1, 2. Ko e ha kua pulotu ke fanogonogo ke he Tufuga ka fifili e mena ke taute e koe he moui haau? (Kikite tau fakatino he kamataaga.)

KAEKE ko e fuata tote a koe, liga loga e fakatonuaga kua moua e koe hagaao ke he vahā haau i mua. Ko e tau faiaoga, tau tagata fakatonutonu, po ke falu ne liga tala atu ki a koe kua lata a koe ke moua e fakaakoaga tokoluga po ke gahua ka lagomatai a koe ke loga e tupe. Ka e nakai pihia e fakatonuaga ha Iehova. Mooli, manako a ia ki a koe ke eketaha fakamakamaka he aoga ke maeke ke leveki e moui mo e lalago ne koe a koe. (Kolose 3:23) Ka e iloa foki e ia he fuata a koe, lata ke taute e koe e tau fifiliaga aoga ka lauia e vahā haau i mua. Ti foaki e ia e tau matapatu fakaakoaga ke takitaki mo e lagomatai a koe ke moui he puhala kua fakafiafia a Ia he tau aho fakamui nei.​—Mataio 24:14.

² Manatu na iloa e Iehova e tau mena oti kana. Iloa e ia e mena ka tupu anoiha, ti iloa tonu e ia e tata ke he fakaotiaga he fakatokaaga nei. (Isaia 46:10; Mataio 24:3, 36) Iloa foki e Iehova  a koe. Iloa e ia e mena ka fiafia a koe mo e mena ka nakai fiafia a koe. Liga mitaki e fakatonuaga he tagata, ka e nakai pulotu mooli kaeke kua nakai fakavē ai ke he Kupu he Atua.​—Tau Fakatai 19:21.

3, 4. Lauia fēfē a Atamu mo Eva mo e ha laua a tau fanau he fanogonogo ke he fakatonuaga kelea?

³ Kua leva tuai e fakatonuaga kelea. Ko Satani ne foaki fakamua e fakatonuaga kelea ke he tau tagata. Tala age a Satani ki a Eva to fiafia lahi a laua kaeke ke fifili ni e laua e puhala ke momoui. (Kenese 3:1-6) Lotokai mooli a Satani! Manako a ia ki a Atamu mo Eva, pihia mo e tau hologa ha laua a mui, ke omaoma mo e tapuaki age ki a ia ka e nakai ki a Iehova. Ne nakai fai mena a Satani ne taute ma e tau tagata. Ko Iehova ne foaki ki a laua e tau mena oti kana. Tufuga e Ia a laua ko e hoa mau, foaki age e kaina fulufuluola ke nonofo ai, mo e tau tino mitaki katoatoa ha laua ke momoui tukulagi.

⁴ Momoko ai, nakai omaoma a Atamu mo Eva ke he Atua. He pihia, ne vevehe kehe e laua a laua mai ia Iehova ne foaki age e moui. Kua kelea lahi e fakahikuaga. Tuga e tau fiti ne hehele mai he akau, ne fuakau fakahaga a Atamu mo Eva ti mamate. Matematekelea foki e tau fanau ha laua ti lauia ai foki a tautolu oti. (Roma 5:12) Laulahi he tau tagata he vahā nei ne fakaheu e talahauaga he Atua mo e taute ni e mena ne manako a lautolu ki ai. (Efeso 2:1-3) Ko e heigoa e tau fua? Pehē e Tohi Tapu kua “nakai ni fai iloilo” he magaaho ne totoko e tau tagata ki a Iehova.​—Tau Fakatai 21:30.

5. Puhala fe ne mauokafua e Atua ke he tau tagata, ti hako nakai a ia?

⁵ Mauokafua a Iehova to ha ha i ai e tau tagata, putoia foki e tau fuata ikiiki tokologa ka manako ke iloa mo e fekafekau ki a Ia. (Salamo 103:17, 18; 110:3) Ko e tau fuata ikiiki nei kua uho lahi mooli ki a Iehova! Ko koe nakai taha ia lautolu? Kua moua mooli e koe e “tau mena mitaki” loga mai he Atua, ti lafi e mena nei ke he fiafia haau he moui. (Totou Salamo 103:5; Tau Fakatai 10:22) To fakatutala a tautolu ke he fā e mena nei. Ko e tau mena kai fakaagaaga, tau kapitiga mitaki, tau foliaga uho lahi, mo e tokanoaaga mooli.

