1. Fēfē e onoonoaga he tau tagata tokologa ke he gahua?

FĒFĒ e onoonoaga he tau tagata tokologa ke he gahua he matakavi ne nofo ai a koe? Laulahi he tau motu ne gahua malolō mo e gahua loa e tau tagata. Ko e tau tagata ne molea e gahua kua fa lavelave lahi foki ke okioki, ke fai magaaho mo e tau magafaoa, po ke leveki e tau manako fakaagaaga ha lautolu. (Fakama. 2:23) He taha faahi, falu tagata ne nakai manako ke gahua ti kumi lagatau he nakai fia gahua.​—Fakatai 26:13, 14.

2-3. Ko e heigoa e fakafifitakiaga ne fakatoka e Iehova mo Iesu hagaao ke he gahua?

² Kehe ai mo e tau aga nakai lagotatai he lalolagi, manamanatu ke he puhala ne onoono a Iehova mo Iesu ke he gahua. Kua gahua malolō mooli a Iehova. Talahau fakamaali ai e Iesu: “Kua gahua haku a Matua kua hoko mai ni ke he aho nei, ha ne gahua foki au.” (Ioane 5:17) Manamanatu ke he tau gahua oti ne taute he Atua he tufuga e ia e tau mena fakaagaaga loga mo e lagi mo e lalolagi katoa. Kitia foki e tautolu e fakamooliaga lahi he tau gahua tufuga he Atua ke he lalolagi fulufuluola ne nonofo ai a tautolu. Ti hako e talahauaga he salamo: “Iehova na e, kua loga ue atu hāu a tau gahua! Ne eke e koe e tau mena oti ia mo e iloilo, kua puke e lalolagi ke he hāu a tau mena.”​—Sala. 104:24.

³ Fifitaki e Iesu e Matua haana. Lagomatai a ia he magaaho ne ‘fakamau he Atua e lagi.’ Fakalataha a ia mo Iehova ‘ko e tufuga ne mua.’ (Fakatai 8:27-31) Magaaho fakamui, haia a  Iesu he lalolagi ti taute e ia e tau gahua ofoofogia. Ko e gahua ia ne tuga e mena kai ma haana, ti fakamooli he tau gahua haana kua fakafano mai he Atua a ia.​—Ioane 4:34; 5:36; 14:10.

4. Ko e heigoa ka fakaako e tautolu mai ia Iehova mo Iesu hagaao ke he okioki?

⁴ Ko e tau fakafifitakiaga kua fakatoka e Iehova mo Iesu he gahua malolō ne kakano kia kua nakai lata a tautolu ke okioki? Nakai pihia. Nakai mategūgū a Iehova he oti e taute e ia taha mena. Ka e talahau he Tohi Tapu he mole e tufuga e Iehova e lagi mo e lalolagi “ne okioki ai a ia, mo e fakamanava ai.” (Esoto 31:17) Fakamooli he mena ia kua okioki fakakū a Iehova mo e fiafia ke he tau mena ne tufuga e Ia. Ti pete he gahua malolō a Iesu he nofo he lalolagi, fakaatā agaia e ia e magaaho ke okioki mo e kai mo e tau kapitiga haana.​—Mata. 14:13; Luka 7:34.

5. Ko e heigoa ne taufetului ki ai e tokologa?

⁵ Fakamalolō he Tohi Tapu e tau tagata he Atua ke fiafia he gahua. Lata e tau fekafekau haana ke gahua fakamakutu ka e nakai teva. (Fakatai 15:19) Liga gahua tupe a koe ke leveki e magafaoa haau. Ti ko e tau tutaki oti he Keriso kua fakalago ki ai e matagahua ke fakamatala e tala mitaki. Ka e lata foki a koe ke lahi e okioki. Fa taufetului nakai a koe ke lagotatai e magaaho ke gahua tupe, gahua fakamatala, mo e okioki? Iloa fēfē e tautolu e lahi mahaki he gahua mo e lahi mahaki he okioki?

