1-2. Matutaki fēfē e Fakamatalaaga 11:6 ke he fakamatala he tala mitaki he Kautu?

KO E tau tagata he falu motu ne fiafia lahi ka logona e tala mitaki. Ko e mena kua leva e fakatali ha lautolu ki ai! He falu motu, tote e fiafia he tau tagata ke he Atua po ke Tohi Tapu. Ko e heigoa e tali mahani mau he matakavi ne nofo ai a koe? Ko e heigoa ni e tali, amanaki a Iehova ki a tautolu ke tumau ke fakamatala ato pehē a Ia kua oti tuai.

² He magaaho ni ne fakatoka e Iehova, to hoko e gahua fakamatala ke he fakahikuaga “ti hoko mai ai e fakaotiaga.” (Mata. 24:14, 36) Ato hoko mai e magaaho ia, omaoma fēfē a tautolu ke he tau kupu “aua neke okioki ai hāu a lima”? *​—Totou Fakamatalaaga 11:6.

3. Ko e heigoa ka fakatutala a tautolu he vala tala nei?

³ Ko e vala tala fakamua ne fakatutala ke he fā e mena kua lata ke taute e tautolu ke eke mo tau tagata “takafaga [mitaki] ke he tau tagata.” (Mata. 4:19) To fakatutala e vala tala nei ke he tolu e puhala ka fakamalolō e mauokafua ha tautolu ke fakamatala, pete ni e tau tuaga kua fehagai mo tautolu. To fakaako e tautolu e kakano kua aoga ke (1) hagaaki tumau (2) fakauka, mo e (3) fakatumau e tua malolō.

4. Ko e ha kua lata a tautolu ke hagaaki tumau ke he gahua ne tuku mai e Iehova ki a tautolu ke taute?

⁴ Talahau tuai e Iesu e tau mena tutupu mo e tau tuaga ka fakamailoga e tau aho fakamui ti maeke e tau mena ia ke fakatauhele haana a tau tutaki ke taute e gahua fakamatala. Ne tala age a ia ke he tau tutaki haana “kia mataala.” (Mata. 24:42) He vahā nei, fehagai a tautolu mo e tau fakatauhele tuga ne fakalavelave e tau tagata he vahā ha Noa ke omaoma ke he hatakiaga ne fakailoa e Noa. (Mata. 24:37-39; 2 Pete. 2:5) Ko e mena ia, manako a tautolu ke hagaaki tumau ke he gahua ne tuku mai e Iehova ki a tautolu ke taute.

5. Fakamaama fēfē he Gahua 1:6-8 e tupu lahi he gahua fakamatala?

⁵ Kua lata mooli a tautolu ke hagaaki fakalahi mogonei ke he gahua fakamatala he Kautu. Talahau tuai e Iesu e gahua nei to tupu lahi mo e matutaki ai he leva e mole e mate haana. (Ioane 14:12) He mole e mate ha Iesu, falu he tau tutaki haana ne liliu ke he gahua futi ika. Mole e liu tu mai ha Iesu, taute e ia e mana ke lagomatai e tau tutaki haana ke moua e tau ika loga. Fakaaoga e Iesu e magaaho ia ke fakamooli ko e kotofaaga ha lautolu ke eke mo tau tagata takafaga ke he tau tagata kua mua atu e aoga ke he ha gahua. (Ioane 21:15-17) Ato hake a Iesu ke he lagi, tala age a ia ke he tau tutaki haana ko e gahua fakamatala ne kamata e ia to tupu lahi ke molea a Isaraela. (Totou Gahua 1:6-8.) He tau tau fakamui, ne foaki e Iesu ke he aposetolo ko Ioane e fakakiteaga ke iloa e mena ka hoko he “aho he Iki.” * He falu mena foki, kitia e Ioane e mena ofoofogia nei ne tupu: I lalo he takitakiaga he agelu, kua fakamatala e “vagahau [po ke tala] mitaki tukulagi” nei ke he “tau motu kehe oti, mo e tau magafaoa, mo e tau vagahau kehekehe, mo e tau motu.” (Fakakite. 1:10; 14:6) Maaliali ai, ko e finagalo ha  Iehova ma tautolu he vahā nei ke fakalataha ke he gahua fakamatala ke he lalolagi katoa ato oti ai.

