1. Liga ko e magaaho fe kua paleko ke fekafekau ki a Iehova?

KO E magaaho fe ka manatu a koe kua mua atu e uka ke fekafekau ki a Iehova​—mogo kia kua fehagai a koe mo e tau lekua uka po ke mafola e moui? Ka fehagai a tautolu mo e tau lekua, mafiti a tautolu ke falanaki ki a Iehova. Ka ko e heigoa ha tautolu ka taute he mafola e tau momoui? Liga fakatauhele kia a tautolu he fekafekau ke he Atua? Hataki e Iehova e tau Isaraela to tupu e mena nei.​—Teu. 6:10-12.

2. Ko e heigoa e fakafifitakiaga ne fakatoka he Patuiki ko Asa?

² Ko e fakafifitakiaga mitaki lahi e Patuiki ko Asa ne gahua fakailoilo he falanaki katoatoa ki a Iehova. Fekafekau a ia ki a Iehova he tau magaaho kelea mo e tau magaaho mafola foki. He kamataaga, “ko Asa kua fakalataha a ia mo Iehova mo e loto katoa . . . hana.” (1 Patu. 15:14) Taha puhala ne fakakite e Asa e loto katoa haana he moumou e tapuakiaga fakavai i Iuta. Pehē e Tohi Tapu “ne uta kehe e ia e tau fatapoa kua eke ke he tau atua kehe, mo e tau mena tokoluga, ne lipilipi foki e ia e tau tupua, mo e hio ki lalo e tau tupua Asaira.” (2 Nofo. 14:3, 5) Ne utakehe foki e ia a Maaka ko e tupuna fifine haana mai he tuaga tokoluga he motu haana. Ko e ha? Ha kua omoomoi e ia e tapuakiaga fakavai he tupua tā.​—1 Patu. 15:11-13.

3. Ko e heigoa ka fakatutala e tautolu he vala tala nei?

³ Lahi atu e mena ne taute e Asa he moumou e tapuakiaga fakavai. Fakaholo ki mua e ia tapuakiaga meā he lagomatai e tau tagata ha Iuta ke liu tapuaki ki a Iehova. Fakamonuina e Iehova a Asa mo e tau Isaraela he foaki age e magaaho mafola. * He magahala he hogofulu e tau he pule a Asa, “kua mafola e  motu.” (2 Nofo. 14:1, 4, 6) He vala tala nei, to fakatutala a tautolu ke he puhala ne fakaaoga e Asa e magaaho mafola. Mo e to fakatutala a tautolu ke he fakafifitakiaga he tau Kerisiano he senetenari fakamua ne fakaaoga fakamitaki e magaaho mafola, tuga ne taute e Asa. Fakahiku ai, to tali e tautolu e hūhū nei: Ka nofo a koe he motu ne moua e atāina ke tapuaki, fakaaoga fakailoilo fēfē e koe e magaaho mafola ia?

4. Ia 2 Nofoaga he Tau Patuiki 14:2, 6, 7, fakaaoga fēfē e Asa e magaaho mafola?

⁴ Totou 2 Nofoaga he Tau Patuiki 14:2, 6, 7. Tala age a Asa ke he tau tagata, ko Iehova ne ‘foaki mai kia lautolu ke okioki ai ke he tau fahi oti.’ Nakai logona hifo e Asa ko e magaaho mafola nei ko e magaaho fiafia hokoia. Ka e kamata a ia ke talaga e tau maaga, tau kaupā, tau kolo, mo e tau gutuhala. Tala age a ia ke he tau tagata ha Iuta: “Kua toka agaia e kelekele ki mua ha tautolu.” Ko e heigoa e kakano ha Asa? Kakano a ia kua maeke e tau tagata ke atāina ke o fano ke he motu ne foaki he Atua mo e talaga ka e nakai totoko mai e tau fī. Tomatoma e ia e tau tagata ke fakaaoga fakamitaki e magaaho mafola nei.

5. Ko e ha ne fakamalolō e Asa e tau kautau haana?

⁵ Fakaaoga foki e Asa e magaaho mafola ke fakamalolō e tau kautau haana. (2 Nofo. 14:8) Kakano kia e mena nei kua nakai falanaki a ia ki a Iehova? Nakai. Ka e iloa e Asa ko e matagahua haana ko e patuiki ke tauteute e tau tagata ka fehagai mo e tau lekua i mua. Iloa e Asa ko e magaaho mafola ne moua e Iuta ne tuga kua nakai tumau e mafola ti kitia mooli e mena nei.

