1. Ko e ha ne aoga lahi e lakaaga ke papatiso? (Kikite fakatino he kamataaga.)

KE HE tau tau takitaha kua totou afe e tau tagata fakaako Tohi Tapu ne papatiso. Tokologa ia lautolu nei ko e tau fuata, tau fuata mui po ke ikiiki hifo foki. Liga feaki hake a lautolu he kupu mooli. Ko koe nakai taha ia lautolu? Kaeke ko koe, kua mitaki lahi e mena ne taute e koe. Kua latatonu e tau Kerisiano takitaha ke papatiso. Ti lata e papatisoaga ke moua e fakamouiaga mo e moui tukulagi.​—Mataio 28:19, 20; 1 Peteru 3:21.

2. Ko e ha kua nakai lata a koe ke matakutaku he taute e tukuleleaga ki a Iehova?

² He papatiso a koe, kamata a Iehova ke fakamonuina a koe ke he loga e tau puhala foou. Ka e ha ha foki ia koe e tau matagahua foou. He puhala fe? He aho ne papatiso a koe, ko e matakainaga taane ne taute e lauga papatiso haau ne hūhū: “He fakavēaga ke he poa ha Iesu Keriso, kua fakatokihala nakai a koe he tau agahala haau mo e tukulele a koe ki a Iehova ke taute haana a finagalo?” Ne tali e koe, ē. Mavehe a koe ke  fakaalofa ki a Iehova mo e eke e fekafekau ki a Ia ko e mena ne mua e aoga ke he moui haau. Lata nakai a koe ke tokihala he taute e maveheaga hokulo lahi pihia? Nakai lata! To nakai tokihala a koe he fakaatā a Iehova ke takitaki e moui haau. Ko lautolu ne nakai iloa a Iehova ko e vala he lalolagi ha Satani. Nakai popole e Tiapolo ki a lautolu po ke ki a koe foki. Ka e fiafia a ia ka galo e koe e amaamanakiaga he moui tukulagi ha kua kau a koe ke he faahi haana mo e tiaki a Iehova.

3. Fakamonuina fēfē e Iehova a koe ha kua tukulele a koe ki a Ia?

³ Manamanatu ke he puhala ne fakamonuina e Iehova a koe ha kua tukulele a koe ki a ia ti papatiso. Foaki e koe e moui haau ki a Iehova, ti talahau mauokafua a koe: “Ha ha ia au a Iehova; nakai matakutaku au; ko e heigoa ha mena ke eke he tau tagata kia au?” (Salamo 118:6) Ko e lilifu mua ue atu he kau ke he faahi a Iehova mo e iloa kua matalahi a ia ha ko koe.

4, 5. (a) Ko e ha ne pehē a tautolu ko e tukuleleaga ko e matagahua ni he tagata? (e) Ko e heigoa e tau paleko ne fehagai mo e tau Kerisiano he tau tau momoui kehekehe?

⁴ Nakai maeke a koe ke onoono ke he haau a fakafetuiaga mo Iehova tuga e ‘fakaholoaga he magafaoa’ he selafoni ne totogi he tau matua haau. Pete foki ka nofo a koe mo e tau matua, ko e matagahua ni haau e fakafetuiaga haau mo Iehova. Ko e ha ne aoga ke manatu e mena ia? Nakai fai ia tautolu ke iloa tonu to kamatamata fēfē e tua ha tautolu he mogo i mua. Ma e fakatai, liga papatiso a koe ato hoko ke fuata mui. Ka e mogonei kua fuata mui a koe, moua e koe e tau logonaaga foou mo e tau lekua foou. Taha e tama fifine fuata mui ne pehē: “To nakai fakaheu he tama ko ia taha he Tau Fakamoli a Iehova ha kua nakai kai e vala keke aho fanau he aoga. Ka e fai tau he mole kua malolō lahi e logonaaga ke taute e mahani fakataane mo e fifine, ti kua lata a ia ke talitonu mooli ko e omaoma ke he tau matafakatufono ha Iehova ko e fifiliaga mitaki lahi tumau.”

⁵ Nakai ni ko e tau fuata ikiiki ne fehagai mo e tau paleko foou. Ko lautolu foki ne papatiso he lalahi ne kamatamata e tua ha lautolu ke he tau puhala ne nakai amanaki ki ai. Ko e tau kamatamata ha lautolu ne liga moua mai he ha lautolu a fakamauaga, malolō tino, po ke tau gahua tupe. Pete ne tau tau moui ha tautolu, igatia a tautolu mo e lata ke tua fakamooli ki a Iehova ke he loga he tau tuaga kehekehe.​—Iakopo 1:12-14.

