Pehē e kupu omoomoi nei: “Kaeke kua kitia e koe e favale ke he tagata nofogati, mo e fakafiliaga mo e fakatonuaga he tau mena kua uta kehe ke he fahi kautu, aua neke ofo a koe he mena na; ha kua kitekite ki ai taha ne mua ke he tagata lahi na; ha ha i ai foki kua mua ue atu kia laua.”​—Fakama. 5:8.

Mai he onoonoaga he tagata, fakamaama he kupu tohi nei e pule he tau tagata he fakatufono. Ka e mua atu, kua talahau foki e mena mooli hagaao ki a Iehova kua lata ke mafanatia mo e mauokafua a tautolu.

Ia Fakamatalaaga 5:8 kua hagaao ke he pule ne favale ke he tau tagata nonofogati mo e nakai fakafili tonu ki a lautolu. Kua lata e pule ke manatu na fai tagata ne tokoluga atu mo e lahi atu e pule he fakatufono hane kitekite ki a ia. Ka e fai tagata atu foki ne tokoluga atu e tau tuaga. Momoko ai, he tau fakatufono he tagata, liga fakakeukeu e tau pule oti nei, ti matematekelea e tau tagata ha ko e nakai fakafili tonu nei.

Pete kua kelea pihia e tuaga, maeke a tautolu ke mafanatia he iloa ko Iehova ‘kua kitekite ke he tau pule’ he fakatufono. Maeke a tautolu ke ole mo e tuku atu ha tautolu a tau kavega ki a Iehova. (Sala. 55:22; Filipi 4:6, 7) Iloa e tautolu “ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.”​—2 Nofo. 16:9.

Ati fakamanatu mai he Fakamatalaaga 5:8 e tuaga mooli he tau pule he fakatufono kua fai tagata tumau ne mahomo hake e pule. Ka e mua atu, maeke e kupu tohi nei ke lagomatai a tautolu ke manamanatu ko Iehova kua tokoluga ue atu, ko e Pule Katoatoa. Pule a ia mogonei he puhala mai he haana Tama ko Iesu Keriso ko e Patuiki he Kautu. Ko e Atua Malolō Ue Atu kua kitekite ke he tau mena oti kana nukua fakafili tonu mo e mitaki katoatoa, ti pihia foki haana Tama.