1. Ko e heigoa e uiina ha Iesu ke he tokofā e tagata takafaga ika, ti fēfē e tali ha lautolu?

KO E aposetolo ko Peteru, Aneterea, Iakopo, mo Ioane ne fai pisinisi takafaga ika. Manamanatu ke he ofo ha lautolu he logona e uiina ha Iesu: “Kia mumui mai a kia au, to eke e au a [mutolu] mo takafaga ke he tau tagata.” * Fēfē e tali ha lautolu? Pehē e Tohi Tapu: “Ati toka ai agataha e . . . tau kupega, ka e mumui atu kia ia.” (Mata. 4:18-22) Ko e fifiliaga ia ne hiki katoatoa e tau momoui ha lautolu. He nakai moua e lautolu e tau ika mooli, ka e “moua ai . . . e tau tagata.” (Luka 5:10) He vahā nei, kua uiina foki e Iesu e tau tagata loto fakamooli ne fiafia ke he kupu mooli. (Mata. 28:19, 20) Kua talia nakai e koe e uiina ha Iesu ke eke mo tagata takafaga ke he tau tagata?

2. Ko e ha kua lata a tautolu ke manamanatu fakahokulo ke he fifiliaga ke eke mo tau tagata takafaga ke he tau tagata, ti ko e heigoa ka lagomatai a tautolu ke taute e lakaaga ia?

² Liga kua holo ki mua e fakaako Tohi Tapu haau ti hoko ke he tuaga ke fifili ko e manako nakai a koe ke eke mo tagata fakailoa he tala mitaki. Ka fakauaua a koe ke talia e uiina ha Iesu, ua loto lolelole. Liga ko e fakauaua haau ha kua iloa e koe e uho lahi he fifiliaga nei. Mooli, na toka “agataha” e Peteru mo e tau tagata  haana e tau kupega ha lautolu. Ka e nakai taute fakatepetepe e Peteru mo e tau matakainaga haana e fifiliaga ia. Ne iloa mo e talia e lautolu a Iesu ko e Mesia he molea e ono e mahina fakamua. (Ioane 1:35-42) Pihia foki, liga kua fitā he iloa e koe hagaao ki a Iehova mo Iesu, ti manako a koe ke matutaki ke holo ki mua fakaagaaga. Ti lata a koe ke manamanatu fakahokulo ki ai ato taute e fifiliaga nei. Ko e heigoa ne lagomatai a Peteru, Aneterea, mo e falu ke taute e fifiliaga ha lautolu?

3. Ko e heigoa e tau mahani ka fakamalolō e manako haau ke talia e uiina ha Iesu?

³ Ko e tau tutaki fakamua ha Iesu ne manako, lotomatala, loto malolō, mo e akonaki fakatagata. Ko e tau mahani nei ne lagomatai a lautolu ke eke mo tau tagata takafaga mitaki ke he tau tagata. To fakatutala e vala tala nei ke he puhala ka feaki e koe e tau mahani nei ke maeke ke eke mo tutaki mitaki he Keriso.

4. Ko e heigoa ne omoomoi a Peteru ke eke mo tagata takafaga ke he tau tagata?

⁴ Ne moua e Peteru e tau ika ke leveki aki e magafaoa haana, ka e nakai ko e gahua ni hokoia. Ne fiafia mooli a Peteru ke he takafaga ika. (Ioane 21:3, 9-15) Fakaako foki a ia ke fiafia ke takafaga ke he tau tagata. Ha ko e lagomatai ha Iehova, ne iloa lahi e Peteru e gahua ia.​—Gahua 2:14, 41.

5. Fakavē ke he Luka 5:8-11, ko e ha ne matakutaku a Peteru, mo e ko e heigoa ka lagomatai a tautolu ke fahia ke he tau logonaaga pihia?

⁵ Fakamatala a tautolu ha kua fakaalofa ki a Iehova; ko e matapatu kakano a ia kua taute e tautolu e gahua nei. Ko e fakaalofa ha tautolu ki a Iehova ka lagomatai a tautolu ke fahia ke he tau logonaaga nakai lotomatala. Mogo ne uiina e Iesu a Peteru ke eke mo tagata takafaga ke he tau tagata, pehē a Iesu: “Ua matakutaku  a koe.” (Totou Luka 5:8-11.) Nakai matakutaku a Peteru ke he mena ka tupu ka eke a ia mo tutaki. Ka e ofomate a ia he tau ika loga ne moua he foaki laia e Iesu ki a lautolu, ti logona hifo e Peteru e nakai lotomatala he ole ke gahua mo Iesu. He taha faahi, liga tupetupe a koe he mailoga e tau mena kua putoia he eke mo tutaki he Keriso. Ka pihia, fakamalolō e fakaalofa haau ki a Iehova, Iesu, mo e katofia, to omoomoi a koe ke talia e uiina ha Iesu ke eke mo tagata takafaga ke he tau tagata.​—Mata. 22:37, 39; Ioane 14:15.