6. (a) Ko e heigoa e kakano kua nakai hikihikifano e tukuleleaga haau ki a Iehova? (e) Ko e heigoa ka fakaako e koe mai he Filipi 4:11, 12 mo e Isaia 12:2?

⁶ Ke lagomatai a koe ke tumau e tua fakamooli, manatu tumau ko e maveheaga ne taute e koe mo Iehova ko e mena nakai hikihikifano. Kakano he mena nei kua mavehe a koe ke he Mua Ue Atu ke fekafekau ki a Ia pete ne mena ka tupu, kaeke foki kua nakai matutaki e tau kapitiga po ke tau matua haau ke taute pihia. (Salamo 27:10) He tau tuaga oti, mailoga ke ole ki a Iehova ke lagomatai a koe ke tumau e maveheaga haau ki a ia.​—Totou Filipi 4:11, 12; Isaia 12:2.

7. Ko e heigoa e kakano ke gahua ke moui ai a koe “mo e matakutaku mo e vivivivi”?

⁷ Manako a Iehova ki a koe ke eke mo kapitiga haana. Ka e lata ke eketaha ke malolō tumau e kapitiga ia mo e gahua ke moui ai a koe. Pehē e Filipi 2:12: “Kia gahua ni a mutolu mo e matakutaku mo e vivivivi, kia momoui ai a mutolu.” Kakano e mena nei kua  lata a tautolu ke manamanatu fakamakutu ke he puhala ka tumau e fakatata ha tautolu ki a Iehova mo e fakatumau e tua fakamooli pete ne mena ka tupu. Ua manatu noa to taute pihia e tautolu. Manatu ko e falu ne leva e fekafekau ke he Atua ne nakai fakatumau e tua fakamooli. Ko e heigoa e tau mena kua aoga ka lagomatai a koe ke gahua ke moui ai a koe?

8. Ko e heigoa ne putoia foki he fakaako fakatagata? Ko e ha ne aoga ai?

⁸ Ke eke mo kapitiga ha Iehova, lata a tautolu ke fanogonogo ki a ia mo e lata ke tutala ki a ia. Ko e matapatu puhala ke fanogonogo a tautolu ki a Iehova he fakaako e Tohi Tapu. Putoia he mena nei e totou mo e manamanatu fakahokulo ke he Kupu he Atua mo e tau tohi ne fakavē ke he Tohi Tapu. Ka ko e fakaako e Tohi Tapu kua nakai tuga e ako manatu he tau vala tala mooli tuga ne liga taute e koe ma e kamatamata he aoga. Ka e tuga e fenoga fiafia kua kitekite mo e iloa e koe e tau mena foou hagaao ki a Iehova. To fakatata atu a koe ke he Atua, mo e to fakatata mai foki a ia ki a koe.​—Iakopo 4:8.

9. Ko e heigoa e tau koloa kua lagomatai a koe ke he fakaako fakatagata haau?

⁹ Foaki he fakatokatokaaga ha Iehova e tau koloa loga ka lagomatai a koe he fakaholoaga fakaako haau. Ma e fakatai, ha ha i ai e tau fufuta ne fakahigoa “Bible Study Activities” he faahi he “Teenagers” he jw.org ke lagomatai a koe ke fakagahua e tau mena  ne fakaako mai he tau tala Tohi Tapu. Maeke foki a koe ke moua he jw.org e tau puhala fakaako he “What Does the Bible Really Teach?” Maeke he tau mena nei ke lagomatai a koe ke atihake e tua haau mo e fakamaama e tau taofiaga haau ke he falu. Maeke foki a koe ke moua e tau manatu ma e fakaako fakatagata haau he fufuta he Awake!, Aperila 2009 he vala tala “Young People Ask . . . How Can I Make Bible Reading Enjoyable?” Ko e fakaako mo e manamanatu fakahokulo kua aoga lahi ke gahua ni ke moui ai a koe.​—Totou Salamo 119:105.

10. Ko e ha kua lata e Kerisiano papatiso ke liogi?

¹⁰ Ka fakaako a tautolu ke he Tohi Tapu kua fanogonogo a tautolu ki a Iehova, ti ka liogi a tautolu kua tutala a tautolu ki a ia. Nakai lata a tautolu ke manamanatu ke he liogi ko e aga po ke ‘fakamonuinaaga’ ke moua e tautolu e kautūaga. Ko e matutakiaga mooli e liogi ke he Tufuga ha tautolu. Kia manamanatu: Manako a Iehova ke logona e tau mena haau ka talahau! (Totou Filipi 4:6.) Ti ka fakaatukehe a koe ha ko e falu kakano, pehē e Tohi Tapu ke “tuku atu kia Iehova e tau mena ne fakaatukehe ai a koe.” (Salamo 55:22) Tokologa e matakainaga ka tala atu ki a koe kua lagomatai he fakatonuaga nei a lautolu. To lagomatai foki ki a koe!

