1, 2. (a) Ko e fēfē la e moui ka nakai fai Tohi Tapu? (e) Ko e heigoa ka lagomatai a tautolu ke aoga mai he Kupu he Atua?

KO E fēfē la e moui haau ka nakai fai Tohi Tapu a koe? To nakai moua e koe e fakatonuaga pulotu ke takitaki a koe he tau aho takitaha. To nakai iloa e koe e kupu mooli hagaao ke he Atua, moui, po ke vahā anoiha. Ti nakai fai iloaaga a koe ke he mena ne taute e Iehova ma e tau tagata i tuai.

² Fakaaue ai, nakai ko tautolu he tuaga momoko nei. Tuku mai e Iehova ki a tautolu haana Kupu ko e Tohi Tapu. Mavehe e ia to tumau tukulagi e kupu haana. Fatiaki he aposetolo ko Peteru e Isaia 40:8. Pete ni kua nakai talahau fakatonu e kupu ia ke he Tohi Tapu ka kua hagaao ai ke he fekau he Tohi Tapu. (Totou 1 Peteru 1:24, 25.) Lahi e aoga he Tohi Tapu ki a tautolu kaeke ke totou ai ke he vagahau ni ha tautolu. Ko lautolu ne fiafia ke he Kupu he Atua ne iloa tumau e mena nei. Ke he tau senetenari, kua gahua malolō e tau tagata ke fakaliliu e Tohi Tapu ke moua ai pete e totokoaga lahi mo e uka. Manako  a Iehova ke “fakamomoui e tau tagata oti kana, mo e hokotia a lautolu he maama ke he kupu moli.”​—1 Timoteo 2:3, 4.

3. Ko e heigoa ka fakatutala a tautolu ke he vala tala nei? (Kikite fakatino he kamataaga.)

³ He vala tala nei, to fakatutala a tautolu ke he puhala kua tumau e Kupu he Atua pete he (1) hiki e vagahau, (2) tau mena ne fakatoka fakapolitika ati hiki e vagahau fakaaoga lahi, mo e (3) totoko ke he fakaliliuaga he Tohi Tapu. To lagomatai fēfē he fakatutalaaga nei a tautolu? To hokulo lahi e loto fakaaue ha tautolu ma e Tohi Tapu mo e ki a Ia ne tohi.​—Mika 4:2; Roma 15:4.

4. (a) Hiki fēfē e tau vagahau he mole fakahaga e tau magaaho? (e) Iloa fēfē e tautolu kua nakai taha ni e vagahau ne fiafia e Atua ki ai? Fēfē e logonaaga haau ke he mena ia?

⁴ He mole fakahaga e tau magaaho, ne hiki foki e tau vagahau. Ko e tau kupu mo e tau talahauaga ne kehe lahi e kakano ke he kakano fakamua. Liga manamanatu a koe ke he fakataiaga he vagahau haau. Pihia foki e tau vagahau tuai. Ko e vagahau Heperu mo e Heleni ne vagahau he tau tagata mogonei kua kehe mai he vagahau Heperu mo e Heleni ne tohia ai e Tohi Tapu. Laulahi he tau tagata ne nakai maama e Tohi Tapu he tau vagahau tuai ne tohi aki, ti kua lata a lautolu ke moua e fakaliliuaga. Falu ne manatu ka fakaako a lautolu ke he vagahau Heperu mo e Heleni i tuai, to maeke a lautolu ke maama mitaki e Tohi Tapu. Ka e to nakai lahi e lagomatai ki a lautolu tuga he manatu e lautolu. * (Kikite matahui tala.) Fakaaue lahi a tautolu ha kua fakaliliu e Tohi Tapu po ke tau vala i ai ke teitei 3,000 e vagahau. Ko Iehova ne manako ke he tau tagata he “tau motu kehe oti, mo e tau magafaoa, mo e tau vagahau kehekehe” ke aoga mai he Kupu haana. (Totou Fakakiteaga 14:6.) Mooli, kua fakatata lahi foki he mena nei a tautolu ke he ha tautolu a Atua, ko ia ne fakaalofa mo e nakai fakamailoga tagata.​—Gahua 10:34.

5. Ko e heigoa ati aoga e King James Version?

⁵ Ha kua hiki e tau vagahau, ne lauia foki e tau fakaliliuaga he Tohi Tapu. Ko e fakaliliuaga ne mukamuka ke totou he magaaho fakamua ne liga nakai maama lahi he magaaho fakamui. Ko e fakataiaga he mena nei ko e King James Version, ne taute fakamua he 1611. Ne eke ai mo taha he tau Tohi Tapu faka-Peritania ne talahaua. Ko e tau kupu ne fakaaoga he King James Version ne lauia foki e vagahau Peritania. * (Kikite matahui tala.) Ka e fakaaoga foki he fakaliliuaga nei e higoa ha Iehova. He tau Tohiaga Tapu Heperu ne moua fakamua ai e higoa he Atua kua fakaaoga ai e kupu “LORD” ke he tau matatohi lalahi. Fakaaoga foki he tau lomiaga fakamui e kupu “LORD” ke he tau matatohi lalahi he falu kupu he tau Tohiaga  Tapu Heleni Kerisiano. He puhala nei, ne fakakite he King James Version ko e higoa he Atua kua ha ha i ai foki he New Testament.

