1-2. Mai he tala ha Angelito, ko e heigoa ha tautolu takitokotaha kua lata ke taute?

KUA feaki hake kia a koe he tau matua ko e Tau Fakamoli a Iehova? Ka pihia, manatu kua nakai moua e koe e fakafetuiaga fakatagata mo Iehova mai ia laua. He fekafekau e tau matua ha tautolu ke he Atua po ke nakai, igatia a tautolu mo e fakamalolō e fakafetuiaga ni ha tautolu mo Iehova.

² Manamanatu ke he tala he matakainaga taane ko Angelito. Feaki hake a ia he magafaoa Fakamoli. Ka e he tote a ia, ne nakai tata lahi a ia ke he Atua. Pehē a ia, “Fekafekau au ki a Iehova ha kua manako au ke taute e mena ne taute he magafaoa haaku.” Ka e fifili a Angelito ke fakalahi e magaaho he totou e Kupu he Atua mo e manamanatu fakahokulo ki ai, ti kamata a ia ke liogi tumau ki a Iehova. Ko e heigoa e fua? Pehē a Angelito, “Fakaako e au ko e puhala ni ke tata ke he haaku a Matua fakahele ko Iehova, ko e iloa mitaki e au a Ia.” Ko e tala ha Angelito ne fakalagā e falu hūhū aoga lahi: Ko e heigoa e kehekehe he mahani mo Iehova mo e iloa mitaki a ia? Ti iloa fēfē e tautolu a Iehova?

3. Ko e heigoa e kehekehe he iloa a Iehova mo e iloa mitaki a Ia?

³ Maeke a tautolu ke talahau kua iloa he tagata a Iehova ka mailoga e ia e higoa he Atua po ke mahani a ia mo e falu mena ne talahau po ke taute e Ia. Ka e lahi atu e mena kua putoia  ke iloa mitaki a Iehova. Lata a tautolu ke fakaaoga e magaaho ke fakaako hagaao ki a Iehova mo e tau mahani homo ue atu haana. Magaaho laia ka kamata a tautolu ke maama e mena ne omoomoi a Ia ke vagahau mo e ke taute. Lagomatai he mena ia a tautolu ke maama kua talia po ke nakai talia e ia e tau manatu, tau fifiliaga, mo e tau gahua ha tautolu. Ka maama e tautolu e finagalo ha Iehova ti lata ke fakagahua e tau mena kua fakaako e tautolu.

4. Lagomatai fēfē ki a tautolu he manamanatu ke he tau fakafifitakiaga he Tohi Tapu?

⁴ Falu tagata ka vā a tautolu he manako ke fekafekau ki a Iehova, ti totoko foki e lautolu a tautolu ka kamata ke fakalataha mo e tau tagata ha Iehova. Kaeke ke falanaki a tautolu ki a Iehova, to nakai tiaki e ia a tautolu. To fakatoka e tautolu e fakavēaga ma e fakafetuiaga mo e Atua he moui katoa ha tautolu. Maeke mooli nakai a tautolu ke iloa mitaki a Iehova? Ē, maeke! Ko e tau fakafifitakiaga ne fakatoka he tau tagata taane nakai mitaki katoatoa tuga a Mose mo e Patuiki ko Tavita ne fakakite ai ko e mena maeke. He manamanatu a tautolu ke he tau gahua ha laua, to tali e tautolu ua e hūhū: Iloa fēfē e laua a Iehova? Ti ko e heigoa e tau fakaakoaga ne moua e tautolu mai he tau fakafifitakiaga ha laua?

5. Ko e heigoa ne fifili a Mose ke taute?

⁵ Taute e Mose e mena ne fakaako e ia. Kavi ke he 40 e tau tau he moui ha Mose, fifili a ia ke fakalataha mo e tau tagata he Atua ko e tau tagata Heperu, ka e nakai ke talahaua “ko e tama he tama fifine a Farao.” (Hepe. 11:24) Toka hifo e Mose e tuaga matalahi. He fakalataha mo e tau tagata Heperu ne fakatupa i Aikupito, ne fakafehagai a ia mo e ita lahi he pule malolō ko Farao ne onoono ki ai e tau tagata ko e atua. Ko e tua malolō mooli! Falanaki a Mose ki a Iehova. Ko e falanaki pihia kua fakavē ke he fakafetuiaga tukulagi.​—Fakatai 3:5.