11. Ko e ha kua lata a koe ke fakaaue tumau ki a Iehova?

¹¹ Ka e lata a tautolu ke nakai liogi ni he magaaho ka manako ke he lagomatai ha Iehova. Fakamanatu he Tohi Tapu ki a tautolu: “Kia mahani foki a mutolu ke fakaaue.” (Kolose 3:15) Falu mogo kua tupetupe lahi mahaki a tautolu ke he tau lekua ti nakai mailoga e tau mena mitaki oti kua moua e tautolu. Lali pehē: He tau aho takitaha manamanatu ke he tolu e mena kua fakaaue a koe ki ai, ti fakaaue ki a Iehova ma e tau mena ia. Ko e fuata mui ko Abigail, ne papatiso he 12 e tau he moui ne pehē: “Logona hifo e au kua latatonu a Iehova ke mua atu e fakaaue lahi mahaki ke he ha tagata he lagi mo e lalolagi katoa. Kua lata ke fakaaue a tautolu ki a ia he tau magaaho oti ma e tau mena fakaalofa ne foaki e ia ki a tautolu.” Falu mogo ne hūhū hifo e Abigail e hūhū nei ne logona e ia he taha aho: “Ka ala hake au a pogipogi mo e tau mena ni ne fakaaue au ki a Iehova ma e aho nei, ko e heigoa mooli ka moua e au?” * (Kikite matahui tala.)

12, 13. Fēfē e logonaaga fakatagata haau ke he mitaki a Iehova, ti ko e ha kua aoga ke manamanatu ke he puhala ne lagomatai e Iehova a koe?

¹² Lagomatai e Iehova e Patuiki ko Tavita ke fakauka ke he loga e tuaga vihi. Ti tutala a Tavita mai he mena ne tupu mooli ki a ia he pehē: “Kia kamata e mutolu mo e kitekite, kua mitaki a Iehova; uhoaki e tagata kua tua kia ia.” (Salamo 34:8) Fakakite he kupu tohi nei kua lata a tautolu ke logona  hifo e mitaki lahi ha Iehova ki a tautolu. Ka totou e koe e Tohi Tapu mo e tau tohi ha tautolu ti fano he tau feleveiaaga, kua fakaako e koe e puhala ne lagomatai he Atua e falu ke tumau e tua fakamooli. Ka e he malolō fakahaga haau a fakafetuiaga mo Iehova, lata a koe ke kitia e puhala kua lagomatai e Iehova a koe. Fēfē e logonaaga fakatagata haau ke he mitaki a Iehova?

¹³ Logona hifo he tau Kerisiano takitaha e mitaki ha Iehova he taha puhala pauaki. Uiina e ia a tautolu takitokotaha ke fakatata atu ki a ia mo e haana Tama. Pehē a Iesu: “Nakai maeke ia taha ke hau kia au, ka nakai futia mai he Matua ne fakafano mai au.” (Ioane 6:44) Logona hifo nakai a koe kua futia e Iehova a koe ki a ia? Po ke manamanatu a koe, ‘kua futia e Iehova e tau matua haaku ki a ia ti ko e mui noa ni au’? Manatu ka tukulele a koe ki a Iehova ti papatiso, kua ha ha ia koe e fakafetuiaga pauaki mo ia. Pehē e Tohi Tapu ki a tautolu: “Kaeke ke fakaalofa taha ke he Atua, kua iloa e ia e tagata ia ni.” (1 Korinito 8:3) Kia tokiofa tumau e tuaga kua foaki atu e Iehova ki a koe i loto he fakatokatokaaga haana.

14, 15. Maeke fēfē he gahua fakamatala ke lagomatai a koe ke malolō lahi e tua?

¹⁴ Kua logona hifo foki e koe e mitaki ha Iehova ka foaki atu e ia ki a koe e loto malolō ke tutala ke he falu hagaao ke he tua haau, he gahua fakamatala po ke aoga. Liga uka ke fakamatala ke he tau kapitiga aoga haau. Liga tupetupe foki a koe ke he tali ha lautolu. Ko e mena matakutaku pauaki ke fakamaama e tau taofiaga haau i mua he moto tagata. Ko e heigoa ka lagomatai a koe?

¹⁵ Manamanatu ke he kakano ati talitonu a koe ke he mena kua talitonu e koe. Kaeke kua ha ha i ai ke he vagahau haau e puhala fakaako he jw.org, kia eketaha ke fakaaoga ai. To lagomatai ai ki a koe ke manamanatu ke he mena kua talitonu a koe, kakano kua talitonu e koe, mo e puhala ke fakamaama e koe e tau taofiaga haau ke he falu. Kaeke ke talitonu mooli a koe ti tauteute fakamitaki, to manako a koe ke fakamatala hagaao ki a Iehova.​—Ieremia 20:8, 9.