6. Ko e heigoa foki kua omoomoi a tautolu ke fakamatala?

⁶ Manamanatu ke he falu kakano kua omoomoi a tautolu ke fakamatala. Manako a tautolu ke omaoma e poaki ha Iesu: “Kia o atu . . . ke eke e tau motu oti kana mo tutaki.” (Mata. 28:19, 20) Fakamatala foki a tautolu ke he tau tagata ha kua “fakafita a lautolu, mo e tiaki atu ai” ti manako lahi ke fakaako e kupu mooli he Kautu. (Mata. 9:36) Manako a Iehova ke he tau tagata oti kana ke moua e iloilo tonu hagaao ke he kupu mooli mo e fakahao ai.​—1 Timo. 2:4.

7. Fakakite fēfē ia Roma 10:13-15 kua uho lahi e gahua fakamatala?

⁷ To omoomoi a tautolu ke taute e gahua fakahao nei ka manamanatu a tautolu ke he lauiaaga he gahua fakamatala ha tautolu. Nakai tuga e tagata takafaga ika ke sela po ke kai e tau ika haana ne moua, ko e tau tagata ne “moua” e tautolu kua maeke ke fakahao e tau momoui ha lautolu.​—Totou Roma 10:13-15; 1 Timo. 4:16.

8-9. Ko e heigoa kua lata e tagata takafaga ke iloa, mo e ko e ha?

⁸ He vahā ha Iesu, ko e tagata takafaga ika i Isaraela ne lata ke iloa ko e vahega ika fēfē haana ka liga moua. (Levi. 11:9-12) Lata foki a ia ke iloa ko e matakavi fe ka moua e tau ika. Fa nonofo e tau ika he magatahi ne lata mo lautolu mo e loga e mena kai. Aoga nakai e magaaho ka fina atu e tagata ke takafaga? Hagaao ke he magaaho mitaki lahi ke moua e tau ika, mailoga e mena ne tala age he Fakamoli he aelani he Pasifika ne uiina e misionare ke o atu ke futi ika. Pehē e misionare, “To feleveia a taua a pogipogi he matahola hiva.” Tali e matakainaga, “Ai maama ia koe. Ō a taua he magaaho hako ma e tau ika, nakai ko e magaaho ne hako ki a taua.”

⁹ Pihia foki, ko e tau tagata takafaga ke he tau tagata he senetenari fakamua ne ō atu ke he matakavi ne fai “ika” mo e he magaaho ka liga fai ika i ai. Ma e fakatai, fakamatala e tau tutaki ha Iesu he faituga mo e tau sunako, mai he taha fale ke he taha fale, mo e tau makete. (Gahua 5:42; 17:17; 18:4) Lata foki a tautolu ke iloa e aga he tau tagata he matakavi kua kotofa ki a tautolu. Lata a tautolu ke hikihiki mo e fakamatala he matakavi mo e magaaho kua liga moua e tautolu e tau tagata.​—1 Kori. 9:19-23.

10. Ko e heigoa e tau koloa kua foaki he fakatokatokaaga ha Iehova ma tautolu?

¹⁰ Lata e tagata takafaga ke moua e tau koloa hako ke fakaaoga mo e lata ke iloa e puhala ke fakaaoga aki. Lata foki a tautolu ke moua e tau koloa hako ma e gahua ha tautolu. Ti lata foki a tautolu ke iloa e puhala ke fakaaoga e koloa ia. Age e Iesu e tau fakatonuaga maaliali ke he tau tutaki haana ke he puhala ke takafaga ke he tau tagata. Tala age e ia ki a lautolu e tau mena ke uta, matakavi ke fakamatala, mo e mena ke talahau. (Mata. 10:5-7; Luka 10:1-11) Mogonei kua foaki he fakatokatokaaga ha Iehova e Puha Koloa Fakaako ne ha ha i ai e tau koloa kua gahua mitaki mooli. * Ti fakaako a tautolu ke fakaaoga e tau koloa ia. Ko e fakamahani ia kua  lagomatai a tautolu ke moua e mauokafua mo e lotomatala kua lata ke eke mo tau faiaoga mitaki.​—2 Timo. 2:15.