6. Fakakite fēfē he Mareko 6:30-34 kua lagotatai e onoonoaga ha Iesu ke he gahua mo e okioki?

⁶ Aoga ke moua e onoonoaga lagotatai ke he gahua. Omoomoi e Patuiki ko Solomona ke tohi: “Ko e mena mo e hana ni a tau ke he tau mena oti.” Totoku e ia e tō akau, talaga, tagi, kata, koli, mo e falu matagahua foki. (Fakama. 3:1-8) Maaliali ai, ua e vala aoga lahi he moui ko e gahua mo e okioki. Lagotatai e onoonoaga ha Iesu ke he gahua mo e okioki. He taha magaaho, liliu mai e tau aposetolo he fenoga fakamatala. Ne lavelave lahi a lautolu ti “nakai atā ke kai mena.” Pehē a Iesu: “Ati o mai a, hoko tautolu ni, ke he mena tokanoa ke okioki fakatote ai.” (Totou Mareko 6:30-34.) Pete ko ia mo e tau tutaki haana kua nakai moua tumau e okioki ne manako a lautolu ki ai, iloa e Iesu kua lata oti a lautolu ke okioki.

7. Ko e heigoa he fakaako ke he fakatufono he Sapati kua lagomatai a tautolu ke taute?

⁷ Falu magaaho kua lata oti a tautolu ke moua e okioki po ke hiki e fakaholoaga he aho. Kitia e tautolu e mena ia mai he fakaholoaga ne taute he Atua ma e tau tagata haana i tuai​—ko e Sapati he tau faahi tapu takitaha. Nakai ko tautolu i lalo he Fakatufono faka-Mose, ka e aoga agaia ki a tautolu he manamanatu ke he mena ne talahau ai hagaao ke he Sapati. Ko e mena kua fakaako e tautolu ka lagomatai ke hakahaka e onoonoaga ha tautolu ke he gahua mo e okioki.

8. Hagaao ki a Esoto 31:12-15, ko e Sapati ko e aho ma e heigoa?

⁸ Talahau he Kupu he Atua he mole e “aho” ono he tufugatia, ne okioki fakakū e Atua he tufuga e tau mena he lalolagi. (Kene. 2:2) Fiafia a Iehova ke gahua ti tumau a ia ke “gahua . . . kua hoko mai ni ke he aho nei.” (Ioane 5:17) Ko e foakiaga ke he Sapati he tau faahi tapu takitaha ne muitua ke he fakaholoaga he aho okioki ha Iehova ne fakamaama ia Kenese. Talahau he Atua ko e Sapati ko e fakamailoga he vahāloto haana mo Isaraela. Ko e aho ‘ke okioki ai kua tapu kia Iehova.’  (Totou Esoto 31:12-15.) Ko e fakatapu ke nakai gahua kua lauia e tau tagata oti, putoia e tau fanau, tau fekafekau, mo e tau manu fao foki. (Esoto 20:10) Kua fakaatā ai e tau tagata ke fakalahi e onoonoaga ke he tau mena fakaagaaga.

9. Ko e heigoa e onoonoaga nakai lagotatai ke he Sapati ne tupu he vahā ha Iesu?

⁹ Ko e aho Sapati kua mitaki ma e tau tagata he Atua; ka e tokologa e tau takitaki lotu he vahā ha Iesu ne pāpā maō lahi e onoonoaga ki ai. Talahau e lautolu kua nakai fakaatā he Sapati ke faki foki e falu fua saito po ke fakamaulu e tagata gagao. (Mare. 2:23-27; 3:2-5) Ko e tau onoonoaga pihia kua nakai fakakite e manatu he Atua, ti talahau fakamaali e Iesu e mena ia ki a lautolu ka fanogonogo.

