1, 2. (a) Kehe fēfē e puhala ne taute e Iehova e tau tagata mai he puhala ne fehagai e tau tagata malolō lahi mo lautolu? (e) Ko e heigoa ka fakatutala a tautolu ki ai he vala tala nei?

KO E tau tagata malolō lahi ne fa pule ke he falu po ke fakapehia a lautolu. (Mataio 20:25; Fakamatalaaga 8:9) Nakai taute e Iehova e mena ia! Pete ko Ia ne Malolō Ue Atu, ko e Atua mua ue atu he lagi mo e lalolagi katoatoa, kua manamanatu lahi a ia ke he tau tagata nakai mitaki katoatoa. Kua totonu mo e leveki e ia e tau logonaaga mo e tau manako ha tautolu. Manatu e ia kua nakai mitaki katoatoa a tautolu mo e iloa e tau mena ne kūkū a tautolu, ti nakai ole a ia ki a tautolu ke taute e tau mena ne nakai maeke a tautolu.​—Salamo 103:13, 14.

² I loto he Tohi Tapu, fakaako e tautolu e puhala kua manamanatu a Iehova ke he tau tagata haana. Kia fakatutala a tautolu ke he tolu e fakataiaga: Fakamua, puhala ne lagomatai totonu e Iehova e tama ko Samuela ke tala age e fekau he fakafiliaga ke he Ekepoa ne Mua ko Eli. Uaaki, puhala ne  fakauka a Iehova ki a Mose he mogo ne logona hifo e Mose kua nakai maeke a ia ke takitaki e motu ha Isaraela mai i Aikupito. Mo e toluaki, puhala ne manamanatu a Iehova ke he tau Isaraela he o kehe a lautolu mai i Aikupito. Ko e heigoa kua fakaako e tautolu hagaao ki a Iehova mai he tau fakataiaga nei, ti fifitaki fēfē e tautolu a ia?

3. Ko e heigoa e mena matakehe ne tupu ke he tama ko Samuela he taha pō, ti ko e heigoa ka liga hūhū hifo e tautolu? (Kikite fakatino he kamataaga.)

³ Kamata a Samuela ke fekafekau he faituga he mogo ne tote a ia. (1 Samuela 3:1) Taha pō he fano a ia ke mohe, ne fai mena matakehe lahi ne tupu. * (Kikite matahui tala.) (Totou 1 Samuela 3:2-10.) Logona e ia e tagata ne hea e higoa haana. Manatu a Samuela ko e fuakau ko Eli, ko e Ekepoa ne Mua. Omaoma a ia he matike ti poi ki a Eli mo e pehē: “Ko au hanai, ha kua ui mai a koe kia au.” Ka e tala age a Eli ki a ia: “Nakai ui atu au.” He lagaua e tupu e mena taha ia, mailoga e Eli ko e Atua ne hea a Samuela. Ti tala age mogoia e Eli e mena ke talahau e Samuela, ti omaoma a Samuela. Ko e ha ne nakai tala age e Iehova ki a Samuela he kamataaga ko Ia ne hea a Samuela? Nakai talahau he Tohi Tapu. Ka e liga taute pihia ai e Iehova ha kua manamanatu a Ia ke he tau logonaaga ha Samuela.

4, 5. (a) Ko e heigoa ne taute e Samuela he foaki age e Iehova ki a ia e fekau ke tala age ki a Eli? (e) Ko e heigoa kua fakaako e tautolu he tala nei hagaao ki a Iehova?

⁴ Totou 1 Samuela 3:11-18. Ko e Fakatufono ha Iehova ne poaki ke he tau fanau ke fakalilifu e tau tagata momotua, mua atu ki a lautolu ne ha ha ai e pule. (Esoto 22:28; Levitika 19:32) Ti uka ke manamanatu ko e tama tuga a Samuela to fano ki a Eli he mogo pogipogi mo e tala age mauokafua ki a ia e fekau malolō he fakafiliaga he Atua. Tala mai e Tohi Tapu ki a tautolu kua “matakutaku a Samuela ke tala age kia Eli e mena ne fakakite mai.” Ka e tala age fakamaaliali he Atua ki a Eli ko Ia ne hea a Samuela. Ti ko e fua, tala age a Eli ki a Samuela ke nakai fufū ha mena taha ne tala age he Atua ki a ia. Omaoma a Samuela ki a Eli ti “tala age . . . e tau kupu oti kia ia.”

