VALA TALA FAKAAKO 38
‘Kia O Mai kia Au, Ko Au Foki ke Okioki Ai a Mutolu’
“Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu.”—MATA. 11:28.
LOLOGO 25 Fakamooliaga he Tutaki
FAKAMAAMAAGA KŪ *
1. Ia Mataio 11:28-30, ko e heigoa e maveheaga ne taute e Iesu?
KUA taute e Iesu e maveheaga homo ue atu ke he moto tagata ne fanogonogo ki a ia. “Kia o mai a mutolu kia au,” he ui e ia, “ko au foki ke okioki ai a mutolu.” (Totou Mataio 11:28-30.) Nakai ko e maveheaga teao anei. Ma e fakatai, manamanatu ke he mena ne taute e ia ma e fifine ne matematekelea lahi he gagao.
2. Ko e heigoa ne taute e Iesu ma e fifine ne gagao?
2 Ne manako lahi e fifine ke he lagomatai. Fitā he fano a ia ke he loga e ekekafo mo e amanaki ke moua e fakamauluaga. He mole 12 e tau he matematekelea, ne nakaila maulu a ia. Hagaao ke he Fakatufono, kua kelea a ia. (Levi. 15:25) Ne logona e ia na maeke a Iesu ke fakamaulu a lautolu ne matematekelea, ti fina atu a ia ke kumi a Iesu. He mogo ne moua e ia a Iesu, ne aamo e ia e kala tapulu ha Iesu ti maulu agataha a ia! Nakai ni fakamaulu e Iesu e tino he fifine, ka e liu foaki age ki a ia e logonaaga fakaalofa mo e fakalilifu. Ma e fakatai, he tutala a ia ke he fifine, fakaaoga e ia e tau kupu mafanatia mo e fakalilifu “haku tama fifine.” Logona mooli he fifine nei e okiokiaga mo e liu moua e malolō!—Luka 8:43-48.
3. Ko e heigoa e tau hūhū ka tali e tautolu?
3 Mailoga ko e fifine ne fina atu ki a Iesu. Ti ko e fifine ne fakamakamaka. Pihia foki he vahā nei, kua lata a tautolu ke lali fakalahi ke “o mai” ki a Iesu. He vahā ha tautolu, to nakai fakamaulu e Iesu e tau gagao fakatino ha lautolu kua “o mai” ki a ia. Ka e foaki atu agaia e ia e uiina: “Kia o mai a mutolu kia au, . . . ko au foki ke okioki ai a mutolu.” He vala tala nei, to tali e tautolu lima e hūhū: Maeke fēfē a tautolu ke “o mai” ki a Iesu? Ko e
heigoa e kakano ha Iesu he pehē a ia: “Kia hahamo e mutolu e lakau hahamo haku”? Ko e heigoa ka fakaako e tautolu mai ia Iesu? Ko e ha e gahua ne tuku mai e ia ki a tautolu kua okioki, po ke atihake? Ti matutaki fēfē a tautolu ke moua e okiokiaga i lalo he lakau hahamo ha Iesu?“KIA O MAI A MUTOLU KIA AU”
4-5. Ko e heigoa e falu puhala ka “o mai” a tautolu ki a Iesu?
4 Taha puhala ke “o mai” ki a Iesu ko e fakaako fakalahi hagaao ke he tau mena ne talahau mo e taute e ia. (Luka 1:1-4) Nakai fai tagata ke taute e mena nei ma tautolu, ka ko tautolu ni kua lata ke fakaako ke he tau fakamauaga nei. “O mai” foki a tautolu ki a Iesu he taute e fifiliaga ke papatiso ti eke mo tutaki he Keriso.