6. Ko e heigoa ka fakaako e tautolu mai he fakafifitakiaga ha Mose?

⁶ Ko e heigoa e fakaakoaga ma tautolu? Tuga a Mose, lata a tautolu oti ke taute e fifiliaga: To fifili kia a tautolu ke fekafekau ke he Atua mo e fakalataha mo e tau tagata haana? To taute e tautolu e tau foakiaga ke fekafekau ke he Atua, ti fakafehagai a tautolu mo e totoko ha lautolu ne nakai iloa a Iehova. Kaeke ke falanaki a tautolu ke he ha tautolu a Matua he lagi to lalago e ia a tautolu!

7-8. Ko e heigoa ne matutaki a Mose ke fakaako?

⁷ Matutaki a Mose ke fakaako hagaao ke he tau mahani ha Iehova mo e taute e finagalo Haana. Ma e fakatai, he ole ki a Mose ke takitaki e motu ha Isaraela mai he fakapaeaaga, ne nakai mauokafua a ia ti tala age lagaloga ki a Iehova kua nakai lotomatala a ia. Tali atu e Atua mo e fakaalofa hofihofi noa mooli he foaki e lagomatai ki a Mose. (Esoto 4:10-16) Ti ko e fua, maeke a Mose ke tala age e tau fekau malolō he fakafiliaga ki a Farao. Kitia mogoia e Mose kua fakaaoga e Iehova e malolō Haana he fakahao a Isaraela ka e tamate a Farao mo e tau kautau haana he Tahi Kula.​—Esoto 14:26-31; Sala. 136:15.

⁸ He mole e takitaki mai e Mose e tau Isaraela i Aikupito, ne fakatumau a lautolu ke gugū. Pete ia, ne mailoga e Mose e fakauka lahi ha Iehova he fehagai mo e tau tagata ne fakatoka mai e Ia he tupaaga. (Sala. 78:40-43) Kitia foki e Mose a Iehova ne fakakite e mahani fakatokolalo ofoofogia he mogo ne hiki e Ia e manatu Haana he mole e ole ha Mose ki a Ia ke hiki.​—Esoto 32:9-14.

9. Hagaao ke he Heperu 11:27, tata fēfē e fakafetuiaga ha Mose mo Iehova?

 ⁹ He mole e Ō Kehe, kua tata lahi e fakafetuiaga ha Mose mo Iehova ke tuga na kitia e ia e Matua haana he lagi. (Totou Heperu 11:27.) He fakakite e fakafetuiaga tata lahi ia, pehē e Tohi Tapu: “Kua vagahau mai foki e Iehova kia Mose, kua fehagaoaki a laua, tuga ne vagavagahau e tagata mo e hana kapitiga.”​—Esoto 33:11.

10. Ke iloa mitaki a Iehova, ko e heigoa kua lata a tautolu ke taute?

¹⁰ Ko e heigoa e fakaakoaga ma tautolu? Ke iloa mitaki a Iehova, nakai ni fakaako e tautolu hagaao ke he tau mahani haana ka e lata ke taute foki e finagalo haana. Ko e finagalo ha Iehova he vahā nei “ke fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:3, 4) Taha puhala ke taute e tautolu e finagalo he Atua ko e fakaako e falu hagaao ki a Iehova.

11. He fakaako e tautolu e falu hagaao ki a Iehova, iloa mitaki fēfē e tautolu a ia?

¹¹ Fa fakaako e tautolu e falu hagaao ki a Iehova ti iloa mitaki foki e tautolu a ia. Ma e fakatai, kitia mooli e tautolu e fakaalofa hofihofi noa ha Iehova ka takitaki e ia a tautolu ki a lautolu kua hako e tuaga he tau loto. (Ioane 6:44; Gahua 13:48) Kitia e tautolu e malolō he Kupu he Atua kua gahuahua he onoono a tautolu ki a lautolu kua fakaako e tautolu hane tiaki e tau aga kelea mo e kamata ke fakatapulu ke he tau tagata foou. (Kolo. 3:9, 10) Kitia e tautolu e fakamooliaga he fakauka he Atua he foaki e ia ke he tokologa he fonua ha tautolu e magaaho ke fakaako hagaao ki a Ia mo e ke fakamomoui.​—Roma 10:13-15.

12. Ia Esoto 33:13, ko e heigoa ne ole a Mose ke moua, ti ko e ha?

¹² Nakai uta fakateaga e Mose e fakafetuiaga haana mo Iehova. He mole e taute e Mose e tau gahua malolō ke he higoa he Atua, ne ole fakalilifu a ia ke fakaatā a ia ke iloa mitaki a Iehova. (Totou Esoto 33:13.) Molea e 80 e tau tau he moui ha Mose he taute e ole ia, ka e iloa e ia kua lahi agaia e mena ke fakaako e ia hagaao ke he Matua fakahele haana he lagi.

