KO Diana ne molea e 80 e tau he moui ti matematekelea ha ko e loga e mena ne tupu he tau tau gahoa kua mole. Ko e taane haana ne gagao Alzheimer ne nofo he kaina leveki ti kua mate. Ne mamate foki e tau tama taane tokoua haana, ti taufetului a ia mo e kenesā e huhu. Ka ko e mogo ne kitia he tau matakainaga a Diana he tau feleveiaaga po ke gahua he fonua, kua fiafia tumau a ia.

Ko John ko e leveki faifano ke molea 43 e tau. Fiafia lahi a ia ke he kotofaaga haana ti nakai manamanatu foki ke taute taha mena kehe. Ka e oti e fekafekauaga haana ke he gahua faifano ke leveki e magafaoa ne gagao. Ka feleveia he tau matakainaga ne iloa a John a ia he takaiaga po ke fonoaga, ne mailoga e lautolu kua nakai hiki a ia. Mau agaia e fiafia lahi haana.

Maeke fēfē a Diana mo John ke tumau e fiafia? Maeke fēfē e taha tagata kua matematekelea ke fiafia? Maeke fēfē e tagata ke fiafia ka toka e ia e kotofaaga haana ne fiafia lahi ki ai? Foaki mai he Tohi Tapu e tali. Pehē ai: “To fiafia e tagata tututonu kia Iehova.” (Salamo 64:10) Maama mitaki e tautolu e kupu mooli nei ka iloa e tautolu e mena ka tamai ki a tautolu e fiafia tukulagi mo e mena ka nakai tamai e fiafia tukulagi.

Ha ha i ai e tau mena ne teitei tamai tumau e fiafia. Ma e fakatai, manamanatu ke he hoa kua loto fakavihi ne kua mau. Po ke manamanatu ke he tagata kua eke mo matua po ke tagata kua moua e kotofaaga foou he fekafekauaga ha Iehova. Tamai he tau mena nei e fiafia ha ko e tau mena fakaalofa oti nei kua mai ia Iehova. Foaki mai e ia e fakamauaga, maeke ke fanafanau, mo e gahua ke taute he fakatokatokaaga haana.​—Kenese 2:18, 22; Salamo 127:3; 1 Timoteo 3:1.

Ka e fai mena ne tamai e fiafia ne kū. Momoko ai, ko e hoa he fakamauaga kua nakai fakamooli po ke mate. (Esekielu 24:18; Hosea 3:1) Nakai omaoma e tau fanau ke he ha lautolu a tau matua mo e Atua, ti liga tuku foki ki tua. Ma e fakatai, nakai fekafekau fakamitaki e tau tama taane ha Samuela ki a Iehova, ti loga e tau lekua ha Tavita mo e magafaoa ha kua agahala a ia mo Patesepa. (1 Samuela 8:1-3; 2 Samuela 12:11) Ka tutupu e  tau mena tuga anei, nakai tamai ai e fiafia ka ko e maanu mo e loga e mamahi.

Pihia foki, falu magaaho kua nakai maeke a tautolu ke matutaki ke he tau kotofaaga he fekafekauaga ha Iehova ha kua gagao po ke leveki he magafaoa ha tautolu, po ke fai hiki e fakatokatokaaga. Tokologa ne kua toka e kotofaaga ha lautolu ne talahau kua misi e lautolu e fiafia he fekafekauaga ia ha lautolu.

Mukamuka ke kitia e tautolu ko e tau kakano ia he fiafia kua nakai tumau. Ti ha ha i ai kia e fiafia ne tumau pete ka vihi e moui? Liga fai, ha ko Samuela, Tavita, mo e falu ne nakai galo ai e fiafia he magaaho ne matematekelea he tau kamatamata.

Iloa e Iesu e fiafia mooli. Ato hifo mai a ia ke he lalolagi, talahau he Tohi Tapu ki a tautolu “ne olioli mau [a ia] ki mua hana [Iehova] ke he tau aho oti ni.” (Tau Fakatai 8:30) Ka ko e mogo ne hau a ia ke he lalolagi, ne fehagai a ia falu magaaho mo e tau mena vihi lahi mahaki. Moua e Iesu e fiafia he taute e finagalo he Matua haana. (Ioane 4:34) Ka e kua e tau tulā mamahi fakahiku haana? Totou e tautolu: “Ko ia ne fakauka ke he satauro, mo e fakateaga a ia ke he ma, ha ko e fiafia kua toka ki mua hana.” (Heperu 12:2) Ti lahi e mena ne fakaako e tautolu mai he ua e mena ne talahau e Iesu hagaao ke he fiafia mooli.

Taha magaaho ne liliu mai e tau tutaki toko 70 ki a Iesu he oti e matagahua fakamatala. Ne fiafia lahi a lautolu ha ko e tau mena oti ne taute e lautolu, pihia mo e vega e tau temoni. Ka e tala age a Iesu ki a lautolu: “Aua foki neke fiafia a mutolu ke he mena nai, he fanogonogo e tau agaga kia mutolu; ka ko e hanai ke fiafia ai a mutolu, he tohi ha mutolu a tau higoa ke he lagi.” (Luka 10:1-9, 17, 20) Ē, ko e moua e taliaaga ha Iehova kua mua atu e aoga mo e tamai e fiafia lahi mahaki ke he ha kotofaaga pauaki.

