho a tautolu ke galo e fiafia mogonei mo e ha tautolu a tau palepale anoiha.

² Ko e taufetului, po ke “tau” uka lahi mahaki ha tautolu ko e totoko ki a Satani mo e lalolagi haana. (Efeso 6:12) Aoga lahi ke totoko ai neke hufia a tautolu he tau fakaakoaga, tau pulotu, mo e tau mahani kelea, tuga e mahani feuaki, ula tapaka, mo e fakaaoga fakahehē e kava po ke tau tulaki he lalolagi nei. Lata foki a tautolu ke matutaki ke totoko ke he fakaloleloleaga mo e tau hepehepe ni ha tautolu.​—2 Korinito 10:3-6; Kolose 3:5-9.

3. Fakamahani fēfē he Atua a tautolu ke tau ke he tau fī ha tautolu?

 ³ Maeke mooli kia ke kautū he tau fī malolō lahi pihia? Ē, ka e to uka! Fakatatai e Paulo a ia ke he tagata hūmomi he pehē a ia: “Kua tau pihia au, nakai tuga e taumoto ke he matagi.” (1 Korinito 9:26) Tuga ni e tagata hūmomi ne tau ke he taha tagata hūmomi foki, lata a tautolu ke tau ke he tau fī ha tautolu. Lagomatai mo e fakamahani e Iehova a tautolu ke totoko atu. Taute e ia e mena nei puhala he Tohi Tapu. Lagomatai foki e ia a tautolu puhala he tau tohi fakavē ke he Tohi Tapu, tau feleveiaaga Kerisiano, tau toloaga, mo e tau fonoaga. Fakaaoga nakai e koe e tau fakaakoaga oti ia kua moua e koe? Ka nakai, liga nakai totoko katoatoa e koe e fī haau, tuga e tagata hūmomi ne taumoto ke he matagi.

4. Maeke fēfē a tautolu ke kalo kehe he kautū ke he kelea?

⁴ Lata ia tautolu ke mataala he tau magaaho oti. Ko e ha? Liga totoko mai e tau fī ha tautolu ka nakai amanaki a tautolu ki ai po ke ka lolelole a tautolu. Tuku mai he Tohi Tapu ki a tautolu e hatakiaga mo e fakamaloloaga he pehē: “Aua neke mahala a koe ke he kelea, ka kia mahala e kelea ke he mitaki.” (Roma 12:21) Ka tumau a tautolu ke tau atu ke he kelea, maeke a tautolu ke kautū! Kaeke ke nakai mataala mo e nakai tau atu a tautolu, to kautū a Satani, lalolagi haana, mo e tau lolelole ha tautolu. Aua neke mahala. Ua fakalolelole mo e fakatalofe e tau lima haau!​—1 Peteru 5:9.

5. (a) Ko e heigoa kua lata a tautolu ke manatu ka manako ke moua e taliaaga mo e monuina he Atua? (e) Ko e tau tagata fe he Tohi Tapu ka fakatutala a tautolu ki ai?

⁵ Ke kautū ai, lata a tautolu ke manatu e kakano ha tautolu ne taufetului. Ha kua manako a tautolu ke moua e taliaaga mo e monuina he Atua. Ia Heperu 11:6, ne pehē: “Lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.” Ko e kumi fakamakutu ki a Iehova ne kakano kua lata a tautolu ke gahua fakalahi ka manako ke moua e taliaaga haana. (Gahua 15:17) He Tohi Tapu, ne loga e tau fakafifitakiaga mitaki he tau tagata ne taute pihia. Ko Iakopo, Rahela, Iosefa, mo Paulo ne fehagai oti mo e tau tuaga uka he tau logonaaga mo e tino. Ka e maeke a lautolu ke kautū. Ko e ha lautolu a tau fakafifitakiaga kua fakamooli ka eketaha a tautolu, to moua foki e tautolu e monuina ha Iehova. Kitekite la ke he puhala.