5 Taha puhala ke “o mai” ki a Iesu ko e ō ke he tau motua he fakapotopotoaga ka manako lagomatai a tautolu. Fakaaoga e Iesu e “tau mena fakaalofa ke he tau tagata” nei ke leveki e tau mamoe haana. (Efeso 4:7, 8, 11; Ioane 21:16; 1 Pete. 5:1-3) Lata a tautolu ke fakamakamaka ke ole ma e lagomatai ha lautolu. Nakai amanaki a tautolu ke he tau motua ke iloa e tau mena ne manamanatu mo e tau mena ne lata mo tautolu. Manamanatu ke he matakainaga taane ko Julian ne pehē: “Toka e au e kotofaaga haaku he Peteli ha ko e malolō tino, ti taha he tau kapitiga haaku ne fakamafana ki a au ke ole ke ahiahi leveki mai e tau motua. Fakamua, manamanatu au kua nakai lata. Ka e fakamui ne ole lagomatai au, ti eke e ahiahi leveki ia mo taha he tau mena fakaalofa uho lahi ne moua e au.” Ko e tau motua fakamooli, tuga e tau motua tokoua ne ahiahi ki a Julian ka lagomatai a tautolu ke iloa e “finagalo a Keriso,” kakano ke maama mo e fifitaki e manatu mo e aga haana. (1 Kori. 2:16; 1 Pete. 2:21) Ko e taha anei he tau mena fakaalofa uho mooli ka foaki mai e lautolu ki a tautolu.
“KIA HAHAMO E MUTOLU E LAKAU HAHAMO HAKU”
6. Ko e heigoa e kakano ha Iesu he pehē a ia: “Kia hahamo e mutolu e lakau hahamo haku”?
6 He pehē a Iesu: “Kia hahamo e mutolu e lakau hahamo haku,” liga kakano a ia “Talia e pule haaku.” Liga kakano foki a ia “O mai ki lalo he lakau hahamo mo au, ti fakalataha a tautolu ke gahua ma Iehova.” Kakano fe ni, kua hagaao e lakau hahamo ke he gahua.
7. Hagaao ke he Mataio 28:18-20, ko e heigoa e gahua kua tuku mai ki a tautolu ke taute, ti ko e heigoa ka iloa tonu e tautolu?
7 Talia e tautolu e uiina ha Iesu ka tukulele e tautolu e tau momoui ki a Iehova ti papatiso. Hafagi e uiina ia ke he tau tagata oti, ti nakai fakaheu e Iesu ha tagata ne manako mooli ke fekafekau ke he Atua. (Ioane 6:37, 38) Tuku age ke he tau tutaki oti he Keriso e lilifu ke taute e gahua ne ole e Iehova ki a Iesu ke taute. Iloa tonu e tautolu to ha ha i ai tumau a Iesu ke lagomatai a tautolu ke taute e gahua ia.—Totou Mataio 28:18-20.
“FIFITAKI MAI A MUTOLU KIA AU”
Foaki e okiokaga tuga ne taute e Iesu (Kikite paratafa 8-11) *
8-9. Ko e ha ne futia e tau tagata fakatokolalo ki a Iesu, ti ko e heigoa e tau hūhū ne kua lata ke hūhū hifo e tautolu?
8 Ko e tau tagata fakatokolalo ne futia ki a Iesu. (Mata. 19:13, 14; Luka 7:37, 38) Ko e ha? Manamanatu ke he kehekehe ha Iesu mo e tau Farasaio. Ko e tau takitaki lotu ia ne nakai fakaalofa ti fakatokoluga. (Mata. 12:9-14) Kua mafanatia mo e fakatokolalo a Iesu. Kua matalahi mo e fakaikaluga e tau Farasaio ha ko e ha lautolu a tuaga tokoluga. Nakai omoomoi e Iesu e aga matalahi ti fakaako e ia e tau tutaki haana ke onoono ki a lautolu ko e tau fekafekau loto fakatokolalo. (Mata. 23:2, 6-11) Kua fakapehia he tau Farasaio e falu, puhala he fakahopoate mo e fakamatakutaku. (Ioane 9:13, 22) Atihake e Iesu e falu ha ko e tau gahua mitaki mo e tau kupu totonu.
9 Iloa nakai e koe e tau fakaakoaga nei mai ia Iesu? Hūhū hifo ki a koe: ‘Onoono nakai e falu ki a au kua loto molū mo e fakatokolalo? Makai nakai au ke taute e tau matagahua ikiiki he fekafekau ke he falu? Totonu nakai au ke he falu?’
10. Fēfē e logonaaga he tau tagata he gahua mo Iesu?
10 Mafola mo e mitaki e takatakaiaga ne fakatoka e Iesu ma e tau ekegahua haana, ti fiafia a ia he fakaako a lautolu. (Luka 10:1, 19-21) Fakamafana e ia e tau tutaki haana ke hūhū, ti manako a ia ke logona e tau manatu ha lautolu. (Mata. 16:13-16) Tuga ni e tau akau ne tō i loto he fale akau, kua tupuolaola pihia e tau tutaki. Manamanatu a lautolu ke he tau fakaakoaga ne talahau e Iesu ti fua mai e tau gahua mitaki.
