1. Ko e heigoa e tuaga he aposetolo ko Ioane he matahiku he senetenari fakamua V.N.?

KE HE matahiku he senetenari fakamua V.N., ko e aposetolo ko Ioane kua lauia he tuaga uka lahi. Fuakau a ia, ti kua nofo he motu ko Patamo, mo e liga ko ia ni e aposetolo ne moui. (Fakakite. 1:9) Iloa e ia ko e tau tagata totoko ne fakahehē e tau fakapotopotoaga mo e fakatupu e feveheaki. Tuga to nakai leva ti galo e tuaga faka-Kerisiano mooli.​—Iuta 4; Fakakite. 2:15, 20; 3:1, 17.

2. Hagaao ke he Fakakiteaga 7:9-14, ko e heigoa e fakakiteaga fakaperofeta ofoofogia ne kitia e Ioane? (Kikite fakatino he kili.)

² He tau tutūaga vihi nei, moua e Ioane e fakakiteaga fakaperofeta ofoofogia. Ha ha i ai he fakakiteaga e tau agelu ne kua tala age ke taofi e tau matagi moumou he matematekelea lahi ato fakamau fakamailoga e matakau he tau fekafekau. (Fakakite. 7:1-3) Ko e matakau ia ne 144,000 ka pule fakalataha mo Iesu he lagi. (Luka 12:32; Fakakite. 7:4) Ati totoku e Ioane e taha matakau foki ne lahi mahaki, ti pehē a ia: “Kitiala”​—ko e kupu ne liga fakakite e ofomate haana he kitia taha mena ne nakaila pihia fakamua. Ko e heigoa ne kitia e Ioane? “Ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe, kua tutu mai a lautolu ki mua he nofoaiki, ki mua foki he Punua mamoe.” (Totou Fakakiteaga 7:9-14.) Manamanatu ke he fiafia ha Ioane he iloa hagaao ke he tokologa mo e tokologa he tau tagata kua tapuaki mooli he vahā i mua!

3. (a) Ko e ha kua lata e fakakiteaga ha Ioane ke fakamalolō e tua ha tautolu? (e) Ko e heigoa ka fakaako e tautolu he vala tala nei?

 ³ Ko e fakakiteaga ia kua fakamalolō mooli e tua ha Ioane. To lahi atu e fakamalolō he tua ha tautolu ha kua nonofo a tautolu he magaaho kua fakamooli e fakakiteaga! Kitia e tautolu e fakapotopoto he tau miliona ne amaamanaki ke hao he matematekelea lahi mo e momoui tukulagi he lalolagi. He vala tala nei, to fakaako a tautolu ke he puhala kua fakakite e Iehova e fakamailoga he moto tagata tokologa ia kua molea e valugofulu e tau tau. To fakatutala foki a tautolu ke he ua e vala he moto tagata ia: (1) ko e lahi mo e (2) ko e kehekehe. Ko e tau manatu nei kua lata ke fakamalolō e tua ha lautolu oti kua moua e amaamanakiaga ia.

4. Ko e heigoa e kupu mooli he Tohi Tapu ne nakai maama he Kerisitenitome, ti kehe fēfē e Tau Tagata Fakaako Tohi Tapu ke he mena nei?

⁴ Nakai fakaako he Kerisitenitome e kupu mooli he Tohi Tapu, ko e taha aho to momoui tukulagi e tau tagata omaoma he lalolagi. (2 Kori. 4:3, 4) Mogonei, laulahi he tau lotu he Kerisitenitome kua fakaako ko e tau tagata mitaki oti to o hake ke he lagi ka mamate a lautolu. Ka e kehe he matakau tote he Tau Tagata Fakaako Tohi Tapu ne lomi e Watch Tower he matahiku he tau atu tau 1800. Maama e lautolu to liuaki mai he Atua e Parataiso ke he lalolagi ti totou miliona e tau tagata omaoma ka momoui he lalolagi nei, ka e nakai he lagi. Ti kua fai magaaho to maama mitaki ai e lautolu ko hai e tau tagata omaoma nei.​—Mata. 6:10.