6. Ko e heigoa ne lagomatai a Iakopo ke fakamanavalahi, ti palepale fēfē a ia? (Kikite fakatino he kamataaga.)

⁶ Ko e tagata fakamooli ko Iakopo ne taufetului mo e fakauka ha kua fakaalofa a ia ki a Iehova mo e tokiofa haana a fakafetuiaga mo Ia. Katoatoa e tua haana ke he maveheaga ha Iehova ke fakamonuina e fanau haana. (Kenese 28:3, 4) Teitei 100 tau he moui ha Iakopo, ne laga a ia mo e agelu ke maeke ke moua e monuina mai he Atua. (Totou Kenese 32:24-28.) Maō mooli nakai a Iakopo ke laga tokotaha mo e agelu malolō lahi nei? Nakai pihia! Ka e eketaha a ia, ti kitia mooli kua gahua malolo a ia ma e fakamonuina haana! Fakamonuina e Iehova a Iakopo ma e fakamanavalahi haana ti foaki ki a ia e higoa Isaraela, ne kakano “Ko Ia kua Fakamanavalahi mo e Atua.” Ne  moua e Iakopo e palepale hane foli atu foki a tautolu ki ai, ko e taliaaga mo e monuina ha Iehova.

7. (a) Ko e heigoa e tuaga fakalolelole ne fehagai mo Rahela? (e) Ko e heigoa ne taute e Rahela, ti fakamonuina fēfē a ia?

⁷ Ko Rahela ko e hoana fakahele ha Iakopo ne makai foki ke kitia e puhala ka fakamooli e Iehova e maveheaga ke he taane haana. Ka e ha ha i ai e matalekua. Nakai maeke a Rahela ke fanau. He vahā Tohi Tapu ko e mena fakamamahi lahi ke he tau fifine anei. Matutaki fēfē a Rahela ke laga pete he tuaga fakalolelole haana? Nakai mahala e amaamanakiaga haana. Ka e tumau e laga haana he liogi fakalahi ki a Iehova. Logona e Iehova e tau liogi mooli mai he loto ha Rahela ti logona hifo e ia e fakamonuina he mogo ne fai tama. Kakano haia ati pehē a ia: “Ko e tau laga fakalahi, . . . ti kua kautu tuai au.”​—Kenese 30:8, 20-24.

8. Ko e heigoa e tau mena uka ne fehagai mo Iosefa, ti eke fēfē a ia mo fakafifitakiaga mitaki ma tautolu?

⁸ Ko e fakafifitakiaga tua fakamooli ha Iakopo mo Rahela ne liga lauia e tama ha laua ko Iosefa mo e kua lagomatai a ia he mogo ne uka e tuaga he moui haana. He 17 e tau ha Iosefa, ne hiki katoa e moui haana. Ne mahekeheke e tau matakainaga haana ki a ia ti fakafua a ia ke eke mo tupa. Fakamui, ne leva e nofo haana he fale puipui i Aikupito pete he nakai fai mena kelea ne taute e ia. (Kenese 37:23-28; 39:7-9, 20, 21) Ka e nakai loto lolelole po ke ita a Iosefa ti nakai lali foki a ia ke taui atu. Nakai pihia he ha? Ha kua tokiofa e Iosefa e fakafetuiaga haana mo Iehova ti fakatumau ki ai mo e loto katoa haana. (Levitika 19:18; Roma 12:17-21) Maeke e fakafifitakiaga ha Iosefa ke lagomatai a tautolu. Pete ka kelea e vahā tote ha tautolu po ke tuga kua nakai fai amaamanakiaga foki e moui ha tautolu mogonei, lata a tautolu ke tumau e  laga mo e fakamanavalahi. Ka taute pihia e tautolu, maeke a tautolu ke iloa tonu to fakamonuina e Iehova a tautolu.​—Totou Kenese 39:21-23.

