1, 2. (a) Matutaki fēfē e fakaalofa mo e tua? (e) Ko e heigoa e tau hūhū ka fakatutala a tautolu ki ai?

KO E ha tautolu a Matua ko Iehova ne mavehe ke fakamonuina haana tau fekafekau fakamooli. Ko e taha puhala anei kua fakakite e Iehova haana fakaalofa ma tautolu, ti fakaalofa a tautolu ki a ia “ha ko e mena ne fakamua mai hana fakaalofa kia tautolu.” (1 Ioane 4:19) He tupu e fakaalofa ha tautolu ki a Iehova, ko e tua ha tautolu ki a ia kua malolō foki ti talitonu lahi a tautolu to taui e Iehova a lautolu kua fakaalofa a ia ki ai.​—Totou Heperu 11:6.

² Ko Iehova mooli kua foaki e taui! Ko e vala aoga ke iloa ko hai a ia mo e ko e heigoa haana ne taute. Ti nakai katoatoa e tua ha tautolu ke he Atua ato talitonu a tautolu to taui e ia a lautolu kua kumi fakamakutu ki a ia. Ko e ha ne pihia ai? Ha ko e “tua, ko e falanaki haia ke he tau mena kua amaamanaki ki ai.” (Heperu 11:1) Ko e tua kua kakano ko e mauokafua katoatoa to fakamonuina he Atua haana tau fekafekau fakamooli. Ka e aoga fēfē a tautolu ke he amaamanakiaga he taui? Puhala fe ka taui e  Iehova haana tau fekafekau i tuai mo e mogonei? Kitekite la ki ai.

3. Ko e heigoa e maveheaga kua totou e tautolu ia Malaki 3:10?

³ Kua mavehe a Iehova ko e Atua ke taui e tau fekafekau fakamooli haana. Uiina e ia a tautolu ke eketaha mo e falanaki ki a ia to fakamonuina e ia a tautolu. Pehē a Iehova: “Kamatamata mai ai e mutolu au.” Matutaki a ia: “Po ke hafagi nakai e au e tau pa he lagi ma mutolu, mo e liligi atu e au e monuina ma mutolu, ato lahi ue atu ni haia.” (Malaki 3:10) Fakakite e tautolu e loto fakaaue ma e foakiaga nei he mogo ne talia e tautolu e uiina ha Iehova ke kamatamata a ia.

4. Ko e ha kua falanaki a tautolu ke he maveheaga ha Iesu ia Mataio 6:33?

⁴ Mavehe a Iesu ke he tau tutaki haana kaeke ke tuku fakamua e lautolu e Kautu, to lagomatai he Atua a lautolu. (Totou Mataio 6:33.) Maeke a Iesu ke talahau pihia ha kua iloa e ia na fakamooli tumau e tau maveheaga he Atua. (Isaia 55:11) Ti talitonu foki a tautolu kaeke ke fakakite e tautolu e tua katoatoa ki a Iehova, to fakamooli e ia e maveheaga nei: “Nakai tuai toka ni e au a koe, nakai tuai tiaki ni e au a koe.” (Heperu 13:5) Ko e maveheaga nei ha Iehova kua lagomatai a tautolu ke falanaki ke he tau kupu ha Iesu ia Mataio 6:33.

5. Ko e ha e tali ha Iesu ki a Peteru kua fakamafana ki a tautolu oti?

⁵ Hūhū e aposetolo ko Peteru he taha  magaaho ki a Iesu: “Kua toka e mautolu e tau mena oti, ka e mumui atu kia koe; ko heigoa e mena ke moua ai e mautolu?” (Mataio 19:27) Nakai fakatonu e Iesu a Peteru he hūhū pihia. Ka e tala age a Iesu ke he tau tutaki haana to taui a lautolu ha ko e tau mena ne taute e lautolu. To pule fakalataha e tau aposetolo mo e falu ia lautolu ne fakamooli mo Iesu ke he lagi he magaaho i mua. Ka e pehē a Iesu kua ha ha i ai foki e taui mogonei: “Kaeke ke toka e taha e tau fale, po ke tau matakainaga, po ke lafu mahakitaga, po ke matua tane, po ke matua fifine, po ke hoana, po ke tau fanau, po ke tau kaina, ha ko e haku a higoa, to moua e ia takiteau māna, to eke foki māna e moui tukulagi.” (Mataio 19:29) Maeke he tau tutaki oti ha Iesu ke moua e tau matua taane, tau matua fifine, tau tugaane, tau mahakitaga, mo e tau fanau he fakapotopotoaga mogonei. Mua atu e aoga he mena ia ke he ha mena kua foaki e tautolu ma e Kautu he Atua.