⁵ Ko e fekau nei ne nakai fakaofo mooli. Ha kua fai “tagata he Atua” he mogo fakamua ne tala age e fekau pihia ki a Eli. (1 Samuela 2:27-36) Fakaako he tala nei ki a tautolu e puhala kua manamanatu mo e pulotu a Iehova.

6. Ko e heigoa e tau mena kua fakaako e tautolu mai he puhala ne lagomatai he Atua e tama ko Samuela?

⁶ Ko e tama kia a koe? Ka pihia, ko e tala ke he tama ko Samuela ne fakakite kua maama e Iehova e tau lekua mo e tau logonaaga haau. Liga mā a koe ti uka ke fakamatala ke he tau tagata lalahi po ke kehe mai he tau tagata he atu haau. Maeke a koe ke talitonu kua manako a Iehova ke lagomatai a koe. Liogi ki a ia ti tala age fakatonu e  tau logonaaga haau. (Salamo 62:8) Manamanatu fakahokulo ke he tau fakafifitakiaga ki a lautolu ne ikiiki tuga a Samuela i loto he Tohi Tapu. Tutala ke he tau matakainaga he atu haau po ke momotua hake ne maeke ke kautū mai he tau lekua tuga haau. To tala atu e lautolu ki a koe e tau magaaho ne lagomatai e Iehova a lautolu, liga he tau puhala ne nakai amanaki a lautolu ki ai.

7, 8. Fakakite fēfē e Iehova kua manamanatu lahi mahaki a ia ke he tau logonaaga ha Mose?

⁷ He 80 e tau he moui ha Mose, ne foaki age e Iehova ki a ia e kotofaaga uka lahi: ke fakatokanoa e motu ha Isaraela mai he tupaaga i Aikupito. (Esoto 3:10) Liga ofo a Mose ke he kotofaaga nei ha ko e leveki mamoe a ia i Mitiana ke 40 e tau. Pehē a Mose: “Ko hai kia au nai, kia fano ai au kia Farao, kia uta ai foki e au e fanau Isaraela mai Aikupito?” Fakamafana e Iehova a Mose: “To fakalataha au mo koe.” (Esoto 3:11, 12) Mavehe foki a Iehova ki a ia to “fanogonogo ni” e tau patu ha Isaraela ki a ia. Ka e pehē agaia a Mose: “Kitiala, nakai talia e lautolu au ti nakai fanogonogo a lautolu ke he haku tau kupu.” (Esoto 3:18; 4:1) Pehē a Mose a ia kua liga hepe a Iehova! Ka e fakauka a Iehova ki a Mose. Foaki age foki e ia ki a Mose e malolō ke taute e tau mana. Ko Mose e tagata fakamua kua totoku he Tohi Tapu ne moua e malolō nei.​—Esoto 4:2-9, 21.

⁸ He tutupu e tau mena oti ia, vagahau fakauaua agaia a Mose. Pehē a ia liga nakai mahifi a ia he vagahau. Ti tala age e Atua ki a ia: “Ko au foki to fakalataha au mo e gutu hau, to fakaako foki e au a koe ke he tau kupu ke vagahau ai a koe.” Talitonu mooli nakai a Mose? Nakai, ole a ia ke he Atua ke fakafano e taha tagata foki! Ati ita lahi a Iehova. Ka e manamanatu agaia a Ia ke he tau logonaaga ha Mose, ti fakafano e ia a Arona ke vagahau ma Mose.​—Esoto 4:10-16.