10. Ko e heigoa ka fakaako e tautolu mai he Mataio 12:9-12 hagaao ke he onoonoaga ha Iesu ke he Sapati?

¹⁰ Fakamanatu e Iesu mo e tau tutaki Iutaia haana e Sapati ha ko lautolu i lalo he Fakatufono faka-Mose. * Ka e fakakite e Iesu ke he tau kupu mo e tau gahua ko e muitua ke he Sapati kua tonu ma e tau gahua fakaalofa mo e lagomatai pihia. Talahau fakamitaki e ia: “Kua lata ai ke mahani mitaki ke he sapati.” (Totou Mataio 12:9-12.) Nakai onoono a ia ko e taute he tau mahani totonu mo e lagomatai kua moumou e Sapati. Fakamaama he tau gahua ha Iesu e vala aoga lahi he Sapati. Ha kua okioki e tau tagata he Atua mai he tau gahua he tau aho takitaha, maeke a lautolu  ke hagaaki ke he tau mena fakaagaaga. Tupu hake a Iesu he magafaoa ne liga hagaaki ke he tau mena fakaagaaga he Sapati. Fakakite he mena ia e totouaga ha tautolu hagaao ki a Iesu he mogo ne haia a ia he maaga haana i Nasareta: “Kua hu atu a [Iesu] ke he sunako ke he aho sapati ko e hana mahani haia; kua tu ki luga ke totou.”​—Luka 4:15-19.

11. Ko hai ne fakatoka e fakafifitakiaga mitaki ma Iesu hagaao ke he gahua?

¹¹ Fakaako e Iosefa ke he tama hiki haana ko Iesu e onoonoaga he Atua ke he gahua ke eke mo tagata kamuta. (Mata. 13:55, 56) Kitia ai e Iesu a Iosefa ne gahua malolō he tau aho takitaha ke leveki aki e magafaoa lahi haana. Tala age a Iesu ke he tau tutaki haana he mogo fakamui: “Kua lata e eke gahua mo e hana palepale.” (Luka 10:7) Ē, kua aga a Iesu he gahua malolō.

12. Ko e heigoa e tau kupu tohi ne fakaaoga he Tohi Tapu hagaao ke he gahua malolō?

¹² Pihia foki e aposetolo ko Paulo. Ko e matapatu gahua haana ko e fakamatala e higoa mo e fekau ha Iesu. Ka e gahua tupe a Paulo ke leveki aki a ia. Mailoga he tau tagata Tesalonia e “gahua mamafa mo e mamahi” haana he “po katoa mo e aho” ke nakai “fakamamafa atu” a ia ke he ha tagata. (2 Tesa. 3:8; Gahua 20:34, 35) Liga hagaao a Paulo ke he gahua haana ko e talaga fale ie. Ne nofo a ia mo Akula mo Pisila i Korinito ti “gahua; ha ko e feua ha lautolu ke eke e tau fale ie.” He gahua a Paulo he “po katoa mo e aho” ne nakai kakano kua gahua fakapākau a ia. Ne okioki a ia mai he talaga fale ie, tuga he aho Sapati. Ko e aho ia kua foaki ki a ia e magaaho ke fakamatala ke he tau Iutaia ne nakai gahua foki he Sapati.​—Gahua 13:14-16, 42-44; 16:13; 18:1-4.

13. Ko e heigoa ka fakaako e tautolu mai he fakafifitakiaga ha Paulo?

¹³ Fakatoka he aposetolo ko Paulo e fakafifitakiaga mitaki. Lata a ia ke gahua tupe; ka e eketaha foki a ia ke fakalataha tumau ke he “feua he ekepoa ke he vagahau mitaki he Atua.” (Roma 15:16; 2 Kori. 11:23) Tomatoma e ia e falu ke taute pihia foki. Ti ko e mena ia, ko Akula mo Pisila kua ‘gahua fakalataha mo ia ke he gahua a Keriso Iesu.’ (Roma 12:11; 16:3) Tomatoma e Paulo e tau tagata Korinito ke “fakamakai nakai noa ke he gahua he Iki.” (1 Kori. 15:58; 2 Kori. 9:8) Omoomoi foki e Iehova e aposetolo ko Paulo ke tohi: “Kaeke ke nakai fia gahua e taha, aua foki neke kai a ia.”​—2 Tesa. 3:10.