Atāina ki ai mo e kapitiga
Makai mo e makutu
Fakatokolalo mo e gahua malolō *
11. Ko e heigoa e tau hūhū kua lata ke hūhū hifo ki a tautolu?
11 Ko koe kia he tuaga ne ha ha ai e pule? Ka pihia, hūhū hifo ki a koe: ‘Ko e takatakaiaga fēfē ne fakatoka e au he gahuaaga po ke i kaina? Fakaholo ki mua nakai e au e mafola? Fakamafana nakai e au e falu ke hūhū? Ti makai nakai au ke fanogonogo ke he tau manatu ha lautolu?’ Nakai manako a tautolu ke tuga e tau Farasaio ne vihiatia e tau tagata ne hūhū toko ki a lautolu, ti favale ke he tau tagata ne fakakite e tau manatu ne nakai tatai mo e ha lautolu.—Mare. 3:1-6; Ioane 9:29-34.
“MOUA AI E MUTOLU E OKIOKIAGA”
12-14. Ko e ha ko e okiokiaga e gahua ne tuku mai e Iesu ke taute e tautolu?
12 Ko e ha ko e okiokiaga ma tautolu ke taute e gahua ne tuku mai e Iesu ki a tautolu? Loga e kakano, ka e hanei e falu ka fakatutala ki ai.
13 Ha ha ia tautolu e tau leveki ne mua e mitaki. Ko Iehova, ko e ha tautolu a Leveki Mua Ue Atu, nakai ko e iki favale po ke nakai loto fakaaue. Kua loto fakaaue a ia ke he gahua ne taute e tautolu. (Hepe. 6:10) Ti foaki mai e ia ki a tautolu e malolō kua lata ke taute aki e matagahua ha tautolu. (2 Kori. 4:7; Kala. 6:5) Ko Iesu ko e ha tautolu a Patuiki kua takitaki, puhala he fakafifitakiaga. (Ioane 13:15) Ko e tau motua ne leveki a tautolu kua lali ke fifitaki a Iesu, ko e “Leveki mamoe ne mua.” (Hepe. 13:20; 1 Pete. 5:2) Eketaha a lautolu ke totonu, fakamafana, mo e fakamalolō he fagai mo e puipui e lautolu a tautolu.
14 Moua e tautolu e tau kapitiga mitaki lahi. Nakai fai tagata ne ha ha i ai e logonaaga he fakafetuiaga fakaalofa tuga ha tautolu. Manamanatu la: Moua e tautolu e lilifu he gahua mo e tau tagata ne mitaki e tau tutūaga he tau mahani ka e nakai manamanatu ni ki a lautolu. Lotomatala a lautolu ka e nakai fakatokoluga, ti manamanatu a lautolu ke he falu kua mua hake ia lautolu. Onoono a lautolu ki a tautolu ko e tau ekegahua mo e tau kapitiga foki. Ko e fakafetuiaga ia kua tata lahi ti makai a lautolu ke foaki e tau momoui ke lata mo tautolu!
15. Lata ke fēfē e logonaaga ha tautolu ke he gahua ne taute e tautolu?
15 Moua e tautolu e gahua mitaki lahi mahaki. Fakaako e tautolu e kupu mooli ke he tau tagata hagaao ki a Iehova mo e fakatapakupaku e tau pikopiko ne talahau he Tiapolo. (Ioane 8:44) Fakapehia e Satani e tau tagata aki e tau kavega ne nakai maeke a lautolu ke hahamo. Ma e fakatai, manako a ia ki a tautolu ke talitonu to nakai fakamagalo e Iehova e tau agahala ha tautolu ti ko e mena ia kua nakai fakaalofa ki a tautolu. Ko e tau pikopiko kelea muitui anei ti kua fakalolelole lahi ke he tau tagata! Ka “o mai” a tautolu ke he Keriso, kua fakamagalo e tau agahala ha tautolu. Ti ko e tala mooli kua fakaalofa hokulo a Iehova ki a tautolu oti. (Roma 8:32, 38, 39) Ko e palepale mooli ke lagomatai e tau tagata ke fakaako ke tua ki a Iehova mo e kitia e tau momoui ha lautolu kua holo ki mua!