6. Fakaaoga fēfē he tau Kerisiano fakamua atu ia e magaaho mafola?

⁶ Pete ia kua favale ke he tau Kerisiano fakamua atu ia, na moua foki e lautolu e magahala  mafola. Fakaaoga fēfē he tau tutaki e tau magaaho ia? Nakai fakalolelole e tau tagata taane mo e tau fifine fakamooli ia ne fakamatala e tala mitaki. Talahau he tala ia Gahua “kua feoaki foki a lautolu mo e matakutaku ke he Iki [Iehova].” Fakatumau a lautolu ke fakamatala e tala mitaki, ti ko e fua kua “fakatokologa” a lautolu. Fakamonuina mooli e Iehova e fakamatala fakamakutu ha lautolu he tau magaaho mafola.​—Gahua 9:26-31.

7-8. Ko e heigoa ne taute e Paulo mo e falu he moua e lautolu e magaaho? Fakamaama.

⁷ Ko e tau tutaki fakamua atu ne fakaaoga fakamitaki e tau magaaho ke folafola e tala mitaki. Taha he fakataiaga ia ko e magaaho ne mailoga he aposetolo ko Paulo e gutuhala lahi kua hafagi ki a ia he nofo a ia i Efeso. Fakaaoga fakamitaki e ia e magaaho ke fakamatala mo e taute tutaki he maaga.​—1 Kori. 16:8, 9.

⁸ Ko e taha magaaho foki ne hafagi ki a Paulo mo e falu Kerisiano he fakamafola e matakupu he peritome he 49 V.N. (Gahua 15:23-29) He mole e tala age e fifiliaga ke he tau fakapotopotoaga, ne eketaha e tau tutaki ke fakailoa e “vagahau mitaki he Iki [Iehova].” (Gahua 15:30-35) Ko e heigoa e fua? Pehē e Tohi Tapu “kua mauokafua e tau ekalesia ke he tua, mo e fakatokologa a lautolu ke he taha aho mo e taha aho.”​—Gahua 16:4, 5.

9. Ko e heigoa e tuaga he tau motu loga he vahā nei, ti ko e heigoa ka hūhū hifo ki a tautolu ni?

⁹ Loga e motu he vahā nei ne atāina ke fakamatala. Nofo nakai a koe he motu ne moua e atāina ke tapuaki? Ka pihia ti hūhū hifo, ‘Fakaaoga fēfē e au e atāina nei?’ He tau aho fakamui nei, kua holo ki mua e gahua fakamatala mo e fakaako atu he fakatokatokaaga ha Iehova nakaila pihia fakamua. (Mare. 13:10) Loga e tuaga kua hafagi ke he tau tagata ha Iehova.

10. Ko e heigoa kua fakamafana he 2 Timoteo 4:2 ke taute e tautolu?

¹⁰ Fakaaoga fēfē e koe e magaaho mafola? (Totou 2 Timoteo 4:2.) Ko e ha he kumikumi ke he tuaga haau ke kitia kaeke ko koe po ke tagata he magafaoa haau kua fakaholo ki mua e gahua fakamatala, liga ke fekafekau foki ko e paionia? Nakai ko e magaaho anei ke tutuli e tau monuina mo e tau koloa he tino, ko e tau mena ka nakai hao atu mo tautolu he matematekelea lahi.​—Fakatai 11:4; Mata. 6:31-33; 1 Ioa. 2:15-17.

11. Ko e heigoa kua taute he falu ke hokotia e tala mitaki ke he tau tagata tokologa?

¹¹ Loga e tagata fakailoa ne fakaako e vagahau foou ke maeke a lautolu ke fakaaoga he fakamatala mo e fakaako atu. Lalago he fakatokatokaaga he Atua a lautolu he taute e tau tohi ne fakavē ke he Tohi Tapu ke he loga e tau vagahau. Ma e fakatai, he 2010 kua moua e tau tohi ha tautolu ke he kavi ke 500 e vagahau. Mogonei kua malikiti e numera ia ke he molea 1,000 vagahau!