14. Ko e heigoa e kakano ha Iesu he talahau e ia e manatu ia Ioane 14:12?

¹⁴ Ko e gahua ne mua atu e aoga he tau aho fakahiku nei ko e gahua fakamatala mo e taute tutaki. Ti talahau tuai e Iesu to lahi atu e gahua he tau tutaki haana ki a ia! (Totou Ioane 14:12.) Nakai kakano a ia to taute e tautolu e tau mana tuga ne taute e ia. Ka e to fakamatala mo e fakaako atu e tau tutaki haana ke he tau matakavi loga, ke he tau tagata tokologa, mo e loa atu foki e magaaho mai he haana.

15. Ko e heigoa e tau hūhū kua lata a tautolu ke hūhū hifo, mo e ko e ha?

¹⁵ Ka gahua tupe a koe, hūhū hifo e tau hūhū nei: ‘Iloa lahi nakai au he gahuaaga haaku ko e tagata gahua malolō? Oti nakai e gahua haaku he magaaho fafati mo e taute fakamitaki ai?’ Ka pehē a koe ē, to liga falanaki e takitaki gahua haau ki a koe. To futia foki e fekau he Kautu ki a lautolu kua gahua mo koe. He gahua fakamatala mo e fakaako atu, hūhū hifo e tau hūhū nei: ‘Iloa lahi nakai au ko e tagata gahua malolō he fonua? Tauteute fakamitaki nakai au ke lata mo e tau aahi atu fakamua?  Liu mafiti nakai au ke tutala ke he tau tagata ne fiafia? Mo e fakalataha tumau nakai au ke he tau vala kehekehe he gahua fakamatala?’ Ka pehē a koe ē, to moua e koe e fiafia he fekafekauaga haau.

16. Ko e heigoa e kehekehe he aga ha Iesu mo e tau aposetolo ke he tokologa he vahā nei hagaao ke he okioki?

¹⁶ Iloa e Iesu kua lata a ia mo e tau aposetolo haana ke moua e taha okioki he falu magaaho. Ka e tokologa e tagata he magahala ia mo e tokologa he vahā nei ka fakatatai ke he tagata maukoloa he fakataiaga ha Iesu. Talitonu e tagata ia ki a ia ni: “Kia nofo fakatekiteki a, ti kai a, mo e inu, mo e fiafia ai a koe.” (Luka 12:19; 2 Timo. 3:4) Manamanatu a ia kua mua e aoga he okioki mo e tau fakafiafiaaga. Kehe mamao, ko Iesu mo e tau aposetolo ne nakai fakavē e tau momoui ha lautolu ke fakafiafia ni a lautolu.

17. Fakaaoga fēfē e tautolu e magaaho ka nakai gahua tupe a tautolu?

¹⁷ He vahā nei, lali a tautolu ke fifitaki a Iesu he fakaaoga e magaaho ne nakai gahua tupe ke okioki mo e ke taute e mena mitaki he fakamatala ke he falu mo e ō ke he tau feleveiaaga Kerisiano. Ki a tautolu, ko e taute tutaki mo e o atu ke he tau feleveiaaga kua mua e aoga ti eketaha a tautolu ke fakalataha tumau ke he tau matagahua fakaagaaga ia. (Hepe. 10:24, 25) Pete foki ka ō evaeva a tautolu, tumau a tautolu ke he fakaholoaga fakaagaaga he o atu ke he tau feleveiaaga he matakavi ia, mo e moua e tau magaaho ke tutala mo lautolu kua feleveia mo tautolu.​—2 Timo. 4:2.

18. Ko e heigoa kua manako e Patuiki ha tautolu ko Keriso Iesu ke taute e tautolu?

¹⁸ Loto fakaaue mooli a tautolu ko e ha tautolu a Patuiki ko Keriso Iesu, kua manamanatu mo e lagomatai a tautolu ke moua e onoonoaga lagotatai ke he gahua mo e okioki! (Hepe. 4:15) Manako a ia ki a tautolu ke moua e okioki kua lata. Manako foki a ia ki a tautolu ke gahua malolō ke leveki e tau momoui fakatino ha tautolu mo e ke fakalataha ke he gahua fiafia he taute tutaki. He vala tala ka mui mai, to fakatutala a tautolu ke he matagahua ne taute e Iesu he fakatokanoa a tautolu mai he puhala favale he fakatupa.