KAEKE ke manako a koe ke iloa e magaaho, ko e heigoa haau ka taute? Liga ono a koe ke he uasi po ke tulā haau. Liga kitia e koe kua taha e tulā mo e 30 e minuti he pale laā. Ko e heigoa ka tala age e koe ke he kapitiga ka hūhū a ia ki a koe, “Kua tā e matahola fiha?”

Fakavē ni ke he matakavi ne nofo ai a koe. Ma e fakatai, liga pehē a koe “Kua 1:30” po ke “13:30.” He falu matakavi liga pehē foki a koe, “Kua hafa ke tā e ua,” kakano 30 e minuti to tā e matahola ua.

Talahau fēfē he tau tagata he vahā Tohi Tapu e magaaho? Loga foki e puhala ha lautolu. Fakaaoga he tau Tohiaga Tapu Heperu e tau talahauaga tuga e “magaaho pogipogi,” “tupou lā,” mo e “magaaho afiafi.” (Kenese 8:11; 19:27; 43:16; Teutaronome 28:29; 1 Tau Patuiki 18:26) Ka e falu mogo kua fakaaoga he Tohi Tapu e tau kupu ne felauaki tonu.

I Isaraela i tuai, fa mahani ke ha ha i ai e tau tagata toko, mua atu ke he pō. Ne vevehe tolu he tau Isaraela e pō ti fakahigoa ai ko e “leoleoaga.” (Salamo 63:6) He Tau Fakafili 7:19, totou e tautolu ko e “leoleoaga tuloto he tau veveheaga he po.” He mogo ne fanau a Iesu ne vevehe he tau Iutaia e pō ke he fā e leoleoaga, tuga ne taute he tau Heleni mo e tau Roma.

Ko e tau Evagelia ne lagaloga e talahau e tau leoleoaga nei he pō. Ma e fakatai, ko e “leoleoaga fa he po,” ne fano a Iesu i luga he kili vai ke he foulua ne ha ha ai e tau tutaki haana. (Mataio 14:25) Ti talahau e Iesu e fakatai: “Ane iloa he patu he fale po ke magapo fe ke hau ai e kaiha, po kua leveki ne ia, ka e nakai toka e ia hana fale kia keli ki ai.”​—Mataio 24:43.

Talahau e Iesu e tau leoleoaga oti ne fā he mogo ne tala age a ia ke he tau tutaki haana ke mataala ha kua “nakai iloa e [lautolu] po ke hau a fe e Iki he fale, po ke magaaho afiafi, po ke magaaho tulotopo, po ke magaaho ke ko ai e tau moa, po ke magaaho pogipogi.” (Mareko 13:35) Ko e leoleoaga fakamua, ko e “magaaho afiafi,” mai he tōaga laā ato hoko e matahola hiva he afiafi. Ko e leoleoaga ke uaaki, ko e “magaaho tulotopo” mai he matahola hiva he afiafi ato hoko e tulotopō. Ko e leoleoaga ke toluaki, ko e “magaaho ke ko ai e tau moa,” mai he tulotopō ke he matahola tolu he magaaho pogipogi. Liga ko e leoleoaga nei ne kō e moa he pō ne tapaki a Iesu. (Mareko 14:72) Ko e leoleoaga ke fāaki, ko e “magaaho pogipogi” mai he matahola tolu he pogipogi ke he hakeaga laā.

Ti pete kua nakai fai uasi e tau tagata he magahala ia tuga he vahā nei, ha ha ia lautolu e puhala ke talahau e magaaho.