6. Ko e ha ne mavehe a Iehova ke taui e tau fekafekau haana?

⁶ He moua foki e tau monuina homo ue atu mogonei, amaamanaki a tautolu ke he loga foki he tau monuina mua ue atu anoiha. (1 Timoteo 4:8) Mavehe a Iehova ke taui e tau fekafekau fakamooli haana, mo e he iloa ai to lagomatai he mena nei a tautolu ke fakauka he tau magaaho vihi. He talitonu katoatoa ko Iehova “kua taui mai a lautolu kua kumi fakamakutu kia ia,” maeke ia tautolu ke fakatumau e fakamooli.​—Heperu 11:6.

7. Puhala fe ne tuga e taula e amaamanakiaga?

⁷ He Lauga he Mouga, pehē a Iesu: “Kia kolikoli a mutolu mo e fiafia ni; ha ko e ha ha he lagi ha mutolu a palepale kua lahi; ha ko e mena favale pihia a lautolu ke he tau perofeta ne mumua ia mutolu.” (Mataio 5:12) Falu he tau fekafekau he Atua to moua e taui ke he lagi. Mo e falu to moua e moui tukulagi ke he parataiso he lalolagi. Ko e kakano foki a ia ke “kolikoli . . . mo e fiafia.” (Salamo 37:11; Luka 18:30) Ka e ma tautolu oti, ko e amaamanakiaga ha tautolu ke tuga “ne taula he agaga, kua nakai matoho mo e mauokafua.” (Heperu 6:17-20) Tuga ni e taula ne taofi e toga he magahala afā, ko e amaamanakiaga malolō ha tautolu ka lagomatai a tautolu ke fakatumau e mauokafua. Kua foaki ki a tautolu e malolō ke fakauka he tau magaaho vihi.

8. Fakatote fēfē he amaamanakiaga e fakaatukehe ha tautolu?

⁸ Ko e ha tautolu a amaamanakiaga ka lagomatai ke fakatote e tau fakaatukehe. Tuga ni e lolo kua fakamomole aki e kili ha tautolu, maeke he tau maveheaga he Atua ke fakatotoka aki e tau loto fakaatukehe ha tautolu. Kua mafanatia ke iloa to leveki e Iehova a tautolu ka tuku atu ha tautolu a tau kavega ki a ia. (Salamo 55:22) Moua e tautolu e mauokafua katoatoa ko e Atua “ke eke e tau  mena oti kua mua ke he tau mena ke ole atu . . . ai a tautolu.” (Efeso 3:20) To lagomatai e Iehova a tautolu, nakai fakalahi po ke lahi, ka e to mua atu e lahi!

9. Maeke fēfē a tautolu ke talitonu to moua mooli e fakamonuinaga ha Iehova?

⁹ Ke moua e taui, kua lata a tautolu ke tua katoatoa ki a Iehova mo e ke omaoma ke he haana tau takitakiaga. Tala age a Mose ke he motu a Isaraela: “Ko e mena fakamonuina fakalahi e Iehova e motu kua foaki mai ai e Iehova hau a Atua kia koe ko e tufaaga ke moua ni māu; Kaeke ni ke fanogonogo fakamitaki a koe ke he leo a Iehova hau a Atua, kia taofi ke eke ai e tau poaki oti nai kua poaki atu ai au kia koe ke he aho nai. Nukua fakamonuina ai e Iehova hau a Atua a koe tuga ne vagahau ai a ia kia koe.” (Teutaronome 15:4-6) Kua talitonu katoatoa nakai a koe to fakamonuina e Iehova a koe kaeke ke fekafekau fakamooli a koe ki a ia? Ha ha ia koe e kakano mitaki ke mauokafua pihia.

10, 11. Taui fēfē e Iehova a Iosefa?

¹⁰ Ne tohi e Tohi Tapu ma e aoga ni ha tautolu. Kua moua e tautolu i loto e tau fakafifitakiaga loga he puhala ne taui he Atua e tau fekafekau fakamooli haana i tuai. (Roma 15:4) Ko Iosefa e fakafifitakiaga mitaki lahi mahaki he mena nei. Fakamua, ne fakafua he tau matakainaga haana a ia ko e tupa. Fakahiku, ne tukupau fakavai he hoana he iki haana a ia ti tuku a ia ki loto he fale puipui i Aikupito. He haia a Iosefa he fale puipui, vevehe kehe nakai a ia mai ia Iehova? Nakai pihia! Pehē e Tohi Tapu: “Fakalataha a Iehova mo Iosefa, ne fakaalofa foki a ia kia ia,” ti “kua fakalataha a Iehova mo ia; kua fakamonuina foki e Iehova e tau mena ne eke e ia.” (Kenese 39:21, 23) Pete foki he tau magaaho vihi ia, ne fakatali fakatekiteki a Iosefa ke he Atua haana.

