1. Ko e heigoa e lalagoaga ne foaki he tau matakainaga fifine ke he fakatokatokaaga, ka ko e heigoa e tau paleko ne fehagai he tokologa ia lautolu? (Kikite fakatino he kili.)

KUA loto fakaaue mooli a tautolu ha ko e gahua malolō he tau matakainaga fifine tokologa i loto he fakapotopotoaga! Ma e fakatai, fai vala a lautolu he tau feleveiaaga mo e gahua fakamatala. Falu ne lagomatai ke leveki e Fale he Kautu, ti fakakite e lautolu e fiafia ke he tau matakainaga tapuaki. Ka e fehagai a lautolu mo e tau paleko. Falu ne leveki e tau matua momotua. Falu ne fakauka ke he totokoaga mai he tau tagata he magafaoa. Mo e falu foki ko e tau matua takitokotaha ne gahua malolō ke leveki e tau fanau.

2. Ko e ha kua lata a tautolu ke lalago e tau matakainaga fifine?

² Ko e ha kua lata ke lalago e tau matakainaga fifine? Ha kua nakai fakalilifu tumau he lalolagi e tau fifine. Lafi ki ai, fakamafana he Tohi Tapu a tautolu ke lalago e tau matakainaga fifine. Tuga anei, tala age e aposetolo ko Paulo ke he fakapotopotoaga i Roma ke fakaalofa age ki a Fipe mo e ‘lagomatai kia ia ke he mena kua manako ki ai a ia.’ (Roma 16:1, 2) He mogo ne eke a Paulo mo Farasaio, ko e aga fakamotu ke taute fakakelea e tau fifine. Ka ko e mogo fakamui ne eke a ia mo Kerisiano, fifitaki e ia a Iesu he fakalilifu mo e mahani totonu ke he tau fifine.​—1 Kori. 11:1.

3. Taute fēfē e Iesu e tau fifine, ti fēfē e onoonoaga haana ke he tau fifine ne taute e finagalo he Atua?

³ Fakalilifu e Iesu e tau fifine oti. (Ioane 4:27) Nakai onoono a ia ke he tau fifine tuga e tau takitaki lotu Iutaia he vahā haana. He taha tohi ke he Tohi Tapu ne pehē: “Nakai taha he tau kupu ha Iesu ne ekefakakelea po ke tuku ki lalo e tau fifine.” Ka e lahi e fakalilifu e Iesu e tau fifine ne taute e finagalo he Matua haana. Fakahigoa e ia a lautolu ko e tau matakainaga fifine po ke tau mahakitaga ne totoku fakalataha mo e tau tagata taane ne onoono a ia ki ai ko e vala he magafaoa fakaagaaga haana.​—Mata. 12:50.

4. Ko e heigoa ka fakatutala a tautolu he vala tala nei?

 ⁴ Mautali tumau a Iesu ke lagomatai e tau matakainaga fifine fakaagaaga haana. Loto fakaaue a ia ki a lautolu ti vagahau hake a ia ma lautolu. Kia fakatutala ke he puhala ka fifitaki e tautolu a Iesu he manamanatu ke he tau matakainaga fifine ha tautolu.

5. Ko e ha ne liga uka he falu matakainaga fifine ke aoga mai he tau lafiaga atihake?

⁵ Lata oti a tautolu ko e tau matakainaga ke moua e lafiaga mitaki. Ka e he falu a magaaho, liga paleko ke he tau matakainaga fifine ke fakapuke e manako nei. Ko e ha? Mailoga e talahauaga nā. Ko e matakainaga fifine ko Jordan * ne pehē, “He nakai fai taane au, nakai fai tuaga au ti logona hifo kua nakai fai vala au he fakapotopotoaga.” Ko Kristen ko e paionia ne hiki ke fakalaulahi e fekafekauaga haana ne pehē, “Ka foou a koe ke he fakapotopotoaga, liga matimati a koe.” Liga pihia foki e tau matakainaga taane. Ko lautolu ne nonofo he kaina ne mavehevehe fakalotu ne fa logona hifo e vevehe kehe mai he magafaoa fakatino mo e he magaaho taha logona hifo pihia ke he magafaoa fakaagaaga. Falu matakainaga fifine ne liga matimati ha kua nonofo fale a lautolu he gagao ti nakai maeke ke ō kehe he kaina, po ke leveki a lautolu he tau tagata he magafaoa kua gagao. Ko Annette ne pehē, “Nakai talia e au e tau uiina ke he tau lafiaga ha ko au ne leveki pauaki e matua fifine haaku.”