13. Ko e heigoa e taha puhala ka fakakite e tautolu kua uho e fakafetuiaga ha tautolu mo e Atua?

¹³ Ko e heigoa e fakaakoaga ma tautolu? Pete ni kua leva e fekafekau ha tautolu ki a Iehova, nakai lata a tautolu ke uta fakateaga e fakafetuiaga ha tautolu mo Ia. Ko e taha he tau puhala ka fakakite e tautolu kua uho e fakafetuiaga ha tautolu mo e Atua ko e tutala ki a ia he liogi.

14. Ko e ha e liogi ko e matapatu ke he fakaako fakalahi hagaao ke he Atua?

¹⁴ Ko e matutakiaga mitaki ko e puhala uho lahi ke he fakafetuiaga malolō. Ti fakatata ke he Atua he liogi tumau, ua matakutaku ke talahau e tau fatuakiloto haau ki a ia. (Efeso 6:18) Ko Krista ne nofo i Turkey, ne pehē: “Ko e fakaalofa haaku ki a Iehova mo e falanaki haaku ki a ia kua tupu he tau magaaho takitaha he talahau e au e tau manatu haaku ki a ia he liogi mo e kitia a ia kua lagomatai au. He kitia e tau tali ha Iehova ke he tau liogi haaku kua lagomatai au ke onoono ki a Iehova ko e Matua mo e Kapitiga.”

15. Fēfē e talahauaga ha Iehova ke he Patuiki ko Tavita?

¹⁵ Fanau e Patuiki ko Tavita he motu ne tukulele ki a Iehova ko e Atua. Ka e lahi e mena ne taute e Tavita he nakai ni muitua e tau aga fakalotu he magafaoa haana. Fakamalolō e ia e fakafetuiaga haana mo e Atua, ti ofania lahi mahaki e Iehova a ia. Talahau e Iehova hagaao ki a Tavita “ko e tagata ke lata  mo e [Haana] a loto.” (Gahua 13:22) Tata lahi fēfē a Tavita ki a Iehova?

16. Ko e heigoa ne fakaako e Tavita hagaao ki a Iehova he onoono ke he tau tufugatia?

¹⁶ Fakaako a Tavita ki a Iehova mai he tau tufugatia. He tote a Tavita, ne lahi e magaaho ne fakaaoga e ia i fafo ke leveki e tau fuifui mamoe he matua haana. Liga ko e mogoia ne kamata a ia ke manamanatu fakahokulo ke he tau mena ne tufuga e Iehova. Ma e fakatai, he ono hake a Tavita ki luga he lagi he pō, ne nakai ni kitia e ia e tau putuputu fetu ka e manamanatu foki a ia ke he tau mahani Haana ne tufuga ai. Omoomoi a Tavita ke tohi: “Kua talahau he lagi e lilifu he Atua; kua fakakite foki he pu lagi likoliko e gahua he hana tau lima.” (Sala. 19:1, 2) He manamanatu a Tavita ke he puhala ne tufuga e tau tagata, kitia e ia e pulotu homo ue atu ha Iehova. (Sala. 139:14) He lali a Tavita ke maama e tau gahua ha Iehova, ne logona hifo e ia e tote haana.​—Sala. 139:6.

17. Ko e heigoa kua fakaako e tautolu ka manamanatu fakahokulo ke he tau tufugatia?

¹⁷ Ko e heigoa e fakaakoaga ma tautolu? Fiafia ke he tau tufugatia. Foaki fakalahi e magaaho ke kitekite ke he fulufuluola he tufugatia ha Iehova; ti ofoofogia ki ai! He tau aho takitaha he moui haau, manamanatu fakahokulo ke he tau tufugatia ne viko takai ia koe​—ko e tau akau, tau manu, mo e tau tagata​—kua fakaako ki a koe hagaao ki a Iehova. Igatia mogoia e aho foou mo e puke he tau fakaakoaga hagaao ke he Matua fakahele haau. (Roma 1:20) Ti ko e tau aho takitaha to kitia e koe e fakaalofa haau ma Haana kua tupu lahi mahaki.

18. He fakakite he Salamo 18, ko e heigoa ne talahau e Tavita?

¹⁸ Mailoga e Tavita kua lagomatai e Iehova a ia. Ma e fakatai, he puipui e Tavita e tau mamoe he matua haana mai he leona mo e urosa, ne mailoga e ia ko Iehova ne lagomatai a ia ke kautū ke he tau manu favale malolō nei. He tamate e Tavita e toa malolō ko Koliato, ne kitia mitaki e ia ko Iehova ne takitaki a ia. (1 Samu. 17:37) He mogo ne hola a ia mai he patuiki mahekeheke ko Saulo, ne talahau e Tavita ko Iehova ne fakahao a ia. (Sala. 18, mataulu) Liga to matalahi e tagata fakatokoluga ha ko e tau mouaaga ia. Ka e mahani fakatokolalo a Tavita ti maeke a ia ke mailoga e lima ha Iehova he moui haana.​—Sala. 138:6.