MATUTAKI KE MOUA E OKIOKIAGA I LALO HE LAKAU HAHAMO HA IESU
16. Kehe fēfē e kavega ne ole a Iesu ke hahamo e tautolu mai he falu kavega kua lata a tautolu ke hahamo?
16 Ko e kavega ne ole a Iesu ke hahamo e tautolu kua kehe mai he falu kavega ne lata a tautolu ke hahamo. Ma e fakatai, he oti e gahua tupe he aho, tokologa ne mategūgū mo e nakai fiafia. Kehe mamao ai, he oti e gahua he fekafekau ki a Iehova mo Keriso, logona hifo e tautolu e fiafia lahi. Liga mategūgū a tautolu he oti e gahua he aho ka e eketaha agaia ke o atu ke he feleveiaaga he pō ia. Fa liliu a tautolu ki kaina he oti e feleveiaaga kua atihake mo e moua e malolō foou. Pihia foki ka eketaha a tautolu ke fakamatala mo e kumikumi fakatagata ke he Tohi Tapu. Ko e fua to moua e tautolu e logonaaga atihake mo e malolō foou!
17. Ko e ha kua lata a tautolu ke mailoga e mena mooli mo e fakaeneene ai?
17 Kua lata a tautolu ke mailoga e mena mooli. Igatia a tautolu mo e malolō ke fakagahua. Ti lata a tautolu ke fakaeneene ke he tau mena kua lali a tautolu ke taute. Ma e fakatai, liga moumou e tautolu e malolō he lali ke fakaputu e tau koloa he tino. Mailoga e mena ne talahau e Iesu ke he fuata maukoloa ne ole ki a ia: “Ko e heigoa e mena ke eke e au ke moua mai ai e au e moui tukulagi?” Fitā e omaoma e fuata ke he Fakatufono. Liga ko e tagata mitaki a ia ha kua talahau he Evagelia ha Mareko na ‘fakaalofa a Iesu kia ia.’ Kua age e Iesu ke he fuata nei e uiina. “Ati fano a, fakafua atu hau a tau mena oti,” he ui e Iesu, “ti mui mai kia au.” Kua manako e fuata ke mui ki a Iesu ka e nakai manako a ia ke toka e ‘tau koloa loga’ haana. (Mare. 10:17-22) Ko e fua, tiaki e ia e lakau hahamo ne age e Iesu ki a ia ti matutaki ke fakatupa ki a “Mamone” po ke, tau monuina. (Mata. 6:24) Ko e heigoa e fifiliaga ka taute e koe?
18. Ko e heigoa kua lata a tautolu he falu magaaho ke taute, ti ko e ha?
18 He falu magaaho, kua mitaki ma tautolu ke liu hakahaka e tau mena ne tuku fakamua e tautolu he tau momoui. Ko e ha? Ke maeke ia tautolu ke iloa tonu kua fakaaoga fakailoilo ha tautolu a malolō. Manamanatu ke he mena ne talahau he fuata ko Mark: “Loga e tau ne manatu au kua mukamuka e moui haaku. Paionia au ka e manamanatu tumau au hagaao ke he tau tupe mo e puhala ke fakahagahaga mitaki e moui haaku. Lali au ke maama e kakano ne uka e moui haaku. Ti mailoga e au kua tuku fakamua ni e au e tau mena ne fiafia lahi au ki ai ka e tote e magaaho mo e malolō ne age ki a Iehova.” Hikihiki e Mark e manamanatuaga mo e puhala moui haana ti maeke ke fekafekau fakalahi ki a Iehova. “Tupetupe au he falu magaaho,” he ui e Mark, “ka ko e lagomatai ha Iehova mo e lalagoaga ha Iesu, ati kautū au ke he tau paleko haaku.”