6. Lagomatai fēfē e Iesu a Mareta mo Maria he Luka 10:38-42?

⁶ Fai magaaho a Iesu mo e tau matakainaga fifine fakaagaaga haana, ti ko ia ko e kapitiga mooli ki a lautolu. Manamanatu ke he haana fakafetuiaga kapitiga mo Maria mo Mareta ne nakai fai taane tokoua a laua. (Totou Luka 10:38-42.) Ko e tau kupu mo e tau gahua ha Iesu, kua fakatotoka mooli e tau logonaaga ha laua. Kua atāina e logonaaga ha Maria ke nofo i lalo he tau vē a Iesu ko e tutaki. * Ti ko e mogo ne nakai fiafia a Mareta he nakai lagomatai e Maria, ne atāina a ia ke tala age e manatu haana ki a Iesu. He haia i ai, maeke a Iesu ke lagomatai fakaagaaga e tau fifine tokoua nei. Ti fakakite e ia e levekiaga haana ke he tau fifine tokoua nei mo e ha laua a tugaane ko Lasalo he ahiahi atu ki ai he falu magaaho foki. (Ioane 12:1-3) Ko e mogo ne gagao lahi mahaki a Lasalo, iloa e Maria mo Mareta kua maeke a laua ke ole ki a Iesu ma e lagomatai.​—Ioane 11:3, 5.

7. Ko e heigoa taha puhala ka fakamalolō e tautolu e tau matakainaga fifine?

⁷ Ma e falu matakainaga fifine, ko e tau feleveiaaga ko e tau magaaho pauaki ha lautolu ke fakalataha mo e tau matakainaga tapuaki. Ti manako a tautolu ke fakaaoga e tau magaaho ia ke fakafeleveia, tutala, mo e fakakite kua manamanatu a tautolu ki a lautolu. Ko Jordan ne totoku fakamua ne pehē, “Kua uho lahi mahaki ka mailoga he falu e tau tali haaku, fakatoka ke gahua fakamatala mo au, po ke lagomatai au he falu puhala.” Lata a tautolu ke tala age ke he tau matakainaga fifine kua uho lahi a lautolu ki a tautolu. “Pehē e matakainaga fifine ko Kia, ka ai fano au he feleveiaaga to matutaki mai e tau matakainaga ke fakakia mai ki a au. Fakakite he mena ia kua manamanatu e tau matakainaga ki a au.”

8. Ko e heigoa e falu puhala ka fifitaki e tautolu a Iesu?

⁸ Tuga a Iesu, lali a tautolu ke fai magaaho  mo e tau matakainaga fifine. Maeke ke uiina e tautolu a lautolu ke he kai mukamuka po ke taha fakafiafiaaga. Ka taute pihia, manako a tautolu ke atihake tumau e fakatutalaaga. (Roma 1:11, 12) Lata e tau motua ke tokaloto tumau e aga ha Iesu. Iloa e ia ko e nofo tokotaha kua maeke ke paleko ma e falu, ka e talahau fakamaaliali foki e ia ko e fai taane mo e faihoana po ke fai fanau ne nakai ko e matapatu ke he fiafia tukulagi. (Luka 11:27, 28) Ka ko e fiafia tukulagi kua moua mai he tuku fakamua e fekafekauaga ki a Iehova.​—Mata. 19:12.

9. Ko e heigoa ka taute he tau motua ke lagomatai e tau matakainaga fifine?

⁹ Lata pauaki e tau motua ke taute e tau fifine Kerisiano ko e tau matakainaga fifine fakaagaaga mo e tau matua fifine ha lautolu. (1 Timo. 5:1, 2) Lata foki e tau motua ke fai magaaho to kamata po ke ka hili e tau feleveiaaga ke tutala mo e tau matakainaga fifine. “Taha e motua ne mailoga kua lavelave au ti manako ke maama ko e fēfē e fakaholoaga haaku,” he ui e Kristen. “Fakaaue lahi au ha kua manamanatu mooli a ia ki a au.” Ka fai magaaho tumau e tau motua ke tutala mo e tau matakainaga fifine fakaagaaga, fakakite e lautolu kua manamanatu a lautolu ke he tau matakainaga fifine. * Ko Annette ne totoku fakamua, ne talahau e taha aoga he tutala  tumau mo e tau motua. Pehē a ia: “Iloa mitaki e au a lautolu, ti iloa e lautolu au. Ti ka fai lekua au, logona hifo e au e atāina ke ole ki a lautolu ma e lagomatai.”

