1. Ko e heigoa ati talitonu a koe kua ha ha he Kupu he Atua e malolō? (Kikite fakatino he kamataaga.)

KUA talitonu e tau tagata ha Iehova ko e kupu, po ke fekau Haana ke he tau tagata “kua moui ia, mo e gahua malolo.” (Heperu 4:12) Kitia e tautolu e malolō he Tohi Tapu he tau momoui ni ha tautolu mo e tau momoui he falu. Ato eke mo Tau Fakamoli, falu ne kaihā, hufia ke he tau tulaki, po ke mahani feuaki. Falu ne talahaua po ke loga e tupe, ka e logona hifo agaia kua fai mena ne galo he tau momoui ha lautolu. (Fakamatalaaga 2:3-11) Fiafia ai, tokologa ia lautolu ne nakai fai amaamanakiaga mo e fakahakuhaku fakamua ka kua fai takitakiaga mo e amaamanakiaga mogonei. He Ko e Kolo Toko, ne totou e tautolu mo e atihake ke he tau mena tutupu he tau fufuta vala tala “Hiki he Tohi Tapu e Tau Momoui.” Ha ko e tau Kerisiano, lata agaia a lautolu ke matutaki ke fakamalolō e fakafetuiaga ha lautolu mo Iehova he lagomatai foki he Tohi Tapu.

2. Lauia fēfē e tau tagata he senetenari fakamua ha ko e malolō he Kupu he Atua?

² Nakai ofo ai ha kua lalahi e tau hikiaga ne taute he tau tagata  tokologa he magaaho ne fakaako e lautolu e kupu mooli. Ko e tau matakainaga ha tautolu he senetenari fakamua ne amaamanaki ke he lagi ne taute e tau hikiaga pihia. (Totou 1 Korinito 6:9-11.) He tutala a Paulo hagaao ki a lautolu ka nakai moua e Kautu he Atua, lafi e ia: “Ne pihia foki e falu ia mutolu.” Ko e Kupu he Atua mo e agaaga tapu haana ne lagomatai e tau tagata ia ke hiki. Pete kua eke a lautolu mo tau Kerisiano, falu ne taute e tau hehē kelea lahi mahaki ne lauia e fakafetuiaga ha lautolu mo Iehova. Ma e fakatai, talahau he Tohi Tapu hagaao ke he taha matakainaga fakauku ne tuku ki tua. Fakamui, ne taute e ia e tau hikiaga ti maeke a ia ke liu mai ke he fakapotopotoaga Kerisiano. (1 Korinito 5:1-5; 2 Korinito 2:5-8) Atihake ai ha kua maeke e tau matakainaga ha tautolu ke taute e tau hikiaga loga ha ko e malolō he Kupu he Atua.

3. Ko e heigoa ka fakatutala a tautolu ki ai he vala tala nei?

³ Kua malolō lahi e Kupu he Atua. Nukua tuku mai ai e Iehova ki a tautolu ti manako mooli a tautolu ke fakaaoga fakamitaki ai. (2 Timoteo 2:15) To fakatutala e vala tala nei ke he puhala ka fakaaoga e tautolu e malolō he Tohi Tapu he (1) tau momoui ha tautolu, (2) gahua he fonua ha tautolu, mo e (3) fakaako a tautolu mai i mua. Ko e mena kua fakaako e tautolu mogonei ka lagomatai ai ke fakakite ha tautolu a fakaalofa mo e fakaaue ke he ha tautolu a Matua he lagi, ko ia ne fakaako a tautolu ke aoga ai a tautolu.​—Isaia 48:17.

4. (a) Ko e heigoa ha tautolu ka taute ke maeke e Kupu he Atua ke lauia a tautolu? (e) Puhala fe kua maeke a koe ke moua e magaaho ke totou e Tohi Tapu haau?

⁴ Ke fakaatā e Kupu he Atua ke lauia a tautolu, lata a tautolu ke totou tumau ai. Lata a tautolu ke lali ke totou ai he tau aho takitaha. (Iosua 1:8) Laulahi ia tautolu ne moui lavelave, ka e nakai lata a tautolu ke fakaatā ha mena, putoia ai e tau matagahua ha tautolu ke taofi e totou he Tohi Tapu. (Totou Efeso 5:15, 16.) Liga moua e tautolu e magaaho he mogo pogipogi, taha mogo he aho, po ke mogo pouli. Talia a tautolu ke he salamo ne tohi: “Kua lahi ni haku a manako ke he hāu a fakatufono; kua manamanatu au ki ai ke he aho oti.”​—Salamo 119:97.

5, 6. (a) Ko e ha kua lata a tautolu ke manamanatu fakahokulo? (e) Lauia mitaki fēfē e manamanatu fakahokulo ha tautolu? (i) Lagomatai fēfē a koe he totou ke he Tohi Tapu mo e manamanatu fakahokulo ki ai?