6. Hagaaki tumau fēfē a tautolu ke he gahua fakamatala?

⁶ Maeke a tautolu ke hagaaki tumau ke he gahua fakamatala ka manamanatu a tautolu ke he lahi he mena ne taute e Iehova ke lagomatai a tautolu. Ma e fakatai, foaki mai e ia e loga lahi he tau mena kai fakaagaaga puhala he tau tohi, tau vitiō mo e tau tapakiaga autiō, mo e fakailoa he tau vala tala he Initanete. Manamanatu la: He faahi kupega hila pauaki ha tautolu, ko e tau vala tala kua maeke ke moua ke molea 1,000 vagahau! (Mata. 24:45-47) He lalolagi ne hufia he tau mena fakapolitika, fakalotu, mo e kehekehe e tau tuaga fakatupe, molea tuai e valu e miliona he tau fekafekau he Atua kua kaufakalataha mooli ko e tau matakainaga ke he lalolagi katoa. Ma e fakatai, he Aho Faraile, Aperila 19, 2019, ko e Tau Fakamoli a Iehova he lalolagi katoa ne fakalataha ke kitekite e vitiō ne fakatutala ke he lauga he aho. He afiafi ia, ne 20,919,041 ne fakapotopoto ke he Fakamanatuaga he mate ha Iesu. Kua fakalagalaga a tautolu ke hagaaki tumau ke he gahua he Kautu ka manamanatu a tautolu ke he lilifu ke kitia mo e fai vala ke he tau mena tutupu ofoofogia he magaaho nei.

7. Lagomatai fēfē he fakafifitakiaga ha Iesu a tautolu ke hagaaki tumau?

⁷ Taha puhala foki ka hagaaki tumau a tautolu ke he gahua fakamatala ko e mumui ke he fakafifitakiaga ha Iesu. Nakai fakaatā e ia ha mena ke fakatauhele a ia he fakamatala. (Ioane 18:37) Nakai mafai a ia he foaki e Satani e “tau kautu oti he lalolagi, mo e lilifu ha lautolu” ki a ia; po ke magaaho foki ne manako e falu ki a ia ke eke mo patuiki. (Mata. 4:8, 9; Ioane 6:15) Nakai fakaohooho foki e manako haana ke he tau monuina fakatino; po ke mahala ke he totokoaga velagia. (Luka 9:58; Ioane 8:59) Ka fehagai a tautolu mo e tau kamatamata ke he tua, maeke a tautolu ke hagaaki tumau ka manatu e tautolu e fakatonuaga he aposetolo ko Paulo. Tomatoma e ia e tau Kerisiano ke mumui ke he fakafifitakiaga ha Iesu ke ‘ua fakalolelole e tau loto mo e nakai fahia’!​—Hepe. 12:3.

8. Ko e heigoa e mahani fakauka, ti ko e ha kua latatonu pauaki ai mogonei?

⁸ Ko e mahani fakauka ko e lotomatala ke fakatali fakatekiteki ma e tuaga ke hiki. He amaamanaki atu a tautolu ke he fakaotiaga he tuaga kelea po ke fakamooliaga he manako kua leva, lata a tautolu ke fakauka. Manako lahi e perofeta ko Hapakuka ke fakaoti e tau tuaga favale i Iuta. (Hapa. 1:2) Amaamanaki e tau tutaki ha Iesu ko e “hoko mai ne fai” e Kautu ka fakahao a lautolu mai he pule favale ha Roma. (Luka 19:11) Manako lahi a tautolu ke he aho ka utakehe he Kautu he Atua e mahani kelea, ti tamai e lalolagi foou tututonu. (2 Pete. 3:13) Ka e lata a tautolu ke fakauka mo e fakatali ke he magaaho kua fifili e Iehova. Manamanatu ke he falu puhala ne fakaako e Iehova a tautolu ke fakauka.