11. Ko e ha kua lata e tau tagata takafaga ke he tau tagata ke loto malolō?

¹¹ Ko e tau tagata takafaga ika ke uta ke sela kua lata ke loto malolō. Falu mogo ne fehagai a lautolu mo e tuaga hikihikifano he tahi. Fa mahani a lautolu ke gahua he pō mo e tau magatahi ne amanaki ti hiki e matagi po ke tō e afā. Lata foki e tau tagata takafaga ke he tau tagata ke loto malolō. Ka kamata a tautolu ke fakamatala ti fakailoa ko e Tau Fakamoli a Iehova a tautolu, liga fehagai a tautolu mo e “tau afā” he totokoaga he magafaoa, vaiga he tau kapitiga, mo e nakai talia e fekau ha tautolu. Ka e nakai ofo a tautolu he mena nei. Hataki e Iesu to fakafano e ia e tau tutaki haana ke he matakavi favale.​—Mata. 10:16.

12. Lagotatai ai mo e Iosua 1:7-9, ko e heigoa ka lagomatai a tautolu ke atihake e loto malolō?

¹² Maeke fēfē a koe ke atihake e loto malolō? Fakamua, kia talitonu kua matutaki a Iesu ke takitaki e gahua nei mai he lagi. (Ioane 16:33; Fakakite. 14:14-16) Uaaki, fakamalolō e tua haau ke he maveheaga ha Iehova ke leveki a koe. (Mata. 6:32-34) Ka malolō e tua haau, to holo ki mua e loto malolō haau. Fakakite e Peteru mo e tau tagata gahua haana e lahi he tua he mogo ne toka e lautolu e gahua futi ika ha lautolu ke mumui ki a Iesu. Maeke foki a koe ke fakakite e lahi he tua ka tala age e koe ke he tau kapitiga mo e tau tagata he magafaoa kua kamata a koe ke fakaako e Tohi Tapu mo e Tau  Fakamoli a Iehova ti fano ke he tau feleveiaaga ha lautolu! Fitā he taute foki e koe e tau hikiaga lalahi he mahani mo e puhala he moui haau ke fakalautatai ke he tau puhala tututonu ha Iehova. Lata foki ke moua e tua mo e loto malolō. He matutaki a koe ke atihake e loto malolō, maeke a koe ke mauokafua kua fakalataha a koe mo “Iehova hau a Atua ke he tau mena oti ke fano a koe ki ai.”​—Totou Iosua 1:7-9.

13. Maeke fēfē he manamanatu fakahokulo mo e liogi ke lagomatai a koe ke atihake e loto malolō?

¹³ Puhala fe foki ka atihake e koe e loto malolō? Liogi ma e loto malolō. (Gahua 4:29, 31) To tali e Iehova e tau liogi haau mo e nakai tiaki a koe. Ha ha i ai tumau a Iehova ke lalago a koe. Maeke foki a koe ke manamanatu fakahokulo ke he puhala ne fakahao e Iehova e falu i tuai. Manamanatu foki ke he puhala kua lagomatai e ia a koe ke fahia ke he tau paleko mo e foaki ki a koe e malolō ke taute e tau hikiaga he puhala moui haau. Ko Ia ne takitaki e tau tagata haana he Tahi Kula ka lagomatai mooli a koe ke eke mo tutaki he Keriso. (Esoto 14:13) Fakatumau e mauokafua pihia tuga ne talahau he salamo: “Ha ha ia au a Iehova; nakai matakutaku au; ko e heigoa ha mena ke eke he tau tagata kia au?”​—Sala. 118:6.

14. Ko e heigoa haau ne fakaako mai he tala ki a Masae mo Tomoyo?

¹⁴ Taha puhala foki ke atihake e loto malolō ko e fakaako e puhala ne lagomatai e Iehova e tau tagata mahani mā pauaki ka e fakaako ke loto toa. Manamanatu ke he tala he matakainaga fifine ko Masae. Mā a ia ti logona hifo to nakai maeke a ia ke fano ke fakamatala. Ko e manatu ke tutala ke he tau tagata kehe kua tokoluganea ke tuga e kaupā nukua talitonu a ia to nakai maeke a ia ke toli. Ti lali pauaki a ia ke fakahokulo e fakaalofa haana ke he Atua mo e tau katofia haana. Manamanatu a ia ke he mafiti he tau magaaho kua nonofo a tautolu ti liogi ma e lagomatai ke fakamalolō e manako haana ke fakamatala. Kautū a ia ke he tau matakutaku haana ti fekafekau ko e paionia tumau. Maeke foki a Iehova ke lagomatai e tau tagata fakailoa foou ‘ke fakamalolo.’ Mailoga e tala ke he matakainaga fifine ko Tomoyo. He kamata a ia ke fakamatala mai he taha fale ke he taha fale, ne vale e tagata he kaina fakamua: “Ai taha e mena haaku ne manako ke taute mo e Tau Fakamoli a Iehova!” ti pahu e gutuhala. Tala age mo e loto malolō a Tomoyo ke he hoa haana: “Logona nakai e koe? Ai fai kupu au ne talahau ka e mailoga e ia ko au taha he Tau Fakamoli a Iehova. Fiafia lahi au!” Fekafekau a Tomoyo mo paionia tumau mogonei.