12. Aoga fēfē e tau tagata he logona e fekau he Kautu he vagahau motu ha lautolu? Talahau e fakatai.

¹² Ko e heigoa e lauiaaga ke he tau tagata tokologa he logona e lautolu e kupu mooli mai he Kupu he Atua ke he vagahau motu ni ha lautolu? Manamanatu ke he tala he matakainaga fifine he fonoaga he magamotu i Memphis, Tennessee i U.S.A. Ne taute e fonoaga ke he vagahau Kinyarwanda ne fakaaoga lahi i Rwanda, Congo (Kinshasa), mo Uganda. He mole e fonoaga, ko e matakainaga fifine vagahau Kinyarwanda ne pehē: “Ko e magaaho fakamua anei kua maeke au ke maama katoa e fakaholoaga fakaagaaga tali mai he 17 e tau he hiki ki United States.” Maaliali ai, kua aamotia lahi e matakainaga fifine nei he logona e ia e  fakaholoaga he vagahau motu haana. Ka fakaatā he tuaga haau a koe, to maeke nakai a koe ke fakaako e taha vagahau ke lagomatai falu he fonua haau? Liga fai pauaki he fonua he fakapotopotoaga haau ne kua fiafia e falu ke vagahau e taha vagahau? To moua e koe e fiafia he gahua lahi haau.

13. Fakaaoga fēfē he tau matakainaga ha tautolu i Rusia e magaaho mafola?

¹³ Nakai moua oti he tau matakainaga ha tautolu e atāina ke fakamatala. Falu mogo, ko e pā he fakatufono ne fakakaupā lahi e puhala ne taute e tautolu e gahua fakamatala. Ma e fakatai, manamanatu ke he tau matakainaga i Rusia. He tau hogofulu tau kua mole he favaleaga, ne moua e lautolu e tokanoaaga ia Mati 1991. He magaaho ia, kavi ke he 16,000 he tau tagata ne fakapuloa e Kautu i Rusia. Uafulu e tau he mole, ne tupu e numera ia ke molea e 160,000 he tau tagata fakailoa! Maaliali ai, kua gahua fakailoilo e tau matakainaga ha tautolu he fai magaaho ke atāina he fakamatala. Nakai tumau e magaaho mafola ia. Ka e nakai fakalolelole he tau tuaga ia kua hiki e makai ha lautolu ke fakaholo ki mua e tapuakiaga meā. Matutaki a lautolu ke fekafekau ki a Iehova he fakaaoga e tau puhala oti ne maeke ia lautolu.

14-15. Fakakite fēfē e Iehova e malolō haana ke lagomatai a Asa?

¹⁴ He vahā ha Asa, ne fakahiku e magaaho mafola ke oti. Ko e matakau tau lahi ne molea e taha e miliona kautau ne o mai i Aitiope. Ko e takitaki kau ko Saraha ne mauokafua to fakakaumahala e ia mo e tau kautau haana a Iuta. Ka e falanaki e Patuiki ko Asa ke he haana Atua ko Iehova, ka e nakai ke he numera he tau kautau. Liogi a Asa: “Iehova na e, ha mautolu a Atua, kia lagomatai mai a kia mautolu; ha kua  falanaki a mautolu kia koe, kua o atu ni a mautolu ke he hau a higoa ke tau mo e motu o tagata tokologa na.”​—2 Nofo. 14:11.

¹⁵ Pete kua teitei fakalahi ua e numera he tau kautau he matakau Aitiope, ka e iloa e Asa kua ha ha ia Iehova e malolō mo e lotomatala ke lagomatai e tau tagata Haana. Lagomatai mooli e Iehova a ia ti kaumahala e matakau tau Aitiope.​—2 Nofo. 14:8-13.

16. Iloa fēfē e tautolu to nakai tumau e magaaho mafola?

¹⁶ Pete kua nakai iloa e tautolu e tau vala tala oti kua fakatoka mai he vahā i mua ma tautolu takitokotaha, ka e iloa e tautolu kua nakai tumau e magaaho mafola kua moua he tau tagata he Atua mogonei. Manatu, talahau tuai e Iesu he tau aho fakamui ko e tau tutaki haana “to vihiatia foki . . . he tau motu oti.” (Mata. 24:9) Talahau pihia foki he aposetolo ko Paulo “ko lautolu oti foki kua loto ke nonofo mo e mahani Atua kia Keriso Iesu, to hoko ni kia lautolu e favale.” (2 Timo. 3:12) Kua “ita lahi” a Satani ti nakai maeke a tautolu ke hao mai he tau lauiaaga he ita lahi haana.​—Fakakite. 12:12.