6. Ko e ha kua fakaaue lahi a tautolu ke he New World Translation?

⁶ Ko e magaaho fakamua ne kitia e King James Version ne foou e tau kupu faka-Peritania ne fakaaoga. Ka e he mole fakahaga e tau magaaho, ne kamata falu he tau kupu ia ke tuga kua tuai, ti uka mogonei ke maama. Pihia foki e mena ne tupu ke he fakaliliuaga Tohi Tapu fakamua atu ke he falu vagahau. Fakaaue lahi a tautolu ke moua e New World Translation of the Holy Scriptures ne kua fakaaoga e vagahau foou. Moua katoa po ke vala e fakaliliuaga nei ke molea 150 e vagahau. Ati laulahi he tau tagata he lalolagi mogonei kua maeke ke totou e fakaliliuaga nei ke he vagahau ni ha lautolu. Ko e tau kupu foou mo e maama kua fakaaoga ai ke mukamuka e fekau he Atua ke hokotia ke he tau loto ha tautolu. (Salamo 119:97) Ka e uho mooli e New World Translation ha kua tuku e higoa he Atua i loto tuga ni ne tohi he kamataaga.

7, 8. (a) Ko e ha ne tokologa e Iutaia he senetenari ke toluaki F.V.N. ne nakai maama e tau Tohiaga Tapu Heperu? (e) Ko e heigoa e Greek Septuagint?

⁷ Ko e tau fakatokaaga fakapolitika he lalolagi ne hiki e vagahau ne fakaaoga he tau tagata he falu magaaho. Ka e mauokafua a Iehova ke moua he tau tagata e Tohi Tapu he vagahau ka maama e lautolu. Ma e fakatai, ko e tau tohi fakamua ne 39 he Tohi Tapu ne tohia he tau Iutaia, po ke tau Isaraela. Ko lautolu fakamua haia “kua tuku atu kia lautolu e tau kupu he Atua.” (Roma 3:1, 2) Ne tohia fakamua e lautolu e tau tohi nei ke he vagahau Heperu po ke Aramaika. Ka e he senetenari ke toluaki F.V.N., tokologa e Iutaia ne nakai maama e vagahau Heperu. Ko e ha? He kautū a Alesana ne Mua ke he laulahi he faahi ia he lalolagi, ne holofa e Pule Atu Motu Heleni. Ti ko e fua, ne eke e vagahau Heleni mo vagahau he tau faahi ne pule a Heleni ki ai, mo e tokologa e tagata ne kamata ke vagahau Heleni ka e nakai ke he vagahau ha lautolu. (Tanielu 8:5-7, 20, 21) Putoia he mena nei e tokologa he tau Iutaia, ti uka a lautolu ke maama e Tohi Tapu faka-Heperu. Ko e heigoa e tali?

⁸ Kavi ke he 250 e tau ato fanau a Iesu, ko e tau tohi lima fakamua he Tohi Tapu ne fakaliliu ke he vagahau Heleni. Fakamui, ko e tau Tohiaga Tapu Heperu ne toe kua fakaliliu foki. Ko e fakaliliuaga nei kua iloa ai ko e Greek Septuagint. Ko e fakaliliuaga fakamua ia ne tohia he tau Tohiaga Tapu Heperu katoa.

9. (a) Maeke fēfē e Septuagint mo e falu fakaliliuaga fakamua atu ke lagomatai e tau tagata ne totou e Kupu he Atua? (e) Ko e heigoa e vala ne fiafia a koe ki ai he tau Tohiaga Tapu Heperu?

⁹ Ko e Septuagint ne maeke he tau Iutaia ne vagahau Heleni ke totou e tau Tohiaga Tapu Heperu he vagahau Heleni. Manamanatu la ke he fiafia ha lautolu he maeke ke logona po ke totou e Kupu he Atua ke he vagahau ni ha lautolu! Fakamui, ne fakaliliu falu vala he Tohi Tapu ke he falu vagahau ne fakaaoga lahi he tau tagata tuga e vagahau Syriac, Gothic, mo e Latin. He tokologa e tagata ne maeke ke totou mo e maama e Kupu he Atua, ne fiafia foki a lautolu ki ai. Ti fai kupu tohi foki a lautolu ne  fiafia lahi ki ai tuga ni a tautolu mogonei. (Totou Salamo 119:162-165.) Ē, ne tumau e Kupu he Atua pete e tau hikiaga fakapolitika mo e tau hikiaga ke he vagahau ne fakaaoga lahi.