He taha magaaho ne tutala a Iesu ke he moto tagata, ne nava lahi e fifine Iutaia ke he fakaakoaga ha Iesu ti pehē kua liga fiafia lahi e matua fifine ha Iesu he fai tama taane pihia. Ka e pehē a Iesu: “[“Nakai,” NW], mua e monuina he tau tagata ka fanogonogo ke he kupu he Atua mo e omaoma ki ai.” (Luka 11:27, 28) He matalahi ke he  tau fanau ha tautolu ka fakafiafia a tautolu. Ka ko e mena ne foaki ki a tautolu e fiafia tukulagi ko e omaoma ki a Iehova mo e moua e fakafetuiaga mitaki mo Ia.

Fiafia lahi a tautolu ka logona hifo kua fiafia a Iehova ki a tautolu. Pete he nakai ko e mena fiafia e tau kamatamata, nakai utakehe he mena ia e logonaaga fiafia ha tautolu. Ka fakatumau e mahani fakamooli ha tautolu he magaaho kamatamata, to hokulo atu e fiafia ha tautolu. (Roma 5:3-5) Foaki mai foki e Iehova haana agaaga ki a lautolu kua falanaki ki a ia, ti ko e fiafia ko e vala he fua he agaaga. (Kalatia 5:22) Lagomatai he mena ia a tautolu ke maama e talahauaga ia Salamo 64:10: “To fiafia e tagata tututonu kia Iehova.”

Fakamaama foki he mena nei e kakano ne fakatumau e fiafia ha Diana mo John pete he fehagai a laua mo e tau mena vihi. Pehē a Diana: “Eke e au a Iehova mo huaga haaku tuga e tama ke he matua.” Lafi e ia: “Logona hifo e au kua fakamonuina e ia au ke maeke ke matutaki e fakamatala tumau mo e mamali.” Ko e heigoa ne lagomatai a John ke fakatumau e fiafia mo e lahi e gahua fakamatala pete he toka e ia e kotofaaga haana? Pehē a ia: “Tali mai he 1998 he kotofa au ke fakaako he Aoga Fakaako Fekafekau, ne lahi atu e fakaako fakatagata haaku mogonei ke he mogo fakamua.” Fakamaama e ia ko e hikiaga ne taute e ia mo e hoana kua mukamuka lahi ha kua makai tumau a laua ke taute e tau mena oti ne kotofa e Iehova ki a laua. Lafi e ia: “Taute e maua mo e nakai tokihala.”

Tokologa foki ne logona hifo e mooli he talahauaga ia Salamo 64:10. Ma e fakatai, ko e hoa ne fekafekau ke molea 30 e tau he Peteli i United States. Kotofa mogoia a laua ke eke mo tau paionia pauaki. Talahau e laua: “Ko e aga pauaki ke momoko ka galo e koe e taha mena ne fiafia a koe ki ai,” ka e lafi e laua: “Nakai maeke a koe ke momoko tukulagi.” Magaaho ne moua e laua e kotofaaga foou, ne kamata agataha a laua ke fakamatala mo e fakapotopotoaga. Pehē foki a laua: “Liogi a maua hagaao ke he falu mena pauaki. He kitia e tali ke he tau liogi ha maua kua mafanatia mo e tamai e fiafia ki a maua. Nakai leva he hohoko atu a maua, ne kamata e falu he fakapotopotoaga ke paionia, ti fakamonuina a maua he ua e fakaako Tohi Tapu holo ki mua.”

Nakai mukamuka tumau ke fiafia. Ha ha i ai e tau magaaho ka logona hifo e tautolu e momoko. Ka e fakamafana e Iehova a tautolu aki e tau kupu ne moua ia Salamo 64:10. Pete ka loto lolelole a tautolu, maeke a tautolu ke iloa tonu ai ka fakatumau a tautolu ke mahani fakamooli pete e tau mena ne tutupu, “to fiafia [a tautolu] kia Iehova.” Amaamanaki atu foki a tautolu ke he magaaho ka fakamooli e maveheaga ha Iehova ke he “lagi fou mo e lalolagi fou.” To mitaki katoatoa mogoia e tau tagata oti kana mo e to “olioli . . . mo e fiafia tukulagi” ha ko e tau mena oti kana ka taute e Iehova.​—Isaia 65:17, 18.

Manamanatu la ke he kakano he mena nei. To mitaki katoatoa e malolō tino ha tautolu mo e to aala hake he tau aho takitaha mo e hakahakau. Pete ni e tau mena ne tutupu i tuai ne fakamomoko aki a tautolu, to nakai liu fakamamahi foki a tautolu. Fakamafana e Iehova a tautolu to “nakai tuai manatu ke he tau mena fakamua, ti nakai hake ai ke he loto e tau mena ia.” To liu a tautolu ke feleveia mo e tau fakahele ne kua mamate ti logona hifo tuga e tau matua he tama fifine 12 e tau ne fakaliu tu mai e Iesu: ‘Ti hohopo ai ha laua a tau ate’ he fiafia lahi. (Mareko 5:42) Fakahiku ai, ko e tau tagata takitaha he lalolagi to tututonu mooli mo e “to fiafia . . . kia Iehova” tukulagi.