Maeke nakai a koe ke tali e tau hūhū nei ne fakavē ke he Ko e Kolo Toko he 2019?

Ko e heigoa e kakano he maveheaga he Atua: “Ko e tau kanavaakau oti kua taute ke tau kia koe, nakai monuina ia”? (Isaia 54:17)

Falanaki a tautolu to puipui he Atua a tautolu mai he tau malolō moumou tuga e “ita lahi ha lautolu ne favale.” (Isaia 25:4, 5) To nakai kautū e tau fī ha tautolu he fakamatematekelea tukulagi a tautolu.​—w19.01, lau 6-7.

Fakakite fēfē e fakafili tonu he fehagai e Atua mo e tau Kanana mo e tau Isaraela nakai omaoma?

Fakafili he Atua a lautolu ne mahani feuaki fakalialia po ke ekefakakelea e tau fifine mo e tau fanau. Fakamonuina e ia e tau tagata ne omaoma ki a ia mo e taute fakamitaki e falu.​—w19.02, lau 22-23.

Ko e heigoa ha tautolu ka taute ka liogi he tagata nakai ko e Fakamoli?

Maeke a tautolu ke fakanono mo e fakalilifu he nakai talahau “amene” po ke toto e tau lima he falu i ai. Talahau fakaeneene ni e tautolu ha tautolu a liogi.​—w19.03, lau 31.

Hagahaga kelea lahi fēfē e fakapilo e tama?

Ko e fakapilo e tama ko e agahala ke he tagata ne lauia he fakapilo, ke he fakapotopotoaga, ke he tau tui ne mua, mo e Atua. Ka manako e fakatufono motu ke hokotaki e tau kumikumiaga he fakapilo, lata e tau motua ke muitua ki ai.​—w19.05, lau 9-10.

Hiki po ke fakaholo ki mua fēfē e koe e manako he loto?

Tau matapatu lakaaga: Tutala ki a Iehova he liogi. Manamanatu fakahokulo ke he foliaga he hakahaka e koe a koe. Fifili fakailoilo e tau kapitiga haau.​—w19.06, lau 11.

Ko e heigoa ka taute e tautolu mogonei ke mautauteute ma e favaleaga?

Lata a tautolu ke fakamalolō e pipiaga mo Iehova. Falanaki kua fakaalofa a ia ki a tautolu mo e to nakai tiaki e ia a tautolu. Totou e Tohi Tapu he tau aho takitaha, ti liogi tumau. Kia mauokafua to fakamooli e tau monuina he Kautu. Ako manatu e tau kupu tohi ne fiafia a koe ki ai mo e tau lologo fakaheke.​—w19.07, lau 2-4.

Ko e heigoa ha tautolu ka taute ke lagomatai e tau magafaoa ha tautolu ke fakamomoui?

Aoga lahi ke fakakite e tautolu e fakaalofa hofihofi, lagomatai he mahani mitaki ha tautolu ke fakamatala, mo e fakauka mo e fakailoilo.​—w19.08, lau 15-17.

Moua fēfē e tautolu e okiokiaga, tuga ne mavehe e Iesu ia Mataio 11:28?

Ha ha mo tautolu e tau leveki Kerisiano fakaalofa, ko e tau hoa mitaki, mo e gahua mitaki lahi.​—w19.09, lau 23.

Foaki mai fēfē he Atua ki a tautolu e manako mo e malolō ke gahua? (Filipi 2:13)

He totou e tautolu e Kupu he Atua mo e manamanatu fakahokulo ki ai, fakamalolō he Atua a tautolu ti foaki mai e manako ke taute e finagalo Haana mo e malolō ke gahua. Fakaholo ki mua he agaaga haana e tau lotomatala ha tautolu.​—w19.10, lau 21.

Ko e heigoa e tau lakaaga pulotu kua lata a tautolu ke taute fakamua to taute e fifiliaga uho lahi?

Lima e lakaaga: Taute e kumikumi fakamitaki. Liogi ma e pulotu. Kumikumi ke he tau fatuakiloto haau. Kia talahau fakatonu. Kia moolioli.​—w19.11, lau 27-29.

Fai matutakiaga kia e manatu he fai vala e tagata ne moui ka mole e mate ke he mena ne tala age e Satani ki a Eva?

Nakai. Tala age a Satani ki a Eva to nakai mate ni a ia. Ko e tau manatu fakavai fakalotu ne nakai hao he hoko e Fakapukeaga. Ko e taofiaga na fai vala e tagata ne moui ka mole e mate ne liga kamata to fakamavehevehe he Atua e tau tagata ne ati e kolo ha Papelu.​—w19.12, lau 15.