1. Ko e ha kua lata a tautolu ke omaoma ki a Iehova?

KUA lata a tautolu ke omaoma * ki a Iehova ha ko ia ko e Tufuga ha tautolu. Ha ha ia ia e tonuhia ke fakatoka e tau tutūaga ma e tau tufugatia haana. (Fakakite. 4:11) Ka e ha ha foki ia tautolu e kakano omoomoi ke omaoma ki a ia ha ko e puhala pule haana ne mua ue atu. He fakamauaga tala, tokologa e tagata ne pule ke he falu. He fakatatai ki a lautolu, ko Iehova ko e Pule kua mua ue atu e pulotu mo e lahi e fakaalofa noa, mo e fakaalofa hofihofi noa.​—Esoto 34:6; Roma 16:27; 1 Ioa. 4:8.

2. Ko e heigoa e tau kakano kua foaki he Heperu 12:9-11 ki a tautolu he omaoma ki a Iehova?

² Manako a Iehova ki a tautolu ke omaoma ki a ia, nakai kakano ha ko e matakutaku ha tautolu ki a ia, ka kua fakaalofa mo e onoono a tautolu ki a ia ko e ha tautolu a Matua fakaalofa. He tohi ha Paulo ke he tau Heperu, ne fakamaama e ia kua lata a tautolu ke “mua ha tautolu a omaoma ke he Matua” ha kua fakaako e Ia a tautolu ke “tupu e mitaki kia tautolu.”​—Totou Heperu 12:9-11.

3. (a) Fakakite fēfē e tautolu kua omaoma a tautolu ki a Iehova? (e) Ko e heigoa e tau hūhū ka tali e tautolu?

³ Omaoma a tautolu ki a Iehova he eketaha ke omaoma ki a ia he tau mena oti kana mo e totoko e manako ke falanaki ni ke he ha tautolu a iloilo. (Fakatai 3:5) Mukamuka lahi a tautolu ke omaoma ki a Iehova he iloa e tautolu e tau mahani mitaki haana. Ko e ha? Ha ko e tau mahani nei ne fakakite ke he  tau mena oti ne taute e ia. (Sala. 145:9) Ko e lahi e fakaako ha tautolu hagaao ki a Iehova, to lahi e fakaalofa ha tautolu ki a ia. Ka fakaalofa a tautolu ki a Iehova, nakai lata a tautolu ke loga lahi e tau matafakatufono ke tala mai ki a tautolu e tau mena ke taute mo e tau mena ke nakai taute. Gahua a tautolu ke fakalagotatai e tau manamanatuaga mo e tau logonaaga ha tautolu mo e mena kua mitaki ti kalo kehe mai he mena kua kelea. (Sala. 97:10) Ka e he falu magaaho, liga taufetului a tautolu ke omaoma ki a Iehova. Ko e ha? Ti ko e heigoa he tau motua, tau matua taane, mo e tau matua fifine ka fakaako mai he tau fakafifitakiaga ne fakatoka he Kovana ko Nehemia; Patuiki ko Tavita; mo Maria ko e matua fifine ha Iesu? To foaki he vala tala nei e tau tali ke he tau hūhū ia.

4-5. Hagaao ke he Roma 7:21-23, ko e ha kua paleko ai ke omaoma ki a Iehova?

⁴ Taha kakano ne liga paleko ki a tautolu ke omaoma ki a Iehova ha kua lauia oti a tautolu he agahala ti kua nakai mitaki katoatoa. Ha ha foki ia tautolu e tau aga totoko. Mole e totoko ha Atamu mo Eva ke he Atua ti kai e fua akau fakatapu, ne fakatoka ni e laua e tau tutūaga ma laua. (Kene. 3:22) He vahā nei, manako agaia e laulahi he tau tagata ke fakaheu a Iehova mo e fifili ma lautolu e mena kua hako mo e mena kua hepe.

⁵ Pihia foki a lautolu kua iloa mo e fakaalofa ki a Iehova kua liga taufetului ke omaoma katoatoa ki a Ia. Fehagai e aposetolo ko Paulo mo e paleko nei. (Totou Roma 7:21-23.) Tuga a Paulo, manako a tautolu ke taute e mena hako ki mua ha Iehova. Ka e lata a tautolu ke fakatumau ke totoko e aga ke taute e tau mahani kelea.

6-7. Ko e heigoa e kakano ke uaaki kua paleko ai ke omaoma ki a Iehova? Talahau e fakatai.

⁶ Taha kakano kua paleko ai ke omaoma ki a Iehova ha kua fakaohooho a tautolu he aga fakamotu ne feaki hake a tautolu. Loga e tau manatu fakatagata ne nakai tatai ke he finagalo ha Iehova, ti ko e paleko tumau ke tokanoa a tautolu mai he tau puhala mahani mau he manamanatuaga. Fakatutala ke he taha e fakatai.