9. Ko e heigoa e tau fakafifitakiaga ne fakakite e fakauka ha Iehova?

⁹ Fakatoka e Iehova e fakafifitakiaga mitaki katoatoa he mahani fakauka. Lahi e magaaho ne foaki e ia ki a Noa ke tā e vaka mo e fekafekau “ko e ogo he tututonu.” (2 Pete. 2:5; 1 Pete. 3:20) Fanogonogo a Iehova he lagaloga e hūhū ha Aperahamo hagaao ke he fifiliaga ha Iehova ke moumou e tau tagata he tau maaga kelea ha Sotoma mo Komora. (Kene. 18:20-33) Leva tuai e fakauka lahi mahaki ha Iehova ke he motu nakai fakamooli ha Isaraela. (Nehe. 9:30, 31) Kitia e tautolu e fakamooliaga he fakauka ha Iehova he vahā nei he fakaatā e ia e  magaaho ma lautolu ne futia e ia ke “hohoko oti kana ke he tokihala.” (2 Pete. 3:9; Ioane 6:44; 1 Timo. 2:3, 4) Ko e fakafifitakiaga ha Iehova kua foaki ki a tautolu e kakano mitaki ke fakauka he fakatumau a tautolu ke fakamatala mo e fakaako atu. Fakaako foki e ia a tautolu ke fakauka he iloa e fakatai i loto he Kupu haana.

10. He fakamau ia Iakopo 5:7, 8, ko e heigoa ne fakaako mai he tagata gahua fonua?

¹⁰ Totou Iakopo 5:7, 8. Ko e fakatai ke he tagata gahua fonua ne tō e tau fua he fonua ne fakaako ki a tautolu e mahani fakauka. Falu akau kua mafiti e tupu. Ka e laulahi he tau akau, mua atu ke he tau akau fai fua ne leva to motua. Ko e vahā ke tō e tau fua he fonua i Isaraela ne kavi ke he ono e mahina he loa. Tō he tagata gahua fonua e tau tega akau haana he mole e uha he vahā mateafu ti helehele ai he mole e uha he vahā tau tupu. (Mare. 4:28) To pulotu a tautolu he fifitaki e fakauka he tagata gahua fonua. Ka e to nakai mukamuka e mena nei.

11. To lagomatai fēfē he fakauka a tautolu he gahua fakamatala?

¹¹ Fa mahani e tau tagata nakai mitaki katoatoa ke manako mafiti ke moua e tau fua he tau gahua ha lautolu. Kaeke ke manako a tautolu ke moui e katene, lata a tautolu ke leveki tumau ai he akuaku, tō, huo, mo e fakamalū. Lata ke matutaki ke gahua fakamalolō he taute tutaki. Fai magaaho a tautolu ke huo kehe e fili tagata mo e fekehekeheaki ha lautolu ne fakaako e tautolu. To lagomatai he fakauka ha tautolu a tautolu ke kalo kehe he fakalolelole ka fehagai mo e tau mena uka. Ka moua e tautolu falu tali mitaki, lata agaia a tautolu ke fakauka. Nakai maeke a tautolu ke fakaohooho e tagata fakaako Tohi Tapu ke tupu e tua. Falu magaaho, na fakatuai foki e tau tutaki ha Iesu ke maama e kakano he mena ne fakaako e ia. (Ioane 14:9) Kia manatu e tautolu kua liga tō e tautolu e akau ti fakamalū, ka ko e Atua kua fakatupu ai.​—1 Kori. 3:6.