10. Ko e heigoa kua lagomatai e tau matakainaga fifine ha tautolu ke tupu olaola?

¹⁰ Ko tautolu oti, ko e tau tagata taane mo e tau fifine kua tupu olaola ka fakaaue e falu ke he tau iloaaga ha tautolu mo e talahau kua loto fakaaue a lautolu ke he gahua kua taute e tautolu. He taha faahi ka uta fakateaga e tau lotomatala mo e tau gahua ha tautolu, kua fifigo e tau loto ha tautolu. Ko e paionia nofo tokotaha ko Abigail ne talahau kua fa logona hifo e ia e fakaheu ki a ia he falu mogo: “Kua kitia noa ni a ia ha ko e lafu haana po ke tama ha mena mo mena. Falu mogo logona hifo e au kua nakai fai tagata ne iloa au.” Ka e mailoga e talahauaga he matakainaga fifine ko Pam. He nofo tokotaha, ne fekafekau au ko e misionare ke he loga e tau tau. Fakamui ne liu a ia ki kaina ke leveki e tau matua haana. He 70 tumā e tau haana mogonei, ne paionia agaia a ia. Pehē a Pam: “Lagomatai lahi ki a au he mogo ka tala mai e falu kua loto fakaaue a lautolu ki a au.”

11. Fakakite fēfē e Iesu kua tokiofa e ia e tau fifine ne fakalataha mo ia he fekafekauaga haana?

¹¹ Tokiofa e Iesu e lagomatai ne moua e ia mai he tau fifine mahani Atua ne fekafekau ki a ia mai he “tau mena ha lautolu.” (Luka 8:1-3) Nakai ni fakaatā e ia a lautolu ke moua e lilifu ka e fakakite foki ki a lautolu e tau kupu mooli uho lahi. Ma e fakatai, tala age a ia ki a lautolu to mate a ia ti liu tu mai. (Luka 24:5-8) Ne mautauteute e ia e tau fifine nei ke tuga ne taute e ia ke he tau aposetolo ke lata mo e tau kamatamata ka fehagai mo lautolu. (Mare. 9:30-32; 10:32-34) Pete he fehola e tau aposetolo he mogo ne tapaki a Iesu, ko e falu he tau fifine ne lalago a ia kua tutū tata atu ki a ia he teitei mate a ia he akau fakatautau.​—Mata. 26:56; Mare. 15:40, 41.

12. Ko e heigoa e gahua ne foaki e Iesu ke he tau fifine?

¹² Kua foaki e Iesu ke he tau fifine e gahua uho lahi. Ma e fakatai, ko e tau fifine mahani Atua ne kitia fakamua e liu tu mai haana. Ole a ia ki a lautolu ke tala age ke he tau aposetolo kua fakaliu tu mai a ia he mate. (Mata. 28:5, 9, 10) He Penetekoso 33 V.N., liga ko e tau fifine i ai mogo ne liligi hifo e agaaga tapu. Ka pihia, ko e tau matakainaga fifine fakauku foou nei kua liga moua e lotomatala pauaki ke vagahau he tau vagahau kehe mo e tala age ke he falu e “tau mana he Atua.”​—Gahua 1:14; 2:2-4, 11.

13. Ko e heigoa hane taute he tau fifine Kerisiano mogonei, ti fakakite fēfē e tautolu e loto fakaaue ke he tau gahua ha lautolu?

¹³ Lata e tau matakainaga fifine ha tautolu ke nava ha ko e gahua ne taute e lautolu he fekafekauaga ha Iehova. Lafi ke he tau matagahua ia ko e talaga mo e leveki he tau fale, lalago e tau matakau vagahau kehe, mo e gahua he tau fale Peteli. Lagomatai foki a lautolu ke he tau matagahua matematekelea tutupu pauaki, lagomatai ke fakaliliu e tau tohi, mo e fekafekau ko e tau paionia mo e tau misionare. Tuga e tau matakainaga taane, ō e tau matakainaga fifine he aoga paionia, Aoga ma e Tau Tagata Fakamatala, mo e Aoga Kiliata. Lafi ki ai, ko e tau hoana kua lagomatai e tau taane ha lautolu ke taute e tau matagahua ha lautolu he fakapotopotoaga mo e fakatokatokaaga. Ko e tau matakainaga taane tū kotofa nei kua nakai maeke ke fekafekau katoatoa ko e “tau mena fakaalofa ke he tau tagata” ka noa mo e lalagoaga he tau hoana ha lautolu. (Efeso 4:8) Maeke nakai a koe ke manamanatu ke he tau puhala ke lalago e tau matakainaga fifine nei ke he gahua ne taute e lautolu?