15. Ko e heigoa e akonaki ni he tagata a ia, ti ko e ha kua aoga ma e tau Kerisiano?

¹⁵ Ko e tau tagata takafaga lotomatala kua akonaki ne lautolu a lautolu. Ko e akonaki ni he tagata a ia kua fakamaama “ko e maeke ke taute e koe e tau mena kua lata ke taute.” Ko e tau tagata takafaga ika ke uta ke sela kua lata ke akonaki ne lautolu a lautolu ke uhu matike, gahua ato oti e mena ne taute, mo e eketaha pete he kelea e matagi. Lata foki a tautolu ke akonaki e tautolu a tautolu ke maeke ke fakauka a tautolu ke oti e gahua he taute.​—Mata. 10:22.

16. Maeke fēfē a tautolu ke feaki e akonaki ni he tagata a ia?

¹⁶ Nakai moua noa e tautolu e akonaki ni he tagata a ia. Ko e hihiga pauaki ha tautolu kua fa taute ni he tau mena ne nakai uka. Lata ke aga fakalatalata ke akonaki ni he tagata a ia. Ko e mena ia, lata a tautolu ke moua e lagomatai ke fakamahani a tautolu ke taute e tau mena ne liga uka ke taute. Foaki e Iehova ki a tautolu e lagomatai ia puhala he agaaga tapu haana.​—Kala. 5:22, 23.

17. He fakamau ia 1 Korinito 9:25-27, fakamaama fēfē he aposetolo ko Paulo e tau laliaga haana ke feaki e akonaki ne ia a ia?

 ¹⁷ Akonaki ni he aposetolo ko Paulo a ia. Ka e talahau e ia kua “tatuki” e ia e tino haana ke taute e mena kua hako. (Totou 1 Korinito 9:25-27.) Tomatoma e ia e falu ke akonaki ni e lautolu a lautolu mo e taute e tau mena oti “mo e fulufuluola mo e taute fakamitaki.” (1 Kori. 14:40) Lata a tautolu ke akonaki ni a tautolu ke mahani fakalatalata ke fakatumau e fakaholoaga fakaagaaga mitaki ne putoia e fai vala tumau he gahua takafaga ke he tau tagata.​—Gahua 2:46.

18. Ko e heigoa ha tautolu ka taute ke onoono mai a Iehova kua kautū a tautolu?

¹⁸ Ko e tagata takafaga ika ke sela ne kitia e kautūaga haana he loga e ika ne moua. Ka e nakai tuku e tautolu e kautūaga ha tautolu ke he numera he tau tagata ne tamai e tautolu ke he fakatokatokaaga he Atua. (Luka 8:11-15) Ka fakatumau a tautolu ke fakauka he fakamatala e tala mitaki mo e fakaako e falu, to onoono mai a Iehova kua kautū a tautolu. Ko e ha? Ha kua omaoma a tautolu ki a ia mo e Tama haana.​—Mare. 13:10; Gahua 5:28, 29.

19-20. Ko e heigoa e matapatu kakano kua fakamatala a tautolu mogonei?

¹⁹ He falu motu, ko e takafaga ika kua fakaatā ni ke he tau mahina pauaki. He tau motu ia, mailoga he tagata takafaga ika e tata lahi he magahala takafaga ika ke oti. Ha ko e tau tagata takafaga ke he tau tagata, logona hifo pihia foki a tautolu ke he fakamatala mogonei: Kua tata lahi mai e fakaotiaga he fakatokaaga nei! Ko e magaaho ne toe ke fai vala he gahua fakahao tagata kua tote lahi. Ua fakamule po ke logona hifo kua lata a koe ke fakatali ke he magaaho mitaki lahi ke fai vala he gahua uho nei.​—Fakama. 11:4.

²⁰ Gahua he mogo tonu nei ke fakamalolō e mauokafua haau, fakahokulo e maamaaga haau ke he Tohi Tapu, atihake e loto malolō haau, mo e feaki e akonaki ni e koe a koe. Matutaki mo e molea e valu miliona tagata takafaga ke he tau tagata, mo e to logona hifo e koe e fiafia ha Iehova. (Nehe. 8:10) Kia eketaha ke fakalataha katoatoa ke he gahua nei mo e kitia ai kua hoko ke he fakaotiaga. Ko e vala tala ka mui mai ka fakatutala ke he tolu e puhala ka fakamalolō e tautolu e fifiliaga ke matutaki ke he gahua fakamatala he Kautu ko e tau tagata takafaga ke he tau tagata.