16. Ko e heigoa ka foaki ki a koe e loto malolō ke tutala hagaao ke he tau taofiaga haau?

¹⁶ Pete kua tauteute fakamitaki a koe, liga to hopoate agaia a koe he fakamaama e tau taofiaga haau. Ko e matakainaga fifine ne 18 e tau he moui, ne papatiso he 13 e tau he moui ne pehē: “Iloa e au e mena ne talitonu au ki ai, ka e falu mogo ne uka ia au ke talahau e tau manatu haaku.” Ti lali a ia ke tutala hagaao ke he kupu mooli he puhala totoka mo e milino. Pehē a ia: “Ne atāina e tau kapitiga aoga haaku ke tutala hagaao ke he tau mena ne taute e lautolu. Lata foki au ke atāina ke taute pihia. Talahau e au taha mena tuga e ‘fakaako au he Tohi Tapu he taha aho, ti . . . ’ Matutaki mogoia au ke talahau e manatu he tala. Pete nakai hagaao e manatu he tala ke he Tohi Tapu, kua fia iloa e falu ke he mena kua taute e au ka fakaako e Tohi Tapu. Falu mogo ne hūhū a lautolu hagaao ke he mena ia. He lahi e fakaaoga e  au e puhala nei, kua mukamuka lahi foki. Mogo fakamui, logona hifo tumau e au e fiafia!”

17. Ko e heigoa falu mena ka lagomatai a koe he tutala ke he falu?

¹⁷ Ka logona hifo he falu kua manamanatu mo e fakalilifu mooli e koe a lautolu, kua mukamuka lahi a lautolu ke fakalilifu a koe mo e tau taofiaga haau. Ko Olivia ne 17 e tau he moui kua papatiso he tote, ne pehē: “Na matakutaku tumau au ka fakaaoga e Tohi Tapu ka tutala neke onoono mai e tau tagata kua fakakikili au.” Ti kamata a ia ke kehe e onoonoaga ke he tau tuaga. He nakai manamanatu lahi mahaki ke he matakutaku haana, ne manatu a ia: “Tokologa e tama fuata ne nakai iloa ha mena hagaao ke he Tau Fakamoli a Iehova. Ko mautolu ni e Tau Fakamoli ne fehagai mo lautolu. Ti ko e tau mahani ha mautolu ka fifili e puhala ka tali mai a lautolu. Ka e kua ka mā po ke fuafuakelea po ke uka ke vagahau hake hagaao ke he tua ha mautolu, po ke ka e kua ka nakai loto malolō a mautolu ka vagahau hake? Ti liga onoono a lautolu ki a mautolu kua nakai fiafia a mautolu he eke mo Tau Fakamoli. Liga to nakai totonu mai a lautolu ha ko e nakai mauokafua ha mautolu. Kaeke ke tutala a mautolu mo e totoka mo e mauokafua ke he mena ne talitonu a mautolu ki ai he eke ai mo taha vala he fakatutalaaga, to liga fakalilifu e lautolu a mautolu.”

18. Ko e heigoa kua lata ia koe ke taute ke gahua ni ke moui ai a koe?

¹⁸ Fitā he kitia e tautolu ko e matagahua hokulo lahi ke gahua ni ke moui ai a koe. Ke taute e mena nei, lata ia koe ke totou mo e manamanatu fakahokulo ke he Kupu he Atua, liogi ki a Iehova, mo e manamanatu fakalahi ke he tau puhala oti ne kua lagomatai fakatagata e ia a koe. He taute e tau mena nei to lagomatai a koe ke lahi e mauokafua ko Iehova e Kapitiga haau. To taute he mena nei a koe ke manako ke tutala ke he falu hagaao ke he tau taofiaga haau.​—Totou Salamo 73:28.

19. Ko e ha kua uho lahi e tau laliaga ke gahua ni ke moui ai?

¹⁹ Pehē a Iesu: “Ko e tagata ka fia mui mai kia au, aua neke omaoma a ia kia ia, ka e nikiti a hana satauro, mo e mui mai ai kia au.” (Mataio 16:24) Ke muitua mooli ki a Iesu, igatia e Kerisiano mo e lata ke tukulele a ia ki a Iehova ti papatiso. Ka ko e kamataaga ni anei he moui homo ue atu mogonei, mo e to takitaki atu ai ke he moui tukulagi he lalolagi foou he Atua. Kia taute e tau mena oti kua maeke ia koe ke tumau e gahua ni ke moui ai!