ONOONO nakai a koe ki a koe ko e tagata loto fakaaue? Ko e hūhū ia ke manamanatu a tautolu takitokotaha ki ai. Talahau tuai he Tohi Tapu ke he vahā ha tautolu, to tokologa ka “nakai fakaaue.” (2 Timo. 3:2) Liga feleveia a koe mo e tau tagata kua amanaki ke he falu ke taute e tau mena ma lautolu po ke age e tau mena ki a lautolu. Tuga na logona hifo a lautolu kua nakai lata ke loto fakaaue ke he tau mena ne moua e lautolu. Liga talia e koe kua nakai mitaki ke haia mo e tau tagata pihia.

Kehe ai, kua tala age ke he tau fekafekau ha Iehova: “Kia mahani foki a mutolu ke fakaaue.” ‘Kia fakaaue ke he tau mena oti kana.’ (Kolo. 3:15; 1 Tesa. 5:18) He feaki e aga fakaaue kua mitaki ma tautolu. Loga e kakano ne pihia ai.

Taha e kakano aoga lahi ma tautolu ke feaki e aga fakaaue kua lafi ke he onoonoaga mitaki hagaao ki a tautolu. Ko e tagata ne fakaaue kua liga mitaki e logonaaga hagaao ki a ia ni, mo e tagata ne moua e fakaaue kua mitaki foki e logonaaga. Ko e ha e aga fakaaue kua fakatupu e aga fiafia ia ki a tautolu mo e falu? Manamanatu ke he fakataiaga: Ka mailoga e koe kua makai e falu ke taute taha mena ma haau, nakai kia fakakite he mena ia kua aoga a koe ki a lautolu? Manamanatu a lautolu ki a koe. Ka mailoga e koe e levekiaga ia, lata ke logona e koe e mitaki hagaao ki a koe ni. Manamanatu la ke he mena ia ne tupu ki a Ruta. Fakakite e Poasa e fakamokoi ki a Ruta. Ti fiafia a Ruta ke mailoga kua fai tagata ne manamanatu ki a ia.​—Ruta 2:10-13.

Kua latatonu pauaki ke loto fakaaue ke he Atua. Manatu mooli a koe he falu magaaho ke he loga he tau mena fakaalofa fakaagaaga mo e fakatino ne foaki e Ia mo e matutaki ke foaki mai. (Teu. 8:17, 18; Gahua 14:17) Ka e he nakai manatu fakakū ke he mitaki ne foaki he Atua, kia fai magaaho ke manamanatu ke he tau monuina loga ne liligi he Atua ki a koe mo e tau fakahele haau. Ko e manamanatu fakahokulo ke he fakamokoi he Tufuga haau ka fakaholo ki mua e loto fakaaue haau ki a Ia mo e fakamalolō e fakaalofa lahi mo e loto fakaaue haana ki a koe.​—1 Ioa. 4:9.

Ka e he nakai manamanatu hokoia ke he mahani fakamokoi mo e tau monuina ha Iehova; kia fakaaue ki a ia ma e mitaki haana. (Sala. 100:4, 5) Kua talahau ai “ko e fakakite he loto fakaaue kua lafi ke he puhala aoga he fiafia he tagata.”

Taha kakano kua mitaki e fakaaue ki a koe ha kua fakamalolō ai e fakafetuiaga. Manako oti a tautolu ke logona e loto fakaaue. Ka fakaaue fakamooli a koe ke he taha tagata ke he mahani totonu, kua fetataaki lahi a mua. (Roma 16:3, 4) Lafi ki ai, ko e tau tagata loto fakaaue ne tuga ko e tau tagata ne lagomatai e falu. Mailoga e lautolu e totonu ne fakakite ki a lautolu mo e omoomoi ke liuaki e totonu ia. Ē, ko e lagomatai e falu kua takitaki ke he fiafia. Tuga ni he talahau e Iesu: “Kua mua e monuina hana ke foaki atu, ke he monuina hana ke talia mai.”​—Gahua 20:35.