10. He magahala ha John Wycliffe, ko e ha ne laulahi e tau tagata ne nakai maeke ke totou e Tohi Tapu?

¹⁰ He tau tau kua mole, ne lali e tokologa he tau takitaki malolō ke taofi e tau tagata he totou e Tohi Tapu. Ka e nakai oti e gahua he tau tagata taane matakutaku Atua ke maeke he tau tagata oti ke moua e Tohi Tapu. Taha ia lautolu nei ko John Wycliffe ne nofo i Igilani he senetenari ke 14 aki. Talitonu a ia kua lata e tau tagata oti ke maeke ke totou e Tohi Tapu. He moui katoa haana, laulahi he tau tagata i Igilani ne nakai logona e fekau he Tohi Tapu ke he vagahau ha lautolu. Lahi e tauuka he tau Tohi Tapu, ti ko e tau lagaki takitaha ne kua lata ke tohilima ai. Ti tokogahoa e tagata ne fai Tohi Tapu. Laulahi foki he tau tagata he magahala ia ne nakai iloa ke totou. Ko lautolu ne ō he tapu ne liga logona e Tohi Tapu ne totou fakaleolahi ke he vagahau Latin, ka ko e vagahau fakamua atu a ia ne nakai maama he tau tagata fakalaulahi. Eketaha fēfē a Iehova ke moua he tau tagata e Tohi Tapu ke he vagahau ni ha lautolu?​—Tau Fakatai 2:1-5.

11. Ko e heigoa e lauiaaga he Wycliffe Bible?

¹¹ He 1382, ne fakaliliu e John Wycliffe mo e falu e Tohi Tapu ke he vagahau Peritania. Ko e Wycliffe Bible ne talahaua lahi ke he matakau ne iloa ko e tau Lollard. Ne fiafia e tau tagata ia ke he Tohi Tapu. Ō hui a lautolu mai he taha maaga ke he taha maaga i Igilani katoa. Totou he tau Lollard e Tohi Tapu ke he tau tagata ti age ki a lautolu e falu vala he tau lagaki ne tohilima. Ko e gahua ha lautolu ati liu talahaua foki e Tohi Tapu.

12. Fēfē e logonaaga he tau akoako ki a Wycliffe mo e gahua haana?

¹² Ne vihiatia he tau akoako a Wycliffe, Tohi Tapu haana, mo lautolu ne mumui ki a ia. Ne favale a lautolu ke he tau Lollard ti moumou oti e tau Wycliffe Bible ne moua e  lautolu. Pete kua fitā he mate a Wycliffe, ne talahau he tau akoako ko ia ko e fī he Lotu. Ne aku hake e lautolu e tau polohui motua haana ti tugi ai mo e tolo e tau efuefu ke he vailele ko Swift. Ka e manako e tau tagata tokologa ke totou mo e maama e Kupu he Atua ti nakai maeke he Lotu ke taofi e mena nei. He tau teau tau fakamui, ko e tau tagata i Europa mo e falu faahi he lalolagi ne kamata ke fakaliliu mo e lomi e Tohi Tapu ke he tau vagahau ne maeke e tokologa ke maama.

13. Ko e heigoa kua mauokafua a tautolu ki ai? Fakamalolō lahi fēfē he mena nei e tua ha tautolu?

¹³ Mai he agaaga he Atua e Tohi Tapu. Ka e nakai kakano e mena nei ko e gahua ke fakaliliu e Septuagint, Wycliffe Bible, King James Version, po ke ha liliuaga foki kua omoomoi fakahako mai he Atua. Ka kumikumi e tautolu e puhala ne taute e tau fakaliliuaga nei, kua maaliali he tuga ni ne mavehe e Iehova to tumau e Kupu haana. Fakamalolō he mena nei e tua ha tautolu ko e tau mena oti ne toe ne mavehe e Iehova to fakamooli ai.​—Iosua 23:14.

14. Ko e ha e fakaako ha tautolu ke he Tohi Tapu kua fakahokulo e fakaalofa ha tautolu ke he Atua?

¹⁴ Ka fakaako e tautolu e puhala ne puipui e Iehova haana Kupu, to malolō lahi e tua ha tautolu ki a ia mo e to hokulo lahi e fakaalofa ha tautolu ki a ia. * (Kikite matahui tala.) Ko e ha ne tuku mai e Iehova e Tohi Tapu ki a tautolu he magaaho fakamua ti mavehe ke puipui ai? Ha kua fakaalofa a ia ki a tautolu ti manako a ia ke fakaako a tautolu ke he puhala ke aoga ai a tautolu. (Totou Isaia 48:17, 18.) Kua fakalagalaga he mena nei a tautolu ke fakaalofa mo e omaoma ki a ia.​—1 Ioane 4:19; 5:3.

15. Ko e heigoa ka fakatutala a tautolu he vala tala ka mui mai?

¹⁵ Kua fiafia lahi mahaki a tautolu ke he Kupu he Atua, ti maeke fēfē a tautolu ke lahi e mena ka moua mai he totouaga fakatagata ke he Tohi Tapu? Lagomatai fēfē e tautolu a lautolu ne feleveia mo tautolu he gahua fakamatala ke loto fakaaue ke he Tohi Tapu? Kua lata fēfē he tau faiaoga he fakapotopotoaga ke iloa tonu ko e tau mena oti ne fakaako e lautolu kua fakavē ke he Kupu he Atua? To fakatutala a tautolu ke he tau hūhū nei he vala tala ka mui mai.