9. Maeke fēfē a tautolu ke fifitaki a Iakopo, Rahela, mo Iosefa?

⁹ He vahā nei, liga fakauka foki a tautolu ke he tau paleko uka. Liga matematekelea a koe ha ko e nakai fakafili tonu, fili tagata, vā po ke mahekeheke taha tagata ki a koe. He nakai loto lolelole, manatu e mena ne lagomatai a Iakopo, Rahela, mo Iosefa ke matutaki ke fekafekau mo e fiafia ki a Iehova. Fakamalolo mo e fakamonuina he Atua a lautolu ha kua hokulo e loto fakaaue ha lautolu ke he fakafetuiaga ha lautolu mo ia. Ne tumau a lautolu ke laga mo e gahua fakatatau ke he tau liogi ha lautolu. Ha kua nonofo a tautolu he tau aho fakamui, kua aoga ke tumau e malolo he amaamanakiaga ha tautolu ke he vahā anoiha! Makai nakai a koe ke taufetului, kakano ke eketaha ke moua e taliaaga ha Iehova?

10, 11. (a) Ko e ha kua liga lata a tautolu ke taufagatua ke moua e fakamonuinaaga he Atua? (e) Ko e heigoa ka lagomatai a tautolu ke taute e tau fifiliaga hako?

¹⁰ Ko e ha kua lata a tautolu ke taufagatua ke moua e fakamonuinaaga he Atua? Taha mena, ha kua nakai mitaki katoatoa a tautolu ti liga taufetului a tautolu mo e falu manako kelea. Falu ne taufetului ke moua e aga hako ke he gahua he fonua, mo e taufetului foki e falu ha ko e nakai malolo e tau tino po ke logonaaga matimati. Ha ha i ai falu ne uka agaia ke fakamagalo e tagata ne fakamamahi a lautolu. Pete ni kua fiha e leva ha tautolu he fekafekau ki a Iehova, lata a tautolu oti ke totoko e tau mena ne taute ke uka e fekafekauaga ke he Atua, ko Ia kua palepale a lautolu ne fakamooli.

¹¹ Maeke mooli ke uka lahi ke eke mo Kerisiano mo e taute e tau fifiliaga hako, mua atu ka totoko a tautolu ke he tau manako hepe ha tautolu. (Ieremia 17:9) Ka pihia e logonaaga haau, liogi ki a Iehova ti ole ma e agaaga tapu haana. Ko e liogi mo e agaaga tapu ka lagomatai a koe ke moua e malolo ke taute e mena hako, ati maeke a koe ke moua e monuina he Atua. Eketaha ke moui fakatatau ke he tau liogi haau. Lali ke totou e Tohi Tapu he tau aho takitaha, ti fai magaaho ma e fakaako fakatagata mo e tapuakiaga fakamagafaoa.​—Totou Salamo 119:32.

12, 13. Maeke fēfē e tau Kerisiano tokoua ke tautaofi e tau manako kelea?

¹² Loga e tau fakafifitakiaga he Kupu he Atua, agaaga haana, mo e tau tohi faka-Kerisiano ne lagomatai e tau matakainaga ha tautolu ke kautū mai he tau manako kelea. Taha e fuata mui ne totou e vala tala “Maeke Fēfē a Koe ke Totoko e Tau Manako Kelea?” ne tohi fakailoa he Awake! ia Tesemo 8, 2003. Tali atu fēfē a ia? “Taufetului au ke tautaofi e tau manatu hehē. Mogo ne totou e au i loto he vala tala ‘ma e tokologa kua uka lahi mahaki e totokoaga ke kautū mai he tau manako kelea,’ ne logona hifo e au ko au taha he tau matakainaga ia. Nakai ni tokotaha au.” Aoga foki ke he fuata nei e vala tala “Hikihiki e Puhala Moui​—Talia Nakai he Atua?” he Awake! ia Oketopa 8, 2003. Mailoga e ia he vala tala, ko e totokoaga tumau ma e falu kua tuga e “mena mahukihuki ke he tino.” (2 Korinito 12:7) Ka e, he matutaki a lautolu ke totoko  ke tumau e meā he tau mahani ha lautolu, ha ha ia lautolu e amaamanakiaga mitaki ma e vahā anoiha. “Ha ko e mena ia,” pehē e fuata, “He mole e tau aho takitaha, maeke au ke fakatumau ke fakamooli. Loto fakaaue lahi au ki a Iehova he fakaaoga e fakatokatokaaga haana ke lagomatai a tautolu ke kautū mai he tau aho takitaha he fakatokaaga kelea nei.”