5. Ko e heigoa ne talitonu e Tau Tagata Fakaako Tohi Tapu hagaao ke he 144,000?

⁵ Mooli, ko e Tau Tagata Fakaako Tohi Tapu foki ne maama e Tau Tohiaga Tapu to fai ka “fakafua mai he lalolagi” ke pule fakalataha mo Iesu he lagi. (Fakakite. 14:3) Ko e matakau ia ne 144,000 ko e tau Kerisiano fakamakutu mo e tukulele ne fekafekau fakamooli ke he Atua he nonofo he lalolagi. Ka e kua e moto tagata tokologa?

6. Ko e heigoa ne talitonu e Tau Tagata Fakaako Tohi Tapu hagaao ke he moto tagata tokologa?

⁶ He fakakiteaga ha Ioane, kitia e ia e matakau “kua tutu mai a lautolu ki mua he nofoaiki, ki mua foki he Punua mamoe.” (Fakakite. 7:9) Ko e tau kupu ia ne takitaki e Tau Tagata Fakaako Tohi Tapu ke talahau, ko e moto tagata tokologa kua tuga e 144,000 ka nonofo he lagi. Kaeke ko e 144,000 mo e moto tagata tokologa kua lata ke nonofo he lagi, to kehe fēfē e tau matakau ua ia? Ko e Tau Tagata Fakaako Tohi Tapu ne manatu ko e moto tagata tokologa kua lata ke eke mo tau Kerisiano ne nakai omaoma katoa ke he Atua he nonofo he lalolagi. Pete he momoui ke he puhala he Tohi Tapu, falu ia lautolu ne liga matutaki agaia he tau lotu Kerisitenitome. Ko e Tau Tagata Fakaako Tohi Tapu ne talahau ko lautolu ia ne fai fakaalofa ke he Atua ka e nakai lahi e fakaalofa ke pule fakalataha mo Iesu. Ha kua nakai malolō lahi e fakaalofa ha lautolu ma e Atua, to lata ni e moto tagata tokologa ke haia he lagi ki mua he nofoaiki ka e nakai nonofo he tau nofoaiki.

7. Hagaao ke he Tau Tagata Fakaako Tohi Tapu, ko hai ka momoui he lalolagi he magaaho he Taha e Afe Tau, ti ko e heigoa ne talitonu e Tau Tagata Fakaako Tohi Tapu hagaao ke he tau tagata taane fakamooli i tuai?

⁷ Ko hai mogoia ka momoui he lalolagi? Talitonu e Tau Tagata Fakaako Tohi Tapu ka mole e fakapotopoto he 144,000 mo e moto tagata tokologa ke he lagi, totou miliona ka moua e moui ke he lalolagi he Pule Afe Tau he Keriso. Ko e Tau Tagata Fakaako Tohi Tapu ne nakai amanaki ke he tau tagata miliona ia ke fekafekau ki a Iehova fakamua ato kamata e Pule he Keriso. Ka kua manatu ai ko e matakau ia to  fakaako ke he tau puhala ha Iehova he magaaho he Taha e Afe Tau. Ka mole ia, ko lautolu kua momoui fakatatau ke he tau tuaga ha Iehova to fakamonuina aki e moui tukulagi he lalolagi, ka ko lautolu ne totoko to fakaotioti a lautolu. Ko e Tau Tagata Fakaako Tohi Tapu ne manatu foki liga falu ka fekafekau ko e “tau iki” he lalolagi he magaaho ia, putoia ai e tau tagata taane fakamooli ne mamate ato fai Keriso ka palepale ke he moui he lagi he matahiku he Taha e Afe Tau.​—Sala. 45:16.