6. Ko e ha kua lata a koe ke leveki e manako fakaagaaga haau, ti ko e heigoa ne foaki e Iehova ke lagomatai a koe?

⁶ Nakai moua he tau manu e manako fakaagaaga, kakano kua nakai logona hifo e lautolu e manako ke iloa e Tufuga. Ka e fai a tautolu. (Mataio 4:4) Ka fanogonogo a tautolu ke he Atua to moua e tautolu e iloilo, pulotu, mo e fiafia. Pehē a Iesu: “Uhoaki a lautolu ne [“manamanatu ke he tau mena fakaagaaga,” NW].” (Mataio 5:3) Foaki mai he Atua ki a tautolu e Tohi Tapu ti fakaaoga e “fekafekau fakamoli mo e loto matala” ke tauteute e tau tohi ke lagomatai a tautolu ke fakamalolō e tua. (Mataio 24:45) Fakahigoa e tautolu e tau tohi nei ko e tau mena kai fakaagaaga ha kua fagai he tau mena nei e tua ha tautolu mo e fakatupu malolō e fakafetuiaga ha tautolu mo Iehova. Moua e tautolu e tau mena kai fakaagaaga kehekehe nei ne kakano lahi!​—Isaia 65:13, 14.

7. Lagomatai fēfē he tau mena kai fakaagaaga mai he Atua a koe?

⁷ Maeke e tau mena kai fakaagaaga ke foaki ki a koe e pulotu mo e iloaaga ke manamanatu fakamitaki ka puipui a koe ke he tau puhala loga. (Totou Tau Fakatai 2:10-14.)  Ma e fakatai, ko e tau mahani nei kua lagomatai a koe ke mailoga e tau pikopiko, tuga e pikopiko kua nakai fai Tufuga po ke pikopiko ko e tupe mo e tau koloa he tino ka moua e koe e fiafia. Ko e tau mahani nei to lagomatai foki a koe ke kalo kehe he tau manako po ke tau aga ka fakamamahi a koe. Kia taute e tau mena oti kua maeke a koe ke pulotu mo e ke manamanatu fakamitaki. To kitia mogoia e koe kua fakaalofa a Iehova ki a koe mo e manako ke kautū a koe.​—Salamo 34:8; Isaia 48:17, 18.

8. Ko e ha kua lata a koe ke fakatata mogonei ke he Atua, mo e to aoga fēfē e mena nei ki a koe anoiha?

⁸ Nakai leva to moumou e lalolagi katoatoa ha Satani. Ko Iehova ni hokoia ka maeke ke puipui mo e foaki ki a tautolu e tau mena kua lata, liga putoia e tau mena kai ke lata mo e magaaho. (Hapakuka 3:2, 12-19) Ti ko e magaaho anei ke fakatata ke he Atua mo e fakamalolō e falanakiaga haau ki a ia. (2 Peteru 2:9) Ka taute pihia e koe, pete ni e tau mena ne tutupu viko ia koe, to logona hifo a koe tuga a Tavita ne pehē: “To tuku atu e au a Iehova ki mua haku nakai noa; ha ko e mena ha he tapa matau haku a ia, nakai fagahuatia ai au.”​—Salamo 16:8.

9. (a) He totou a tautolu ke he Ioane 6:44, ko e heigoa ne taute e Iehova? (e) Ko e heigoa e mena ne uho pauaki he feleveia mo e falu Fakamoli?