14. Ha ko e tau mena kua talahau ia Salamo 68:11, ko e heigoa kua taute he tau motua lotomatala?

¹⁴ Ko e tau motua lotomatala ne mailoga “kua lahi e kau” he tau matakainaga fifine kua gahua  fakamakai ti fa mitaki lahi a lautolu he fakamatala e tala mitaki. (Totou Salamo 68:11.) Ti kumi puhala e tau motua ke moua e iloaaga mai he tau matakainaga fifine. Ko Abigail ne totoku fakamua ne loto fakaaue ka ole e tau matakainaga taane ki a ia ke he tau puhala lauia mitaki ke tutala ke he tau tagata he fonua. Pehē a ia, “Lagomatai he mena ia au ke kitia kua fai gahua a Iehova ke lata mo au he fakatokatokaaga haana.” Lafi ki ai, mailoga he tau motua ko e tau matakainaga fifine fakamooli mo e motua fakaagaaga kua mitaki lahi he lagomatai e tau matakainaga fifine fuata ke fehagai mo e tau paleko. (Tito 2:3-5) Lata mooli e tau matakainaga fifine ha tautolu ke moua e loto fakaaue!

15. Magaaho fe ka lata e tau matakainaga fifine ke he taha tagata ke vagahau hake ma lautolu?

¹⁵ Falu magaaho kua liga lata e tau matakainaga fifine ha tautolu ke fai tagata ke vagahau hake ma lautolu ka fehagai a lautolu mo e paleko pauaki. (Isaia 1:17) Ma e fakatai, ko e takape po ke matakainaga fifine ne kua tau vevehe mo e taane ne liga lata ke fai tagata ke vagahau hake ma haana mo e lagomatai a ia ke taute falu gahua ne fa taute he taane haana. Ko e matakainaga fifine motua kua liga lata ke lagomatai ke tutala ke he tau ekekafo. Po ke matakainaga fifine paionia kua gahua he tau talagaaga he fakatokatokaaga a Iehova kua lata ke fai tagata ke vagahau ma haana ka tuhituhi ki a ia he nakai fano tumau he gahua fakamatala ke tuga falu paionia. Lagomatai fēfē foki e tautolu e tau matakainaga fifine ha tautolu? Liu la ke fakatutala ke he fakafifitakiaga ha Iesu.

16. Vagahau hake fēfē a Iesu ke lata mo Maria he tohi a Mareko 14:3-9?

¹⁶ Mafiti a Iesu ke vagahau hake ma e tau matakainaga fifine fakaagaaga haana he magaaho ka nakai maama he falu a lautolu. Tuga anei, lalago e ia a Maria he tuhituhi e Mareta. (Luka 10:38-42) Ti lalago e ia a Maria ke lagauaaki he mogo ne ekefakakelea he falu a Maria he taute e mena kua manatu a lautolu ko e fifiliaga hepe. (Totou Mareko 14:3-9.) Maama e Iesu e fatuakiloto ha Maria ti nava ki a ia he pehē: “Ko e mena mitaki ne eke e ia kia au nai. . . . Kua eke e ia e mena ne maeke ia ia.” Talahau foki e ia ko e mahani totonu ha Maria to fakailoa ke he “tau mena oti kana ha he lalolagi ke fakamatala ai e vagahau mitaki nai,” tuga hane taute he vala tala nei mogonei. Ofoofogia he totoku e Iesu e tala mitaki ka fakamatala ke he lalolagi katoa he nava e ia e mahani fakamokoi he fifine nei! Kua fakamafana mooli he tau kupu haana a Maria he mole e nakai fakafili tonu ki ai!