8. Ko e heigoa e tau matakau tolu ne liga fai fakatokaaga he finagalo he Atua?

⁸ Logona hifo he Tau Tagata Fakaako Tohi Tapu ko e tolu la e matakau: (1) ko e 144,000 ka pule fakalataha mo Iesu he lagi; (2) ko e moto tagata tokologa he tau Kerisiano ne tote e fakamakutu ka tutū ki mua he nofoaiki ha Iesu he lagi; mo e (3) totou miliona e tau tagata ka fakaako ke he tau puhala ha Iehova he lalolagi ke he magaaho he Pule Afe Tau he Keriso. * He magaaho ni ha Iehova, kamata ai ke maama mitaki e matakupu nei.​—Fakatai 4:18.

9. (a) He puhala fe ka tutū e moto tagata tokologa he lalolagi “ki mua he nofoaiki, ki mua foki he Punua mamoe”? (e) Ko e ha ne fai kakano e maamaaga nei he Fakakiteaga 7:9?

⁹ He 1935 kua iloa mitaki ai e moto tagata tokologa he fakakiteaga ha Ioane. Mailoga he Tau Fakamoli a Iehova ko e moto tagata tokologa kua nakai o hake mooli ke he lagi ke tutū “ki mua he nofoaiki, ki mua foki he Punua mamoe.” Ka ko e tuaga ha lautolu ko e mena fakatai. Pete kua nonofo e moto tagata tokologa he lalolagi, kua tutū a lautolu “ki mua he nofoaiki” he mailoga e pule ha Iehova mo e omaoma ke he pule katoatoa haana. (Isaia 66:1) Maeke a lautolu ke tutū “ki mua foki he Punua mamoe” he fakagahuahua e tua ke he poa lukutoto ha Iesu. Pihia foki ia Mataio 25:31, 32, ko e “tau motu oti kana” ne putoia foki a lautolu ne mahani kelea, ka “fakapotopoto ki mua” ha Iesu he nofoaiki homo ue atu haana. Maaliali ai, nakai haia e tau motu oti nei he lagi, ka e haia he lalolagi. Ko e hiki he maamaaga nei kua fai kakano. Fakamaama ai e kakano ne nakai talahau he Tohi Tapu kua ta hake e moto tagata tokologa ke he lagi. Taha ni e matakau ne mavehe ki ai e moui tukulagi he lagi​—ko e 144,000, “kua eke foki . . . mo tau patuiki ke he lalolagi,” fakalataha mo Iesu.​—Fakakite. 5:10.

10. Ko e ha kua lata e moto tagata tokologa ke fakaako e tau puhala ha Iehova fakamua to hoko e Taha e Afe Tau?

¹⁰ Tali mai he 1935, kua maama he Tau Fakamoli a Iehova ko e moto tagata tokologa he fakakiteaga ha Ioane ko e matakau he tau Kerisiano fakamooli ne amaamanaki ke momoui tukulagi he lalolagi. Ke hao he matematekelea lahi, kua lata e moto tagata tokologa ke fakaako ke he tau puhala ha Iehova fakamua to kamata e Taha e Afe Tau. Lata ke fakakite e lautolu e tua malolō kua “aoga ke hao mai ke he tau mena oti ia ka hohoko mai” ato hoko e Taha e Afe Tau he Pule he Keriso.​—Luka 21:34-36.

11. Ko e ha kua liga manamanatu e falu Tagata Fakaako Tohi Tapu to fai ka o hake ke he lagi he mole e Taha e Afe Tau?

¹¹ Ka e kua e onoonoaga to o hake ke he lagi e falu ia lautolu ne mahani fakamooli he lalolagi ka mole e Taha e Afe Tau? Ko e manatu ia kua talahau he tau tau kua mole he fufuta he The Watch Tower ia Fepuari 15, 1913. Fai ka pehē, ‘Ko e ha e tau tagata fakamooli i tuai kua moua e tufaaga he lalolagi ka e moua he tau Kerisiano ne tote e fakamooli e moui ke he lagi?’ Ko e manamanatuaga ia kua fakaohooho he ua e manatu nakai hako: (1) ko e moto tagata tokologa to nonofo ke he lagi mo e  (2) ko e moto tagata tokologa ko e tau Kerisiano ne tote e fakamakutu.

12-13. Ko e heigoa kua mailoga e lautolu ne fakauku mo e moto tagata tokologa hagaao ke he palepale ha lautolu?