12. Fakagahua fēfē e tautolu e fakauka ka fakamatala ke he tau magafaoa nakai tua?

 ¹² Taha faahi ne liga uka ki a tautolu ke fakauka ka fakamatala ke he tau magafaoa nakai tua. Ko e matapatu fakaakoaga ia Fakamatalaaga 3:1, 7 ka lagomatai a tautolu. Pehē: “Ko e vaha ke fakanono ai, mo e vaha ke vagahau ai.” Maeke e mahani mitaki ha tautolu ke fakamatala ka e nakai vagahau, ka e mautali tumau a tautolu ke he tau tuaga ke tutala hagaao ke he kupu mooli. (1 Pete. 3:1, 2) Fakauka a tautolu ke he tau tagata oti​—putoia e tau tagata he magafaoa he fakamakutu a tautolu ke fakamatala mo e fakaako atu.

13-14. Ko e heigoa falu fakafifitakiaga he fakauka ka mumuitua a tautolu ki ai?

¹³ Maeke a tautolu ke fakaako ke fakauka mai he tau fakafifitakiaga ha lautolu ne fakamooli he Tohi Tapu mo e pihia mo lautolu he vahā nei. Manako lahi a Hapakuka ke hoko mai e fakaotiaga ke he mahani kelea, ka e fakailoa mauokafua e ia: “To tu ai au ke he haku mena ke toko ai.” (Hapa. 2:1) Talahau he aposetolo ko Paulo e manako haana ke “fakaoti” haana feua. Ka e fakauka a ia he matutaki ke “talahau fakatonu atu . . . e tala mitaki.”​—Gahua 20:24.

¹⁴ Manamanatu ke he fakafifitakiaga he hoa mau ne paase mai i Kiliata ne kotofa ke he motu ne tokofiha ni e Tau Fakamoli a Iehova ti tokologa e tagata ne ō ke he lotu ne nakai Kerisiano. Tokogahoa ni ne hihiga ke fakaako e Tohi Tapu. Ka e fakafano atu he falu kapitiga ha laua ne ō fakalataha ki Kiliata e tau tala ofoofogia ke he loga e tau tagata fakaako Tohi Tapu mitaki ha lautolu. Pete ni e fakatuai e fai fua he fonua ha laua, ka e fakauka ni a laua he gahua fakamatala. He mole e fakamatala ke valu e tau he fonua ne tuga kua nakai fai fua, fakahiku ai kua fiafia a laua he kitia taha he tau tagata fakaako Tohi Tapu ha laua ne papatiso. Ko e heigoa he tau fakafifitakiaga nei i tuai mo e vahā nei kua fakaako ki a tautolu? Fakamakutu tumau a lautolu nei ne fakamooli po ke nakai okioki ha lautolu a tau lima, ti foaki e Iehova e taui ma e fakauka ha lautolu. Kia “fifitaki a [ta]utolu kia lautolu kua moua tuai ke he tua mo e fakauka e tau mena kua talahaua mai.”​—Hepe. 6:10-12.

15. Ko e heigoa taha puhala he tua kua fakamalolō e fifiliaga ha tautolu ke fakamatala?

¹⁵ Tua a tautolu ke he fekau ne fakamatala e tautolu, ti makai a tautolu ke tala age ai ke he tau tagata tokologa. Falanaki a tautolu ke he tau maveheaga i loto he Kupu he Atua. (Sala. 119:42; Isaia 40:8) Fitā he kitia e tautolu kua fakamooli e tau perofetaaga he Tohi Tapu he vahā ha tautolu. Kitia e tautolu e puhala kua hiki e tau momoui he tau tagata ke he mitaki he kamata a lautolu ke fakagahua e fakatonuaga he Tohi Tapu. Fakamalagaki he fakamooliaga nei e mauokafua ha tautolu ko e tala mitaki he Kautu ko e fekau kua lata he tau tagata oti ke logona.