⁷ Ko e aga pauaki he falu matakavi ke fakaohooho a lautolu ne ikiiki ke foaki e tau momoui ha lautolu ke moua e tau tupe loga. Ko e matakainaga fifine ne higoa ko Mary * ne fehagai mo e paleko ia. Ato fakaako hagaao ki a Iehova, ne fano a ia ke he taha he tau aoga ne mua e tokoluga he motu haana. Logona e Mary e peehiaga mai he magafaoa haana ke moua e gahua totogi mitaki ne matalahi. Manako pihia foki a ia. Ka e he mole e fakaako hagaao ki a Iehova mo e fakaalofa ki a Ia, ne hiki e tau foliaga haana. Pete he pihia, pehē a ia: “Falu mogo ne kitia e au e tau gahua mitaki ne maeke ke fakaatā au ke moua e tau tupe loga ka e to fakatauhele e fakaholoaga fakaagaaga haaku. Ha ko e puhala ne feaki hake au, paleko agaia ki a au ke pehē, nakai. Olelalo au ki a Iehova ke lagomatai au ke totoko e kamatamata ke talia e gahua ka utakehe au mai he fekafekauaga haaku ki a Ia.”​—Mata. 6:24.

8. Ko e heigoa ka fakatutala a tautolu ki ai mogonei?

⁸ Aoga ki a tautolu ke omaoma ki a Iehova. Ka ko lautolu ne ha ha ai e pule, tuga e tau motua, tau matua taane, mo e tau matua fifine ne fai kakano foki ke mumui ke he takitakiaga he Atua; moua e lautolu e magaaho ke lagomatai e falu tagata. Kia fakatutala a tautolu ke he falu fakafifitakiaga mai he Tohi Tapu kua fakaako a tautolu ke fehagai mo e pule ke he puhala kua fakafiafia a Iehova.

9. Ko e heigoa e tau paleko ne fehagai mo Nehemia?

⁹ Foaki e Iehova ke he tau motua e matagahua aoga ke leveki e tau tagata haana. (1 Pete. 5:2) Lahi e mena ka fakaako he tau motua mai he kumikumi ke he puhala ne fehagai a Nehemia mo e tau tagata ha Iehova. Ha ko Nehemia e kovana ha Iuta, ne lahi e pule haana. (Nehe. 1:11; 2:7, 8; 5:14) Manamanatu ke he falu paleko ne fehagai mo Nehemia. Ne iloa e ia kua ekefakakelea he tau tagata e faituga ti nakai lalago fakatupe e tau Levi tuga ne poaki he Fakatufono. Kua moumou he tau Iutaia e fakatufono he Sapati, ti falu he tau tagata taane kua faihoana ke he tau fifine motu kehe. Lata ke fai mena e Kovana ko Nehemia ke taute ke he tuaga uka nei.​—Nehe. 13:4-30.

10. Tali atu fēfē a Nehemia ke he tau paleko ne fehagai mo ia?

¹⁰ Nakai fakaaoga fakahehē e Nehemia e pule haana he fakatoka e tau tutūaga ni haana ke he tau tagata he Atua. Ka e kumi e ia e takitakiaga ha Iehova he liogi fakamakutu, ti fakaako e ia e Fakatufono ha Iehova ke he tau tagata. (Nehe. 1:4-10; 13:1-3) Ne fakatokolalo foki a Nehemia he gahua fakalataha mo e tau matakainaga haana, he lagomatai foki a lautolu ke liu ati e tau kaupā i Ierusalema.​—Nehe. 4:15.

11. Hagaao ke he 1 Tesalonia 2:7, 8, lata e tau motua ke taute fēfē a lautolu he fakapotopotoaga?

¹¹ Liga nakai fehagai e tau motua mo e tau lekua pihia tuga ha Nehemia, ka e maeke a lautolu ke fifitaki a ia ke he loga he tau puhala. Ma e fakatai, gahua malolō a lautolu ke lagomatai e tau matakainaga. Ti nakai logona e lautolu e tokoluga hake ke he falu ha ko e pule ha lautolu. Ka e taute fakamitaki e lautolu e fakapotopotoaga. (Totou 1 Tesalonia 2:7, 8.) Ko e fakaalofa hokulo mo e aga fakatokolalo ha lautolu kua lauia e puhala ne tutala a lautolu ke he falu. Ko Andrew, ko e motua lotomatala ne pehē: “Mailoga e au kua fanogonogo fakamitaki e tau matakainaga ha ko e totonu  mo e mafanatia mooli he motua. Ko e tau mahani nei kua fakalagalaga e fakapotopotoaga ke kaufakalataha mo e tau motua.” Taha motua foki kua leva ne higoa ko Tony, ne pehē: “Lali au ke fakagahua e fakatonuaga ia Filipi 2:3 mo e lali tumau ke onoono ke he falu kua mua hake ia au. Lagomatai he mena nei au ke kalo kehe he tuga ko e pule lahi ke he falu.”