9. Lagomatai fēfē he fakauka mo e totonu ha Iehova a Mose ke eke mo takitaki mitaki?

 ⁹ Ko e heigoa ne fakaako he tala nei ki a tautolu hagaao ki a Iehova? Ha ko Iehova ko e Malolō Ue Atu, maeke a ia ke fakaaoga e malolō haana ke fakamatakutaku a Mose ke omaoma ki a Ia. Ka e fakauka mo e totonu a Iehova, ti fakamafana e ia e fekafekau mahani fakatokolalo haana to fakalataha a ia mo Mose. Gahua nakai e puhala nei? Ē! Ne eke a Mose mo takitaki ne mua he tau tagata he Atua. Lali a ia ke mahani molū mo e manamanatu ke he falu, tuga ni ne taute e Iehova ki a ia.​—Numera 12:3.

10. Aoga fēfē a tautolu ka manamanatu ai ke he falu tuga ne taute e Iehova?

¹⁰ Ko e heigoa ne fakaako mai e tautolu he tau mena ia mogonei? Kaeke ko koe ko e taane, matua, po ke motua, ha ha ia koe e pule ke he falu. Ma e kakano nei, kua aoga lahi ke fifitaki e koe a Iehova he manamanatu, totonu, mo e fakauka ke he haau a hoana, tau fanau, mo lautolu he fakapotopotoaga. (Kolose 3:19-21; 1 Peteru 5:1-3) Ka fifitaki e koe a Iehova ko e Atua mo Iesu Keriso, ko Mose ne Mua Atu, to fakamukamuka e koe ma e falu ke o mai ke tutala ki a koe, mo e to eke a koe mo fakamafana ki a lautolu. (Mataio 11:28, 29) To eke foki a koe mo fakafifitakiaga mitaki ma lautolu.​—Heperu 13:7.

11, 12. Taute fēfē e Iehova e tau Isaraela ke logona hifo e puipuiaga mo e haohao mitaki he o kehe a lautolu i Aikupito?

¹¹ Liga molea e tolu miliona he tau Isaraela ne o kehe i Aikupito he tau 1513 ato fai Keriso. He matakau ia ko e tau fanau, lautolu ne momotua, mo e falu ne liga gagao po ke kulikuli. Ko e matakau lahi mahaki he tau tagata ne lata ma e Takitaki manamanatu mo e maama. Ti pihia tonu a Iehova he puhala ia Mose. Ko e fua, ne logona hifo he tau Isaraela e haohao mitaki he toka hifo e tau kaina ha lautolu.​—Salamo 78:52, 53.

¹² Taute fēfē e Iehova e tau tagata haana ke logona hifo e puipuiaga mo e haohao mitaki? Fakatokatoka e ia e motu ha Isaraela he “fakavahega” he mogo ne toka e lautolu a Aikupito. (Esoto 13:18) Ha kua fakatokatoka a lautolu he puhala nei, maeke a lautolu ke kitia maali ko e Atua ha lautolu ne takitaki e tuaga. Foaki foki e Iehova ki a lautolu e “aolagi ke he aho” mo e “maama he afi” he pō ke fakamanatu ki a lautolu ko ia kua fakalataha, takitaki mo e puipui ki a lautolu. (Salamo 78:14) Lata e motu ha Isaraela  ke moua e fakamafanaaga ia ha ko e taha mena foki ka tupu.

13, 14. (a) Puhala fe ne leveki e Iehova e tau Isaraela he Tahi Kula? (e) Fakakite fēfē e Iehova kua mua atu e lahi he malolō haana ke he tau Aikupito?

¹³ Totou Esoto 14:19-22. Manamanatu ko koe i ai mo e tau Isaraela. Kua apitia a koe. Ti ko e kau Aikupito i tua haau, mo e Tahi Kula i mua haau. Ti taute he Atua e taha mena. Ko e aolagi fakatupou ne fa mahani ke haia i mua haau kua holo ki tua he heaga api ke he vahāloto haau mo e tau Aikupito. Kua pouli a lautolu mogonei ka e maama katoatoa e heaga api haau! Ti kitia mogoia e koe a Mose ne fakaolo e lima haana ke he tahi ti agi mai e matagi malolō he faahi uta ne hafagi fakalahi e hala ke he taha faahi. Ko koe, magafaoa haau, mo e tau manu haau ne ō hui mo e tau tagata oti ne toe he kelekele mōmō he puhala fakatokatoka. Ofoofogia a koe kua nakai pelapela mo e hekeheke e hala. Kua mōmō mo e maō ti mukamuka ke ō hui ai. Ko e fua, ko lautolu foki ne fakatuai kua maeke ke hohoko haohao mitaki ke he taha faahi.