19. Ko e heigoa ka fakaako e tautolu mai he fakafifitakiaga ha Tavita?

¹⁹ Ko e heigoa e fakaakoaga ma tautolu? Lata a tautolu ke lahi e mena ke taute he nakai ni ke ole ke he lagomatai ha Iehova. Lata a tautolu ke lali foki ke mailoga e magaaho mo e puhala kua foaki e ia ki a tautolu e lagomatai. Ka talahau fakatokolalo e tautolu e tau kūkū ha tautolu, to kitia mitaki e tautolu ko Iehova ne lagomatai a tautolu ke he tau mena ne kūkū ai a tautolu. Ti ko e tau magaaho takitaha ne kitia e tautolu e lagomatai ha Iehova ki a tautolu, to tupu malolō e fakafetuiaga ha tautolu mo ia. Ko Isaac ko e matakainaga i Fiti ne kua leva e fekafekau ki a Iehova ne logona pihia. Pehē a ia: “He liu ono ki tua ke he moui haaku, kitia e au e puhala ne lagomatai e Iehova au he mogoia ne kamata au ke fakaako e Tohi Tapu ke hoko mai ke he mogonei. Ko e fua, kua moolioli a Iehova ki a au.”

20. Ko e heigoa ka fakaako e tautolu mai he fakafetuiaga ha Tavita mo e Atua?

²⁰ Fifitaki e Tavita e tau mahani ha Iehova. Tufuga e Iehova a tautolu aki e lotomatala ke fifitaki e tau mahani Haana. (Kene. 1:26) Ko e lahi e fakaako e tautolu hagaao ke he tau mahani ha Iehova, to maeke mooli a tautolu ke fifitaki a ia. Iloa mitaki e Tavita e Matua  haana he lagi, ti maeke a ia ke fifitaki a Ia he fakafehagai mo e falu. Manamanatu ke he taha e fakafifitakiaga. Ne agahala a Tavita ki a Iehova he faivao mo Patesepa ti kelipopo e taane he fifine nei. (2 Samu. 11:1-4, 15) Ka e fifili a Iehova ke fakakite e fakaalofa noa ki a Tavita, ko e tagata ne fakakite e fakaalofa noa ke he falu. Ha kua mitaki e fakafetuiaga ha Tavita mo Iehova, ne eke a ia mo taha he tau patuiki ne ofania lahi i Isaraela mo e tokoluga hake e tuaga he kitiaaga ha Iehova ke he falu patuiki i Isaraela.​—1 Patu. 15:11; 2 Patu. 14:1-3.

21. Lagotatai mo e Efeso 4:24 mo e 5:1, ko e heigoa e tau fua he ‘fifitaki a tautolu ke he Atua’?

²¹ Ko e heigoa e fakaakoaga ma tautolu? Lata ke ‘fifitaki a tautolu ke he Atua.’ Ko e taute pihia kua nakai ni aoga ka e lagomatai foki ki a tautolu ke iloa a Ia. Ka fifitaki e tautolu e mahani he Atua, kua fakakite e tautolu ko e tau fanau haana a tautolu.​—Totou Efeso 4:24; 5:1.

22-23. Ko e heigoa ka tupu ka fakagahua e tautolu e mena kua fakaako e tautolu hagaao ki a Iehova?

²² He kitia e tautolu, fakakite e Iehova a ia ki a tautolu puhala he tau tufugatia mo e haana a Kupu ko e Tohi Tapu. Ko e tohi ofoofogia nei kua puke he tau fakafifitakiaga he tau fekafekau fakamooli he Atua ka fifitaki e tautolu, tuga a Mose mo Tavita. Taute e Iehova e vala haana. Ka ko tautolu ni ke hafagi tumau e tau mata, tau teliga, mo e tau loto ki a ia.

²³ To nakai oti e fakaako ha tautolu ki a Iehova. (Fakama. 3:11) Ko e mena ne mua, nakai ko e lahi he iloa e tautolu a ia ka ko e mena kua taute e tautolu aki e mena ne iloa e tautolu. Ka fakagahua ai e mena ne iloa e tautolu mo e lali ke fifitaki e Matua fakahele ha tautolu, to matutaki a ia ke fakatata ki a tautolu. (Iako. 4:8) Puhala he Kupu haana, talahau e ia ki a tautolu to nakai tiaki e ia a lautolu kua kumi a ia.