12. Ko e ha kua aoga ma e tau motua ke mahani fakatokolalo?

¹² Lata e tau motua ke mahani fakatokolalo tuga a Iehova kua fakatokolalo. Pete ko Iehova e Pule katoatoa he lagi mo e lalolagi, ne “fakatokolalo” hifo a ia ke fakatu hake mai he “kelekele e lalo tagata.” (Sala. 18:35; 113:6, 7) Vihiatia e Iehova a lautolu kua mahani fakatokoluga.​—Fakatai 16:5.

13. Ko e ha kua lata e motua ke “taofi hana alelo”?

¹³ Ko e motua kua omaoma ki a Iehova kua lata ke “taofi hana alelo.” Ka nakai pihia, kua liga vagahau fakakelea a ia ka nakai fakalilifu e taha ki a ia. (Iako. 1:26; Kala. 5:14, 15) Ko Andrew ne totoku fakamua, ne pehē: “Falu magaaho ne manako au ke tali fakakelea ke he matakainaga ne tuga kua nakai fakalilifu ki a au. Ka e manamanatu fakahokulo au ke he tau fakafifitakiaga he tau tagata taane fakamooli he Tohi Tapu, ti lagomatai he mena ia au ke fakaako e aoga he mahani fakatokolalo mo e mahani molū.” Fakakite he tau motua e omaoma ha lautolu ki a Iehova he fakaalofa mo e totonu ka tutala mo lautolu he fakapotopotoaga, ti pihia ke he falu motua foki.​—Kolo. 4:6.

14. Ko e heigoa e matagahua kua foaki e Iehova ke he tau matua taane, ti ko e heigoa kua amanaki a Ia mai ia lautolu?

¹⁴ Kotofa e Iehova e matua taane ko e ulu he magafaoa, ti amanaki e Atua ki a ia ke fakaako mo e akonaki e tau fanau haana. (1 Kori. 11:3; Efeso 6:4) Ka e fakakaupā ni e pule he matua taane​—ti ko ia kua lata ke tali ki a Iehova ne tufuga e tau magafaoa oti. (Efeso 3:14, 15) Fakakite he tau matua taane e omaoma ha lautolu ki a Iehova he fakaaoga e pule ha lautolu he puhala kua fakafiafia e Atua. Lahi e mena ka iloa e lautolu he fakaako ke he moui he Patuiki ko Tavita.

15. Ko e ha ko e fakafifitakiaga mitaki e Patuiki ko Tavita ma e tau matua taane ke manamanatu ki ai?

¹⁵ Kotofa e Iehova a Tavita ko e ulu he magafaoa haana ti pihia foki mo e motu katoa ha Isaraela. Ha ko e patuiki, lahi e pule ha Tavita. Falu magaaho, ne fakaaoga fakahehē e pule haana ti loga e hepehepe lalahi ne taute. (2 Samu. 11:14, 15) Ka e fakakite e ia e omaoma haana ki a Iehova he talia e akonaki. Liligi e ia e loto haana he liogi ki a Iehova. Ti  lali a ia ke eketaha ke omaoma ke he fakatonuaga ha Iehova. (Sala. 51:1-4) Lafi ki ai, fakatokolalo a ia ti talia e fakatonuaga mitaki mai he tau tagata taane mo e pihia foki he tau fifine. (1 Samu. 19:11, 12; 25:32, 33) Fakaako a Tavita mai he tau hepehepe haana ti fakavē e moui haana ke he fekafekauaga ki a Iehova.

16. Ko e heigoa e tau mena ka fakaako he tau matua taane mai ia Tavita?

¹⁶ Manamanatu ke he falu mena ka fakaako he tau matua taane mai he Patuiki ko Tavita: Ua fakaaoga hehē e pule kua tuku atu e Iehova ki a koe. Talahau e tau hehē haau ti talia e fakatonuaga ne fakavē ke he Tohi Tapu mai he falu. Ka taute pihia e koe, to fakalilifu he magafaoa haau a koe ha ko e mahani fakatokolalo haau. Ka liogi mo e magafaoa haau, liligi e loto haau ki a Iehova, fakaatā a lautolu ke logona e lahi he falanaki haau ki a Ia. Mua atu ai, tuku fakamua e fekafekauaga haau ki a Iehova. (Teu. 6:6-9) Ko e fakafifitakiaga mitaki haau ko e taha he tau mena fakaalofa aoga lahi ka foaki e koe ke he magafaoa haau.