¹⁴ Totou Esoto 14:23, 26-30. Hane tutupu e tau mena nei, ko Farao ne fakatokoluga mo e goagoa kua kamata ke tutuli a koe mo e tau matakainaga Isaraela haau. Liu mogoia a Mose fakaolo atu e lima haana ke he tahi mo e liu mai e tahi ke he haana tokaaga. Ne ufitia he tahi a Farao mo e haana kau. Nakai fai ia lautolu ne momoui!​—Esoto 15:8-10.

15. Fakaako fēfē he tala nei a koe hagaao ki a Iehova?

¹⁵ Ko e tala nei kua fakaako ki a tautolu e  taha mena foki hagaao ki a Iehova. Ko ia ko e Atua maopoopo, ti lagomatai he mahani nei a tautolu ke logona hifo e puipuiaga mo e haohao mitaki. (1 Korinito 14:33) Tuga e leveki mamoe ne ofania mo e leveki haana tau mamoe, kua leveki e Iehova e tau tagata haana he puhala lagomatai. Ne puipui tumau e ia a lautolu mai he tau fī ha lautolu. Atihake mo e fakamafana mooli he mena nei a tautolu he tata lahi atu a tautolu ke he moumouaga he fakatokaaga nei.​—Tau Fakatai 1:33.

16. Aoga fēfē a tautolu mai he liu fakatutala ke he puhala ne fakahao e Iehova e tau Isaraela?

¹⁶ He vahā nei, leveki agaia e Iehova e matakau he tau tagata haana. Lagomatai e ia a lautolu ke tumau e fakafetuiaga mitaki mo ia mo e puipui a lautolu mai he tau fī ha lautolu. Mo e to tumau a ia ke taute e mena nei he magaaho he matematekelea lahi hane tata lahi mai. (Fakakiteaga 7:9, 10) He fuata po ke fuakau, tino malolō po ke kulikuli, to nakai tupetupe po ke matakutaku e tau tagata he Atua he magaaho he matematekelea lahi. * (Kikite matahui tala.) To kehe lahi e mena ka taute e lautolu! Manatu e lautolu e tau kupu ha Iesu: “Kia kitekite hake mo e haga hake a mutolu; ha kua tata tuai ha mutolu a fakamouiaga.” (Luka 21:28) Pete kua totoko e Koku a lautolu, ko e matakau he tau motu kua malolō atu ia Farao, mauokafua e tau tagata he Atua to puipui e Iehova a lautolu. (Esekielu 38:2, 14-16) Ko e ha? Ha kua iloa e lautolu kua nakai hiki a Iehova. To liu a ia ke fakamooli ko ia e Fakamoui kua fakaalofa mo e leveki he tau tagata haana.​—Isaia 26:3, 20.

17. (a) Aoga fēfē ki a tautolu ka fakaako e tau tala Tohi Tapu hagaao ke he puhala ne leveki e Iehova e tau tagata haana? (e) Ko e heigoa ka fakatutala a tautolu he vala tala ka mui mai?

¹⁷ He vala tala nei, kitia e tautolu e falu fakataiaga he puhala kua manamanatu mo e totonu a Iehova he leveki, takitaki, mo e fakamoui e ia e tau tagata haana. He manamanatu fakahokulo a koe ke he tau tala pihia, eketaha ke fakaako e taha mena foou hagaao ki a Iehova he kumi e tau vala tala ne nakaila mailoga e koe fakamua. He fakaako fakalahi a koe ke he tau mahani mitaki ha Iehova, to malolō lahi e fakaalofa mo e tua haau ki a ia. He vala tala ka mui mai, to fakaako a tautolu ke he tau puhala ka fifitaki e tautolu a Iehova he manamanatu ki a lautolu he ha tautolu a magafaoa, fakapotopotoaga, mo e gahua fakamatala.