⁹ Ka feleveia fakamua a koe mo e tagata ne nakai i loto he kupu mooli, lahi fēfē e iloaaga haau ki a ia? Liga iloa e koe e higoa mo e foliga haana, ka e liga koēnaia. Ka e kehe lahi ka feleveia a koe mo e taha i loto he kupu mooli. Iloa e koe kua fakaalofa a ia ki a Iehova. Iloa e koe na kitia e Iehova e mena mitaki ia ia ti uiina a ia ke fakalataha mai ke he magafaoa Haana he tau tagata tapuaki. (Totou Ioane 6:44.) Pete ne mena ne hau e tagata i ai po ke feakiaga haana, fitā e lahi e mena ne iloa e koe hagaao ki a ia ti lahi e mena ne iloa e ia hagaao ki a koe!

10, 11. Ko e heigoa ne tatai e tau tagata ha Iehova, ti lauia fēfē a koe he mena nei?

¹⁰ Nakai leva he feleveia a koe mo e taha  Fakamoli, iloa e mua kua fitā he fai mena aoga lahi a mua ne tatai ai. Iloa e mua pete he kehekehe e tau vagahau ha mua, kua tatai e “vagahau mitaki” ha mua ke he kupu mooli. (Sefanaia 3:9) Kakano he mena nei kua talitonu tokoua a mua ke he Atua, momoui ke he tau tutūaga mitaki he mahani, mo e tatai e amaamanakiaga ha mua ma e anoiha. Lagomatai he tau mena nei a mua ke falanaki e taha ke he taha mo e fakamalolō e tuaga kapitiga malolō kua tumau tukulagi.

¹¹ Ti ka tapuaki a koe ki a Iehova, maeke a koe ke talahau mooli kua moua e koe e tau kapitiga mitaki lahi mahaki. Moua e koe e tau kapitiga he lalolagi katoa, pete ka nakaila feleveia a koe mo lautolu! Maeke nakai a koe ke manamanatu ke he falu tagata kehe ne nakai ko e tau tagata ha Iehova kua moua e mena fakaalofa uho nei?

12. Ko e heigoa e tau foliaga uho lahi ka fakatoka e koe?

¹² Totou Fakamatalaaga 11:9–12:1. Fai foliaga nakai a koe hane eketaha ke hokotia ki ai? Liga fakatoka e koe e foliaga ke totou e Tohi Tapu he tau aho takitaha po ke taute fakamitaki e tau tali po ke tau vala he tau feleveiaaga. Po ke liga lali a koe ke fakaaoga fakamitaki e Tohi Tapu he gahua fakamatala. Fēfē e logonaaga haau ka mailoga e koe kua holo ki mua a koe po ke tala atu pihia e falu? Liga logona e koe e fiafia lahi, ti lata a koe ke fiafia! Ko e ha? Ha kua taute e koe e mena ne manako a Iehova ke taute e koe, tuga ne taute e Iesu.​—Salamo 40:8; Tau Fakatai 27:11.

13. Ko e ha e fekafekau ke he Atua kua mitaki atu mai he hagaaki ke he tau foliaga he lalolagi nei?

¹³ Ka hagaaki a koe ke he fekafekauaga haau ki a Iehova, kua taute e koe e gahua ne moua e koe e fiafia mo e foaki ke he moui haau e fai kakano lahi. Fakatonu e Paulo: “Kia tumau a mutolu mo e nakai fagahuatia, kia fakamakai nakai noa ke he gahua he Iki, he iloa e mutolu nakai noa mo e fua ha mutolu a fakafita ke he gahua he Iki.” (1 Korinito 15:58) Ka hagaaki e tau tagata ke he tau foliaga he lalolagi nei tuga ke moua e tau tupe loga po ke talahaua, kua nakai fiafia mooli a lautolu. Pete kua kautū a lautolu, fa gatigati e logonaaga ha lautolu. (Luka 9:25) Fakaako e tautolu e mena nei mai he fakafifitakiaga he Patuiki ko Solomona.​—Roma 15:4.