16. Ke lagotatai mo e Salamo 46:1-3, fakamalolō fēfē he tua ki a Iehova mo Iesu e fifiliaga ha tautolu ke fakamatala?

¹⁶ Tua foki a tautolu ki a Iehova, ko e Punaaga he fekau ne fakamatala e tautolu, mo e ki a Iesu ne fakafoufou he Atua mo Patuiki he Kautu. (Ioane 14:1) Pete ni e tau tuaga ne fehagai mo tautolu, ko Iehova tumau e huaga mo e malolō ha tautolu. (Totou Salamo 46:1-3.) Lafi ki ai, mauokafua a tautolu ko Iesu ne takitaki e gahua fakamatala mai he lagi, he fakaaoga e malolō mo e pule ne age e Iehova ki a ia.​—Mata. 28:18-20.

17. Talahau e fakataiaga kua lata a tautolu ke tumau e fakamatala.

¹⁷ Atihake he tua e mauokafua ha tautolu to fakamonuina e Iehova e tau laliaga ha tautolu, falu magaaho he tau puhala kua nakai amanaki a tautolu ki ai. (Fakama. 11:6) Ma e fakatai, he  tau aho takitaha kua totou afe e tau tagata ne kitia e tau laulau po ke tau peleō ne fakatātā ai e tau tohi ha tautolu. Lauia mitaki nakai e puhala fakamatala nei? Ē! Ko e Ha Tautolu a Fekafekauaga he Kautu he Novema 2014 ne tohi hagaao ke he tama aoga univesitī ne manako ke tohi e tala hagaao ke he Tau Fakamoli a Iehova. Nakai maeke a ia ke moua e Fale he Kautu, ka e moua e ia e laulau ne fakatātā ai e tau tohi ha tautolu he aoga, ti moua foki e ia e tau vala tala ma e tala haana. Fakahiku ai kua eke a ia mo matakainaga papatiso, ko e paionia tumau mogonei. Ko e tau tala pihia ne fakalagalaga a tautolu ke tumau e fakamatala ha kua fakakite he tau tala ia na fai tagata agaia ne lata ke iloa mo e logona e fekau he Kautu.

18. Ko e ha kua iloa tonu e tautolu ko e gahua fakamatala he Kautu to oti ke he puhala kua manako a Iehova ki ai?

¹⁸ Maeke ai ke iloa tonu ko e gahua fakamatala he Kautu to fakaoti ai mo e nakai mule. Manamanatu ke he mena ne tupu he vahā ha Noa. Fakakite e Iehova ko ia ko e Leveki katoatoa he magaaho. Kavi ke he 120 e tau ato hoko e Fakapuke, fifili e Iehova e magaaho ke fakahoko e Fakapuke. Loga e tau he mole, poaki e Iehova ki a Noa ke tā e vaka. Liga 40 po ke 50 e tau ato kamata e Fakapuke, ne matutaki a Noa ke gahua malolō. Pete he fehagai mo e tau tagata nakai fanogonogo, tumau a ia ke fakamatala e fekau hataki ato pehē a Iehova kua hoko e magaaho ke tamai e tau manu ki loto he vaka. He mogo tonu ia, kua “puipui [pā] ai e Iehova” e gutuhala.​—Kene. 6:3; 7:1, 2, 16.

19. Ko e heigoa ka amanaki atu a tautolu ki ai ka nakai okioki e tau lima ha tautolu?

¹⁹ Nakai leva ti fakaoti e Iehova e gahua fakamatala; to ‘pā’ e ia e gutuhala ke he fakatokaaga ha Satani mo e tamai e lalolagi foou tututonu. Ato hoko e mogoia, kia fifitaki e tautolu a Noa, Hapakuka, mo e falu ne nakai okioki ha lautolu a tau lima. Kia hagaaki tumau, kia fakauka, mo e fakatumau e malolō he tua ki a Iehova mo e tau maveheaga haana.