¹² Kitia e tautolu tali mai he 1935, kua maama mitaki he Tau Fakamoli a Iehova ko lautolu ka hao mai i Amaketo ko e moto tagata tokologa he fakakiteaga ha Ioane. To o mai a lautolu he “matematekelea lahi” he lalolagi nei, mo e to tumau ke “tauui foki a lautolu mo e leo lahi, kua pehe atu, Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe.” (Fakakite. 7:10, 14) Lafi ki ai, fakaako he Tau Tohiaga Tapu ko lautolu kua fakaliu tū hake ke he moui he lagi kua moua e “taha mena kua mua he mitaki” ka e nakai pihia e tau tagata taane fakamooli i tuai. (Hepe. 11:40) Ko e tau matakainaga ha tautolu kua kamata ke uiina fakamakutu e tau tagata ke fekafekau ki a Iehova mo e amaamanakiaga ke momoui tukulagi he lalolagi.

¹³ Ko lautolu he moto tagata tokologa kua fiafia ke he amaamanakiaga ha lautolu. Maama e lautolu ko Iehova ka fifili e matakavi ka fekafekau e tau tagata tapuaki fakamooli haana ki a ia, he lagi po ke lalolagi. Ko lautolu ne fakauku mo e moto tagata tokologa kua mailoga ko e palepale ha lautolu kua maeke ni ha ko e fakaalofa noa ha Iehova ne fakakite, puhala he poa lukutoto ha Iesu Keriso.​—Roma 3:24.

14. He mole e 1935, ko e ha ne tokologa kua manamanatu ke he puhala ka fakamooli e perofetaaga he moto tagata tokologa?

¹⁴ He mole e hiki e maamaaga he tau tagata ha Iehova he 1935, tokologa agaia ne manamanatu to maeke fēfē a lautolu kua amaamanaki ke momoui he lalolagi ke tokologa lahi. Ma e fakatai, ko Ronald Parkin ne 12 e tau he moui he magaaho ne maama mitaki e kitiaaga he moto tagata tokologa. “Ko e mogoia,” he manatu e ia, “kavi ke he 56,000 he tau tagata fakailoa he lalolagi katoa mo e laulahi ia lautolu ne fakauku. Ti tuga kua nakai lahi e moto tagata tokologa.”

15. Matutaki fēfē e fakapotopoto he moto tagata tokologa ke holo ki mua?

¹⁵ Ka e he tau hogofulu tau fakamui, ne fakafano atu e tau misionare ke he tau motu loga ti tupu lahi e numera he Tau Fakamoli a Iehova. He 1968 mogoia, ko e fakaholoaga fakaako Tohi Tapu ne kamata ke fakaaoga e tohi The Truth That Leads to Eternal Life. Ko e fakamaamaaga mukamuka ke he kupu mooli he Tohi Tapu kua futia e tau tagata loto molū ne nakaila pihia fakamua. He fā e tau, molea e hafa e miliona he tau tutaki foou ne papatiso.  He kamata e Lotu Katolika ke tote e pule ki Latin America mo e falu motu ti hafagi e tau pāaga he gahua ha tautolu he Faahi Uta ha Europa mo e falu vala ha Aferika, totou miliona ne papatiso. (Isaia 60:22) He tau tau e kua mole, ne taute he fakatokatokaaga ha Iehova e loga he falu puhala lauia mitaki ke lagomatai e tau tagata ke iloa e tau mena ne fakaako he Tohi Tapu. Nakai fakauaua ai ko e moto tagata tokologa he mogonei kua molea e valu e miliona ne kua fakapotopoto.

16. Fakapotopoto mai i fe e moto tagata tokologa?

¹⁶ He fakamau e Ioane e fakakiteaga, ne pehē a ia ko e moto tagata tokologa kua “mai he tau motu oti, mo e tau faoa, mo e tau tagata kehekehe, mo e tau vagahau kehekehe.” Kua talahau tuai he perofeta ko Sakaria e taha mena pihia. Ne tohi e ia: “Ko e tau aho ia to toto atu ai he tau tagata tokohogofulu he tau vagahau oti he tau motu kehe; to toto atu ai e lautolu e kala tapulu he tagata Iuta mo e pehe atu, To o a tautolu mo mutolu; ha kua logona e mautolu ha ha ia mutolu e Atua.”​—Saka. 8:23.