17. Talahau e fakatai ka lata a tautolu ke vagahau hake ma e matakainaga fifine.

¹⁷ Vagahau hake nakai a koe ke lata mo e tau matakainaga fifine fakaagaaga haau ka manako lagomatai a lautolu? Ma e fakatai, manamanatu ke he tala nei. Kitia he falu tagata fakailoa ko e matakainaga fifine he kaina ne nakai tua e magafaoa kua fa hau mule ke he tau feleveiaaga ti fano mafiti ka hili. Mailoga e lautolu kua lavea ke tamai e ia e tau fanau haana. Ti tuhituhi e lautolu a ia ha kua manatu a lautolu kua lata a ia ke fekau e taane haana ke fakaatā a ia ke tamai e tau tama ke he feleveiaaga. Ka kua kaumahala a lautolu ke nava e gahua mitaki kua taute he matakainaga fifine. Nakai ha ha ia ia e pule katoatoa ke he fakaholoaga haana; po ke nakai ha ha ia ia e fifiliaga fakahiku ke he tau fanau haana. Ko e heigoa haau ka taute? Ka nava a koe ke he matakainaga fifine ti tala age ke he falu e mena mitaki hane taute e ia to taofi e koe e tau tala tuhituhi.

18. Ko e heigoa falu puhala ka lagomatai e tautolu e tau matakainaga fifine?

¹⁸ Fakakite e tautolu ke he tau matakainaga fifine e lahi he levekiaga ha tautolu ki a lautolu  he foaki e tau lagomataiaga ki a lautolu. (1 Ioa. 3:18) Ko Annette ko e matakainaga fifine ne leveki e matua fifine haana ne gagao, ne pehē: “Falu he tau kapitiga kua o mai ke leveki e matua fifine haaku ka e taute au taha mena, po ke tamai e lautolu e tau mena kai. Logona e au e fakaalofa mo e fai vala he fakapotopotoaga.” Moua foki e Jordan e lagomatai. Tala age he matakainaga taane ki a ia e falu puhala ke leveki aki e motokā haana. Pehē a ia: “Homo he iloa kua leveki he tau matakainaga haaku e haohao mitaki haaku.”

19. Ko e heigoa e falu puhala ka lagomatai he tau motua e tau matakainaga fifine?

¹⁹ Eketaha foki e tau motua ke leveki e tau manako he tau matakainaga fifine. Iloa e lautolu kua manako a Iehova ke taute fakamitaki a lautolu ia. (Iako. 1:27) Ko e mena ia kua fifitaki e lautolu e mahani totonu ha Iesu he nakai taute e tau matafakatufono ka latatonu e falu puhala foki. (Mata. 15:22-28) Ko e tau motua ne lali fakalahi ke lagomatai e tau matakainaga fifine kua logona hifo e lautolu e lalagoaga. Mogo ne logona he leveki he matakau ha Kia kua hiki a ia ke he taha fale kehe, mafiti a ia ke fakatoka ke lagomatai. “Fakatote hifo he mena ia e tupetupe,” he ui e Kia. “Ha ko e tau kupu fakamafana mo e tau lagomatai he tau motua, kua fakakite fakamaali e lautolu ki a au kua aoga au ke he fakapotopotoaga ti nakai tokotaha au ka fehagai mo e tuaga uka.”

20-21. Fakakite fēfē kua tokiofa oti e tautolu e tau matakainaga fifine Kerisiano ha tautolu?

²⁰ Ka onoono viko a tautolu ke he fakapotopotoaga mogonei, loga e fakafifitakiaga he tau fifine Kerisiano gahua malolō kua lata ke lalago e tautolu. He fakaako mai he fifitakiaga ha Iesu, lagomatai e tautolu he fai magaaho mo lautolu mo e ke iloa a lautolu. Fakakite e tautolu e loto fakaaue ke he tau mena ne taute e lautolu he fekafekauaga he Atua. Ti vagahau hake a tautolu ma lautolu he magaaho kua latatonu.

²¹ He fakaotiaga he tohi haana ke he tau Roma, totoku pauaki he aposetolo ko Paulo tokohiva e fifine Kerisiano. (Roma 16:1, 3, 6, 12, 13, 15) Ai noa kua mafanatia e tau matakainaga fifine ia he logona e fakaalofa mo e nava haana. Lata foki a tautolu ke lalago oti e tau matakainaga fifine he fakapotopotoaga. Fakakite he mena ia kua tokiofa e tautolu a lautolu ko e vala he magafaoa fakaagaaga.