17. He tau puhala fe ka kamatamata e tua ha tautolu?

¹⁷ He vahā tata i mua, to fehagai oti a tautolu mo e tau kamatamata he mahani fakamooli. Nakai leva to lauia e lalolagi he ‘matematekelea lahi, nakai pihia taha mena tali mai he kamataaga he lalolagi, kua hoko ni ke he vaha nai.’ (Mata. 24:21) He magaaho ia, to totoko mai e tau tagata he magafaoa ki a tautolu ti liga pā e gahua ha tautolu. (Mata. 10:35, 36) To liga falanaki oti kia a tautolu tuga a Asa, ki a Iehova ma e lagomatai mo e puipuiaga?

18. Ia Heperu 10:38, 39, ko e heigoa ka lagomatai a tautolu ke mautauteute ma e magaaho kū he mafola?

¹⁸ Hane tauteute e Iehova a tautolu fakaagaaga ke lata mo e tau mena ne fakatoka mai i mua. Takitaki e ia “e fekafekau fakamoli mo e loto matala” ke foaki “e tau mena kai [huhua] ke he tau magaaho” tonu ke lagomatai a tautolu ke fakatumau e mauokafua ke he tapuakiaga ha tautolu. (Mata. 24:45) Ka e lata ke taute e vala ha tautolu he atihake e tua malolō ki a Iehova.​—Totou Heperu 10:38, 39.

19-20. He oti e totou he 1 Nofoaga he Tau Patuiki 28:9, ko e heigoa e tau hūhū kua lata ke hūhū hifo, ti ko e ha kua lata ai ke hūhū pihia?

¹⁹ Tuga e Patuiki ko Asa, lata a tautolu ke  ‘kumi a Iehova.’ (2 Nofo. 14:4; 15:1, 2) Kamata a tautolu ke kumi ai he iloa a Iehova ti papatiso. Fakaaoga e tautolu e tau magaaho oti he fakamalolō ha tautolu a fakaalofa ki a Iehova. Ke kamatamata e tautolu ha tautolu a tuaga, liga hūhū hifo a tautolu, ‘Fano tumau nakai au ke he tau feleveiaaga he fakapotopotoaga?’ Ka ō a tautolu he tau feleveiaaga ne taute he fakatokatokaaga ha Iehova, to moua e tautolu e okiokiaga fakaagaaga mooli fakalataha mo e fakamafana mai he tau matakainaga. (Mata. 11:28) Liga hūhū hifo foki, ‘Fakaako tumau nakai e au e Tohi Tapu?’ Ka nofo a koe mo e magafaoa haau, fakatoka nakai e koe e magaaho he tau faahi tapu takitaha ma e tapuakiaga magafaoa? Po ke ka nofo tokotaha a koe, fakatoka agaia nakai e koe e magaaho tuga ni he fakalataha a koe mo e magafaoa? Fakalataha katoatoa foki nakai a koe ke he gahua fakamatala mo e taute tutaki?

²⁰ Ko e ha kua lata a tautolu ke hūhū e tau hūhū nei? Talahau he Tohi Tapu ki a tautolu kua kumikumi a Iehova ke he tau manatu mo e tau mena he tau loto ha tautolu, ti kua lata a tautolu ke taute pihia. (Totou 1 Nofoaga he Tau Patuiki 28:9.) Ka kitia e tautolu kua lata ke taute e falu hikiaga ke he ha tautolu a foliaga, aga, po ke manamanatuaga, kua lata a tautolu ke ole ki a Iehova ke lagomatai a tautolu ke taute e tau hikiaga ia. Ko e magaaho anei ke tauteute e tautolu a tautolu ma e tau kamatamata ne fakatoka mai i mua. Ua fakaatā ha mena ke taofi a koe he fakaaoga fakailoilo e magaaho mafola!