17. Ko e heigoa kua taute ke lagomatai e tau tagata he tau motu mo e tau vagahau oti kana?

¹⁷ Mailoga he Tau Fakamoli a Iehova ke maeke e tau tagata he tau vagahau kehekehe ke fakapotopoto, kua lata e tala mitaki ke fakamatala  ke he tau vagahau loga. Kua fakaliliu e tautolu e tau vala tala fakaako Tohi Tapu ke molea 130 e tau, ka ko e mogonei kua lahi mahaki e gahua fakaliliu hane taute e tautolu ke he loga e tau vagahau. Maaliali ai, kua taute e Iehova e taha mena ofoofogia he vahā nei he fakapotopoto e moto tagata tokologa mai he tau motu oti. Ha kua loga lahi e tau mena kai fakaagaaga kua moua ke he tau vagahau loga, ko e matakau nei ne putoia e tau tagata kehekehe kua kaufakalataha he tapuakiaga. Ti iloa lahi e tau tagata ha Iehova ha ko e ha lautolu a fakamatala fakamakutu mo e fakaalofa fakamatakainaga. Ko e mena ke atihake mooli e tua!​—Mata. 24:14; Ioane 13:35.

18. (a) Lagotatai mo e Isaia 46:10, 11, ko e ha ne nakai ofo a tautolu kua fakamooli e Iehova e perofetaaga hagaao ke he moto tagata tokologa? (e) Ko e ha a lautolu ne amaamanaki ke momoui he lalolagi kua nakai logona hifo kua tiaki a lautolu?

¹⁸ Ha ha ia tautolu e tau kakano ke fiafia ke he perofetaaga he moto tagata tokologa! Nakai ofo a tautolu kua fakamooli e Iehova e perofetaaga ia he puhala mua ue atu. (Totou Isaia 46:10, 11.) Ko lautolu he moto tagata tokologa kua fakaaue ke he amaamanakiaga ne tuku age e Iehova ki a lautolu. Nakai logona hifo e lautolu kua tiaki a lautolu ha kua nakai fakauku he agaaga he Atua ke fekafekau fakalataha mo Iesu ke he lagi. He Tau Tohiaga Tapu, totou e tautolu hagaao ke he tau tagata taane mo e tau fifine ne tua kua takitaki he agaaga tapu; ka e nakai ko lautolu he 144,000. Ko Ioane ko e Papatiso e taha fakataiaga. (Mata. 11:11) Ko Tavita foki taha. (Gahua 2:34) Ko laua mo e tokologa atu foki ka fakaliu tū mai ke he moui he lalolagi parataiso. Ko lautolu oti, fakalataha mo e moto tagata tokologa ka moua e magaaho ke fakakite e fakamooli ha lautolu ki a Iehova mo e haana pule katoatoa.

19. Fakamaama fēfē he fakamooliaga he fakakiteaga ha Ioane ke he moto tagata tokologa e mafiti he tau magaaho kua nonofo ai a tautolu?

¹⁹ Ko e magaaho fakamua anei kua fakapotopoto he Atua e tau miliona tagata mai he tau motu oti kana. He amaamanaki a tautolu ke momoui he lagi po ke lalolagi, lata a tautolu ke lagomatai e laulahi ke fai vala he moto tagata tokologa he ‘tau mamoe kehe.’ (Ioane 10:16) Nakai leva to fakahoko e Iehova e matematekelea lahi ne talahau tuai ke moumou e tau fakatufono mo e tau lotu ne fakamamahi e tau tagata. Ko e lilifu lahi kua fakatoka i mua he tau tagata oti he moto tagata tokologa ke fekafekau tukulagi ki a Iehova he lalolagi!​—Fakakite. 7:14.