¹¹ Fai tau he mole, ne fakatoka mai e Farao a Iosefa he fale puipui, ti eke e fekafekau fakatokolalo nei mo pule malolō ke uaaki i Aikupito. (Kenese 41:1, 37-43) He magaaho ne ua e tama taane ha Iosefa mo e hoana haana, “ne ui e Iosefa e higoa he tama uluaki ko Manase, kua pehe age a ia, Ha kua eke e Atua ke nimo ia au haku a mamahi oti kana, katoa mo e magafaoa oti kana he haku matua. Ne ui e ia e higoa he tama ne ua aki ko Efaraimo, kua pehe age a ia, Ha kua fakatokologa he Atua au ke he motu ne matematekelea ai au.” (Kenese 41:51, 52) Ne taui e Iehova e mahani fakamooli ha Iosefa, ti maeke a ia ke fakamomoui e tau Isaraela mo e tau Aikupito mai he hoge. Iloa e Iosefa ko Iehova ne taui mo e fakamonuina a ia.​—Kenese 45:5-9.

12. Fakatumau fēfē a Iesu ke fakamooli he mogo ne kamatamata a ia?

¹² Fakatumau foki a Iesu Keriso ke omaoma ke he Atua he magahala ne loga e tau kamatamata, ti taui ai e Iehova a ia. Ko e heigoa ne lagomatai a Iesu ke fakatumau e fakamooli? Fakamaama he Kupu he Atua: “Ko ia ne fakauka ke he satauro, mo e fakateaga a ia ke he ma, ha ko e fiafia kua toka ki mua hana.” (Heperu 12:2) Moua mooli e Iesu e fiafia he maeke ke fakatapu e higoa he Atua. Ti taui a  Iesu he moua e taliaaga he Matua haana mo e tau kotofaaga loga homo ue atu. Talahau he Tohi Tapu “kua nofo foki a ia ke he fahi matau he nofoaiki he Atua.” Totou foki e tautolu: “Kua fakamatalahi ai he Atua a ia, mo e foaki atu ai kia ia e higoa kua mua ke he tau higoa oti kana.”​—Filipi 2:9.

13, 14. Fēfē e logonaaga ha Iehova ke he mena kua taute e tautolu ma haana?

¹³ Talitonu foki a tautolu kua uho ki a Iehova e tau mena oti kua taute e tautolu ke fekafekau ki a ia. Maama e ia e magaaho ka nakai mauokafua a tautolu po ke fakauaua a tautolu ke he tau lotomatala ni ha tautolu. Ne manamanatu fakahokulo a ia ki a tautolu ka fakaatukehe a tautolu hagaao ke he gahua tupe po ke levekiaga he tau magafaoa. Maama foki e ia ka nakai lahi e mena ha tautolu kua taute tuga fakamua he fekafekauaga haana ha kua gagao po ke fakaatukehe a tautolu mogonei. Maeke ia tautolu ke mauokafua katoatoa kua uho e mahani fakamooli ha tautolu ki a Iehova pete ni e tau lekua ha tautolu.​—Totou Heperu 6:10, 11.

¹⁴ Manatu foki ko Iehova “ko e fanogonogo liogi.” Talitonu foki a tautolu ka liogi a tautolu ki a ia to logona e ia a tautolu. (Salamo 65:2) “Ko e Matua hana e fakaalofa hofihofi, ko e Atua foki hana e tau fakamafanaaga oti” ka foaki ki a tautolu e tau mena oti kua lata mo tautolu ke maeke ke nonofo fakatata ki a ia. He falu magaaho ne liga fakaaoga e ia e tau matakainaga ha tautolu ke taute e mena ia. (2 Korinito 1:3) Fiafia a Iehova ka fakakite e tautolu e fakaalofa hofihofi noa ke he falu. “Ko ia kua fakaalofa ke he tagata nofogati kua ta age e ia hana tau mena kia Iehova; to taui mai foki e ia e tau mena ne ta age kia ia.” (Tau Fakatai 19:17; Mataio 6:3, 4) Ti ka fakamokoi a tautolu mo e lagomatai e tau matakainaga ha tautolu, kua kitia e Iehova e mitaki kua taute e tautolu ko e foakiaga ne taute ki a ia. Ti mavehe a ia ke taui e mahani totonu ia.

15. Ko e heigoa e taui kua amaamanaki a koe ki ai? (Kikite fakatino he kamataaga.)

¹⁵ Ha ha he tau Kerisiano fakauku e amaamanakiaga ke moua e “foufou he tututonu,” ko e taui mai ia Iesu. (2 Timoteo 4:7, 8) Ka e nakai tote e aoga haau ke he Atua ka kehe e amaamanakiaga haau. Totou miliona e ‘tau mamoe kehe’ ha Iesu ne amaamanaki atu ke he taui anoiha he moui tukulagi he lalolagi parataiso. I ai, to “fakafiafia foki e lautolu a lautolu ha ko e monuina kua lahi.”​—Ioane 10:16; Salamo 37:11.

