Nakai. Ne nakai tala age e Tiapolo ki a Eva ka kai e ia e fua akau ne fakatapu he Atua to nakai ni mate a ia ka e fai vala e tagata ne moui ka mole e mate. He vagahau puhala he gata, pehē a Satani ka kai e Eva e fua he akau, to ‘nakai ni mate’ a Eva. Hagaao a Satani to tumau a Eva ke moua e moui fiafia he lalolagi, ko e moui ne tu kehe mai he Atua.​—Kene. 2:17; 3:3-5.

Ko e fakaakoaga fakavai kua fai vala e tagata ne moui ka mole e mate ne fakaako he vahā nei kua nakai moua mai i Etena, ti ko e magaaho fe ne tupu e mena ia? Nakai iloa tonu e tautolu. Ka e iloa e tautolu ko e tau tapuakiaga fakavai oti ne moumou he Fakapukeaga he vahā ha Noa. Nakai fai manatu fakalotu hepe ne hao he Fakapukeaga ka ko Noa ni mo e magafaoa haana, ko e tau tagata tapuaki mooli ne hao.

Ti ko e fakaakoaga foou nei kua fai vala e tagata ne moui ka mole e mate ne kamata he mole e Fakapukeaga. Magaaho ne fakakehekehe he Atua e tau vagahau i Papelu ti mavehevehe fano e tau tagata “ke he lalolagi oti,” ne uta e lautolu e tau manatu nei ka mate e tagata kua moui e taha vala he tino he taha matakavi. (Kene. 11:8, 9) Pete ni e magaaho ne kamata e talahauaga fakavai, iloa tonu e tautolu ko e “matua he pikopiko” ko Satani ko e Tiapolo i tua he talahauaga nei ti fiafia a ia ke kitia kua tupu lahi ai.​—Ioane 8:44.