¹³ Manamanatu foki ke he mena ne tupu ke he matakainaga fifine i United States. Tohi e ia: “Manako au ke fakaaue he fagai tumau a mautolu ke he tau mena kua lata mo mautolu he magaaho hako. Fa logona hifo e au kua tohi pauaki e tau vala tala nei ke lata mo au. Loga e tau ne taufetului au ke he manako kelea lahi mahaki ko e mena ne vihiatia e Iehova. Falu magaaho ne logona hifo e au e fiu ti loto ke tiaki. Iloa e au kua fakaalofa hofihofi noa mo e fakamagalo a Iehova, ka kua ha ha ia au e manako kelea nei ti nakai vihiatia katoatoa ai e au, ne logona hifo e au kua nakai maeke au ke moua e lagomatai haana. Ko e taufetului tumau nei kua lauia e tau faahi oti he moui haaku. . . . He mole e totou e vala tala ‘Ha Ha Nakai ia Mutolu e “Tau Loto ke Iloa” a Iehova?’ he Ko e Kolo Toko ia Mati 15, 2013, ne logona hifo mooli e au kua manako a Iehova ke lagomatai au.”

14. (a) Fēfē e logonaaga ha Paulo ke he tau taufetului haana? (e) Maeke fēfē a tautolu ke kautū he tauaga ke he tau lolelole ha tautolu?

¹⁴ Totou Roma 7:21-25. Iloa e Paulo e uka ke totoko ke he tau manako kelea mo e tau lolelole. Ka e iloa e ia to kautū a ia he tauaga ka liogi a ia ki a Iehova, falanaki ki a Ia ma e lagomatai, mo e fakakite e tua ke he poa ha Iesu. Ka e kua a tautolu? Maeke nakai a tautolu ke kautū he tau lolelole ha tautolu? Ē, ka fifitaki a tautolu ki a Paulo mo e falanaki katoatoa ki a Iehova ka e nakai ke he malolo ni ha tautolu, mo e tua ke he lukutoto.

15. Maeke fēfē a Iehova ke lagomatai a tautolu ke fakatumau e fakamooli mo e fakauka ke he tau kamatamata?

¹⁵ Falu magaaho ne liga fakaatā he Atua a tautolu ke fakakite e tupetupe mooli ha tautolu ke he mena ne tupu. Ma e fakatai, kaeke kua gagao lahi po ke nakai fakafili tonu taha he magafaoa ha tautolu, to fēfē e tali ha tautolu? Kaeke ke falanaki katoatoa a tautolu ki a Iehova, to olelalo a tautolu ki a ia ke foaki ki a tautolu e malolo ke fakatumau e fakamooli mo e tumau e fiafia mo e fakafetuiaga ha tautolu mo ia. (Isaia 12:2) Ko e tau fakafifitakiaga he tau Kerisiano tokologa he vahā fakamua mo e mogonei ne fakakite na maeke e liogi ke fakamalolo a tautolu mo e foaki ki a tautolu e loto malolo kua lata ke matutaki a tautolu ke fakauka.

16, 17. Ko e heigoa haau kua eketaha ke taute?

¹⁶ Manako e Tiapolo ke kitia a koe kua loto lolelole mo e kaumahala ti tagatagatō e tau lima haau. Eketaha ke “taofi e tau mena mitaki ke mau.” (1 Tesalonia 5:21) Maeke a koe ke kautū ke he tau ki a Satani, haana a lalolagi kelea, mo e tau manako kelea! Maeke a koe ke kautū kaeke ke falanaki katoatoa a koe to fakamalolo mo e lagomatai he Atua a koe.​—2 Korinito 4:7-9; Kalatia 6:9.

¹⁷ Kia tumau e tau atu. Tumau e taufetului. Tumau e laga. Tumau e fakamanavalahi. Maeke a koe ke iloa tonuhia to ‘liligi atu e Iehova e monuina ma haau, ato lahi ue atu ni haia.’​—Malaki 3:10.