Ko Robert Emmons ko e hagai takitaki he University of California ne kumikumi ke he aga fakaaue ne talahau e manatu nei, ko e aga fakaaue kua lata a tautolu ke maama kua falanaki a tautolu ke he taha mo e taha. Falu magaaho maeke a tautolu ke foaki mo e falu magaaho maeke a tautolu ke moua. Ke tumau e moui mo e ke moua e moui fiafia kua falanaki a tautolu ke he falu ke he loga e tau puhala. Ma e fakatai, liga foaki mai e lautolu e tau mena kai po ke levekiaga fakaekekafo. (1 Kori. 12:21) Ko e tagata aga fakaaue kua  kitia maali e loto fakaaue ke he mena ne taute he falu ma haana. He pihia, kua eke nakai mo mahani haau ke fakakite e aga fakaaue ke he mena ne taute he falu ma haau?

Taha kakano ke feaki e aga fakaaue kua lagomatai he loto fakaaue a koe ke hagaaki ke he tau mena mitaki ka e nakai ke he tau mena kelea. Kakano ai, to eke e manamanatuaga haau ke tuga e hakahaka. Kua lagomatai a koe ke hagaaki ke he tau mena mitaki ka e tote e hagaaki ke he tau mena nakai mitaki. Liga kitia e koe e tau mena mitaki ti nakai onoono lahi ke he tau lekua. Ko e lahi e aga fakaaue haau, to lahi e mitaki ka kitia e koe, ti lahi atu e aga fakaaue haau. He moua e onoonoaga fakaaue he moui ka lagomatai a koe ke taute e mena ne tomatoma he aposetolo ko Paulo: “Kia fiafia a mutolu ke he Iki.”​—Filipi 4:4.

To mailoga e koe to utakehe he aga fakaaue e manatu kelea. Uka kia ke aga fakaaue mo e he magaaho taha mahekeheke, momoko, po ke ita? Ko e tau tagata aga fakaaue kua fa tote e velevelekoloa. Loto fakaaue a lautolu ke he mena kua moua e lautolu mo e nakai hagaaki ke loga e mena ka moua.​—Filipi 4:12.

Ha ko e Kerisiano, mailoga e koe to manako a Satani ki a koe ke loto lolelole mo e momoko ha ko e tau mena uka kua fehagai mo koe he tau aho fakamui nei. To fiafia lahi a ia ka moua e koe e aga kelea mo e gūgū. Ko e aga pihia kua taute a koe ke uka e tau tagata ke fanogonogo ke he tala mitaki kua fakamatala e koe. Tuilima e aga fakaaue mo e fua he agaaga he Atua, putoia e fiafia ke he mitaki kua foaki he Atua ki a koe mo e tua ke he tau maveheaga oti haana.​—Kala. 5:22, 23.

He eke mo taha he tau tagata ha Iehova, liga talia e koe e mena ne talahau he vala tala nei hagaao ke he aga fakaaue. Mailoga agaia e koe, ko e aga fakaaue kua mitaki ne nakai moua noa. Ka e ua fakaatā e mena ia ke fakalolelole a koe. Maeke a koe ke feaki mo e fakatumau e onoonoaga he aga fakaaue. Puhala fe? Fakaaoga e magaaho he tau aho takitaha ke manamanatu hagaao ke he tau mena he moui haau kua maeke a koe ke loto fakaaue. Ka lahi e manamanatu haau, to mafiti a koe ke aga fakaaue. To mua atu e fiafia lahi haau ke he mena ia ki a lautolu kua hagaaki ke he tau mena uka he moui. Manamanatu ke he tau mena mitaki kua taute he Atua mo e falu ke lagaki hake a koe, ti foaki he mena ia ki a koe e fiafia. Liga maeke foki a koe ke kamata ke tohi hifo e tau mena ia. He tohi haau, fakamau e koe ua po ke tolu e mena ne taute a koe ke logona e fiafia he aho ia.

Falu ne kumikumi ke he matakupu ia ko e “fakaaue tumau to maeke ke hiki e puhala ne gahuahua e uho ulu ha tautolu ti mukamuka lahi ke logona hifo e mitaki hagaao ke he moui.” Ko e tagata aga fakaaue ko e tagata fiafia lahi. Ti totou e tau monuina haau, fiafia ke he tau mena mitaki he moui, mo e aga fakaaue tumau! He ua uta fakateaga e tau mena mitaki, “kia fakaheke [fakaaue] atu ā mutolu kia Iehova ha kua mitaki ni a ia.” Ē, ‘kia fakaaue ke he tau mena oti kana.’​—1 Nofo. 16:34; 1 Tesa. 5:18.