17. Ko e heigoa e matagahua ne kotofa e Iehova ke he tau matua fifine?

¹⁷ Kotofa e Iehova ke he matua fifine e matagahua aoga lahi he magafaoa, ti foaki e Ia ke he matua fifine e pule foki ke he tau fanau haana. (Fakatai 6:20) Ko e fakaohoohoaga he matua fifine ke he tau fanau haana kua malolō lahi mo e aoga tumau ke he tau momoui ha lautolu. (Fakatai 22:6) Mailoga e mena ka fakaako he tau matua fifine mai ia Maria ko e matua fifine ha Iesu.

18-19. Ko e heigoa ka fakaako mai he tau matua fifine he fakafifitakiaga ha Maria?

¹⁸ Iloa mitaki e Maria e Tau Tohiaga Tapu. Feaki e ia e fakalilifu hokulo ki a Iehova mo e fakafetuiaga malolō mo Ia. Makai a Maria ke omaoma ke he takitakiaga ha Iehova pete kua hiki katoa e puhala moui haana.​—Luka 1:35-38, 46-55.

¹⁹ Tau matua fifine, maeke a mutolu ke fifitaki a Maria ke he tau puhala loga. Fēfē? Fakamua, he fakatumau e fakafetuiaga haau mo Iehova puhala he fakaako fakatagata he Tohi Tapu mo e tau liogi ni haau. Uaaki, he makai ke taute e tau hikihikiaga he moui haau ke fakafiafia a Iehova. Ma e fakatai, liga feaki hake a koe he tau matua ne mukamuka lahi ke ita mo e vagahau vale ke he tau fanau. Ti liga tupu hake a koe mo e manamanatu ko e puhala ni anei ke feaki e magafaoa. Pete he fakaako e koe e tau tutūaga ha Iehova, liga paleko agaia ki a koe ke fakatumau e fakatotoka mo e fakauka ke he tau fanau haau, mua atu ka nakai mahani mitaki a lautolu he mogo ka lolelole  a koe. (Efeso 4:31) He tau magaaho pihia, kua lata mooli a koe ke falanaki ki a Iehova he liogi. Ko e matua fifine ne higoa ko Lydia ne pehē: “Falu magaaho kua liogi fakamakamaka au ke ua vagahau vale ka liuliu e tama taane haaku ki a au. Nakai oti foki e manatu haaku he talahau ka e liogi fakaeneene ma e lagomatai ha Iehova. Fakatotoka tumau au he liogi.”​—Sala. 37:5.

20. Ko e heigoa e paleko kua fehagai mo e falu matua fifine, ti kautū fēfē mai he paleko ia?

²⁰ Falu matua fifine ne liga fehagai mo e paleko pihia, ti uka lahi ia lautolu ke fakakite e fakaalofa ke he tau fanau ha lautolu. (Tito 2:3, 4) Tokologa e tau matua fifine ia ne feaki he kaina ne nakai fai fakafetuiaga mafanatia e tau matua ha lautolu mo e tau fanau ha lautolu. Kaeke ko e puhala ia ne feaki a koe, nakai lata a koe ke fatiaki e tau hepehepe he tau matua haau. Ko e matua fifine ne omaoma ki a Iehova ka liga fakaako e puhala ke fakakite e fakaalofa ke he tau fanau haana. Liga uka a ia ke hiki e puhala manamanatu, logonaaga, mo e mahani haana. Ka e maeke ke taute, to aoga e tau hikiaga ia ki a ia mo e magafaoa haana.

21-22. Hagaao ke he Isaia 65:13, 14, ko e heigoa e tau aoga kua moua e tautolu mai he omaoma ki a Iehova?

²¹ Iloa he Patuiki ko Tavita e tau aoga he omaoma ki a Iehova. Tohi e ia: “Kua tonu e tau fekau a Iehova, kua fakafiafia e loto, kua meā e tau poaki a Iehova, kua fakamaama e tau mata. Kua fakamafanatia mai ai foki hāu a fekafekau; kua lahi foki e totogi ka taofi ki ai.” (Sala. 19:8, 11) He vahā nei, kitia e tautolu e kehekehe ha lautolu kua omaoma ki a Iehova mo lautolu kua fakaheu e fakatonuaga totonu haana. Ko lautolu ne omaoma ki a Iehova kua “kalaga . . . ha ko e loto fiafia.”​—Totou Isaia 65:13, 14.

²² Ka mautali e tau motua, tau matua taane, mo e tau matua fifine ke omaoma ki a Iehova to holo ki mua e tau momoui ha lautolu, fiafia lahi e tau magafaoa ha lautolu, mo e kaufakalataha e fakapotopotoaga katoa. Mua atu, kua fakafiafia e lautolu e loto ha Iehova. (Fakatai 27:11) Ko e palepale mitaki lahi mahaki!