14. Ko e heigoa ka fakaako e koe mai he mena ne moua e Solomona?

¹⁴ Ko Solomona ko ia taha he tau tagata ne mua atu e maukoloa mo e malolō lahi ne moua e moui nei. Pehē hifo a ia ki a ia: “To kamatamata e au a koe ke he olioli, kia fiafia a ke he mena mitaki.” (Fakamatalaaga 2:1-10) Talaga e Solomona e tau fale ne mua atu e fulufuluola, taute e tau katene mo e tau paaka ofoofogia, ti taute e ia e tau mena ne loto a ia ki ai. Logona hifo nakai e ia e fiafia? He liu a Solomona ono ke he tau mena oti ne taute e ia, pehē a ia: “Kitiala, ko e mena fakateaga ni haia.” Lafi e ia: “Kua nakai ni fai mena aoga.” (Fakamatalaaga 2:11) To fakaako mai nakai a koe he mena ne moua e Solomona?

15. Ko e ha kua lata a koe mo e tua, ti lagomatai fēfē he mena ia a koe he fakaako mai he Salamo 32:8?

¹⁵ Moua he falu tagata e tau fakaakoaga he moui ha kua taute e tau hehē mo e mamahi ha ko e tau fua kelea. Nakai manako a Iehova ke tupu e mena nei ki a koe. Manako a ia ki a koe ke fanogonogo mo e omaoma ki a ia. Lata e mena nei mo e tua, ka e to nakai tokihala  a koe ke he tau fifiliaga haau ne taute mogonei ha ko e tua haau. To nakai nimo e Iehova e “fakaalofa kua fakakite mai ai e [koe] ke he hana higoa.” (Heperu 6:10) Ti eketaha ke atihake e tua malolō. To taute mogoia e koe e tau fifiliaga mitaki he moui ti kitia e koe kua manako haau a Matua he lagi ke kautū a koe.​—Totou Salamo 32:8.

16. Ko e ha kua tokiofa e tautolu e tokanoaaga mo e fakaaoga ai he puhala pulotu?

¹⁶ Tohi e Paulo: “Ko e mena ha i ai e Agaga he Iki [Iehova] ha ha i ai e tokanoaaga.” (2 Korinito 3:17) Fiafia a Iehova ke he tokanoaaga ti tufuga e ia a koe ke fiafia foki ke he tokanoaaga. Ka e manako a ia ki a koe ke fakaaoga e tokanoaaga ke he puhala pulotu ka puipui a koe. Liga falu he tau kapitiga haau kua onoono ke he tau fakatino telefua, kua mahani feuaki, mo e foaki e tau momoui ha lautolu ke he tau sipote hagahaga kelea, po ke fakaaoga fakahehē e tau tulaki po ke kava. Liga tuga na fulufuluola e tau mena nei he mogo fakamua, ka e fa takitaki atu ai ke he tau fua kelea tuga e gagao, hufiaaga mamahi, po ke mate foki. (Kalatia 6:7, 8) Ko e tau fuata ikiiki ne taute e tau mena nei ne liga manamanatu kua moua e lautolu e tokanoaaga, ka e nakai pihia.​—Tito 3:3.

17, 18. (a) Tokanoa mooli fēfē a tautolu he omaoma ke he Atua? (e) He puhala fe ne lahi atu e tokanoaaga ha Atamu mo Eva ke he tau tagata he vahā nei?

¹⁷ He taha faahi, ko e omaoma ki a Iehova kua mitaki ma tautolu. Mitaki ai ma e malolō tino ha tautolu mo e fakatokanoa mooli a tautolu. (Salamo 19:7-11) Ka fakaaoga e koe e tokanoaaga he puhala pulotu, kakano ka fifili a koe ke omaoma ke he tau fakatufono mo e tau matapatu fakaakoaga mitaki katoatoa he Atua to fakakite e koe ke he Atua mo e tau matua ko e tagata lotomatala a koe. Liga to lahi e falanaki he tau matua haau ki a koe ti lahi atu foki e tokanoaaga ka foaki ki a koe. Mavehe e Iehova to nakai leva ti foaki e ia ke he tau fekafekau tua fakamooli oti haana e tokanoaaga mitaki katoatoa ne fakahigoa he Tohi Tapu ko e “tokanoaaga ha ha he monuina he fanau he Atua.”​—Roma 8:21.