16. Ko e heigoa e fakamafanaaga kua moua e tautolu ia 1 Ioane 3:19, 20?

¹⁶ Falu magaaho kua liga logona hifo e tautolu kua nakai lahi mahaki e mena ne taute e tautolu he fekafekauaga ha Iehova, po ke liga manamanatu a tautolu to fiafia nakai a Iehova ke he mena kua taute e tautolu. Logona hifo foki a tautolu kua nakai latatonu a tautolu ke moua e ha palepale. Ka e nakai lata a tautolu ke nimo “kua mua e Atua ke he tau loto ha tautolu, kua fioia foki e ia e tau mena oti kana.” (Totou 1 Ioane 3:19, 20.) Ka fekafekau a tautolu ki a Iehova ha ko e ha tautolu a tua mo e fakaalofa ki a ia, maeke a tautolu ke talitonu to taui e ia a tautolu, pete ka liga tote e mena ne taute e tautolu.​—Mareko 12:41-44.

17. Ko e heigoa falu taui kua moua e tautolu mogonei?

¹⁷ He tau aho fakamui nei foki he fakatokaaga kelea ha Satani, kua fakamonuina e  Iehova e tau tagata haana. Kua eketaha a ia ke moua e tautolu e mua atu he lahi e iloilo mo e mafola, po ke monuina ko e vala he tau matakainaga he lalolagi katoa. (Isaia 54:13) Ē, tuga he mavehe e Iesu to taui e Iehova a tautolu mogonei he moua e magafaoa fakahelehele he tau matakainaga he lalolagi katoa. (Mareko 10:29, 30) Ko lautolu foki ne kumi fakamakutu ke he Atua kua taui he moua e mafola lahi he loto, makona, mo e fiafia.​—Filipi 4:4-7.

18, 19. Fēfē e logonaaga he tau fekafekau ha Iehova hagaao ke he taui ne moua e lautolu?

¹⁸ Ko e tau fekafekau ha Iehova he lalolagi katoa kua moua e tau taui homo ue atu mai he ha tautolu a Matua. Ma e fakatai, ko Bianca mai i Sihamani ne pehē: “Fakaaue lahi mahaki au ki a Iehova he lagomatai au ke he tau tupetupe haaku mo e ha ha he tapa haaku he tau aho takitaha. Kua to lahi e lavelave mo e fakaatukehe he lalolagi. Ka e he gahua fakatata au mo Iehova, ne logona e au e haohao mitaki ke he tau lima haana. He tau foakiaga fakatagata ne taute e au ke lata mo ia, foaki e ia ki a au e tau monuina ne takiteau.”

¹⁹ Po ke manamanatu ki a Paula i Kanatā ne 70 e tau he moui, kua matematekelea lahi ha ko e spina bifida ne lauia he hokotua. Pehē a ia pete ni kua fakakaupā he tuaga haana a ia ke fanofano, nakai kakano e mena ia kua fakakaupā e gahua haana ke he fonua. Lafi e ia: “Fakaaoga e au e tau puhala kehekehe tuga e fakamatala he telefoni mo e fakamatala he magaaho noa. Ke moua e au e fakamafanaaga, fakamau e au e tau kupu tohi mo e tau manatu mai he tau tohi ha tautolu he pepa haaku ke maeke au ke fakakia ki ai he falu magaaho. Fakahigoa e au ‘My Survival Notebook.’ Ko e fakaloleloleaga ko e mena kū kaeke ke hagaaki a tautolu ke he tau maveheaga ha Iehova. Kua ha ha i ai tumau a Iehova ke lagomatai a tautolu, pete ne tau tuaga ha tautolu.” Liga kehe lahi e tuaga haau ke he ha Bianca po ke ha Paula. Ka e liga manamanatu a koe ke he tau puhala kua taui atu e Iehova a koe mo lautolu ne takatakai ia koe. Ko e mitaki ha ia ke manamanatu ke he puhala ne taui e Iehova a koe he magaaho nei mo e puhala ka taui e ia a koe anoiha!

20. Ko e heigoa ka amaamanaki atu a tautolu ki ai ka fakatumau a tautolu ke eketaha ke fekafekau fakamooli ki a Iehova?

²⁰ Nakai nimo ko e tau liogi haau mai he loto to “ha i ai e palepale kua lahi.” Maeke a koe ke talitonu “ka oti he eke . . . e finagalo he Atua,” to “moua ai . . . e tau mena kua talahaua mai.” (Heperu 10:35, 36) Kia fakatumau a tautolu ke fakamalolō e tua ha tautolu mo e taute e tau mena oti kua maeke ia tautolu ke fekafekau ki a Iehova. Moua e tautolu e mauokafua to taui mooli e Iehova a tautolu!​—Totou Kolose 3:23, 24.