⁵ Ka e nakai koēnaia he totou e Tohi Tapu. Lata a tautolu ke manamanatu fakahokulo mo e manamanatu fakamitaki ke he mena ne totou e tautolu. (Salamo 1:1-3) Ko e mogo laia ka maeke a tautolu ke fakagahua e pulotu he Tohi Tapu ke he tau momoui ha tautolu. Ti ka totou a tautolu ke he Tohi Tapu ne kua lomi po ke matini hila, manako a tautolu ke fakaatā e Kupu he Atua ke hiki mo e fakamafana tautolu.

⁶ Lauia mitaki fēfē e manamanatu fakahokulo ha tautolu? Ka totou e tautolu e Tohi  Tapu, lata a tautolu ke fakamanou ti hūhū hifo: ‘Ko e heigoa ne tala mai he mena nei ki a au hagaao ki a Iehova? Puhala fe ne fitā au he fakagahua e mena ne totou e au ke he moui haaku? Ko e heigoa e tau hikiaga kua lata agaia au ke taute?’ Ka manamanatu fakahokulo a tautolu ke he Kupu he Atua mo e liogi hagaao ke he mena ne totou e tautolu, to manako a tautolu ke fakagahua ai. Ti maeke a tautolu ke logona hifo e malolō he Tohi Tapu ke he tau momoui ha tautolu.​—2 Korinito 10:4, 5.

7. Fakaaoga fakamitaki fēfē e tautolu e Kupu he Atua ke he gahua he fonua?

⁷ Aoga lahi ke fakaaoga tumau e tautolu e Kupu he Atua he fakamatala mo e fakaako atu. Taha e matakainaga taane ne pehē, “Ka fakamatala a koe he taha fale ke he taha fale mo Iehova, to tutala tumau kia a koe po ke fakaatā e koe a ia ke tutala?” Ka totou a tautolu mai he Tohi Tapu ke he taha tagata, kua fakaatā e tautolu a Iehova ke tutala ki a ia. Ko e kupu Tohi Tapu kua fifili fakamitaki ne mua e malolō ke he ha mena ne liga talahau e tautolu. (1 Tesalonia 2:13) Kaeke ko koe he gahua he fonua, eketaha nakai a koe ke totou mai he Tohi Tapu?

8. Ko e ha kua lata a tautolu ke lahi atu e mena ke taute he nakai ni totou e tau kupu tohi ka fakamatala a tautolu?

⁸ Ka e nakai koēnaia ke totou e kupu Tohi Tapu ki a lautolu ne fakamatala a tautolu ki ai. Laulahi he tau tagata ne nakai maama e kakano he Tohi Tapu. Pihia e mena ne tupu he senetenari fakamua, ti pihia foki mogonei. (Roma 10:2) Nakai lata a tautolu ke tali manatu kua maama he tagata he kaina e kupu tohi ne totou e tautolu. Maeke a tautolu ke lagomatai a ia he fatiaki e tau matapatu kupu po ke tau manatu mai he kupu tohi ti fakamaama e kakano. He puhala nei, maeke e Kupu he Atua ke hokotia ke he tau manamanatuaga mo e tau loto he tau tagata.​—Totou Luka 24:32.

9. Lagomatai fēfē e tautolu e tau tagata ke fakalilifu e Tohi Tapu ha ko e tau mena ne talahau fakamua e tautolu to totou e kupu tohi? Talahau e fakatai.

⁹ Ko e mena kua talahau e tautolu ato totou e kupu tohi ka lagomatai foki e tagata he kaina ke fakalilifu e Tohi Tapu. Ma e fakatai, liga pehē a tautolu, “Kitekite la ke he mena ne talahau he Tufuga ha tautolu hagaao ke he matakupu nei.” Po ke ka tutala a tautolu ke he tagata ne nakai ko e Kerisiano, maeke a tautolu ke pehē, “Mailoga la e mena ne talahau he tau Tohiaga Tapu ki a tautolu.” Ka feleveia a tautolu mo e tagata ne nakai manamanatu ke he lotu, maeke a tautolu ke hūhū, “Kua logona nakai a koe he talahauaga tuai nei?” Ka manatu e tautolu kua igatia e tagata mo e feakiaga mo e taofiaga, to eketaha a tautolu ke lauia mitaki e tau kupu hafagi ha tautolu.​—1 Korinito 9:22, 23.

10. (a) Ko e heigoa ne tupu ke he taha matakainaga taane? (e) Kitia fēfē e koe e malolō he Kupu he Atua ke he gahua he fonua?