¹⁸ Ko e tokanoaaga nei ne moua e Atamu mo Eva. He kaina ko Etena, taha ni e mena ne tala age e Atua ki a laua ke ua taute. Nakai lata a laua ke kai e fua he taha akau pauaki. (Kenese 2:9, 17) Manatu kia a koe kua nakai tonu po ke pāpā maō e Atua ha kua tuku age ki a laua e matafakatufono ia? Nakai pihia! Manamanatu ke he tau matafakatufono loga ne taute he tau tagata ti poaki ke he falu ke omaoma ai. Ka e foaki e Iehova ki a Atamu mo Eva taha ni e matafakatufono.

19. Ko e heigoa hane fakaako e Iehova mo Iesu ki a tautolu ka lagomatai a tautolu ke moua e tokanoaaga?

¹⁹ Pulotu lahi a Iehova he puhala ne fakafehagai a ia mo tautolu. He nakai tuku mai ki a tautolu e tau matafakatufono loga, fakaako fakamitaki e ia a tautolu ke omaoma ke he fakatufono he fakaalofa. Fakaako e ia a tautolu ke momoui fakatatau ke he tau matapatu fakaakoaga haana mo e vihiatia e mena  kelea. (Roma 12:9) He Lauga he Mouga, ko e Haana Tama ko Iesu kua lagomatai a tautolu ke maama e kakano ne taute he tau tagata e tau mena kelea. (Mataio 5:27, 28) He lalolagi foou, ko Iesu e Patuiki he Kautu he Atua ka fakaako tumau a tautolu ke kitia e mena hako mo e mena hepe tuga he kitia e ia. (Heperu 1:9) To taute foki e Iesu e tau manamanatuaga mo e tau tino ha tautolu ke mitaki katoatoa. Manamanatu la ka nakai kamatamata a tautolu ke taute e tau mena kelea ti nakai mamahi a tautolu ha ko e nakai mitaki katoatoa. Fakahiku ai, to moua e tautolu e “tokanoaaga ha ha he monuina” ne mavehe mai e Iehova.

20. (a) Fakaaoga fēfē e Iehova e tokanoaaga haana? (e) Fifitaki fēfē e koe a ia?

²⁰ He lalolagi foou, to fai fakakaupāaga agaia e tokanoaaga ha tautolu. He puhala fe? To lata tumau a tautolu ke omoomoi he fakaalofa ha tautolu ma e Atua mo e falu. Ka takitaki he fakaalofa a tautolu, kua fifitaki e tautolu a Iehova. Pete kua katoatoa e tokanoaga ha Iehova, fifili a ia ke fakaatā e fakaalofa ke takitaki e tau mena oti ne taute e ia ti putoia e puhala ne fakafehagai a ia mo tautolu. (1 Ioane 4:7, 8) Ti fai kakano mitaki kua maeke a tautolu ke tokanoa mooli ka fifitaki a tautolu ke he Atua.

21. (a) Fēfē e logonaaga ha Tavita hagaao ki a Iehova? (e) Ko e heigoa ka fakatutala a tautolu he vala tala ka mui mai?

²¹ Loto fakaaue nakai a koe ke he tau mena mitaki oti kua foaki atu e Iehova ki a koe? Foaki e ia ki a koe e tau mena kai fakaagaaga, tau kapitiga mitaki, tau foliaga uho lahi, amaamanakiaga he tokanoaaga mitaki katoatoa he vahā i mua, mo e falu mena fakaalofa homo ue atu foki. (Salamo 103:5) Liga logona hifo a koe tuga a Tavita he liogi ke he tau kupu ia Salamo 16:11: “To fakakite mai e koe kia au e puhala he moui: ha i mua hāu e fiafia ke makona ai; ha he lima matau hāu e olioli tukulagi.” He vala tala ka mui mai, to fakatutala a tautolu ke he falu kupu mooli uho he Salamo 16. To lagomatai he tau mena nei a koe ke kitia e puhala ka moua e koe e moui ne mua atu!