19. Ko e ha kua aoga lahi ke moua e onoonoaga hako?
19 To matutaki a tautolu ke moua e okiokiaga i lalo he lakau hahamo ha Iesu he tolu e mena ka taute e tautolu. Fakamua, tumau e onoonoaga hako. Kua taute a tautolu he gahua ha Iehova, ti lata ke taute he puhala ha Iehova. Ko e tau ekegahua a tautolu, mo e ko Iehova e Iki. (Luka 17:10) Ka lali a tautolu ke taute e gahua haana he puhala ha tautolu, to totoko a tautolu ke he lakau hahamo. Liga pakia mo e lolelole e povi malolō ka lali tumau ke fano he puhala ni haana mo e totoko atu ke he lakau hahamo ne takitaki he iki haana. He taha faahi, maeke a tautolu ke taute e tau mena ofoofogia mo e kautū mai he ha fakatauhele kaeke ke muitua e tautolu e takitakiaga ha Iehova. Manatu kua nakai fai tagata ke taofi e finagalo ha Iehova he fakakatoatoa!—Roma 8:31; 1 Ioa. 4:4.
20. Ko e heigoa e logonaaga ha tautolu he o mai ki lalo he lakau hahamo ha Iesu?
20 Uaaki, gahua mo e logonaaga hako. Ko e foliaga ha tautolu ke fakaheke ha tautolu a Matua fakaalofa ko Iehova. Ko lautolu he senetenari fakamua ne omoomoi he lotokai po ke manako ni ke he tau mena ha lautolu kua mafiti ke nakai fiafia mo e tiaki e lakau hahamo ha Iesu. (Ioane 6:25-27, 51, 60, 66; Filipi 3:18, 19) Kehe mamao ai, ko lautolu ne fakaohooho he fakaalofa nakai lotokai he Atua mo e fakaalofa ke he katofia kua fiafia he uta e lakau hahamo ia he tau momoui ha lautolu he lalolagi, mo e amaamanakiaga he fekafekau mo e Keriso he lagi. Tuga a lautolu, to fakatumau e fiafia ha tautolu he uta e lakau hahamo ha Iesu mo e logonaaga hako.
21. Hagaao ke he Mataio 6:31-33, ko e heigoa ka amanaki a tautolu ke taute e Iehova?
21 Toluaki, moua e tau amanakiaga kua hako. Fifili e tautolu e moui ne foaki noa mo e gahua malolō. Hataki e Iesu to favale ki a tautolu. Ka e amanaki to foaki mai e Iehova e malolō ke fakauka ke he ha paleko. He lahi e fakauka ha tautolu, to lahi e malolō ha tautolu. (Iako. 1:2-4) Amanaki foki to foaki mai e Iehova e tau mena kua lata, to leveki e Iesu a tautolu, mo e to fakamalolō he tau matakainaga a tautolu. (Totou Mataio 6:31-33; Ioane 10:14; 1 Tesa. 5:11) Lata mooli a tautolu ke fakauka ke he ha paleko!
22. Ko e heigoa ka loto fakaaue a tautolu ki ai?
22 Ko e fifine ne fakamaulu e Iesu ne moua e okiokiaga he aho ia ni ne maulu haana gagao. Ka e to moua e ia e okiokiaga tukulagi ka eke mo tutaki fakamooli he Keriso. Ko e heigoa ne taute e ia he manatu e koe? Ka fifili a ia ke hau ki lalo he lakau hahamo ha Iesu, manamanatu ke he palepale he fekafekau mo Iesu he lagi! Ko e ha foakiaga ne taute he fifine ke mui ke he Keriso kua mua atu e aoga. Pete ni e amaamanakiaga he momoui tukulagi he lagi po ke lalolagi, loto fakaaue mooli a tautolu ha kua talia e uiina ha Iesu: “Kia o mai a mutolu kia au”!
LOLOGO 5 Keriso, Ha Tautolu Fakafifitakiaga
^ para. 5 Uiina e Iesu a tautolu ke o mai ki a ia. Ko e heigoa ne putoia he talia e uiina haana? To tali he vala tala nei e hūhū ia, mo e to fakamanatu mai e puhala ka moua e tautolu e okiokiaga he gahua fakalataha mo Keriso.
^ para. 60 FAKAMAAMA E FAKATINO: He tau puhala loga, foaki e Iesu e okiokiaga ke he falu.
^ para. 66 FAKAMAAMA E FAKATINO: Pihia foki a Iesu, ko e matakainaga taane ne fakakite e okiokiaga ke he falu he tau puhala kehekehe.