¹⁰ Tokologa ne mailoga ko e fakaaoga e Kupu he Atua kua malolō e lauiaaga ke he tau  tagata ne fakamatala a lautolu ki ai. Ma e fakatai, taha e matakainaga taane ne ahiahi atu ke he fuakau taane ne leva tuai e totou he tau mekasini ha tautolu. Taha aho ne nakai age noa ni e Watchtower foou ka e fifili e matakainaga ke totou e kupu tohi. Totou e ia e 2 Korinito 1:3, 4, ne pehē: “Ko e Matua hana e fakaalofa hofihofi, ko e Atua foki hana e tau fakamafanaaga oti, Ko ia kua fakamafana mai a mautolu ke he ha mautolu a tau matematekelea oti.” Ne hokotia e tau kupu nei ke he loto he fuakau taane ti ole a ia ke he matakainaga ke liu totou foki e tau kupu tohi ia. Ti tala age e fuakau taane kua manako lahi a ia mo e hoana haana ke moua e fakamafanaaga. He logona e kupu tohi nei, ne manako a ia ke iloa atu foki e Tohi Tapu. He fakaaoga e tautolu e Kupu he Atua he gahua ke he fonua kua malolō lahi!​—Gahua 19:20.

11. Ko e heigoa e matagahua kua moua he tau matakainaga taane kua fakaako mai i mua?

¹¹ Fiafia a tautolu ke o atu ke he tau feleveiaaga, tau toloaga, mo e tau fonoaga. Ko e kakano uho ne o atu a tautolu ke tapuaki ki a Iehova. Aoga foki ki a tautolu e tau mena ne fakaako e tautolu. Ha ko e kakano nei, ko e tau matakainaga taane ne fakaako mai i mua ne moua e kotofaaga lilifu mo e matagahua lahi mahaki. (Iakopo 3:1) Kua lata a lautolu ke iloa tonu ko e fakaakoaga ha lautolu kua fakavē ke he Kupu he Atua. Ka moua e koe e kotofaaga nei, fakaaoga fēfē e koe e malolō  he Tohi Tapu ke hokotia ke he toloaga haau?

12. Maeke fēfē he tagata lauga ke fakavē e lauga haana ke he Tohi Tapu?

¹² Kua lata e tau Tohiaga Tapu ke eke mo vala uho he tau lauga. (Ioane 7:16) Kia mataala ke he puhala ka lauga a koe mo e tau mena ne tutupu po ke tau fakataiaga ne fakaaoga e koe kua nakai mahomo hake ke he Tohi Tapu. Manatu foki ko e totou mai he Tohi Tapu kua nakai tatai mo e fakaako mai he Tohi Tapu. Kaeke ke loga e kupu Tohi Tapu ka totou e koe, to nakai manatu he tau tagata tokologa. Ti fifili fakamitaki e tau kupu tohi ne manako a koe ke fakaaoga. Fai magaaho mogoia ke totou, fakamaama, fakatai, mo e fakagahua fakamitaki ai. (Nehemia 8:8) Ka fai fakatokaaga e lauga, eketaha ke fakaako e fakatokaaga mo e tau kupu tohi ne tū ai. Lali ke maama e puhala ne matutaki e fakatokaaga he lauga mo e tau kupu tohi. Ti fakaaoga falu kupu tohi nei ke fakaako e tau manatu he fakatokaaga lauga. (Moua e koe e tau manatu mitaki he Benefit From Theocratic Ministry School Education he fakaakoaga 21 ke he 23.) Mua atu e aoga, ole ki a Iehova ke lagomatai a koe ke talahau e tau manatu uho Haana mai he Tohi Tapu.​—Totou Esera 7:10; Tau Fakatai 3:13, 14.

13. (a) Lauia fēfē e taha matakainaga fifine he kupu tohi ne logona e ia he feleveiaaga? (e) Lauia fēfē a koe ke he puhala kua fakaaoga e Tohi Tapu he tau feleveiaaga ha tautolu?

¹³ He mogo ne tama tote e matakainaga fifine i Ausetalia, loga e mena kelea ne tupu  ki a ia ti pete he iloa a Iehova he magaaho fakamui, ne nakaila talitonu katoatoa a ia kua ofania e Iehova a ia. He taha feleveiaaga, logona he matakainaga fifine nei e kupu tohi ne lauia hokulo e logonaaga haana. Manamanatu fakahokulo a ia ki ai ti taute e kumikumiaga ne takitaki a ia ke totou e falu kupu tohi he Tohi Tapu. Ne talitonu a ia kua ofania e Iehova a ia. * (Kikite matahui tala.) Kua logona nakai e koe e kupu tohi he feleveiaaga, toloaga, po ke fonoaga ne lauia pihia a koe?​—Nehemia 8:12.

14. Fakakite fēfē e tautolu kua tokiofa mo e fiafia a tautolu ke he Kupu ha Iehova?

¹⁴ Nakai kia loto fakaaue a tautolu ki a Iehova ma e haana Kupu ko e Tohi Tapu? Mavehe e ia to tumau ai, ti fakamooli a ia ke he maveheaga. (1 Peteru 1:24, 25) Manako a tautolu ke totou tumau e Tohi Tapu, fakagahua ai ke he tau momoui ha tautolu, ti fakaaoga ai ke lagomatai e falu. Ka taute e tautolu e mena nei, fakakite e tautolu kua fiafia mooli mo e loto fakaaue a tautolu ke he koloa uho nei, ka e mua atu ke he Punaaga ko Iehova ko e Atua.